1. ¿Imaynataj qhepakunku congregacionmanta qharqochikojpa familiaresnin?

CONGREGACIONMANTA pillapis qharqochikojtenqa familiaresnin may llakisqas qhepakunku. Hermana Hildamanta parlarina. * Pay nin: “Qosaywanqa 41 watasta casados karqayku. Payqa wañupunankama Jehovata tukuy sonqo sirverqa. Noqaqa yuyarqani ni ima chay jinatapuni llakichinawanta. Jinapis waway congregacionmanta qharqochikojtin, señoranta, wawasninta ima saqerpajtenqa astawanraj llakikorqani”, nispa.

2, 3. Salmo 78:40, 41 nisqanman jina, ¿imaynataj sientekun Jehová kamachisnin paymanta karunchakojtinku?

² Jehovaqa maytachá llakikorqa ashkha ángeles paymanta karunchakojtinku (Jud. 6). Chantapis Jehovaj sonqonqa maytachá nanarqa ajllakusqan llajta kutin kutinta paypa contranpi oqharikojtinku (Salmo 78:40, 41 leey). Ujnin familiarniyki qharqochikojtenqa, munakuyniyoj Tatanchej Jehovapis mayta llakikullantaj. Payqa yachan may llakisqapuni kashasqaykita. Khuyakususqanraykutaj kallpachasonqa, yanapasonqa ima.

³ Kay yachaqanapeqa yachakusun mayqen familiarninchejpis qharqochikojtin, imatachus ruwananchej kasqanta Jehová yanapanawanchejpaj. Yachakullasuntaj imaynasmantachus yanapayta atisqanchejta qharqochikojpa familiaresninta. Chantá yachakullasuntaj mayqen familiarninchejpis qharqochikojtenqa, imatachus mana ruwanachu kasqanta.

4. ¿Imaynataj ashkha tatas sientekunku wawanku congregacionmanta qharqochikojtin?

⁴ Ashkha tatasqa munasqa wawanku congregacionmanta qharqochikojtin ninku: “¿Imaraykutaj mana wawayta yanaparqanichu Jehovata sirvinallanpajpuniri?”, nispa. Hermano Lucasqa wawan qharqochikojtin nerqa: “Noqa juchayoj kasqayta  yuyarqani. Ni puñukuytapis aterqanichu. Wakin kutisqa waqarikoj kani. Maytapuni sonqoy nanawarqa”, nispa. Hermana Elizabethpa wawanpis qharqochikullarqataj. Paytaj yuyaj, mana allin mamachu kasqanta, nitaj allintachu Jehovamanta wawanman yachachisqanta.

5. ¿Pitaj juchayoj uj runa Jehovamanta karunchakojtin?

⁵ Jehovaqa imatachus ruwayta munasqanchejta ajllakojta saqewanchej. Chayrayku sapa uj ajllakuyta atinchej Jehovata kasuytachus manachus. Wakin jovenespa tatasninkoqa mana testigoschu kanku. Jinapis chay jovenesqa ajllarqanku Jehovata sirviyta, tukuy sonqollapunitaj sirvishanku. Wakin jovenestaj Bibliaj yuyaychaykunasninman jina uywasqa karqanku. Jinapis wiñarqoytawanqa Jehovamanta karunchakorqanku. Sapa ujpuni ajllakunanchej tiyan Jehovata sirviytachus manachus (Jos. 24:15). Tatas, wawaykichej Jehovamanta karunchakojtenqa, amapuni qankuna juchayoj kasqaykichejta yuyaychejchu.

6. ¿Imaynataj uj joven sientekunman tatan chayri maman congregacionmanta qharqochikojtin?

⁶ Wakin kuteqa tata chayri mama Jehovamanta karunchakun. Ichá familianta ima saqerpan (Sal. 27:10). Chaytaj may llakiy kanman tatasninkuta jatunpaj qhawaj wawaspaj. Estherpa tatanqa congregacionmanta qharqochikorqa. Pay nin: “Sapa kuti waqaj kani. Tatayqa mana pisimanta pisichu Jehovamanta karunchakorqa. Manaqa paypuni chayta ajllarqa. Tataytaqa mayta munakuni. Chayrayku qharqochikojtin, sapa kuti imaynachus kashasqanmanta llakikorqani, mancharisqa jinallataj kasharqani”, nispa.

