1. ¿Imatá Jesús tumpamantawan ruwanqa?

 TUKUKUY tiempopi kausakushanchej. Pisimantawan Jesusqa kay jallpʼapi tukuy kausakojkunata juzganqa. Payqa nerqa chay juicio qayllaykamushajtinña imachus kananta, chaytaj uj ‘señal’ kanan karqa ‘kay mundoj imasninpa tukukuyninmanta’ (Mat. 24:3). Chay profeciataj kashan Mateo 24, 25 capitulospi, Marcos 13 capitulopi, Lucas 21 capitulopiwan.

2. ¿Imamantataj kay yachaqanapi parlarisunchej, chanta imapajtaj chay yanapawasun?

² Jesusqa wakichisqa kananchejpaj kinsa kikinchaykunamanta parlarqa: ovejasmanta, cabrasmantawan, chunka doncellasmanta, talentosmantawan. Chay kikinchaykunataj entiendechiwanchej juzgashaspa imatachus Jesús sapa runapi qhawananta. Kay yachaqanapi chay kikinchaykunamanta parlarisun, imatachus yachachiwasqanchejmantapis. Ñaupajtaqa parlarinachej ovejasmanta, cabrasmantawan.

OVEJASWAN CABRASWAN

3. ¿Maykʼajtaj Jesús runasta juzganqa?

³ Jesusqa yachacherqa sapa runata juzgashaspa qhawarinanta sumaj willaykunata japʼikusqantachus manachus, ajllasqa hermanosnintapis yanapasqantachus manachus (Mat. 25:31-46). ¿Maykʼajtaj Jesús nenqa uj runa ovejawanchus chayri cabrawanchus ninakusqanta? “Manchay ñakʼariy” tiempopi, Armagedón qallarinanpajña kashajtin (Mat. 24:21). Imaynatachus uj michejqa ovejasta cabrasmanta tʼaqan, ajinallatataj Jesuspis ajllasqa cristianosta tukuy sonqo yanapajkunata tʼaqanqa mana yanapajkunamanta.

4. Isaías 11:3, 4 nisqanman jina, ¿imaraykutaj ninchej Jesús runaspaj cheqan justiciata ruwananta? (Dibujostawan qhawariy).

 ⁴ Jehovaqa Jesusta churarqa Juez kananpaj, Bibliataj niwanchej Jesusqa cheqan justiciata ruwananta (Isaías 11:3, 4 leey). Chaypajtaj sapa runapi qhawan imatachus ruwasqanta, imatachus yuyasqanta, imatachus nisqanta, ajllasqa hermanosnintapis yanapasqantachus manachus (Mat. 12:36, 37; 25:40). Payqa yachanqa pikunachus ajllasqa cristianosta yanapasqankuta, llankʼayninkupipis ruwaysikusqankuta. a Ajllasqa cristianostaqa runasman willaspa astawan yanapanchej. Paykunata yanapajkunaqa cheqan runaspaj qhawasqas kanqanku, kay jallpʼapitaj wiñaypaj kausakuyta atenqanku (Mat. 25:46; Apo. 7:16, 17). Chayqa sumaj bendicionpuni. Manchay ñakʼariy tiempopi, chay tiempo pasaytapis Jehovata tukuy sonqo kasukullanqankupuni chayqa, sutisninkoqa “kausay libropi” qhelqasqa qhepakonqa (Apo. 20:15).

5. ¿Imatataj yachakunchej ovejasmanta, cabrasmantawan kikinchaymanta, chanta pikunataj chaymanta yachakullankumantaj?

⁵ Tukuy sonqo kasukusqanchejta rikuchina. Ovejasmanta, cabrasmantawan kikinchayqa, astawanqa kay jallpʼapi wiñaypaj kausakuyta suyakojkunapaj kashan. Paykunaqa tukuy sonqo kasukusqankuta rikuchinku Cristoj hermanosninta willaypi yanapakuspa, chantá allin kamachi yuyayniyojta kasukuspa, pikunatachus Jesús ajllakorqa chaykunata (Mat. 24:45). Ajinapis cieloman ripuyta suyakojkunaqa, chay kikinchaymanta mayta yachakullankumantaj. Jesusqa sumajta qhawamushan imatachus ruwasqankuta, imatachus yuyasqankuta, imatachus nisqankutapis. Chayrayku paykunapis tukuy sonqo kasukusqankuta rikuchinanku tiyan. Jesustaj iskay kikinchaykunamantawan Mateo 25 capitulopi parlarqa. Chay kikinchaykunataj ajllasqa cristianospaj kashan. Qallarinapaj chunka doncellasmanta parlarina.

CHUNKA DONCELLAS

6. ¿Imaynatataj phishqa doncellas yuyayniyoj kasqankuta rikucherqanku? (Mateo 25:6-10).

