Manasina. Ashkha runasqa yuyanku, uj runa wañupojtin espiritun chayri alman kausashallasqantapuni. Jinapis Diabloqa, mana Evaman nerqachu: “Huerta chaupipi kaj sachʼamanta mikhunki chayqa, cuerpollayki wañonqa, espirituykeqa mana wañonqachu”, nispa. Astawanpis Satanasqa, katarinejta Evaman nerqa: “Mana wañunkichejchu”, nispa. Chayta nispaqa, kausanallantapuni nisharqa. Creecherqataj mana Diosllawan aswan kusisqa kay jallpʼapi kausakunanta (Gén. 2:17; 3:3-5).

Alma mana wañusqanmanta creencia mana Edén huertapichu rikhurerqa chay, ¿maykʼajtaj chay creencia rikhurerqa? Mana sutʼita yachakunchu. Jinapis yachanchej, pantasqa yachachiykuna Jatun Parapi chinkasqanta. ¿Imaraykutaj chayta ninchej? Imaraykuchus Jatun Paramantaqa, Noewan familiallanwan salvakorqanku. Paykunataj Jehová Diosta yupaychajkuna karqanku.

Chayrayku alma mana wañusqanmanta creenciaqa, Jatun Para pasaytachá rikhurerqa. Chanta, ¿imaynatataj chay yachachiy tukuynejman chayarqa? Jehová Dios Babelpi runaspa parlayninkuta chajrojtin, runasqa chay llulla yachachiypi creespaña tukuynejman riporqanku (Gén. 11:8, 9). Chay pantasqa yachachiy maykʼajpunichus rikhurisqanta mana yachanchejchu. Jinapis sutʼita yachanchej, ‘llullakojkunaj tatanku’ Kuraj Supay Satanás chay llulla yachachiyta rikhurichisqanta. Chay llulla creencia tukuynejman chayajtintaj, payqa maytachá kusikorqa (Juan 8:44).