1. ¿Imatataj Jesús tawa pescadoresman nerqa, chanta imatá paykuna ruwarqanku?

PEDRO, Andrés, Santiago, Juan ima, pescadosta japʼispa trabajakoj kanku. Jesustaj paykunaman nerqa: “Qhepayta jamuychej, runa japʼej pescadoresman * tukuchisqaykichej”, nispa. Paykunarí, ¿kasukorqankuchu? Biblia nin: “Chay ratopacha chʼipasninkuta saqerpayaspa, qhepanta rerqanku”, nispa (Mat. 4:18-22). Chaymantapacha kausayninkoqa niña kikinchu karqa. Imajtinchus pescadosta japʼinankumantaqa, ‘runastañataj pescadosta jina japʼinanku’ karqa (Luc. 5:10). Kay tiempopipis, Jesusqa Diosta munakoj runasman kikillantataj nin: “Qhepayta jamuychej, runa japʼej pescadoresman tukuchisqaykichej”, nispa (Mat. 28:19, 20). Bibliata estudiashanki chay, ¿Jesuspa nisqanta kasukushankiñachu?

2. 1) ¿Imaraykutaj wakin predicaj llojsiyta manchachikunku? 2) Bibliamanta yachakojkuna, ¿imatataj ruwananku tiyan predicaj llojsinankupaj?

² Bibliamanta unaytaña yachakushanki chayqa, ichapis predicaj llojsinaykiña kasqanta yachanki. Jinapis ichá predicaj riyta manchachikushanki. Ashkha predicajkunapis ajinallatataj ñaupajta manchachikorqanku. Chantapis predicaj llojseyqa mana pujllakunapajchu. Ichá qanpis chayta yachasqaykirayku manchachikushanki. Bibliaqa nin, Pedrowan compañerosninwan, “chay ratopacha” Jesuspa qhepanta risqankuta. Jinapis chayqa mana ninayanchu, mana piensarispalla chayta ruwasqankuta. Imaraykuchus Pedrowan hermanon Andreswanqa, Jesusta khuskan watata jinaña rejserqanku, Mesías kasqantataj yacharqanku (Juan 1:35-42). Ichá qanpis Jehová Diosmanta, Jesusmantawan ashkhataña yachakunki, bautizakunaykipajtaj predicaj  rinallaykiña faltasunki. Chayrayku ichapis mayta predicayta munashanki. Chaywanpis predicaj llojsinaykipajqa, sumajta piensarinayki tiyan. Qhepan parrafopi yachakusun, imachus Pedrota, Andresta, wajkunatawan chaypaj yanapasqanta.

3. ¿Imastataj Bibliamanta yachakojkuna pescadoresmanta yachakunkuman?

³ Jesuspa yachachisqasnenqa, familiankupaj trabajanankurayku pescaj kanku. Paykunaqa imaynatachus pescadosta japʼiyta sumajta yacharqanku. Chantapis wapus karqanku, sapa diataj mana qhellakuspa trabajaj kanku. Chayqa runa japʼej pescadores kanankupaj, mayta yanaparqa. Bibliamanta yachakojkunaqa, pescadoresmanta mayta yachakunkuman. Kay yachaqanapitaj paykunamanta parlarisun.

4. ¿Imajtintaj Pedro pescadosta japʼej?

⁴ Pedroqa familianpaj trabajananrayku pescadosta japʼej. Jinapis pescadota japʼiytaqa, mana uj trabajota jinallachu qhawarqa. Paymanqa chayta ruway maytasina gustaj (Juan 21:3, 9-15). Aswan qhepamantaj Pedroqa runa japʼej pescadorman tukorqa. Chayta ruwaytaj mayta gustarqa. Payqa Jehová Diospa yanapayninwan, sumajta Diosmanta willarqa (Hech. 2:14, 41).

5. 1) Lucas 5:8-11 nisqanman jina, ¿imamantataj Pedro mancharisqa kasharqa? 2) ¿Imataj yanapawasunman runa japʼej pescador kayta munanapaj?

⁵ Noqanchejqa Jehová Diosta munakusqanchejrayku paymanta willamunchej. Jinapis ichá wakin kutisqa ninchej: “Ima yachasqaytataj wajkunaman yachachimusaj”, nispa. Jinata yuyanchej chayqa, Jehová Diosta astawan munakunapaj kallpachakuna. Jesusqa Pedrota runa japʼej pescador kananpaj wajyarishajtin, payta nerqa: “Amaña mancharikuychu”, nispa (Lucas 5:8-11 leey). ¿Imamantataj Pedro mancharisqa kasharqa? ¿Jesuspa yachachisqan kaytachu  manchachikorqa? Mana. Jesusqa uj milagrota ruwaspa, Pedrota compañerosnintawan may chhika pescadosta japʼinankupaj yanaparqa. Pedrotaj chayta rikusqanrayku, mana Jesuswan khuska purinanpaj jinachu kasqanta yuyakorqa. Bibliata unaytaña estudiashanki chayqa, yachankiña Jesusta qhatiyta munajkuna imastachus ruwananku kasqanta. Jinapis ichá ninki: “Noqaqa mana kaykunata ruwayta atiymanchu”, nispa. Jina kajtin, Jehová Diosta, Jesusta, runamasinchejta ima astawan munakunaykipaj kallpachakuy. Chayqa runa japʼej pescador kayta munanaykipaj yanapasonqa (Mat. 22:37, 39; Juan 14:15).