⁶ Jesusqa chunka doncellasmanta parlarqa, nerqataj noviota taripaj llojsisqankuta (Mat. 25:1-4). Paykunaqa tukuyninku noviowan khuska casamiento wasiman yaykuyta munarqanku. Jesusqa nerqa phishqa doncellas yuyayniyoj kasqankuta, phishqataj mana yuyayniyoj. Yuyayniyoj doncellasqa wakichisqas, rijchʼarisqastaj kasharqanku. Paykunaqa novio chayamunankamapuni suyayta munarqanku, allin tutaña chayamunan kajtinpis. Chayrayku aceiteyoj mecherosta apakorqanku tuta kʼanchakunankupaj. Chantapis waj yuruspi aceiteta apakullarqankutaj, novio chayamunankama mecherosninkupi mana aceite tukukapunanpaj, sigataj kʼanchananpaj (Mateo 25:6-10 leey). Novio chayamojtintaj, yuyayniyoj doncellasqa noviowan khuska casamiento wasiman yaykorqanku. Ajinallataj kanqa ajllasqa cristianoswanpis: Pikunachus novio chayamunankama, nisunman Jesús chayamunankama, tukuy sonqo kasukullanqankupuni, rijchʼarisqastaj kanqanku chaykunaqa, paywan khuska Gobiernonman yaykonqanku (Apo. 7:1-3). b Chanta, ¿imataj karqa mana yuyayniyoj doncellaswan?

7. ¿Imataj karqa phishqa mana yuyayniyoj doncellaswan, chanta imaraykutaj?

⁷ Phishqa mana yuyayniyoj doncellastajrí,  mana wakichisqaschu kasharqanku novio chayamushajtin. Paykunaqa novio chayamushasqantaña uyarisparaj, cuentata qokorqanku mecherosninku wañupunanpajña kashasqanta. Mecherosninkuman yapanankupaj aceiteta mana apakusqankurayku, rantejraj rinanku karqa, novio chayamunanpajtaj niraj chayamusharqankuchu. “Wakichisqa doncellastaj noviowan khuska casamiento wasiman yaykusqanku, punkutaj wisqʼakusqa” (Mat. 25:10). Chay qhepataraj mana yuyayniyoj doncellasqa kutimuspa casamiento wasiman yaykuyta munarqanku. Noviotajrí paykunata nerqa: “Qankunataqa mana rejsiykichejchu”, nispa (Mat. 25:11, 12). Paykunaqa mana wakichikorqankuchu noviota chayamunankama suyanankupaj. ¿Imatataj chay kikinchaymanta ajllasqa cristianos yachakunkuman?

8, 9. ¿Imatataj ajllasqa cristianos chunka doncellasmanta yachakunkuman? (Fotostawan qhawariy).

⁸ Wakichisqas, rijchʼarisqastaj kasqanchejta rikuchina. Jesusqa mana nisharqachu iskay grupo ajllasqa cristianos kanankuta: Ujnin grupo tukukuykama suyanankupaj wakichisqa kanankuta, ujnintaj mana. Astawanpis Jesusqa ajllasqa cristianosman sutʼinchasharqa tukukuykama aguantanankupaj mana wakichisqachu kajtinku, tʼinkankuta mana japʼinankuta (Juan 14:3, 4). Chayrayku cielopi chayri kay jallpʼapi kausakuyta suyakuspapis, tukuyninchej chay chunka doncellasmanta yachakusunman. Sapa ujninchej tukukuykama aguantananchejpaj rijchʼarisqas, wakichisqastaj kananchej tiyan (Mat. 24:13).

⁹ Chunka doncellasmanta kikinchaywan, Jesusqa reparachiwanchej wakichisqaspuni, rijchʼarisqaspunitaj kananchej kasqanta. Chaymanta Jesusqa talentosmantañataj parlarqa, chaywantaj yachacherqa mana qhellaschu kana kasqanta.

TALENTOS

10. ¿Imaynatataj iskay kamachis allin kamachis kasqankuta rikucherqanku? (Mateo 25:19-23).

¹⁰ Jesusqa chay kikinchaypi iskay allin kamachismanta, uj mana allin kamachimantawan  parlarqa (Mat. 25:14-18). Patronninkoqa niraj karu llajtaman ripushaspa paykunaman talentosta qorqa, nisunman ashkha qolqeta. Iskay kamachisqa sumaj trabajadores karqanku, kallpachakorqankutaj patronninkoj qolqenta mirachinankupaj. Patronninku kutimunanpajqa chay japʼisqankuta uj jinatawan miracherqanku. Patronninkutaj paykunata felicitaspa sapa ujninkuta nerqa: “Noqawan khuska kusikuy”, nispa (Mateo 25:19-23 leey). Chay ujnin kamachirí, ¿imatataj ruwarqa japʼisqan qolqewan?

