1, 2. ¿Pillataj jovenesta sumajta yuyaychanman? (Patapi kaj fotosta qhawariy).

PROFESORESWAN, waj runaswanqa jovenesman tukuy imata yuyaychanku. Ichapis ninkuman qhapajyanankupaj profesionales kanankuta. Chaywanpis Jehová Diosqa jovenesman mana runas jinachu yuyaychan. Diosqa munan sumaj estudiantes kanankuta, colegiota tukuytawan trabajoyoj kanankupaj (Col. 3:23). Chantapis Jehová Diosqa munan yuyaychaykunasninman jina imatapis ruwanankuta. Chayrayku jovenesta Bibliawan yuyaychan kay qhepa pʼunchaykunapi payta kusichinankupaj (Mat. 24:14).

² Chantapis jovenesqa mana qonqanankuchu tiyan Jehová Dios tukuy imata yachasqanta. Diosqa yachan imachus aswan qhepaman kananta, maykʼajchus kay mundoj imasninpa tukukuynin chayamunantapis (Isa. 46:10; Mat. 24:3, 36). Chantapis Jehová Diosqa jovenesta sumajta rejsin. Payqa yachan imaschus jovenesta kusichinanta, imastajchus llakichinanta. Runasqa imatapis yuyaychallawasunman, chaywanpis chaykunaqa mana allinninchejpajchu kanman. Imaraykuchus runasqa mana Bibliaman jinachu yuyaychawanchej (Pro. 19:21).

3, 4. ¿Adanwan Evawan Satanasta kasusqankurayku kusisqachu kashanchej?

³ Satanasqa qallariymantapacha runasta mana allinta yuyaychaspa pantacherqa. Payqa Evaman nerqa: ‘Kusisqa kausakunaykichejpajqa mana Diostapunichu kasukunaykichej tiyan’, nispa (Gén. 3:1-6). Chaywanpis Satanasqa payllapi yuyasharqa. Satanasqa ni imata runasrayku ruwaspapis, munarqa Adanwan Evawan mirayninwan ima, payta kasukunankuta, yupaychanankutataj, Diosta yupaychanankumantaqa. Jehová Diostajrí tukuy imata runasrayku ruwarqa. Diosqa Adanman Evata yanapananpaj qorqa, paykunatataj uj kʼachitu huertaman churarqa, chaypitaj mana viejoyaspa wiñay wiñaypaj tiyakunankupaj.

⁴ Chaywanpis Adanwan Evawanqa mana Diosta kasukorqankuchu. Jinamantataj Diosmanta karunchakorqanku, chaymantataj viejoyaspa wañuporqanku, imaynatachus uj kʼuturpasqa tʼikita qawirpapuspa chʼakipun, ajinata. Chaynejta noqanchejpis sufrishanchej (Rom. 5:12). May chhika runasqa mana Diosta kasukunkuchu, munaynillankutataj ruwanku (Efe. 2:1-3). Chaynejtachá Biblia nin: “Tata Diospa contrampeqa mana yachayqa kanchu”, nispa (Pro. 21:30).

5. ¿Imatataj Jehová Dios yacharqa Adanwan Evawan mana kasukojtinkupis?

⁵ Adanwan Evawan mana kasukojtinkupis, Jehová Diosqa yacharqa wakin runas, jovenespis payman qayllaykuspa yupaychanankuta (Sal. 103:17, 18; 110:3). Diosqa payman qayllaykoj jovenesta mayta munakun. Chayrayku chay jovenesman ‘allin imasta’ qon kusisqa kanankupaj (Salmo 103:5 leey; Pro. 10:22). Chay allin imasmantataj qhepan parrafospi parlarisunchej. Parlarisunchej ima yanapastachus Dios qowasqanchejmanta, sumaj amigosta qowasqanchejmanta, Diosman astawan qayllaykunapaj imastachus ruwanamanta, kacharichisqa kanamantawan.

6. 1) ¿Diosmanta yachakuyta necesitanchejchu? 2) ¿Imatataj Dios qowanchej paymanta yachakunapaj?

⁶ Animalesqa mana necesitankuchu Diosmanta yachakuyta. Runastajrí necesitanchej Diosmanta yachakuyta (Mat. 4:4). Diosta kasukuspaqa yuyayniyoj, yachayniyoj, kusisqastaj kasunchej. Jesús nerqa: “Kusisqa kanku Diosmanta yachakuyta munasqankuta reparakojkunaqa”, nispa (Mat. 5:3). Jehová Diosqa paymanta yachakunapaj, creeyninchejtapis astawan sinchʼiyachinapaj Bibliata qowarqanchej. Chantapis ‘allin kamachi yuyayniyojnejta’ publicacionesta, videosta, grabacionesta, waj imastawan qowanchej (Mat. 24:45). Chaykunataj yanapawanchej creeypi sinchʼita sayanapaj, Diospa qayllallanpipunitaj kanapaj (Isa. 65:13, 14).