7. Uj jovenpa tatan chayri maman qharqochikojtin, ¿imaynatataj Jehová chay joventa qhawan?

⁷ Jóvenes tataykichej chayri mamaykichej qharqochikusqanmanta llakisqa kashankichej chayqa, noqaykupis llakikullaykutaj. Jehovaqa yachan sinchʼi llakisqa kashasqaykichejta. Payqa mayta munakusunkichej. Kusisqataj kashan tukuy sonqo sirvishallasqaykichejmantapuni. Cristiano hermanosniykichejpis mayta kusikullaykutaj. Mana qankunachu juchayoj kankichej tatasniykichej Diosta wasanchayta ajllasqankumanta. Párrafo cincopi yachakorqanchej jina, Jehovaqa payta sirviytachus manachus ajllakojta saqewanchej. Diospa kamachisnenqa ‘sapa uj imatachus ruwanankuta juntʼananku tiyan’ (Gál. 6:5).

8. Qharqochikojpa testigo familiaresnin, ¿imatá ruwankuman pay Jehovaman kutinpunankama? (“ Jehová kutinpunaykita munan” nisqa recuadrota leeriy).

⁸ Qharqochikojpa familiaresnenqa pay Jehovaman kutinpunanta suyakunku. Ujnin familiarniyki qharqosqa kashan chay, ¿imatá ruwawaj Jehovaman kutinpunankama? Kallpachakullaypuni creeyniyki sinchʼi kananpaj. Ajinamanta familiaykita sumajta yanapanki, ichá qharqosqa kajtapis. Chantá llakisqa, sonqo nanasqa kaspapis aguantayta atillanki. Qhawarina, imastachus ruwayta atisqaykita creeypi sinchʼi sayasqallapuni kanaykipaj.

9. ¿Imataj yanapasunkiman sinchʼi creeyniyojllapuni kanaykipaj? (“ Ujnin familiarniyki qharqochikojtin kay textos yanapasunkiman” nisqa recuadrota qhawariy).

⁹ Kallpachakullaypuni creeyniyki sinchʼi kananpaj. Jehovaj qayllanpi kanaykipaj, familiaykitapis yanapanaykipaj kallpachakullaypuni. Chaypajtaj sapa día Bibliata leeriy,  leerisqaykipi tʼukuriy, reunionesmanpis ama faltakuychu. Juanamanta parlarina. Paypa tatanwan hermananwanqa congregacionmanta qharqochikorqanku. Pay nin: “Bibliapi Abigailmanta, Estermanta, Jobmanta, Josemanta, Jesusmanta ima leejteyqa sonqoy tiyaykun. Paykunaj kausayninmanta leespaqa allin imaspi yuyani. Chaytaj yanapawan mana anchata sonqoy nananawanpaj. Broadcastingmanta takiykunapis mayta kallpachawan”, nispa.

10. Salmo 32:6-8 nisqanman jina, ¿imatá ruwasunman sinchʼi llakisqa kashaspa?

¹⁰ Jehovaman willakuy imaschus llakichisusqanta. Sinchʼi llakisqa kashaspaqa Diosmanta mañakuy. Munakuyniyoj Tatanchejmanta mañarikuy, pay jina yuyanaykipaj yanapasunanta. Paytaj ‘yachachisonqa, yuyaychasonqataj mayqen ñantachus rinaykita’ (Salmo 32:6-8 leey). Ichá mana atillankichu Jehovaman willariyta imaynapunichus kashasqaykita. Jinapis payqa sumajta entiendesunki. Jehovaqa mayta munakusunki, paymantaj llakiyniykita willakunaykita munan (Éxo. 34:6; Sal. 62:7, 8).

11. Hebreos 12:11 nisqanman jina, ¿imaraykutaj Jehová juchallikoj runata congregacionmanta qharqochin? (“ Jehovaqa munakuyninta rikuchin juchallikojta qharqochispa” nisqa recuadrota leeriy).

¹¹ Congregacionmanta pillapis qharqochikojtin ama ancianospaj rimanachu. Jehová juchallikojta qharqochisqanqa allinninchejpaj, juchallikojpa allinninpajpis (Hebreos 12:11 leey). Ichapis wakenqa ninkuman, juchallikojta ancianos qharqospa, pantaykusqankuta. Jinapis paykunaqa ichá mana parlanqankuchu juchallikoj mana allin imasta ruwasqanmanta. Chantapis imaraykupunichus juchallikoj qharqochikusqanmantaqa mana tukuy imatachu yachanchej. Ancianosqa kallpachakorqanku Bibliaj nisqanman jinapuni juchallikojta juzganankupaj, Jehovaj sutinpitaj juzgarqanku  (2 Cró. 19:6). Chayrayku paykunaj juzgasqankupi atienekuna.