11. ¿Imataj karqa “qhella” kamachiwan, chanta imaraykutaj?

¹¹ Patronqa chay ujnin kamachiman uj talentota qorqa, paypis chayta mirachinanpaj. Chay kamachitaj “qhella” kasqanrayku, pampata allaytawan chayman chay qolqeta pʼampaykorqa. Patronnin kutimojtintaj chay qolqellanta kutichiporqa. Qolqenta mana mirachisqanmanta perdonta mañakunanmantaqa, patronnintaraj nerqa “sajra” kasqanta. Ajinamanta rikucherqa paymá sajra sonqo kasqanta. Chayrayku patronnenqa payta kʼamerqa, talentonta qhechukaporqa, wasinmantataj wijchʼorqa (Mat. 25:24, 26-30).

12. ¿Pikunawantaj ninakun iskay allin kamachis?

¹² Chay iskay allin kamachisqa kasukoj ajllasqa cristianoswan ninakunku, Jesustaj patronwan ninakun. Paytaj sapa ujninkuman nin: “Noqawan khuska kusikuy”, nispa. Chayqa kausariytawan cieloman ripusqankuwan ninakun, chaymin ñaupaj kaj kausarimoyqa (Mat. 25:21, 23; Apo. 20:5 qallariynin). Qhella kamachimanta parlaspataj, Jesusqa ajllasqa cristianosta nisharqa sumajta qhawarikunankuta. Imajtinchus chayta nisqanta qhawarina.

13, 14. ¿Imatataj ajllasqa cristianos yachakunkuman talentos kikinchaymanta? (Fotostawan qhawariy).

¹³ Ama qhellaschu kana. Talentosmanta kikinchaywanqa Jesús mana nisharqachu ajllasqa cristianos qhellasman tukunankuta. Astawanpis chunka doncellasmanta kikinchaypi jinallataj sumajta qhawarikunankuta nisharqa. Paykunaman sutʼinchasharqa maykʼajllapis qhellasman tukojtinku, imachus paykunawan kananta. “Wajyasqas, ajllasqastaj” kasqankoqa qhasilla kanman karqa, nitaj  Diospa Gobiernonman yaykuyta atinkumanchu karqa (2 Ped. 1:10).

¹⁴ Jesusqa chunka doncellasmanta, talentosmanta kikinchaykunawan sutʼincharqa tukuy ajllasqa cristianosqa sumaj wakichisqas, rijchʼarisqas kananku kasqanta, nitaj qhellaschu. Jinapis Jesusqa mana chayllatachu ajllasqa cristianosman nerqa, imastawanchus nisqanqa Mateo 24:40, 41 versiculospi kashan. Chay versiculosta ukhuncharina.

¿PITAJ “APASQA” KANQA?

15, 16. Mateo 24:40, 41 nisqanman jina, ¿imaraykutaj ajllasqa cristianos rijchʼarisqasllapuni kananku tiyan?

¹⁵ Jesusqa manaraj chay kinsa kikinchaykunamanta parlashaspa, ajllasqa cristianos juzgasqa kanankumanta parlarqa. Chaypitaj yachakunman karqa pikunachus ajllasqaspuni kasqankuta. Payqa nerqa iskay runas chajrapi trabajashasqankuta, iskay warmistaj maki molinowan jakʼushasqankuta. Iskaynin qharispis iskaynin warmispis kikin trabajollata ruwaspa jinasharqanku. Chaywanpis Jesusqa nerqa: “Ujnin apasqa kanqa, ujnintaj saqerpasqa kanqa”, nispa (Mateo 24:40, 41 leey). Qhepan versiculopitaj Jesusqa discipulosninta nerqa: “Rijchʼarisqallapuni kaychej, mana yachankichejchu ima pʼunchaychus Señorniykichej jamunanta”, nispa (Mat. 24:42). Jesusqa chayman rijchʼakojllatataj nerqa chunka doncellasmanta parlaytawan (Mat. 25:13). Chayrayku iskaynin kutispi chayta nispaqa uj imallamantasina parlasharqa: Ajllasqaspuni kajkunallata, tukukuykamataj tukuy sonqo kasukojkunallata Diospa Gobiernonman Jesús ‘apananmanta’ (Juan 14:3).

¹⁶ Rijchʼarisqa kasqanchejta rikuchina. Sichus uj ajllasqa cristiano mana rijchʼarisqallapunichu kanqa chayqa, mana ujnin ‘ajllasqaswan’ tantasqachu kanqa (Mat. 24:31). Kay jallpʼapi kausakuyta suyakojkunapis, Jesuspa nisqanta kasukunallankutaj tiyan. Paykunaqa tukuy sonqo kasukuspa rijchʼarisqasllapuni kananku tiyan.

