1, 2. Kay 2018 watapi, ¿ima tantakuytaj ujchawasunchej? (Patapi kaj fotota qhawariy).

KAY 2018 watapi 31 de marzo killapi, Jesuspa Wañuyninta yuyarisunchej inti yaykupusqantawan. Chay tantakuytaj mundontinpi tukuyta ujchawasunchej. Chay jina tantakoyqa, sapa wata uj kutillata ruwakun. Chay tantakuy jinaqa, manapuni waj kanchu.

² Jehová Dioswan, Jesuswanqa mayta kusikunku chay sumaj tantakuyman rejtinchej. Bibliataj unaymantaña nerqa, ‘may chhika runas, mana yupay atina, tukuy nacionesmanta, tukuy ayllusmanta, tukuy laya runasmanta, tukuy parlaykunamantawan’, kay jinata ninankuta: “Salvacionqa Diosninchejmanta jamun, pichus kamachina tiyanapi tiyasqa kashan, chaymanta, Corderomantawan”, nispa (Apo. 7:9, 10). Arí, may sumajpuni may chhika runas Jesuspa Wañuyninta Yuyarinapaj tantakuyman rinankoqa, Jehová Diosta, Jesustawan jatunchanankupaj.

3. ¿Ima tapuykunamantaj kay yachaqanapi kutichisunchej?

 ³ Kay yachaqanapeqa kay tapuykunaman kutichisunchej: ¿Imatataj ruwasunman Jesuspa Wañuyninta Yuyarinapaj tantakuypaj semanas faltashajtin? ¿Imaynasmantataj Jesuspa Wañuyninta Yuyarinapaj tantakuy yanapawanchej Diospa llajtan ujchasqa kananpaj? ¿Imatataj ruwasunman Diospa llajtan ujchasqa kananpaj? ¿Jesuspa Wañuyninta Yuyarinapaj tantakuyta ruwallasunpunichu? Manaña ruwakojtin, ¿maykʼajmantapachataj manaña ruwasunchu?

4. ¿Imajtintaj Jesuspa Wañuyninta Yuyarinapaj tantakuyman rinanchejpuni kasqa?

⁴ Tantakuykunamanqa Jehová Diosta yupaychanapaj rinchej. Chayrayku Jesuspa Wañuyninta Yuyarinapaj tantakuymantaqa, manapuni faltakunachu tiyan. Imajtinchus chay tantakuyman rinapaj kallpachakushasqanchejta Jehová Dios, Jesús ima qhawashanku. Chaytataj may jatunpaj qhawanku. Noqanchejpis paykuna jinallataj chay tantakuyman riyta jatunpaj qhawananchej tiyan. Tukuy atisqanchejtataj ruwananchej tiyan chay tantakuyman rinapaj. Chantapis tantakuykunaman mana faltakuspa rejtinchejqa, Jehová Dios sutisninchejta ‘libronpi yuyarisqa kananpaj’ churanqa. Chay libroqa ‘kausay libro’ sutikun. Chay libropi Jehová Diosqa, pikunamanchus wiñay kausayta qonqa, chaykunaj sutisninkuta churashan (Mal. 3:16; Apo. 20:15).

5. ¿Imastataj tapurikusunman creeypi sinchʼitachus chayri manachus sayashasqanchejta yachanapaj?

⁵ Jesuspa Wañuyninta Yuyarinapaj tantakuypaj semanas faltashajtin, Diosmanta mañakusunman, piensarisunmantaj creeypi sinchʼichus manachus kashasqanchejta (2 Corintios 13:5 leey). Apóstol Pabloqa cristianosman nerqa: “Allinta qhawarikullaychejpuni, yachanaykichejpaj creeypi sinchʼitachus manachus sayashasqaykichejta”, nispa. Chaypajqa ichapis kaykunata tapurikusunman: “¿Creenichu Diospa llajtanpipuni kashasqayta mayqentachus ajllan munayninta ruwananpaj? ¿Tukuy atisqaytachu kallpachakuni predicanaypaj, Bibliamantataj yachachinaypaj? ¿Rikuchinichu ruwasqasniywan qhepa pʼunchaykunapi kausashasqayta, tumpamantawantaj Satanaspa mundon chinkananta? ¿Jehová Diospi, Jesuspi ima atienekushallanipunichu?”, nispa (Mat. 24:14; 2 Tim. 3:1; Heb. 3:14). Kay tapuykunaman kutichispaqa, reparakusunchej creeypi sinchʼitachus sayashasqanchejta chayri manachus.

6. 1) ¿Pikunamanta yachakuspataj wiñay kausayta tarisunchej? 2) Jesuspa Wañuyninta Yuyarinapaj tantakuypaj, ¿imatataj uj anciano ruwaj kasqa? 3) ¿Imatataj noqanchejpis ruwasunman chay tantakuypaj semanas faltashajtin?

