HERMANANCHEJ Dianamanta parlarina. Payqa 80 kurajniyojña. Qosanqa Alzheimer nisqa onqoywan onqoykusqa, nisunman yuyayninta chinkachisqa. Chantapis qosanqa wañupunankama awelitosta qhawanku chay wasipi tiyakusqa. Iskaynin wawasninpis wañupusqanku, paytaj cancerwan onqoykusqa. Chay jinapi rikukuspapis, hermananchej Dianaqa kusisqallapuni. Congregacionninmanta hermanospis ninku: “Predicacionpi, reunionespipis kusisqallatapuni rikuyku”, nispa.

Hermanonchej Johnmantañataj parlarina. Payqa 43 watas kurajta congregacionesta waturispa sirvisqa. Chaywanpis chay ruwananta saqepusqa ujnin familiarninta cuidananrayku. May chhika hermanostaj paymanta ninku: “Johntaqa sapa kuti asambleapi kusisqallatapuni rikuyku”, nispa.

Hermananchej Dianawan, hermanonchej Johnwanqa ashkha problemaspi rikukuspapis kusisqallapuni karqanku. Bibliaqa willawanchej imajtinchus paykuna kusisqallapuni kasqankuta. Biblia nin: “Cheqan runaqa Diospi kusikonqa”, nispa (Sal. 64:10). Kunantaj qhawarinachej imaynatachus cheqan runa kaspa Diospi kusikunata. Qhawarinallataj imaschus llakichiwasqanchejta.

Casarakuspa, wawayoj kaspa chayri Diospa llajtanpi uj ruwanata japʼispaqa mayta kusikunchej. Jehová Diosqa chay imasta ruwaspa kusirikunapaj ruwawarqanchej. Chayrayku casarakuyta, wawasniyoj kaytapis atinchej. Chantapis llajtanpi ashkha ruwanasta qowanchej (Gén. 2:18, 22; Sal. 127:3; 1 Tim. 3:1).

Chaywanpis wakin imasqa llakichiwasunman. Ichapis llakikusunman qosanchej chayri warminchej wañupojtin chayri wasanchawajtinchej (Eze. 24:18; Ose. 3:1). Chantapis llakikullasunmantaj wawasninchej mana uyariwajtinchej chayri juchachakuspa congregacionmanta qharqochikojtinku. Profeta Samuelpis maytachá llakikorqa wawasnin mana Jehová Diosta kusichisqankumanta. Rey Davidpa familiaresninpis mayta sufrerqanku David Betsabewan khuchichakusqanrayku (1 Sam. 8:1-3; 2 Sam. 12:11). Chay jina problemasqa mayta llakichiwasunman.

 Llakikullasunmantaj wakin ruwanasta saqepojtinchej. Ichapis Diospa llajtanpi wakin ruwanasninchejta saqenanchej kanqa, onqoykusqanchejrayku, familiaresninchejta qhawananchejrayku chayri Diospa llajtanpi cambios kasqanrayku. Ruwanasninkuta saqepoj hermanosmanta wakenqa, chay ruwanasninkuta saqepusqankumanta llakikusqankuta ninku.

Wakin imas chayri wakin ruwaykunaqa uj ratollata kusichiwasunman. Chaywanpis uj ima tiyan kusisqallapuni kanapaj. Chayraykuchá Samuelwan Davidwan wajkunapiwan, imapi rikukuspapis kusisqallapuni karqanku.

Jesusqa niraj kay Jallpʼaman jamushaspa kusisqa cielopi tiyakorqa. Chayrayku Biblia nin ‘tukuy rato Diospa ñaupaqenpi kusisqa’ kasqanta (Pro. 8:30). Jinapis Jesusqa kay Jallpʼapi kashaspa wakin kutis jatuchaj problemaspi rikukorqa. Ajina problemaspi rikukuspapis Jehová Diospa munayninta ruwasqanrayku kusisqallapuni karqa (Juan 4:34). Bibliaqa willawanchej imachus Jesusta yanapasqanta wañuchisqa kashajtin aguantananpaj. Biblia nin: “Payqa ñaupaqenman churasqa karqa chay kusiyrayku, kʼaspipi wañuchisqa kayta aguantarqa mana pʼenqakuspa”, nispa (Heb. 12:2). Kunantaj qhawarinachej imatachus Jesús nisqanta kusisqallapuni kanamanta.

Uj kutipi Jesusqa, 70 yachachisqasninta ashkha lugaresman kacharqa predicamunankupaj. Yachachisqasnintaj predicacionmanta kusisqas kutimorqanku ashkha milagrosta ruwasqankurayku, supaykunatapis qharqosqankurayku. Jesustaj paykunaman nerqa: “Ama kusikuychejchu supaykuna kasusojtiykichejqa, astawanpis kusikuychej cielopi sutiykichej qhelqasqa kasqanmanta”, nispa (Luc. 10:1-9, 17, 20). Diospa llajtanpi uj ruwanata japʼispaqa mayta kusikunchej. Chaywanpis kusisqallapuni kanapajqa Diospa ñaupaqenpi allinpaj qhawasqa kananchej tiyan.

