1, 2. ¿Imayna kanapajtaj Jehová ruwawarqanchej?

 JEHOVAQA ruwawarqanchej aswan kusisqa kanapaj wajkunaman qorispa, qorichikunamanta nisqaqa (Hech. 20:35). Pillapis uj regalota qowajtinchejqa kusirikunchejpuni. Jinapis noqanchej wajkunapaj imatapis ruwapunchej chayqa, aswan kusisqaraj kanchej. Jehová ajinata ruwawasqanchejqa allinnillanchejpajtaj. ¿Imarayku?

² Jehová ajinata ruwawasqanchejrayku, noqanchejmanta kashan aswan kusisqas kanaqa. Noqanchej tukuy imaynamanta wajkunata yanapariyta maskʼasun chayqa, aswan kusisqas kasun. Ajina kanapaj ruwasqa kasqanchejqa may sumajpuni, ¿icharí? (Sal. 139:14).

3. ¿Imaraykutaj Biblia nin Jehová ‘kusikuyniyoj Dios’ kasqanta?

³ Bibliaqa niwanchej qorikuyta yachajkunaqa kusisqas kasqankuta. Chayrayku Jehovapis ‘kusikuyniyoj Dios’ (1 Tim. 1:11). Pay ñaupajta tukuy imata qorqa, nitaj pipis paymanta astawan qonchu. Apóstol Pablo nerqa jina, “paynejta kausanchej, kuyunchej, kanchejtaj” (Hech. 17:28). Chantapis “tukuy ima allin kaj regaloqa, aswan sumaj regalopis” Jehovamanta jamun (Sant. 1:17).

4. ¿Imataj aswan kusisqas kananchejpaj yanapawasunman?

⁴ ¿Imatá ruwasunman wajkunaman qorispa aswan kusisqa kananchejpaj? Kay yachaqanapi yachakusun jina, Jehová jina qorikuyta yachananchej tiyan (Efe. 5:1). Yachakullasuntaj imatachus ruwananchejta wajkunaman qorejtinchej mana agradecekuwasqanchejta yuyaspa. Ajinamanta wajkunaman  kusiywan qorikullasunpuni, aswan kusisqastaj kasunchej.

JEHOVÁ JINA QORIKUYTA YACHANA

5. ¿Imastataj Jehová qowanchej?

⁵ Jehovaqa ashkha imaynasmanta rikuchin qorikuyta yachasqanta. Wakinta qhawarina. Payqa necesitasqanchej imasta qowanchej. Ichapis mana tukuy ima munasqanchejpunichu kapuwasunman. Chaywanpis Jehovaqa imatachus necesitasqanchejta qowanchejpuni: mikhunata, ropata, wasitapis (Sal. 4:8; Mat. 6:31-33; 1 Tim. 6:6-8). Chay tukuy imasta, ¿obligasqa jinallachu qowanchej? Mana. Qhawarina imaraykuchus qowasqanchejta.

6. ¿Imatá yachachiwanchej Mateo 6:25, 26?

⁶ Jehová imastachus necesitasqanchejta munakuwasqanchejrayku qowanchej. Imatachus Jesús Mateo 6:25, 26 (leey) versiculospi niwasqanchejta qhawarina. Kay versiculospi Jesusqa pʼisqosmanta parlaspa nerqa: “Mana tarpunkuchu, nitaj ruthunkuchu, nillataj pirwaspipis jallchʼankuchu”, nispa. Chantataj nerqa: “Cielopi kaj Tataykichejtaj paykunata mikhuchin”, nispa. Chayta niytawantaj tapurerqa: “¿Manachu qankunaqa aswan valorniyojraj kankichej chay pʼisqosmanta nisqaqa?”, nispa. Chaywan Jesusqa nisharqa Jehovapajqa pʼisqosmanta nisqaqa kamachisnin aswan valorniyojraj kasqanchejta. Sichus Jehová paykunata cuidan chayqa, noqanchejtaqa astawanraj cuidawasun. Jehovaqa Tatanchej kasqanrayku mayta munakuwanchej, imatachus necesitasqanchejtataj qowanchej (Sal. 145:16; Mat. 6:32).

7. ¿Imaynatá Jehová jina qorikuyta yachasunman? (Fotostawan qhawariy).

