SAPA ujninchej piensarinanchej tiyan, agradecekoj runachus manachus kasqanchejpi. Bibliaqa unayña nerqa, tukukuy pʼunchaykunapi ashkha runas “mana graciasta qoyta yachajkuna” kanankuta (2 Tim. 3:2). Ashkha runasqa yuyanku, wajkuna paykunata yanapanankupuni kasqanta, chayri imatapis japʼinankupuni kasqanta. Chayraykutaj mana agradecekuyta yachankuchu. Ajina runaswanqa nichá kayta munasunmanchu.

Jinapis Jehová Diosqa kamachisninman nin: “Agradecekuychejpuni”, nispa. Chantá nillantaj: “Tukuy imamanta agradecekuychej”, nispa (Col. 3:15; 1 Tes. 5:18). “Gracias” niyta yachayqa, mayta yanapawanchej. Imaraykuchus chayta nisqanchejta qhawarina.

Agradecekuyta yachaspaqa, mana wajkunata kusisqa kanallankupajchu yanapanchej, manaqa noqanchejpis kusisqa kanchej. ¿Imaraykutaj chayta ninchej? Agradecekuyta yachanchej chayqa, wajkunapaj allinpaj qhawasqa kasqanchejta reparanchej. Kaypi piensarina: Pillapis imatapis ruwapuwajtinchej kusikunchej. Imaraykuchus yachanchej, noqanchejmanta llakikusqanrayku chayta ruwasqanta. Ñaupa tiempopi Rutpis, Booz payta khuyakusqanrayku yanapajtin maytachá kusikorqa (Rut 2:10-13). 

Astawanqa Diosman agradecekunanchej tiyan. Jehová Diosqa kausananchejpaj tukuy imata qowanchej, qoshallawanchejpunitaj. Chayta maykʼajllapis repararqankichá (Deu. 8:17, 18; Hech. 14:17). Jinapis, ¿“Diosqa kʼachapuni” nispallachu ninanchej tiyan? Mana. Astawanpis imastachus qowasqanchejpi, jinallataj imastachus familianchejman qosqanpi tʼukurinanchej tiyan. Chaypi piensarispaqa, payta astawan agradecekusun. Reparasuntaj paypis mayta munakuwasqanchejta, sumajpajtaj qhawawasqanchejta (1 Juan 4:9).

Jehová Dios ashkha bendicionesta qowasqanchejpi tʼukuriytawanqa, may kʼacha kasqanmanta payman agradecekuna (Sal. 100:4, 5). Yachayniyoj runaspis ninku: “Agradecekuyta yachayqa, kusisqa kanapaj yanapawanchej”, nispa.

Agradecekuyta yachaspaqa, wajkunawan aswan allinta kausakusun. Tukuypis wajkuna allinpaj qhawanawanchejta munanchej. Pillapis yanapariwajtinchej chayri imata qoriwajtinchej, tukuy sonqo “gracias” ninchej chayqa, paywan astawan sumajta kausakusun (Rom. 16:3, 4). Chantapis agradecekuyta yachajkunaqa, waj runasta yanapayta yachallankutaj. Chay jina runasqa, wajkuna paykunawan kʼacha kasqankuta reparanku. Chayraykutaj paykunapis, wajkunawan kʼachas kayta munallankutaj. Wajkunata yanapareyqa, kusisqa kanapaj yanapawanchej. Jesús nerqa jinapuni, “aswan kusiy wajman qoriy, qorichikunamanta nisqaqa” (Hech. 20:35).

Universidad de California nisqapi, agradecekuymanta astawan estudiasqanku. Chaypi ujnin yanapakojqa Robert Emmons karqa. Pay nerqa: “Agradecekuyta yachanapajqa, entiendenanchej tiyan wajkunaj yanapankuta necesitasqanchejta. Wakin kutisqa noqanchej wajkunata yanapanchej, waj kutistaj paykuna yanapawanchej”, nispa. Jinapunitaj, tukuy imapajpuni wajkunaj yanapayninta necesitanchej. Ichapis wakenqa mikhunata qoriwanchej, chayri  onqosqa kajtinchej atiendewanchej (1 Cor. 12:21). Agradecekuyta yachaspaqa, wajkuna yanapawasqanchejta reparasun. Chayrayku sapa ujninchej piensarina, wajkunaman “gracias” niyta yachasqanchejtachus manachus.