6. ¿Imaraykutaj runasman predicanchej?

⁶ Runasman predicallanchejtaj, Jesuspa kamachisqanta kasukuyta munasqanchejrayku. Payqa kamacherqa: “Rispa, [...] runasta yachachisqasniyman tukuchimuychej”, nispa (Mat. 28:19, 20). Chantapis runasmanta khuyakusqanchejrayku predicallanchejtaj. Paykunaqa “mana michejniyoj ovejas jina” “mitharasqas, tʼaqa tʼaqallataj” kashanku. Diospa Gobiernollantaj paykunata yanapayta atinman (Mat. 9:36). Jehová Diosqa “munan tukuy laya runas salvasqa kanankuta, cheqa kajtataj allinta rejsinankuta” (1 Tim. 2:4).

7. Romanos 10:13-15 nisqanman jina, ¿imaraykutaj predicananchej kasqa?

⁷ Predicaspaqa runasta salvakunankupaj yanapasunman. Chaypi piensariytaj predicayta munanapaj yanapawasun. Runasqa pescadosta japʼinku vendenankupaj chayri mikhunankupaj. Noqanchejtajrí runasta pescadosta jina japʼinchej, paykunaj kausayninkuta salvanapaj (Romanos 10:13-15 leey; 1 Tim. 4:16).

8, 9. ¿Imatataj pescadota japʼejkuna sumajta yachananku tiyan?

⁸ Jesuspa tiemponmanta pescadoresqa, sumajta yachananku karqa ima clase pescadostachus japʼinankuta (Lev. 11:9-12). Yachanallankutaj karqa maypichus pescadosta tariyta. Imaraykuchus pescadosqa mana ima yakupipis kausallankuchu. Chantapis maypichá paykunapaj mikhuna tiyan, chaypi kanku. Pescadosta japʼejkunaqa, ima horastachus pescaj rinankutapis yachanallankutaj karqa. Chayta astawan entiendenapaj, pescayta yachaj hermanomanta parlarina. Payqa Pacífico nisqa mar kantupi tiyakun. Chay hermanoqa uj misionero hermanoman pescadota japʼej rinankuta nisqa. Misionerotaj nisqa: “Ya, qʼaya 9 de la mañanata tiempituy kanman. Chay horasta risunman”, nispa. Hermanotaj nisqa: “Chay horastaqa mana pescadota tarisunchu. Qhasillata risunman”, nispa.

⁹ Jesuspa yachachisqasnenqa, sumaj pescadores jina karqanku. Paykunaqa maypichus, ima horastatajchus runasta tarinankupi piensaj kanku. Chayman jinataj predicaj kanku. Chayrayku paykunaqa predicarqanku templopi, sinagogaspi, wasimanta wasi, mercado plazaspi ima (Hech. 5:42; 17:17; 18:4). Noqanchejpis predicanchej chay lugarpi, ima horastachus runasta tarinanchejta yachananchej tiyan. Chay horaspitaj predicaj rinanchej tiyan (1 Cor. 9:19-23).

10. ¿Ima herramientastataj Jehová Dios llajtannejta qowanchej?

¹⁰ Pescadoresqa pescado japʼina chʼipankuta, waj imasninkutawan sumajta apaykachayta yachananku tiyan. Noqanchejpis runasman yachachimunapaj herramientasniyoj kananchej tiyan. Chaykunatataj sumajta apaykachayta yachananchej tiyan. Jesusqa yachachisqasninman sumajta yachacherqa imaynatachus predicanankuta. Paykunaman nerqa imatachus apakunankuta, maypichus predicamunankutapis. Imatachus ninankutapis yachachillarqataj (Mat. 10:5-7; Luc. 10:1-11). Kay tiempopipis, Jehová Diosqa runasman yachachinapaj  sumaj herramientasta llajtannejta qowanchej. Chay herramientastaj Bibliata estudiachinapaj publicaciones sutikun. * Jehová Diostaj llajtannejta yachachiwanchej, chay publicacionesta sumajta apaykachayta. Chaytaj yanapawanchej mana manchachikuspa predicanapaj, aswan sumaj yachachejkuna kanapajtaj (2 Tim. 2:15).