⁷ Jehová jina wajkunata munakunchej. Chayraykutaj atisqanchejman jina kapuwasqanchejwan yanaparinchej. Ichapis yachanchej uj hermano mikhunata chayri ropata necesitashasqanta. Ajina kajtenqa, Jehová noqanchejmanta valekunman payta yanaparinanpaj. Kaymanta jinalla imapis pasajtin, Jehovaj kamachisnenqa chay rato yanapanakunchej, chaytataj wajkuna sutʼita reparanku. Ajina karqa coronavirus onqoy kashajtin. Wakin hermanosqa necesitajkunaman qorqanku mikhunata, ropata, waj imastawan. Chantapis ashkha hermanosqa qolqesitunkumanta churarqanku jallpʼantinpi willakunanpaj. Chay qolqewantaj yanapata necesitaj hermanosta jallpʼantinpi yanapakorqa. Chayta ruwaspataj Hebreos 13:16  nisqanman jina ruwarqanku. Chaypi nin: “Amataj qonqaychejchu allin kajta ruwayta, kapuyniykichejmanta wajkunaman qoriytapis. Chay ruwaykunaqa uj jaywana jina kanku, Diostataj mayta kusichin”, nispa.

8. Jehová kallpata qowasqanchejrayku, ¿imatá ruwayta atinchej? (Filipenses 2:13).

⁸ Jehová kallpata qowanchej. Atiynenqa mana tukukuyniyoj, chay atiynintataj tukuy sonqo kamachisninman qon (Filipenses 2:13 leey). Ichapis Jehovamanta kallpata mañakorqanchej juchapi mana urmanapaj, uj jatun pruebata aguantanapaj, chayri sapa día ruwananchejta ruwanapaj. Jehová kallpata qowajtinchejtaj apóstol Pablo jinachá sientekorqanchej. Pay nerqa: “Tukuy imapaj kallpayoj kani, Dios atiyta qowasqanrayku”, nispa (Fili. 4:13).

9. ¿Imaynatá Jehová jina wajkunata yanaparisunman? (Fototawan qhawariy).

⁹ Noqanchejqa mana Jehová jina wajkunaman kallpanchejta qoyta atisunmanchu. Jinapis Jehová jina ruwasunman kallpanchejwan wajkunata yanaparispa. Sichus uj hermanito machituña, chayri onqosqeta kashan chayqa, imatachus necesitasqanta rantinpusunman chayri wasinpi ruwanasninta ruwaysisunman. Atinchej chayqa, Tantakuna Wasita llimphuchaypi chayri allinchaypi yanapakusunman. Chay imasta ruwanapaj kallpanchejta churaspaqa hermanosninchejta mayta yanapasunman.

10. ¿Imaynatá parlasqanchejwan wajkunata kallpachasunman?

¹⁰ Kayta ama qonqanachu. Parlasqanchejwanpis wajkunata kallpachariyta atisunman. ¿Yachanchejchu pillapis kallpacharinata chayri sonqocharinata necesitashasqanta? Jina kajtenqa chayta ruwanapaj kallpachakusunman. Ichapis payta waturej risunman, telefononejta wajyarisunman chayri uj mensajeta manachayrí tarjetitata apachisunman. Ichapis mana yachanchejchu imatachus ninanchejta, jinapis tukuy sonqo imitallatapis nisun chayqa, mayta yanapanqa. Uj mashkha simillata nisqanchej yanapanman Jehovata tukuy sonqo kasukunallanpajpuni chayri watejmanta kallpata japʼinanpaj (Pro. 12:25; Efe. 4:29).

11. ¿Imatá Jehová ruwan yachayninwan?

¹¹ Jehová yachayta qowanchej. Santiagoqa nerqa: “Sichus qankunamanta pillapis pisi yachayniyoj chayqa, Diosmanta mañakullachunpuni”, nispa. Chantá nerqa: “Diosqa tukuyman mana michʼakuspa qon, mana rimaspallataj”, nispa (Sant. 1:5). Kay versículo nin jina, Jehovaqa yachayninta mana payllapajchu  waqaychakun, astawanpis mana michʼakuspa wajkunaman qon. Chantapis ‘mana rimaspalla’, mana thutuspalla chay yachayninta qowanchej. Payqa ni jaykʼaj kʼamiwasunmanchu yachayninta mañakojtinchej (Pro. 2:1-6).

12. ¿Imaynasmantataj yachasqanchejta wajkunaman yachachisunman?