⁶ Jesuspa Wañuyninta yuyarinapajqa, wakichikusunman chaymanta parlaj yachaqanasta leespa, chaypi piensarispa ima. Chay yachaqanasqa sutʼinchan imajtinchus chay tantakuyman rinapuni kasqanta (Juan 3:16; 17:3 leey). Chantá wiñay kausayta tarinapajqa, Jehová Diosmanta yachakunanchej tiyan, Wawan Jesuspitaj creenanchej tiyan. Jesuspa Wañuyninta yuyarinapajqa wakichikusunman chaymanta parlaj yachaqanasta estudiaspa. Ajinamantataj Diosman, Jesusmanpis astawan qayllaykusunchej. Uj ancianopis ajinata ruwan. Payqa unaytaña anciano jina kashan, nintaj: “Unaymantaña Jesuspa Wañuyninmanta parlaj yachaqanasta jallchʼani. Chaykunaqa Torremanta Qhawaj revistapi llojserqa. Parlantaj Jehová Diosta, Jesustawan mayta munakunamanta. Chantapis chay tantakuypaj semanas faltashajtin, chay jallchʼasqay yachaqanasta leerini, chaypitaj tʼukurini. Reparanitaj chay tantakuy ni imawan kikinchakusqanta. Wakin kuteqa, chay jallchʼasqasniyman ujta chayri iskay yachaqanasta yapani. Chantá chay semanapaj Bibliamanta ajllasqa versiculosta leerispa  tʼukurini. Ajinata ruwajteyqa sapa wata mosoj imasta yachakuni. Chantapis estudiasqayqa yanapawan astawan Jehová Diosta, Jesustapis munakunaypaj”, nispa. Ajinata noqanchejpis estudiasunchej chayqa, astawan Jehová Diosta, Jesustapis munakusunchej. May agradecesqataj kasunchej Jehová Diosman, Jesusmanpis tukuy imata noqanchejrayku ruwasqankumanta. Chantapis chay tantakuypeqa, astawan Diosmanta yachakusunchej.

7. 1) ¿Imatataj Jesús mañakusqa Señorpa Cenanta ruwashajtin? 2) ¿Jesuspa mañakusqanta Jehová Dios uyarisqachu?

⁷ Jesusqa Señorpa Cenanta ruwashajtin, uj mañakuypi nerqa, tukuy yachachisqasnin ujchasqas kanankuta, imaynatachus pay Tatanwan ujchasqa kasharqa, ajinata (Juan 17:20, 21 leey). Jehová Diostaj Jesuspa mañakuyninta uyarerqapuni. Imajtinchus Diospa llajtanqa may ujchasqa kashan. Chaytaj sutʼi rikukun Jesuspa Wañuyninta Yuyarinapaj tantakuypi. Chay diaqa jallpʼantinmanta tukuy runas, waj parlayniyoj kajtinkupis chayri maymanta kajtinkupis ujchasqas tantakunku. Imaraykuchus creenku Jehová Dios Wawanta kachamusqanta kay jallpʼaman. Jinapis wakin lugarespeqa, waj parlayniyoj runaswan mana tantakuyta atillankuchu Diosta yupaychanankupaj. Tantakojtinkutaj chay runasta mana allinpajchu qhawanku. Jehová Dioswan, Jesuswantajrí ujchasqa kasqanchejta, may sumajpaj qhawanku.

8. ¿Imatataj Jehová Dios Ezequielman nisqa?

⁸ Diospa llajtanqa ujchasqa kashan, chaytaj mana tʼukunapajchu. Imaraykuchus Diosqa chay kananta nerqaña, profeta Ezequielman uj willayta qoshajtin. Jehová Diosqa Ezequielta kamacherqa iskay kʼaspista oqharinanta. Uj kʼaspeqa “Judá ayllupaj” kanan karqa, ujtaj Josejpa kanan karqa. Chay kʼaspistataj ujchaykunan karqa, ujllaman tukunankupaj (Ezequiel 37:15-17 leey). Chaymanta parlaspa julio de 2016 watamanta Torremanta Qhawaj revistapi, 31 paginapi, jinata nerqa: “Jehovaqa profeta Ezequielnejta kamachisnin Sumaj Jallpʼaman kutinankuta, watejmanta uj nación jina sumaj ujchasqa kanankuta ima nerqa. Chantapis Ezequielnejta nillarqataj kay qhepa pʼunchaykunapi Diosta yupaychajkuna, uj llajta jina sumaj ujchasqa kanankuta”, nispa.