Agradecekuyta yachaspaqa, sumaj imas kapuwasqanchejta reparasun. Yuyayninchejqa coladera jina, wakin imasta pasachin, wakin imastataj mana. Agradecekuyta yachaj runaqa mana problemasnillanpichu yuyan, astawanqa ima sumaj imaschus kapusqanpi piensan. Imamantapis “gracias” niyman yachaykukusun chayqa, sumaj imas kapuwasqanchejta mana qonqakusunchu. Jinamantataj agradecekuyta yachaj runas kasunchej. Ajina kaspataj, apóstol Pabloj nisqanta ruwasun. Pay nerqa: “Señorpi kusikuychejpuni”, nispa (Fili. 4:4).

Agradecekuyta yachayqa, kusisqa kausakunapaj yanapawanchej. Agradecekuyta yachaj runaqa, mana wajkunamanta envidiakunchu, nitaj llakikunchu, nillataj phiñasqallapuni purinchu. Chantapis agradecekuyta yachaj runaqa, kapusqanwan sonqo juntʼasqa kausakun. Chayraykutaj mana tukuy imayoj kayta maskʼanchu (Fili. 4:12).

Tukukuy pʼunchaykunapi kausasqanchejrayku, tukuypis llakiykunasniyoj kanchej. Satanastaj chay llakiykunawan atipachikunanchejta munan. Payqa mayta munan llakisqalla, tukuy imamanta rimaspataj purinanchejta. Ajina kaspataj, mana sumaj willaykunamanta runasman willayta atisunmanchu. Chantapis agradecekuyta yachaspalla, Diospa atiyninpa poqoyninta kausayninchejpi rikuchiyta atisunman. Chaykunamanta ujqa kusikuyniyoj kay. Noqanchejtaj kusisqa kanchej, Jehová Dios tukuy ima allin kajta qowasqanchejrayku, aswan qhepaman bendicionesta qonawanchejpi creesqanchejrayku ima (Gál. 5:22, 23).

Kaykama yachakunchej, agradecekoj runas kayqa sumajpuni kasqanta. Chayrayku ichá ninchej: “Chayqa ajinapuni”, nispa. Jinapis yachallanchejtaj agradecekoj runas kay, sumaj imaspi yuyaypis mana atikullasqanta. Jina kajtinpis agradecekoj runas kanapaj kallpachakunallapuni. Graciasta qoyman yachasqa kanchej chaytaj, agradecekoj runas kanallapajpuni kallpachakuna. Chaypajqa sapa día ima sumaj imaschus kapuwasqanchejpi piensarina, agradecekunataj. Chayta sapa kuti ruwasun chayqa, “gracias” niyman yachaykukusun. Llakiynillankupi yuyajkunamanta nisqataj, aswan kusisqa kasunchej. Diosninchejpis, wajkunapis kallpachawanchejpuni. Chaytaj mayta kusichiwanchej. Chay ruwasqankumanta amapuni qonqakunachu. Munaspaqa uj cuadernitopi anotakusunman, sapa día ima bendicionestachus japʼisqanchejta.

Científicos ninku: “Gracias niyman yachaykukunchej chayqa, ñojtunchejta sumaj imaspi yuyananpaj yachachinchej”, nispa. Agradecekuyta yachajkunaqa, aswan kusisqa kausakunku. Chayrayku ima sumaj imaschus kapuwasqanchejpi piensarina. Allin riwajtinchej kusikuna. Tukuy chaykunamantataj agradecekuna. Chay imasta qonqapunamantaqa, Bibliaj nisqanta ruwana. Chaypi niwanchej: “Tata Diosman graciasta qoychej, imaraykuchus payqa may kʼachamin”, “tukuy imamanta agradecekuychej”, nispa (1 Cró. 16:34; 1 Tes. 5:18).