7. ¿Bibliata publicacionestawan estudiay jovenesta yanapanmanchu?

⁷ Bibliata, publicacionestawan jóvenes estudiajtinkoqa, sumaj yachayniyoj kanqanku, tanteaytapis atenqanku. Ajinamantataj mana imatapis ruwarpallanqankuchu (Proverbios 2:10-14 leey). Chantapis wajkuna mana “Dios kanchu” nejtinku chayri “qhapaj kaspaqa kusisqa kanki” nejtinku mana creeykullanqankuchu. Manallataj sajra munayninkuwan atipachikonqankuchu, nitaj ima viciopipis urmanqankuchu. Chayrayku jovenesqa yachayniyoj kanankupaj, tanteayta atinankupaj ima, kallpachakunanku tiyan. Ajinamanta jovenesqa reparanqanku Dios paykunata munakusqanta, nisqasninpis allinninkupaj kasqanta (Sal. 34:8; Isa. 48:17, 18).

8. ¿Imaraykutaj jóvenes kunan Jehová Diosman qayllaykunanku kashan?

⁸ Tumpitamantawanqa kay sajra mundoj  imasnin tukuchisqa kanqa. Tukuchisqa kashajtintaj Jehová Dioslla salvawasunchej, tukuy ima necesitasqanchejtataj qowasunchej, mana mikhuna kapuwajtinchejpis mikhunata qowasunchej (Hab. 3:2, 12-19). Chayrayku kunan tiempo kashan jóvenes Diosman qayllaykunankupaj, paypitaj tukuy sonqo confianankupaj (2 Ped. 2:9). Ajinata ruwajtinkoqa ni imamanta manchachikuspa David jina nenqanku: “Tata Diospipuni yuyani; pay pañaypi kajtin, mana imapis urmachiwanqachu”, nispa (Sal. 16:8).

9. 1) Juan 6:44 nisqanman jina, ¿imatataj Jehová Dios ruwan? 2) ¿Hermanosta rejsiy mana Testigosta rejsiy jinachu kasqa?

⁹ Mana Testigo runasta por primera vez rejsishaspaqa, ichapis sutillankuta yachanchej chayri rijchʼaynillankuta. Chaywanpis hermanosta por primera vez rejsishaspaqa, yachanchej paykuna Jehová Diosta munakusqankuta, llampʼu sonqo kasqankuraykutaj Diosninchej llajtanman pusamusqanta (Juan 6:44 leey). Hermanosninchejmantaqa casi tukuy imata yachanchej maymanta kajtinkupis, waj culturayoj kajtinkupis. Paykunapis noqanchejmanta casi tukuy imata yachanku.

10, 11. 1) ¿Imaspitaj uj yuyaylla hermanosninchejwan kanchej? 2) Chanta, ¿mayllapitaj jóvenes sumaj amigosta tarinkuman?

¹⁰ Hermanosninchej waj idiomata parlajtinkupis, yachanchej tukuyninchej ‘llimphu parlayta’ parlasqanchejta (Sof. 3:9). Nisunman tukuyninchej Diospi creenchej, millay ruwaykunata chejninchej, Diosninchej sumaj kausayta qonawanchejtataj suyakunchej. Chay imaspi uj yuyaylla kasqanchejrayku hermanosninchejwan sumaj amigos kanchej. Noqanchejqa paykunapi confianchej, paykunapis noqanchejpi confiallankutaj.

¹¹ Chayrayku nisunman Diospa llajtallanpi sumaj amigosta tariyta atisqanchejta. Jallpʼantinmanta hermanosqa amigosninchejña kanku, paykunata manaraj rejsejtinchejpis. Jawamanta runastajrí mana noqanchej jinachu mundontinpi amigosniyoj kanku.

12. ¿Imapajtaj jóvenes kallpachakunkuman?

¹² (Eclesiastés 11:9–12:1 leey). Wakin jovenesqa ichapis kallpachakushanku Bibliata sapa día leenankupaj chayrí reunionespi sumajta comentanankupaj chayrí partenkuta sumajta ruwanankupaj manachayrí sumajta predicanankupaj. Jovenesqa congregacionpi ñauparispa mayta kusikunku. Kusikullankutaj wajkuna “sumajta ñauparishanki” nejtinku. Jovenesqa ñauparispa Diospa munayninta ruwashanku, imaynatachus Jesuspis Diospa munayninta ruwarqa, ajinata (Sal. 40:8; Pro. 27:11).

