1, 2. ¿Jehová Dios noqanchejwan kʼachachu kasqa?

JEHOVÁ DIOSQA may kʼacha kasqanrayku, tukuy imata qowanchej. Jallpʼapi kaj tukuy imasqa Diospata. Chantapis kausananchejpaj tukuy imata poqochipuwanchej (Sal. 104:13-15; Hag. 2:7, 8). Bibliataj niwanchej Jehová Diosqa, kamachisninman necesitasqankuta qosqanta, uj milagronejta.

² Jehová Diosqa israelitasman “tawa chunka watasta” chʼin pampapi kashajtinku, maná nisqa mikhunata qorqa, jinallataj yakutapis (Éxo. 16:35). Chay jawataj ni “imallankupis piserqachu” (Neh. 9:20, 21). Uj pachataj Jehová Diosqa, profeta Eliseoman atiyta qorqa, uj viudaj aceitenta ashkhayachinanpaj. Ajinamanta chay viudaqa, aceiteta vendeytawan manusninta juntʼarqa. Chay vendemusqan qolqetaj paypaj wawasninpajwan puchorqaraj (2 Rey. 4:1-7). Uj kutipis Jehová Diosqa, Jesusman atiyta qorqa, ashkha runasman mikhuchinanpaj. Waj kutipitaj Jesusman atiyta qollarqataj, qolqeta rikhurichinanpaj (Mat. 15:35-38; 17:27).

3. ¿Imastataj kay yachaqanapi yachakusunchej?

³ Jehová Diosqa tukuy imata qowajtinchejpis, munan llajtanta kapuyninchejwan yanapakunanchejta (Éxo. 36:3-7;  Proverbios 3:9 leey). Kay yachaqanapitaj yachakusunchej, imajtinchus Jehová Dios kapuyninchejwan yanapakunanchejta munasqanta. Imaynatachus ñaupa tiempomanta Diospa kamachisnin yanapakusqankutapis. Yachakullasuntaj kay tiempopi imaynatachus Diospa llajtan, hermanospa churasqanku qolqeta apaykachasqankuta.

4. ¿Imajtintaj Diospa llajtanta kapuyninchejwan yanapakunchej?

⁴ Jehová Diosta munakusqanchejrayku, jatunpajtaj qhawasqanchejrayku, llajtanta kapuyninchejwan yanapakunchej. Imastachus Jehová Dios noqanchejrayku ruwasqanpi piensarispaqa, sonqonchej kuyurin. Rey Davidpis nerqa, tukuy ima Diosllamanta jamusqanta, imatachus qowasqanchejpis paypata kasqanta. Chaytataj nerqa, templo ruwakunanpaj imastachus necesitakusqanmanta parlashaspa (1 Crónicas 29:11-14 leey).

5. ¿Imajtintaj kapuyninchejwan Diosta jatunchanapuni kasqa?

⁵ Diospa llajtanta kapuyninchejwan yanapakuspaqa, Jehová Diosta yupaychanchej. Uj kuti apóstol Juanqa, mosqoypi jina Diospa kamachisninta rikusqa. Paykunataj jinata nishasqanku: “Atiyniyoj Jehová Diosniyku, qanllamin jatunchanapaj jina, yupaychanapaj jinataj kanki, imaraykuchus qanmin tukuy imata ruwarqanki, munayniykiraykutaj tukuy imapis rikhurerqa, ruwasqataj karqa”, nispa (Apo. 4:11). Reparanchej jina, Jehová Dioslla jatunchanapaj jina, yupaychanapaj jinataj. Chayrayku tukuy kapuwasqanchejwan, payta jatunchana. Unay tiempopi Jehová Diosqa, Moisesnejta israelitasman nerqa, watapi kinsa fiestasta ruwanankuta. Chantá Moisespa Leyninpi ajinata nerqa: “Mana mayqellampis chʼusaj makeqa mana imayojqa Tata Diosman qayllaykonqachu”, nispa (Deu. 16:16). Kay tiempopipis Diosta yupaychallanchejtaj, tukuy sonqo kapuyninchejwan llajtanta yanapakuspa. Kapuyninchejwan yanapakuspaqa, predicacionta jatunpaj qhawasqanchejta rikuchinchej.

6. ¿Imata ruwaspataj kusisqa kasunman? (17 paginapi fotosta qhawariy).

⁶ Wajkunaman qorispaqa, kusisqa kanchej, sonqo juntʼasqataj (Hechos 20:35 leey). Uj tata wawitanman sapa kuti qolqesituta regalasqanpi piensarina. Chay wawitataj chay qolqesituta tantaspa, tatasninpaj uj regalitota rantipun. Tatasnintaj chay regalomanta mayta kusikunku. Kunantaj uj joven precursorpi piensarina. Payqa tatasninwan tiyakun, qolqesitunwantaj yanapakun alquilerpaj chayri mikhunapaj, tatasnin mana mañajtinkupis. Tatasnenqa wawanta saqellanku yanapakunanta, imajtinchus yachanku pay yanapakojtin kusisqa kananta. Chay tatas jinallataj Jehová Diospis, yachan kapuyninchejwan yanapakojtinchej kusisqa kananchejta.

7, 8. ¿Imaynasmantataj unay tiempopi Diospa kamachisnin kapuyninkuwan yanapakusqanku?