12. ¿Imaynatataj wakin hermanosta yanaparqa Jehovata kasukusqanku familiarninku qharqochikojtin?

¹² Juchallikoj familiarniyki qharqochikojtin, mana ancianospa juzgasqankuman churanakunkichu chayqa, ichá yanapanki pay Jehovaman kutinpunanpaj. Hermana Elizabethmanta párrafo cuatropi parlarerqanchej. Pay nin: “Wawayku qharqochikusqantawanqa, niña paywan parlarqaykuchu. Chaymantataj maytapuni sonqoy nanawarqa pay wiñay tukusqaña kajtinpis. Jinapis payqa Jehovaman kutinpuytawan niwarqayku ancianosqa payta qharqospa mana pantasqankuta. Aswan qhepamantaj niwarqayku allin imasta yachakusqanta. Ajinamanta repararqani Jehová juchallikojta qharqochisqanqa allinpuni kasqanta”, nispa. Hermana Elizabethpa qosanqa Marcos sutikun. Paypis nillantaj: “Watas pasasqanmantaj wawayku niwarqayku, pay Jehovaman kutinpusqanta Jehovata kasukusqaykurayku. Maytapuni Jehovata agradecekuni payta kasukunaykupaj yanapawasqaykumanta”, nispa.

13. ¿Imataj yanapasunkiman llakiyniykita atipanaykipaj?

¹³ Sumaj amigosniykiwan parlariy. Experienciayoj hermanoswan karinaykipaj astawan tiempochakuy. Paykunaqa yanapasonqanku qharqosqa familiarniyki Jehovaman kutinpunanta suyakunallaykipajpuni (Pro. 12:25; 17:17). Hermana Juanamanta párrafo nuevepi parlarerqanchej. Pay nin: “Maytapuni sapayakorqani. Jinapis sumaj amigoswan parlareyqa maytapuni yanapawarqa”, nispa. Jinapis uj hermano kallpacharisuyta munaspa sonqoykita astawan nanachisojtin, ¿imatá ruwawaj? Chayta qhepan parrafopi qhawarina.

14. ¿Imaraykutaj purajmanta aguantanakunallapuni, tukuy sonqotaj perdonanakunallapuni tiyan?

¹⁴ Hermanoswan pacienciakuna. Mana suyasunmanchu hermanos imatachus uyariyta munasqanchejtapuni ninawanchejta (Sant. 3:2). Tukuy pantaj runas kanchej. Chayrayku ama tʼukuychu pipis ni imaynamanta sonqochayta atisojtin chayri mana munashaspalla sonqoykita nanarpachisojtin. Apóstol Pablo nerqa: “Wajkuna contraykichejpi imata ruwajtinkupis, ujkuna ujkunawan aguantanakullaychejpuni, tukuy sonqotaj perdonanakuychej. Imaynatachus Jehová Dios qankunata tukuy sonqo perdonasorqachej, ajinallatataj qankunapis perdonanakuychej”, nispa (Col. 3:13). Amapuni chayta qonqaychu. Uj hermanaj ujnin familiarnin qharqosqa kashan. Paytaj nin: “Hermanosqa kallpachariyta munawaspa sonqollayta nanachiwaj kanku. Jehovaqa paykunata perdonanaypaj yanapawarqa”, nispa. Qhepan parrafospi yachakusun imaynatachus qharqochikojpa familiaresninta yanapayta atisqanchejta.

15. ¿Imaynatá yanapasunman kunallanraj qharqochikojpa familiaresninta?

¹⁵ Qharqochikojpa familiaresninwan kʼachas kana, paykunatataj munakuna. Hermana Miriamqa hermanon qharqochikusqantawan reunionesman riyta tumpata manchachikorqa. Pay nin: “Manchachikoj kani  wajkuna imatapis parlanankumanta. Jinapis sumaj amigosneyqa llakisqa kasharqanku, nitaj hermanoymanta ima sajratapis parlarqankuchu. Chayrayku mana sapayakorqanichu”, nispa. Waj hermanataj nin: “Wawayku congregacionmanta qharqochikojtin hermanosqa sonqochawarqayku, wakintaj ni ima niyta atiwasqaykuta niwarqayku. Wajkunataj noqawan khuska waqarikorqanku chayri cartitasta apachimuwarqanku. Chayta ruwasqankutaj maytapuni yanapawarqa”, nispa.