13. ¿Imataj aswan allin, Jehová Diosta astawan sirviychu chayri kay mundopi qhapajyayta maskʼaychu?

¹³ Jovenesqa Jehová Diosta astawan sirvinankupaj kallpachakojtinku, aswan kusisqas kanqanku, reparanqankutaj ruwasqasninku mana qhasipajchu kasqanta. Apóstol Pablo nerqa: “Sinchʼita sayaychej, mana kuyurispa. Señorpa ruwayninpi ashkhata llankʼallaychejpuni, yachaspa Señorpaj llankʼasqaykichejqa, mana qhasipajchu kasqanta”, nispa (1 Cor. 15:58). Kay mundopi qhapajyayta chayri may rejsisqa kayta maskʼajkunaqa, mana kusisqachu kanku. Kay mundopi tukuy imayoj kaspapis phutisqallapuni kanku (Luc. 9:25). Chaytataj sutʼita reparasunman rey Salomonpa kausayninpi (Rom. 15:4).

14. ¿Imatataj jóvenes Salomonmanta yachakunkuman?

¹⁴ Rey Salomonqa may qhapaj karqa, jallpʼantinpitaj mana pipis pay jina karqachu. Uj kutipitaj sonqonpi nikusqa: “Kunanqa mayta kusikusaj, kusiy kawsaymantaj qokusaj”, nispa (Ecl. 2:1-10). Jinamantataj sumaj wasista, tʼika canchasta, kʼachitu huertasta, tukuy ima munasqantataj ruwachikorqa. Salomonqa chay tukuy imasta ruwachikuspapis mana kusisqachu, nitaj sonqo juntʼasqachu karqa. Chayrayku nerqa: ‘Chaykunaqa qhasi manakajlla noqapaj karqa; kay pachapi chay ruwasqaywan mana imatapis tarerqanichu’, nispa (Ecl. 2:11). Jovenesqa Salomonmanta yachakunkuman kay mundoj imasninta maskʼay qhasi manakajlla kasqanta.

15. 1) ¿Imapitaj jóvenes creenanku kasqa? 2) Salmo 32:8 nisqanman jina, ¿ima yanapastataj jóvenes japʼenqanku?

¹⁵ Wakin runasqa pantaykuspa mayta sufrinku. Chaymantaraj pesachikuspa ninku: “Amallapis chayta ruwaymanchu karqa”, nispa. Jehová Diostaj mana munanchu jóvenes chay jinata sufrinankutaraj. Astawanpis munan payta kasukunankuta, uyarinankutataj. Jóvenes Diosta kasukunankupajqa, creenanku tiyan Diospa nisqasnin allinninkupaj kasqanta. Diospa munayninta ruwaspataj ni jaykʼaj pesachikonqankuchu. Chantapis Bibliaqa jovenesman nin: “Diosqa cheqan, manataj qonqaponqachu ruwasqaykichejta, sutinta munakusqaykichejtapis”, nispa (Heb. 6:10). Chayrayku jovenesqa Diosta kasukunankupaj kallpachakunanku tiyan. Jinamanta allin kajta ruwanqanku, reparanqankutaj Jehová Diosta kasukuy allinninkupajpuni kasqanta (Salmo 32:8 leey).

16. 1) ¿Jehová Dios munanchu jóvenes esclavos jina kanankuta? 2) ¿Imataj kanman jóvenes munaynillankuta ruwajtinku?

¹⁶ Apóstol Pablo nerqa: “Jehová Diospa atiyninwan kajkunataj, kacharichisqa kanku”, nispa (2 Cor. 3:17). Jehová Diosqa mana uj esclavo jinachu, manallataj munanchu jovenespis esclavos jina kanankuta. Astawanqa munan kacharichisqa runas jina payta tukuy sonqo kasukunankuta. Diosta kasukunankutaj allinninkupaj. Munaynillankuta ruwaj jovenestajrí, tukuy laya munapayaypa esclavon kanku (Tito 3:3). Wakin jovenesqa qʼala runasta videospi chayri fotospi qhawanku, khuchichakuy juchapi urmanku, kausayninkuta wañuy pataman churaspa pujllanku,  drogakunku, machankutaj. Chaykunata ruwaspataj ichapis chay rato mayta kusikunku. Chaywanpis chaykunata ruwasqankurayku onqoykunku, uj viciopi urmanku chayri wañupunku (Gál. 6:7, 8).