9. Jesuspa Wañuyninta Yuyarinapaj tantakuypi, ¿Ezequielpa nisqanta juntʼakojta rikunchejchu?

⁹ “Judá ayllupaj” kʼaspeqa ajllasqa cristianoswan ninakun. ‘José ayllupaj’ kʼaspitajrí kay jallpʼapi kausakuyta suyakojkunawan ninakun. Jehová Diostaj chay iskay kʼaspista ujllaman tukucherqa. Kay 1919 watamantapachataj, ajllasqa cristianosta pisimanta pisi ujchaykorqa. Chaymantataj Jehová Diosqa, kay jallpʼapi kausakuyta suyakojkunata tantayta qallarerqa. Ajinamanta Jehová Diosqa ajllasqa cristianosta, kay jallpʼapi kausakuyta suyakojkunatawan ‘uj tropallaman’ tukucherqa (Eze. 37:18, 19; Juan 10:16; Zac. 8:23). Kay tiempopitaj iskaynin qotusqa ujchasqa Diosta sirvishanku. Chay iskay qotuspa Reynintaj Jesucristo. Diostaj Bibliapi unaymantaña nerqa, Jesucristota ‘kamachiy David’ nispa (Eze. 37:24, 25). Jesuspa Wañuyninta Yuyarinapaj tantakuypitaj, Ezequielpa nisqanman jina iskaynin qotus ujchasqa kanku. Chayrayku kunanqa yachakunachej imatachus ruwanata, Diospa llajtan ujchasqallapuni kananpaj.

10. ¿Imatataj ruwasunman Diospa llajtan ujchasqallapuni kananpaj?

¹⁰ Diospa llajtan ujchasqa kananpajqa, kʼumuykukoj sonqo kananchej tiyan. Jesuspis kay jallpʼapi kashaspa, yachachisqasninman nerqa kʼumuykukoj sonqo kanankuta (Mat. 23:12).  Kay mundomanta runasrí, maytapuni jatunchakunku. Jinapis noqanchej kʼumuykukoj sonqo kasunchej chayqa, congregacionpi ñaupajman apajkunata respetallasunchej, kamachiwasqanchejtapis kasukullasunchej. Ajinallamanta congregacionqa, ujchasqa kanqa. Astawanpis kʼumuykukoj sonqo kasunchej chayqa, Jehová Diosta kusichisunchej. “Imaraykuchus Diosqa jatunchakojkunaj contranpi sayaykun. Kʼumuykukoj sonqoyojkunamanrí, jatun khuyakuyninta qon” (1 Ped. 5:5).

11. ¿Imaspi tʼukuriytaj yanapawasunchej ujchasqa kanapaj?

¹¹ Diospa llajtan ujchasqallapuni kananpajqa, sumajta tʼukurinanchej tiyan tʼanta, jinallataj vinopis imachus niyta munasqanpi. Chaypitaj ñaupajmantaña tʼukurinanchej tiyan. Jinallataj Jesuspa Wañuyninta Yuyarinapaj tantakuypi kashaspapis (1 Cor. 11:23-25). Mana levadurayoj tʼantaqa, Jesuspa mana juchayoj cuerponwan ninakun. Mayqentachus noqanchejrayku qorqa. Vinotaj Jesuspa yawarninwan ninakun. Jinapis mana chayllatachu entiendenanchej tiyan. Astawanqa yuyarikuna, Jehová Dios munakuwasqanchejrayku Wawanta qosqanta. Jesuspis munakuwasqanchejrayku kausayninta qosqanta. Chaypi tʼukurispaqa, Jehová Diosta astawan munakusun, hermanosninchejwantaj aswan ujchasqas kasunchej.

12. ¿Imatataj Jesús yachacherqa uj reymanta kamachisninmantawan parlaspa?

¹² Diospa llajtan ujchasqallapuni kananpajqa, tukuy sonqo perdonayta yachananchej tiyan. Perdonaspaqa Jehová Diosman agradecekunchej. Imajtinchus payqa Wawanta qorqa juchasninchejta perdonanawanchejpaj. Jesuspis perdonay may allinpuni kasqanta rikuchinanpaj, uj reymanta kamachisninmantawan parlarerqa. Chaytataj Mateo 18:23 al 34 versiculospi leerisunman. Chantá tapurikusunman: “Jesús yachachisqanman jina, ¿perdonanaypaj wakichisqachu kashani sonqoyta nanachiwajtinkupis? ¿Hermanosniyta entiendenichu, pacienciakunitajchu?”, nispa. Noqanchejqa juchasapas kasqanchejrayku, mana perdonayta atillanchejchu. Astawanraj pillapis contranchejpi mayta juchallikojtin. Jinapis Jesús uj reymanta, kamachisninmantawan parlasqanqa, yachachiwanchej  imatachus Jehová Dios ruwananchejta munasqanta (Mateo 18:35 leey). Jesusqa sutʼita nerqa mana hermanonchejta perdonajtinchejqa, nillataj Jehová Diospis perdonanawanchejta. Chaypitaj sumajtapuni tʼukurinanchej tiyan. Chantapis Diospa llajtan ujchasqallapuni kananpajqa, tukuy sonqo perdonanakunanchej tiyan.