16. ¿Imaynatataj congregacionmanta qharqochikojpa familiaresninta yanapallasunmanpuni?

¹⁶ Qharqochikojpa familiaresninta yanapanallapuni. Paykunaqa mayta necesitanku munakunanchejta, kallpacharinanchejta ima (Heb. 10:24, 25). Wakin kutisqa, qharqochikojpa familiaresnin repararqanku wakin hermanos niña paykunawan parlayta munasqankuta, paykunapis qharqosqa kashankuman jina. Amapuni noqanchejqa chayta ruwanachu. Qharqosqa tatasniyoj jovenesqa, maytapuni necesitanku kallpachananchejta, “allinta ruwashanki” ninanchejtataj. Hermana Mariamanta parlarina, paypa qosanqa congregacionmanta qharqochikorqa, familiantataj saqerparqa. Pay nin: “Qosay qharqochikojtenqa wakin amigosniy wasiyman jamorqanku, waykʼuripuwarqanku, wawasniymantaj Bibliamanta yachachinaypaj yanapawarqanku. Paykunaqa llakisqa kasharqanku, noqawan khuskataj waqarikorqanku. Waj runas noqamanta llulla imasta parlajtinkutaj, paykunaqa noqaman sayakuwarqanku. Chaytaj maytapuni kallpachawarqa”, nispa (Rom. 12:13, 15).

17. ¿Imatataj ancianos ruwankuman llakisqa kajkunata sonqochanankupaj?

¹⁷ Ancianos, kallpachakuychej qharqochikojpa familiaresninta yanaparinaykichejpaj. Jehovaqa churasunkichej chay qharqochikojpa familiaresninta sonqochanaykichejpaj (1 Tes. 5:14). Chay hermanostaqa niraj reunión qallarishajtin chayri reunión pasayta kallpachariychej. Paykunata visitariychej, orapuychejtaj. Chantapis paykunawan predicawajchej, wakin kutistaj familiapi Diosta yupaychayniykichejman invitariwajchej. Ancianosqa Jehovaj llakisqa ovejitasninta khuyakunanku, munakunanku, yanapananku ima tiyan (1 Tes. 2:7, 8).

18. 2 Pedro 3:9 nisqanman jina, ¿imatataj munan Jehová paymanta karunchakojkuna ruwanankuta?

¹⁸ Jehovaqa “mana munanchu ni pi chinkachisqa kananta. Astawanqa munan tukuy pesachikunankuta” (2 Pedro 3:9 leey). Uj runa jatun juchapi urmajtinpis, Jehovaqa kausayninta may valorniyojllapajpuni qhawan. Payqa sapa ujninchejta, munasqa Wawanpa kausayninwan rantiwarqanchej. Jehová Diosqa paymanta karunchakojkunata munakuywan yanapayta munan payman kutinpunankupaj. Suyashantaj payman kutinpunankutapuni. Chaytataj yachanchej chinkasqa qhari wawamanta Jesús kikinchasqanpi (Luc. 15:11-32). Qharqochikoj hermanosmanta ashkhasqa, munakuyniyoj Tatanku Jehovaman kutinporqanku. Congregacionmanta hermanostaj tukuy sonqo japʼikaporqanku. Hermana Elizabethpis maytapuni kusikorqa wawan congregacionman kutinpojtin. Pay nin: “Ashkha hermanosqa maytapuni kallpachawarqayku wawayku Jehová Diosman kutinpunanta suyakunallaykupajpuni. Paykunata mayta agredecekuni”, nispa.

19. ¿Imaraykutaj Jehová atienekunapaj jinapuni?

¹⁹ Jehová Diosqa atienekunapaj jinapuni. Payqa allinninchejpajpuni imatapis ruwananchejta niwanchej. Chantapis kʼacha Tata, khuyakuyniyojtaj. Payta munakojkunata, yupaychajkunatataj mayta munakun. Jehovaqa nipuni saqerpariwasunchu sinchʼi llakiykunapi kashajtinchej (Heb. 13:5, 6). Hermano Marcosmanta párrafo docepi parlarerqanchej. Pay nin: “Jehovaqa ni jaykʼaj saqerpariwarqaykuchu. Sinchʼi llakiykunapi kashajtinchejtaj payqa noqanchejwanpuni kashan”, nispa. Jehovaqa ‘may sumaj atiyta’ qollawasunpuni (2 Cor. 4:7). Arí, mayqen familiarninchej congregacionmanta qharqochikojtinpis, atisunman sinchʼi sayasqallapuni kayta, kutinpunantataj suyakuyta.