17. ¿Jehová Diosta kasukuy allinninchejpajchu kasqa?

¹⁷ Jehová Diosta kasukoyqa allinninchejpajpuni. Diosta kasukuspaqa mana anchata onqonchejchu, tukuy laya munapayaypa esclavon kaymantataj kacharichisqa kanchej (Sal. 19:7-11). Jovenesqa Diospa kamachiykunasninta, yuyaychaykunasninta ima kasukuspa, Diosman, tatasninkumanpis rikuchinku atienekunapaj jina kasqankuta. Atienekunapaj jina kajtinkoqa, tatasninku mana ñawillankupichu purichenqanku. Diostaj niwanchej tumpitamantawan kamachisninta sajra kajmanta kacharichinanta. Bibliapis niwanchej: “Chay jinamanta Diospa wawasnin jina kacharichisqa kanqanku, chaytaj may sumajpuni”, nispa (Rom. 8:21).

18. ¿Adanwan Evawan ashkha kamachiykunatachu juntʼananku karqa?

¹⁸ Adanwan Evawanqa, qallariypi Diospa wawasnin jina kacharichisqa karqanku. Diosqa paykunaman uj kamachiyllata qorqa. Dios nerqa: “Allin kajta mana allin kajta yachanamanta sachʼaj poqoynillanta amapuni mikhunkichu”, nispa (Gén. 2:9, 17). Chay kamacheyqa mana uj llasa qʼepi jinachu karqa, manaqa juntʼanankupaj jinalla karqa. Chantapis uj kamachiylla karqa, manataj kay tiempomanta runaspa kamachiykunasnin jinachu karqa. Runasqa ashkha kamachiykunata orqhonku, runastataj obliganku chayta juntʼanankupaj.

19. ¿Imaynatataj Jehová Dioswan Jesuswan yachachishawanchej?

¹⁹ Jehová Diosqa mana ashkha leyestachu qowanchej. Manaqa payta, runa masinchejtapis munakunallata kamachiwanchej. Chantapis pacienciawan yachachiwanchej yuyaychaykunasninta kasukuyta, sajra kajtataj chejnikuyta (Rom. 12:9). Jesuspis pacienciallawantaj uj kutipi yachacherqa imaraykuchus runas sajra kajta ruwasqankuta (Mat. 5:27, 28). Mosoj Jallpʼapi kamachishaspataj, yachachillawasunpuni sajra kajta chejnikunata, cheqan kajtataj munakunata (Heb. 1:9). Chantapis Jesusqa, cuerponchejta, yuyayninchejtapis mosojyachenqa. Ni pipis sajra imasta ruwanapaj tanqawasunchu, manañataj juchasapaschu kasunchej, niñataj sufrisunchejchu. Chaymantataj “Diospa wawasnin jina kacharichisqa” kasunchej, chaytaj may sumajpuni kanqa.

20. 1) Dios tukuy imata munasqanman jina ruwayta atispapis, ¿munakuwanchejchu? 2) ¿Imata ruwaspallataj kacharichisqa kasunman?

²⁰ Mosoj Jallpʼapi kashaspañapis mana munaynillanchejtachu ruwasunchej. Tukuy imatapis Diostawan runa masinchejtawan munakusqanchejrayku ruwasunchej. Jehová Diosqa munan pay jina imatapis ruwananchejta. Payqa tukuy imata munasqanman jina ruwayta atispapis, munakuwasqanchejrayku allin imasta ruwapuwanchej (1 Juan 4:7, 8). Chayrayku nisunman Dios jina ruwajtillanchej kacharichisqa kananchejta.

21. 1) ¿Imatataj David Jehová Diosman nisqa? 2) ¿Imatataj qhepan semana yachakusunchej?

²¹ Jovenesqa maytachá kusikunku Jehová Dios paykunaman allin imasta qosqanmanta. Chay allin imasqa kanku Biblia, publicaciones, Diospa llajtanpi sumaj amigos ima. Chantapis Diosqa saqewanchej payman qayllaykojta, niwanchejtaj tumpamantawan sajra kajmanta kacharichisqa kananchejta (Sal. 103:5). Jovenesqa ichapis David jina kusiymanta Jehová Diosman ninkuman. David nerqa: “Kawsayman pusaj ñanta rikuchiwanki. May jatun kusikuy tiyan ñawpaqeykipi; qanwanqa wiñaypaj sonqo qhallallariy tiyan”, nispa (Sal. 16:11). Qhepan semanaqa yachakusunchej 16 Salmomanta. Chaytaj jovenesta reparachenqa imasta ruwaspallachus kusisqa kausakunankuta.