Uj kutipi Jesús ashkha runasman yachachishajtin, runas ukhumanta uj warmi qhaparimorqa: “Maytachá kusikun wijsanpi apasorqa, ñuñuchisorqataj chay warmeqa”, nispa. Jesustajrí kuticherqa: “Diospa palabranta uyarispa kasukojkunamin aswan kusisqaqa kanku”, nispa (Luc. 11:27, 28). Tatasqa mayta kusikunku wawasninku kasukojtinku, kʼachastaj kajtinku.  Chaywanpis tatas kusisqallapuni kanankupajqa, Jehová Diosta kasukunanku tiyan, paymantaj qayllaykunanku tiyan.

Reparanchej jina kusisqallapuni kanapajqa, Jehová Diospa ñaupaqenpi allinpaj qhawasqa kananchej tiyan. Ajinallamanta problemaspi rikukuspapis kusisqallapuni kayta atisunchej. “Chantapis llakiykunapi kaspa kusikunachej. Imaraykuchus yachanchej, llakiykunaqa sinchʼita sayanapaj yanapawasqanchejta” (Rom. 5:3-5). Jehová Diosqa paypi confiajkunaman atiyninta qon. Diospa atiyninta japʼejkunataj kusisqas kanku (Gál. 5:22). Chantachá Biblia niwanchej: “Cheqan runaqa Diospi kusikonqa”, nispa (Sal. 64:10).

Chaykunata yachaspaqa, reparanchej hermananchej Dianawan hermanonchej Johnwanqa, Diospa ñaupaqenpi allinpaj qhawasqa kasqankurayku imapi rikukuspapis kusisqallapuni kasqankuta. Hermananchej Diana nin: “Jehová Diospi tukuy sonqo atienekorqani, imaynatachus uj wawita tatanpi atienekun, ajinata. Reparanitaj kusisqallapuni predicanaypaj Jehová Dios yanapawasqanta”, nispa. Hermanonchej Johntaj imachus kusisqallapuni kananpaj yanapasqanmanta nin: “1998 watapi Escuela de Entrenamiento Ministerial nisqapi instructor jina sirviyta qallarerqani. Chaypajtaj ni jaykʼaj jina Bibliata astawan estudiarqani. Imatachus yachakusqaytaj congregacionesta waturiyta saqepojtiy, mayta yanapawarqa kusisqallapuni predicanaypaj. Señoraywanqa nej kayku: ‘Imatachá Jehová Dios ruwananchejta niwasun, chayta ruwasun’, nispa. Chayrayku wakin ruwanasniykuta saqepuyta atillarqayku, nitaj imamantapis pesachikorqaykuchu”, nispa.

May chhika hermanosqa, repararqanku Salmo 64:10 nisqanman jina cheqan runa kaspa kusisqallapuni kayta atisqankuta. Uj qhariwarmimanta parlarina. Paykunaqa Estados Unidos Betelpi 30 watas kurajtaña sirvisharqanku. Jinallapi precursores especiales jina uj congregacionman kachasqa karqanku. Paykunataj ninku: “Diospa llajtanpi uj ruwanata saqespaqa llakikunchejpuni. Pero mana llakisqallapuni kasunmanchu”, nispa. Paykunaqa precursores especiales jina uj congregacionman chayaspa hermanoswan predicamorqankupacha. Paykuna nillankutaj: “Jehová Diospa yanapayninta tukuy imapaj mañakoj kayku. Paytaj yanapawarqaykupuni. Chaytaj mayta kusichiwarqayku, kallpachawarqaykutaj. Mosoj congregacionniykumanta wakin hermanos mayta kusichillawarqaykutaj precursores jina sirviyta qallarispa. Chantapis iskay estudiosniyku mayta kusichillawarqaykutaj, congregacionpi sumajta ñauparispa”, nispa.

Kusisqallapuni kanapajqa mayta kallpachakunanchej tiyan. Wakin kutisqa imapis llakichiwasunpuni. Chaywanpis Jehová Diosqa Salmo 64:10 versiculopi niwanchej kusisqa kayta atisqanchejta. Cheqan runas kasunchej chayqa, Jehová Diostapis kasukusunchej chayqa, imapi rikukuspapis kusisqallapuni kasunchej. Tukuypis mayta suyakushanchej ‘mosoj cielota, mosoj pachatawan’. Tukuy ima mosojyajtenqa manaña juchasapaschu kasunchej. Ajinamantataj “maytapuni wiñaypaj” kusikusunchej (Isa. 65:17, 18).

Paraisopeqa manaña onqosunchu, kallpanchejpis manaña pisiyanqachu. Yuyayninchejpis mosojyachisqa kanqa, niñataj ima llakiymantapis yuyarikusunchu. Jehová Dios niwanchej: “Chay ñawpaj kajkunaqa qonqasqa kanqa, manapunitaj yuyarisqachu kanqa”, nispa. Jehová Dios wañusqasta kausarichimojtenqa, familiaresninchejwan tinkukapuyta atisunchej. Wañusqasta kausarimojta rikuspaqa maytapunichá kusikusunchej, imaynatachus 12 watayoj sipasitata Jesús kausarichejtin tatasnin maytapuni kusikorqanku, ajinata (Mar. 5:42). Paraisopeqa tukuypis cheqan runas kasunchej, Jehová Diospitaj wiñaypaj kusikusunchej.