11. ¿Imajtintaj runa japʼej pescadores mana manchachikojkuna kananku tiyan?

¹¹ Jatun qochapeqa, jinallamanta sinchʼita wayramoj chayri loco paras rikhurimoj. Pescadorestaj tutan astawan pescaj kanku. Chayrayku paykunaqa wapus kananku karqa, nitaj manchachikunankuchu karqa. Runa japʼej pescadorespis, ajinallataj kananchej tiyan. Predicayta qallarejtinchej, Jehovaj testigon kasqanchejta nejtinchej ima, ichá familiaresninchej churanakuwasun, amigosninchej asipayawasun, chayri runas mana uyariwasunchu. Chaytaj ‘loco para jina’ kanman. Jinapis mana chaymanta tʼukunanchejchu tiyan. Jesuspuni nerqa: “Ovejasta jina, atojkunaj chaupinkuta kachashaykichej”, nispa (Mat. 10:16).

12. Josué 1:7-9 nisqanman jina, ¿imataj yanapawasun mana manchachikoj kanapaj?

¹² ¿Imataj yanapawasunman mana manchachikoj kanapaj? Ñaupajtaqa Jesús predicacionta ñaupajman apashasqanta yuyarikuna (Juan 16:33; Apo. 14:14-16). Chantá Jehová Diosninchej ni imata faltachinawanchejmanta, ama  iskayrayanachu (Mat. 6:32-34). Jehová Diospi astawan creesun, atienekusuntaj chayqa, mana imatapis manchachikusunchu. Pedrowan compañerosninwanqa, Jesuspa qhepanta rinankupaj tukuy imankuta saqerqanku. Ajinamanta sinchʼi creeyniyoj kasqankuta rikucherqanku. Ichá qanpis familiaresniykiman, amigosniykiman ima, Bibliata estudiashasqaykita willarerqanki. Ichá paykunaman willarillarqankitaj, Jehovaj testigosninpa reunionesninkuman jamushasqaykita. Chayta ruwaspaqa creeyniyoj kasqaykita rikucherqanki. Chantapis kausayniykita cambiashanki, Jehová Diospa kamachiykunasnintataj kasukushanki. Chaypipis creeyniyoj kasqaykita, nitaj manchachikusqaykita rikuchishallankitaj. Diosta kasukunaykipaj kallpachakullankipuni chayqa, payqa qanwanpuni kanqa (Josué 1:7-9 leey).

13. ¿Imataj Bibliamanta yachakojkunata yanapanman predicaj llojsiyta mana manchachikunankupaj?

¹³ Bibliata unaytaña estudiaspapis predicaj llojsiyta manchachikunki chayqa, Jehová Diosmanta kallpata mañakuy (Hech. 4:29, 31). Payqa mañakusqaykita uyarisonqapuni, nitaj jaykʼajpis saqerparisonqachu. Jehová Diosqa qanwanpuni kanqa yanapasunanpaj. Payqa ñaupa tiempopi kamachisninta mayta yanaparqa. Qantapis ichá llakiykunapi kashajtiyki, chayri kausayniykita cambianaykipaj yanapasorqa. Chaykunapi piensareyqa mayta yanapasonqa. Imaynatachus Jehová Dios israelitasta Puka qochata pasanankupaj yanaparqa, ajinallatataj qantapis Jesuspa yachachisqanman tukunaykipaj yanapasunkiman (Éxo. 14:13). Qanpis kay salmista jina niwaj: “Tata Diosqa noqawan kashan; mana manchachikusajchu. Imanawanqataj runari?” (Sal. 118:6).

14. ¿Imatá yachakusunman hermananchej Masaemanta, hermananchej Tomoyomantawan?

¹⁴ Jehová Dios imaynatachus manchali runasta yanapasqanpi piensarina. Hermananchej Masaemanta parlarina. Payqa manchay manchiskiri karqa, yuyajtaj ni jaykʼaj predicayta atinanta. Hermana Masaeqa mana rejsisqa runaswan parlariyta, jatun perqata wichariyta jina qhawaj. ¿Imataj yanaparqa predicayta mana manchachikunanpaj? Jehová Diosta, runastapis astawan munakunanpaj kallpachakorqa. Chantá kay mundoj tukukuynin qayllitapiña kashasqanpi piensarerqa. Chaymantataj Jehová Diosmanta kallpata mañakorqa predicayta munananpaj. Ajinamanta hermananchej Masaeqa manaña manchachikorqachu, precursora regulartaj karqa. Jehová Diosqa reciellanraj predicaj llojsishanku chaykunatapis, mana manchachikunankupaj yanapallantaj. Tomoyo sutiyoj hermanamanta parlarina. Ñaupaj kutipi wasimanta wasi predicaj llojsishajtin, uj señora payman qhapariykusqa: “¡Mana testigosta uyarinaypajchu kashani!”, nispa. Chantá punkuwan uyanpi wisqʼarparisqa. Hermana Tomoyotajrí, paywan predicaj hermanaman nisqa: “Niraj imatapis nishajtiy, ñapis yacharqaña Jehovaj testigosnin kasqanchejta. Sumaj, ¿i?”, nispa. Hermananchej Tomoyoqa, kunan precursora regular.