¹² Noqanchejrí, ¿imatachus yachasqanchejta Jehová jina wajkunaman yachachisunmanchu? (Sal. 32:8). Arí, ashkha imaynasmanta chayta ruwasunman. Mosojllaraj kajkunata predicayta yachachisunman. Ancianospis siervos ministerialesta, waj bautizasqa hermanostawan pacienciawan yachachinkuman congregacionpi ruwanasninkuta ruwayta. Wakin hermanostaj sumajta yachanku Tantakuna Wasista ruwayta, mantenimientota ruwaytapis, chay yachasqankuta waj hermanosman yachachispataj yanapakunku.

13. ¿Imaynatá Jehová jina ruwasunman wajkunata yachachishaspa?

¹³ Wajkunata yachachishaspa Jehová jina ruwananchej tiyan. Yachakunchej jina, payqa mana michʼakuspa yachayninta qowanchej. Noqanchejpis yachasqanchejta wajkunaman sumajta yachachinchej, nitaj noqallanchejpajchu japʼikunchej. Mana yuyananchejchu tiyan tukuy imata yachachejtinchej ruwayninchejta qhechunawanchejta. Nillataj ninanchejchu tiyan: “Sapanmanta yachachun á, noqataqa ni pi yachachiwarqachu”, nispa. Jehovaj llajtanpeqa chay jina yuyay mana kananchu tiyan. Imatachus yachasqanchejta wajkunaman tukuy sonqo yachachinchej. Chantapis tukuy atisqanchejta kallpachakunchej sumajta yachachinapaj (1 Tes. 2:8). “Ajinamanta paykunapis sumaj wakichisqa kanqanku wajkunaman yachachinankupaj” (2 Tim. 2:1, 2). Yachachisqanchejta mana michʼakuspa wajkunaman yachachisun chayqa, tukuy aswan kusisqas kasun, aswan yachayniyojtaj.

RUWASQANCHEJMANTA MANA AGRADECEKUWAJTINCHEJ

14. Wajkunapaj imatapis ruwapojtinchej, ¿imatataj paykuna ruwayta yachanku?

¹⁴ Imitatapis wajkunapaj chayri hermanosninchejpaj ruwapojtinchej, ashkha kutisqa mayta agradecekuwanchej. Ichapis agradecekuwasqanchejrayku uj tarjetitata qowasunman, chayri waj jinamanta agradecekuwasunman (Col. 3:15). Chaytaj astawanraj kusichiwanchej.

15. ¿Imatá yuyarikunanchej tiyan wajkuna mana agradecekuwajtinchej?

¹⁵ Chaywanpis mana tukuypunichu agradecekuwasunman imatachus ruwapusqanchejmanta. Ichapis pita yanaparinapaj tiempochakunchej, kallpachakunchej, kapuyninchejtapis churanchej. Paytaj chay ruwasqanchejmanta mana agradecekullawanchejpischu. Jina kajtin, ¿imataj yanapawasunman kusisqallapuni kananchejpaj, nitaj phiñakunapaj? Yuyarikuna kay yachaqanapaj textota: Hechos 20:35 versiculota. Wajkunaman qorispa kusikusqanchejqa mana agradecekunawanchejmantachu kashan. Noqanchejmanta kashan wajkunaman qorispa kusisqa kayqa, agradecekuwajtinchejpis manapis. Chayrayku wakin yuyaychaykunata qhawarina.

16. ¿Imatá yuyarikunanchej tiyan?

¹⁶ Qospaqa Jehová jina ruwashasqanchejta yuyarikuna. Jehovaqa allin imasta runasman qon agradecekojtinkupis manapis (Mat. 5:43-48). Jehovaqa kamachisninta nin: “Allin kajta ruwapullaychejpuni, ama imata suyaspa [...]. Ajinamanta tʼinkaykichejqa jatun kanqa”, nispa (Luc. 6:35). Chayrayku wajkuna mana agradecekuwajtinchejqa ama  llakikunachu. Jehovaqa wajkunapaj allin imasta ruwapusqanchejmanta kutichipuwasunpuni, “kusiywan” chayta ruwasqanchejrayku (Pro. 19:17; 2 Cor. 9:7).

17. ¿Imataj yanapawasunman Jehová jina ruwanapaj? (Lucas 14:12-14).

