Deuteronomio 22:25-27 versiculosqa, mana chay runa juchayojchus manachus kasqanmantachu parlashan. Imaraykuchus juchanqa sutʼiña karqa. Chay leyqa karqa, warmi mana juchayojchu kasqanta rikuchinanpaj. Imatachus 23, 24 versículos nisqanta qhawarina.

Chay versiculospeqa, uj runa mañaqasqa sipaswan “llajtapi” puñuykusqanmanta parlan. Chay tiempopi casarakunanpaj mañaqasqa sipasqa, casada jinaña qhawasqa kaj. Chayrayku chay sipaswan puñuykoj qhareqa, qhenchachakuymanta juchayoj karqa. Sipasrí, ¿juchayojllatajchu karqa? Arí, “mana qhaparikusqanrayku” juchayojllataj karqa. Llajtapi kasqanrayku, payqa qhaparikuyta atinman karqa, wajkunataj uyarispa yanapankuman karqa. Jinapis mana qhaparikusqanrayku, sipaspis qharipis qhenchachakuymanta juchayoj karqanku (Deu. 22:23, 24).

Leyqa ajinata nillajtaj: “Uj sipas casarakunampaj uj qhariwan parlapayasqaña kashajtin, sichus waj qhari campopi taripaspa, paywan puñuykunman chay sipas mana munashajtin chayqa, chay qharilla wañuchisqa kanqa, chay warmej honranta tʼakasqanrayku. Sipastaqa ama imanankichejchu, imaraykuchus payqa mana juchayojchu wañunampaj jina. Imaynachus uj runa qhari masinta taripaspa, wañuchin, ajina kayqa. Chay qhareqa sipasta sapallanta campopi tariparqa. Pay qhaparikushajtimpis, ni pi uyarinmanchu karqa payta jarkʼarikunampaj” (Deu. 22:25-27).

Chay kutispi juecesqa, warmej nisqanta creej kanku. Paykunaqa sipasmanta nej kanku: “Pay qhaparikushajtimpis, ni pi uyarinmanchu karqa”, nispa. Chayrayku sipasqa qhenchachakuymanta mana juchayojchu karqa. Qharitajrí chay sipasta abusasqanrayku juchayoj karqa. Chantapis qhenchachakuymanta juchachasqa kaj. Imaraykuchus casarananpaj parlapayasqaña sipaswan “mana munashajtin” puñuykorqa.

Rikunchej jina, Moisespa Leynenqa chay sipas mana juchayojchu kasqanta nej. Jinapis chay sipasta abusaj runaqa, juchayojpuni karqa abusasqanmanta, qhenchachakusqanmantawan. Chaywanpis juecesqa ‘sumajta tapukuspa allintaraj yachaj’ kanku. Chantapis Diospa kamachisqanman jina juzgaj kanku. Chay kamachiykunatataj Diosqa kutin kutita sutʼita willarqa (Deu. 13:14, 15; 17:4; Éxo. 20:14).