17. ¿Imaraykutaj mana llakikunchejchu Jehová kay qhepa wataspi wakin kasukoj kamachisninta ajllasqanmanta?

¹⁷ Noqanchejqa Jehovata sumajta rejsinchej, chayrayku imatachus ruwasaj nisqanpi tukuy sonqo atienekunchej. Manataj llakikunchejchu Jehová kay qhepa wataspi wakin kasukoj kamachisninta ajllasqanmanta. c Chayqa yuyarichiwanchej Jesús uva huertapi trabajajkunamanta parlasqanta. Chay trabajajkunamanta wakenqa tarde horasllataña minkʼasqa karqanku (Mat. 20:1-16). Chaywanpis tutamantapacha llankʼajkuna jinallataj kikin pagota japʼerqanku. Ajinallataj kanqa tukuy sonqo kasukoj ajllasqa cristianoswanpis. Paykunaqa tukuyninku cieloman riponqanku ima tiempopi ajllasqa kajtinkupis.

SUMAJTA QHAWARIKUNATA NIWASQANCHEJTA KASUKUNA

18, 19. ¿Imastataj kay yachaqanapi yachakorqanchej?

¹⁸ ¿Imastataj kay yachaqanapi yachakorqanchej? Ovejasmanta, cabrasmantawan kikinchaypeqa yachakorqanchej kay jallpʼapi wiñaypaj kausakuyta suyakojkuna kay tiempopi, manchay ñakʼariy tiempopipis tukuy sonqo kasukunallankupuni kasqanta. Manchay ñakʼariy tiempo chayamojtintaj, Jesusqa nenqa pikunachus “wiñay kausayta” japʼinankupaj jina kasqankuta (Mat. 25:46).

¹⁹ Chantapis ajllasqa cristianospaj iskay kikinchaykunamanta yachakorqanchej. Chunka doncellasmanta phishqaqa wakichisqas, rijchʼarisqastaj karqanku. Paykunaqa yuyayniyoj, sumaj wakichisqastaj karqanku noviota chayamunankama suyanankupaj. Phishqa  doncellastaj mana yuyayniyojchu karqanku, nitaj wakichisqachu kasharqanku. Chayrayku novioqa mana casamiento wasiman yaykunankuta saqerqachu. ¿Imatá chaymanta yachakunchej? Wakichisqas kananchej kasqanta, Jesús tukukuy pʼunchayta apamunankama suyayta atinanchejpaj. Talentosmanta kikinchaypitaj yachakorqanchej iskay kamachisqa sumaj trabajajkuna kasqankuta. Paykunaqa allin kamachis kasqankurayku, mayta kallpachakorqanku patronninkoj qolqenta mirachinankupaj. Chayrayku patronninkoqa paykunata allinpaj qhawarqa, qhella kamachitataj jawaman wijchʼorqanku. ¿Imatá chaymanta yachakunchej? Jehovata tukukuykama tukuy sonqo sirvinanchej kasqanta. Chantapis yachakullarqanchejtaj ajllasqa cristianosqa tukukuykama rijchʼarisqasllapuni kananku kasqanta Diospa Gobiernonman apasqa kanankupaj. Paykunaqa tukuy sonqowan suyakushanku Jesuswan khuska cielopi ‘tantakonqanku’ chay pʼunchay chayamunanta. Armagedón maqanakuy pasaytataj Jesuspa novian kanqanku, paywantaj casarakonqanku. Chaytaj kanqa ‘Corderoj casamienton’ (2 Tes. 2:1; Apo. 19:9).

20. Jesuspa nisqanta kasukojtinchej, ¿imatataj Jehová ruwanqa?

²⁰ Pisi tiempollaña faltan Jesús runasta juzgananpaj, nitaj chayta manchachikunanchejchu tiyan. Sichus munakuyniyoj Tatanchejta tukuy sonqo kasukusunchej chayqa, payqa ‘sumaj atiyta’ qowasunchej Jesuspa ‘ñaupaqenpi sayayta atinanchejpaj’ (2 Cor. 4:7; Luc. 21:36). Chayrayku cielopi chayri kay jallpʼapi kausakuyta suyakuspapis, imamantachus Jesús kikinchaykunasninpi sumajta qhawarikunata niwasqanchejta kasukuna. Sichus chayta ruwasun chayqa, Tatanchej Jehová allinpaj qhawawasun, jatun khuyakuyninraykutaj sutinchejqa ‘kausay libropi’ qhelqasqa kanqa (Dan. 12:1; Apo. 3:5).