Señorpa Cenanta Jesús ñaupaj kutirayku ruwashajtin 70 discipulosnin mana paywanchu kasqankurayku, mana nisunmanchu paykuna Jesusta saqerparisqankuta, chayri niña Jesús paykunata allinpajchu qhawasqanta. Jesusqa chay kutipi apostolesnillanwan kayta munarqa.

Jesusqa 12 apostolesninta, 70 discipulosnintapis allinpaj qhawarqa. Payqa tukuynin discipulosninmanta 12 runastaraj ñaupajta ajllarqa, paykunatataj apóstoles nispa suticharqa (Luc. 6:12-16). Jesusqa Galileapi kasharqa “12 apostolesninta” wajyashaspa. “Chantá paykunata kacharqa Diospa Gobiernonmanta willamunankupaj, onqosqastapis sanoyachimunankupaj” (Luc. 9:1-6). Chaymantataj aswan sur ladoman rerqa, Judeaman. Chaypitaj “70 runastañataj ajllarqa. Paykunataqa iskaymanta iskay kacharqa, ñaupaqenta rinankupaj” (Luc. 9:51; 10:1). Chayrayku Jesuspa discipulosnenqa tukuynejpi karqanku, paymanta predicanankupaj.

Jesuspa discipulosninman tukoj judiosqa sapa wata Pascuata ruwajpuni kanku, ichapis familiasninkuwan khuska (Éxo. 12:6-11, 17-20). Jesusqa wañupunanpaj pisi tiempollaña faltashajtin, apostolesninwan Jerusalenman rerqa. Chaywanpis Jesusqa mana Judeapi, Galileapi, Pereapi kaj tukuynin discipulosnintachu nerqa paywan khuska Pascuata ruwanankuta. Jesusqa apostolesnillanwansina chay kutipi kayta munarqa. Chayrayku paykunata nerqa: “Maytapuni munarqani qankunawan kay Pascuata mikhuyta, manaraj ñakʼarishaspa”, nispa (Luc. 22:15).

Chanta, ¿imaraykutaj chay kutipi apostolesnillanwan kayta munarqa? Jesusqa pisimantawan, ‘Diospa Corderon jina’ wañunan karqa, “kay mundomanta juchata” chinkachinanpaj (Juan 1:29). Payqa Jerusalenpi wañunan karqa, unay tiempomantapachaña chaypi Diosman uywa wañuchisqasta jaywasqankurayku. Pascua corderoqa israelitasta yuyarichej Jehová Egiptomanta kacharichisqanta. Jesuspa wañuynintaj chay corderomanta aswan sumajraj karqa, tukuy runasta juchamanta, wañuymantawan kacharichinan kasqanrayku (1 Cor. 5:7, 8). Jesuspa wañuyninrayku, 12 apostolesqa cristiana congregacionpa cimienton partellataj kananku karqa (Efe. 2:20-22). Santo llajta Jerusalenqa “12 cimiento rumisniyoj”, chaykunapitaj qhelqasqa kashan “12 sutis, Corderoj 12 apostolesninpa sutisninku” (Apo. 21:10-14). Chayrayku kasukoj apostolesqa Diospa munaynin juntʼakunanpaj mayta yanapakunanku karqa. Chaynejta Jesusqa apostolesnillanwan kayta munarqa qhepa kaj Pascuata ruwananpaj, chantá Señorpa Cenanta rikhurichinanpaj.

70 discipuloswan, waj discipulosninwan imaqa mana chay kutipi Jesuswanchu karqanku. Chaywanpis Señorpa Cenanqa tukuynin kasukoj discipulosninta yanapananpaj karqa. ¿Imarayku? Tukuynin chay discipulosnin ajllasqa cristianosman tukuspa Gobiernopaj tratoman yaykunanku kasqanrayku. Chay tratotataj Jesusqa chay chʼisi apostolesninwan ruwarqa (Luc. 22:29, 30).