13. ¿Imatataj ruwananchej kasqa wajkunawan allinta kausakunapaj?

¹³ Hermanosta perdonaspaqa, paykunawan allinta kausakunchej. Apóstol Pablotaj nerqa: “Allinta kausakuychej. Ujchasqallapuni kanaykichejpajtaj mayta kallpachakuychej”, nispa (Efe. 4:3). Jesuspa Wañuyninta Yuyarinapaj tantakuy qayllata, chantapis chay tantakuy chʼiseqa ni piwan phiñanasqachu kananchej tiyan. Chayrayku allinpuni kanman kaykunata tapurikunanchej: “¿Ruwasqasniypi yachakunchu ni piwan phiñasqa kasqayta? ¿Tukuypis reparankuchu wajkunawan allinta kausakunaypaj kallpachakushasqayta?”, nispa.

14. ¿Imatataj ni jaykʼaj ninanchejchu kasqa?

¹⁴ Chantapis ujchasqallapuni kanapajqa, Jehová Dios jina runasta munakunanchej tiyan (1 Juan 4:8). Ni jaykʼajtaj ninanchejchu tiyan: “Yachani hermanosta munakunay kasqanta, pero mana amigosniypunichu kananku tiyan”, nispa. Ajinata yuyaspaqa, mana Bibliaj nisqanman jinachu ruwashasunman. Bibliapi Pablo nerqa: ‘Purajmanta munakuywan aguantanakuychej’, nispa (Efe. 4:2). Reparanchej jina, Pabloqa mana aguantanakuychej nillarqachu, manaqa ‘munakuywan aguantanakuychej’ nerqa. Jehová Diostaj llajtanman tukuy rijchʼaj runasta pusamorqa (Juan 6:44). Paykunatataj munakusqanrayku pusamorqa. Noqanchej hermanosninchejta mana munakusunchejchu chayqa, Jehová Diostapis mana munakuyta atisunmanchu. Chayrayku Jehová Dios jina, hermanosta munakunapaj, kallpachakunallapuni (1 Juan 4:20, 21).

15. ¿Jesuspa Wañuyninta Yuyarinapaj tantakuyta ruwallasunpunichu?

¹⁵ Uj diaqa manaña Jesuspa Wañuyninta yuyarikusunchu. Imaraykuchus Pabloqa ajllasqa cristianosman nerqa, sapa wata Jesuspa Wañuyninta Yuyarinapaj tantakuyta ruwaspa, ‘Señorpa wañuyninmanta willanankuta, pay jamunankama’ (1 Cor. 11:26). Chantapis Jesusqa jatun ñakʼariy tiempomanta parlaspa, jamunanmanta parlallarqataj. Jinatataj nerqa: “Chaypacha cielopi rikhurenqa noqaj señalniy, kay jallpʼapi tukuy ayllustaj phutiyta waqanqanku. Noqata rikuwanqanku phuyus patata atiywan, jatun kayniywantaj jamushajta. Corneta sinchʼita waqanqa, noqataj angelesniyta kachamusaj, paykunataj ajllasqasniyta tantanqanku kay jallpʼaj kʼuchusninmanta, cieloj ujnin kantunmanta, ujnin kantunkama”, nispa (Mat. 24:29-31). Jesusqa, kay jallpʼapi kaj ajllasqa cristianosta pusakapuytawan, cielopi tukuynin ajllasqa cristianosta ‘tantaykonqa’. Chayqa kanqa jatun ñakʼariy tiempo niraj tukukushajtin. Chanta Armagedón maqanakuy qallarenqa. Chaypeqa Jesús 144.000 ajllasqa cristianoswan, kay jallpʼamanta tukuy gobiernosta chinkarparichenqa (Apo. 17:12-14). Jesús kay jallpʼapi kaj ajllasqa cristianosta pusakapusqantawan, manaña Jesuspa Wañuyninta Yuyarinapaj tantakuyta ruwasunchu.

16. ¿Imaraykutaj Jesuspa Wañuyninta Yuyarinapaj tantakuymanta mana faltakunachu kasqa?

¹⁶ Jesuspa Wañuyninta Yuyarinapaj tantakoyqa, 2018 watapi, 31 de marzo killapi ruwakonqa. Chay tantakuymantataj amapuni faltakunachu. Jehová Diosmantataj mañakunachej, llajtanpi ujchasqallapuni kanapaj (Salmo 133:1 leey). Amataj qonqanachu, uj día Jesuspa Wañuyninta Yuyarinapaj tantakuyta manaña ruwananchejta. Chay día chayamunankamaqa, hermanos jina ujchasqallapuni kana.