15. ¿Imaraykutaj cristianos sumaj pescador jina kananchej tiyan?

¹⁵ Sumaj pescadorqa, ruwanasninta tukunankama ruwananpaj kallpachakun. Payqa mana qhellakuspa sapa paqarin sutʼiyayta jatarikun. Parajtinpis, wayrajtinpis, ruphajtinpis ruwanasninta juntʼanpuni. Cristianosqa chay sumaj pescador jinallataj kananchej tiyan. Ajinamanta Dios qowasqanchej llankʼayta tukunakama ruwasun (Mat. 10:22).

16. ¿Imataj yanapawasunman ruwanasninchejta juntʼanapaj?

¹⁶ Pantaj runas kasqanchejrayku, mana atikoj imasta ruwayta qhellakunchej. Chay imastataj mana munaspapis ruwanapuni tiyan. Chayrayku ruwanasninchejta juntʼanapajqa, ama  munayninchejwan atipachikunachu. Jehová Diostaj chayta ruwanapaj atiyninwan yanapawasun (Gál. 5:22, 23).

17. Kay 1 Corintios 9:25-27 nisqanman jina, ¿imatataj Pablo ruwaj ruwanasninta juntʼananpaj?

¹⁷ Apóstol Pabloqa ruwanasninta juntʼajpuni. Jinapis chayta ruwananpajqa mayta kallpachakoj. Pay nerqa: “Cuerpoyta ni imarayku munayninta ruwajta saqenichu”, nispa (1 Corintios 9:25-27 leey). Pabloqa munallarqataj cristianos ruwanasninkuta juntʼanankutapuni. Chayrayku paykunaman nerqa: “Tukuy imata allinta ruwaychej, maychus kananta jinataj”, nispa (1 Cor. 14:40). Noqanchejpis Jehová Diosta yupaychaypi ruwanasninchejta juntʼananchejpuni tiyan. Chay ruwanasninchejmanta ujtaj, Diosmanta runasman willamuy kashan (Hech. 2:46).

18. ¿Imata ruwajtinchejtaj Jehová Dios kusikonqa?

¹⁸ Pescadoresqa niyta yachanku: “Uj runa sumaj pescador kasqanqa, ashkha pescadosta japʼisqanpi yachakun”, nispa. Jinapis sumaj cristianos kasqanchejqa, mana ashkha runasta Diospa llajtanman pusamusqanchejpichu yachakun (Luc. 8:11-15). Runasman sumaj willaykunata willallasunpuni, yachachillasunpunitaj chayqa, Jehová Diosninchej kusikonqa. Imaraykuchus chayta ruwaspaqa, payta Wawantawan kasukushanchej (Mar. 13:10; Hech. 5:28, 29).

19, 20. ¿Imaraykutaj kunan tiempo usqhayllata predicananchej tiyan?

¹⁹ Wakin suyuspeqa, wakin killasllata pescadota japʼejta saqenku. Chayrayku chay killas tukukushajtinña, pescadoresqa astawan apurata pescadosta japʼinku. Noqanchejpis yachanchej, kay mundoj tukukuynin manchay qayllitapiña kashasqanta. Chayrayku usqhayllata predicamunanchej tiyan. Ajinallamanta runaspa kausayninkuta salvayta atisun. Chayrayku ama ninachu: “Kaysitulla japʼishawan. Chay allinchakojtin, predicaj llojsillasaj”, nispa (Ecl. 11:4).

²⁰ Bibliata unaytaña estudiashanki chayqa, predicayta munanaykipaj kallpachakuy, Bibliamanta astawan yachakuy, mana manchachikunaykipaj kallpachakuy, ruwanasniykita juntʼaymantaj yachaykukuy. Mundontinpeqa pusaj millones runasmanta astawanña predicashanku. Qanpis paykunaman ujchaykukuy, Diostaj kusikuyninta qosonqa (Neh. 8:10). Jehová Dios “kaykamalla” ninankama, chay sumaj llankʼaypi yanapakuy. Diospa Gobiernonmanta willashanchejña chayrí, ¿imatá ruwasunman predicayta munanallapajpuni? Qhepan yachaqanapi chayta yachakusun.