¹⁷ Lucas 14:12-14 (leey) versículos yanapallawasunmantaj Jehová jina ruwanapaj. Piskunachus noqanchejta invitallawasunmantaj, chayri piskunachus noqanchejwan kʼachasllataj kankuman chaykunata invitayqa mana juchachu. Chaywanpis ichá sonqonchejpi reparasunman imata ruwapunawanchejraykulla paykunata invitashasqanchejta. Jina kajtin, Jesús nisqanman jina ruwanapaj kallpachakuna. Piskunachus mana kutichipuyta atiwanchejchu chaykunawan kʼachas kana. Chayta ruwasun chayqa, kusisqas kasun Jehová jina ruwashasqanchejrayku. Chantapis mana imata suyaspalla wajkunaman qosun chayqa, kusiywanpuni qorikuyta yachasun mana agradecekuwajtinchejpis.

18. ¿Imataj yanapawasunman wajkunamanta mana sajrata yuyanapaj?

¹⁸ Ama wajkunamanta sajrata yuyanachu (1 Cor. 13:7). Wajkunapaj imatapis ruwajtinchej, manataj agradecekuwajtinchejqa, kayta tapurikusunman: “¿Malagradecidochu kanman, chayri agradecekullawaytachu qonqapunman karqa?”, nispa. Ichapis waj imasrayku mana yuyasqanchejman jinapunichu agradecekuwasunman. Wakenqa may agradecesqas kashaspapis, ichá mana agradecekuyta atillankumanchu. Ichapis wakenqa yanaparisqanchejmanta pʼenqakunkuman, astawanraj paykuna ñaupajta wajkunata yanaparej kanku chayqa, kunantaj manaña chayta ruwayta atisqankurayku. Imayna kajtinpis, munakusqanchejrayku hermanosninchejmanta mana sajrata yuyasunchu, kusiyllawanpunitaj qorikuyta yachasun (Efe. 4:2).

19, 20. ¿Imaraykutaj pacienciakunanchej tiyan? (Fotostawan qhawariy).

¹⁹ Pacienciakuna. Yachayniyoj rey Salomonqa  qorikuymanta kayta nerqa: “Tʼantaykita yakuman choqallay, ashkha diasninmantaj tarikapullanki”, nispa (Ecl. 11:1). Chay nisqanmanta yachakunchej ichapis wakin runasqa ‘ashkha diasninmanraj’ agradecekunawanchejta. Uj experienciamanta parlarina.

²⁰ Unay watasña, congregacionesta waturejpa señoran uj kʼachitu tarjetitata reciellanraj bautizakoj hermanaman jaywarqa. Chaypitaj nerqa Jehovata sirvinallanpajpuni kallpachakunanta. Chay hermanataj pusaj watasninmanraj uj cartata apacherqa agradecekunanpaj. Chay cartapitaj nerqa: “Kay cartapi niyta munayki ashkha watastaña mana yachaspalla mayta yanapawasqaykita”, nispa. Chantá nillarqataj: “Qowarqanki chay tarjetitaqa may kʼachitupuni karqa. Jinapis astawan yanapawarqa chaypi anotasqayki texto. Chayqa sonqoymanpuni chayarqa, ni jaykʼajtaj qonqakorqanichu”, nispa. a Ima llakiykunapichus rikukusqanta willaytawan nerqa: “Wakin kuteqa tukuy imata saqepuyta munarqani: Jehovata, ruwanasniyta, tukuy imatapuni. Kay textotaj yuyaynillaypipuni kasharqa, ñaupajllamanpuni rinaypajtaj yanapawarqa. Kay pusaj watastaña chay textopuni mayta yanapawan”, nispa. Congregacionesta waturejpa señoranqa chay cartata leeytawan ima kusisqachus kasharqapis. Sichus noqanchejpis imallatapis wajkunapaj ruwaporqanchej chayqa, ichapis ‘ashkha diasninmanraj’ agradecekuwasunman.

21. ¿Imaraykutaj Jehová jina qorikuyta yachanapaj kallpachakunallapuni tiyan?

²¹ Yachakorqanchej jina, Jehovaqa ruwawarqanchej wajkunaman qorispa aswan kusisqa kanapaj, qorichikunamanta nisqaqa. Hermanosninchejta yanaparispa mayta kusikunchej, agradecekunawanchejtataj munanchej. Jinapis agradecekuwajtinchejpis manapis kusisqas kanchej, allinta ruwasqanchejrayku. Wajkunaman imata qojtinchejpis, Jehovaqa chaymanta nisqa ‘astawanraj qowasunman’ (2 Cró. 25:9). Ni pi Jehová jina qoyta atisunmanchu. Jehovaj bendicionnin jinataj ni ima kusichiwasunmanchu. Chayrayku kallpachakunallapuni Tatanchej Jehová jina qorikuyta yachanapaj.