⁷ Bibliaqa niwanchej, Diospa may chhika kamachisnin kapuyninkuwan yanapakusqankuta. Uj pacha Moisesqa, israelitasman nerqa kapuyninkuta apamunankuta, Diospa tinkukuna toldota ruwanankupaj. Rey Davidpis kapuyninmanta qollarqataj, Diospa templon ruwakunanpaj (Éxo. 35:5-9; 1 Cró. 29:5-9). Rey Joás kamachishajtin tiempopipis, sacerdotesqa Diospa templonta allincharqanku, runas kapuyninkumanta churasqanku qolqewan (2 Rey. 12:4, 5). Apostolespa tiemponpipis, cristianosqa Judeapi yarqhay kasqanta yachaytawan, hermanosninkuta kapuyninkuwan yanapakullarqankutaj.  Bibliataj nin sapa uj kapusqanman jina yanapata apachisqankuta (Hech. 11:27-30).

⁸ Chantapis Diospa kamachisnenqa, ñaupajman apajkunata kapuyninkuwan yanapaj kanku. Leví ayllumanta parlarina. Levitaspataqa, mana jallpʼanku karqachu. Chayrayku israelitasqa, poqochisqankumanta sapa chunkamanta ujta levitasman qonanku karqa. Ajinamanta levitasqa, Dioswan tinkukuna toldopi ruwanasninkuta allinta juntʼayta atillarqanku (Núm. 18:21). Jesuspa tiemponpipis wakin warmisqa, “kapuyninkuwan yanapaj kanku Jesusta, apostolesnintawan” (Luc. 8:1-3).

9. Unay tiempomanta Diospa kamachisnin, ¿imastataj ruwarqanku kapuyninkuwan yanapakunankupaj?

⁹ Unay tiempomanta Diospa kamachisnin, ¿imastataj ruwarqanku kapuyninkuwan yanapakunankupaj? Israelitasqa ichapis Egiptomanta apakapusqanku imasta qorqanku, Diospa tinkukuna toldon ruwakunanpaj (Éxo. 3:21, 22; 35:22-24). Apostolespa tiemponpitaj, wakin cristianosqa jallpʼasninkuta chayri wasisninkuta venderqanku. Chay vendesqanku qolqetataj, apostolesman jaywaj kanku. Apostolestaj chay qolqeta pisichikoj hermanosman qoj kanku (Hech. 4:34, 35). Wakin cristianostaj, kapuyninkumanta “mashkhallatapis” tʼaqaj kanku yanapakunankupaj (1 Cor. 16:2). Reparanchej jina tukuy cristianos qhapaj kaspapis, wajcha kaspapis kapuyninkuwan yanapakojpuni kanku (Luc. 21:1-4).

10. Yanapakusqanchej qolqe, ¿imaspajtaj kasqa?

¹⁰ Kay tiempopipis congregacionpi, imata ruwanapajpis qolqesitunchejwan yanapakusunman. Ichá Tantakuna Wasinchej allinchakunan kashan chayri mosojta sayarichikunan kashan. Chantapis qolqesitunchejwan yanapakullasunmantaj, Betel wasi allinchakunanpaj, jatun tantakuykuna ruwakunanpajpis. Qolqesitunchejwan yanapakullasunmantaj terremotorayku, inundacionesrayku llakiypi tarikoj hermanosta. Qolqesitunchejwanqa yanapakullanchejtaj misionerosta, precursores especialesta, congregacionesta waturejkunata, centralninchejpi trabajajkunata, Betelpi trabajaj hermanostawan. Chantapis ichá congregacionninchej sapa killa qolqewan yanapakushan, jallpʼantinpi Tantakuna Wasis, Jatun Tantakuna Wasis ima ruwakunanpaj.

11. ¿Kusisqachu kanchej qolqesitunchejwan yanapakuspa?

¹¹ Kay qhepa pʼunchaykunapi, predicación ñaupajllamanpuni rinanpaj qolqesitunchejwan yanapakusunman. Congregacionninchejpi cajitasman qolqesitunchejta churashaspataj, ni piman willanchejchu. Jinallataj Internetnejta qospapis nillataj pimanpis willanchejchu. Noqanchejmanta ashkhastaj, pisi qolqesitullawan yanapakusqanchejrayku, ichá yuyasunman qolqesitunchej ni imapaj valesqanta. Jinapis ama jinata yuyanachu. Imajtinchus mundontinpi casi tukuyninchej pisi qolqellawan yanapakojtinchejpis, ashkha qolqe tantakun. Pisi qolqellawan yanapakuspaqa Macedoniamanta cristianos jina ruwanchej. Imajtinchus chay cristianosqa, ‘may wajchas kashaspapis, tukuy atisqankuta qorqanku’ wajkunata yanapanankupaj (2 Cor. 8:1-4).

12. ¿Imaynatataj Diospa Llajtanta Kamachejkuna qolqeta apaykachanku?

¹² Diospa Llajtanta Kamachejkunaqa, sumaj yuyaywan apaykachanku hermanos churasqanku qolqeta (Mat. 24:45). Paykunaqa Diosmanta mañakunku chay qolqeta sumajta apaykachanankupaj (Luc. 14:28). Unay tiempomanta Diospa kamachisnenqa, Diosta yupaychanallapaj qolqeta  gastaj kanku. Paykunamanta ujnintaj Esdras karqa. Paypa cargonpeqa ashkha qolqe, qori, waj valorniyoj imaspiwan kasharqa, chaykunataj 100 millones dolaresmanta astawan valenman karqa. Chaykunataqa Persiamanta rey qorqa, Jerusalenman Esdras kutipushajtin. Esdrastaj chay valorniyoj imas Jehová Diospaj, uj sumaj regalo jina kasqanta yacharqa. Chayrayku Esdrasqa apajkunata kamacherqa, “chay imasta allinta” qhawanankuta, waqaychanankutataj (Esd. 8:24-34). Apóstol Pablopis, Judeamanta cristianosta yanapananpaj qolqeta tantarqa. Chay kutipitaj jinata nerqa: “Tukuy imata mana chʼaukiyaspa ruwanaykupaj kallpachakuyku, mana Jehová Diospa ñaupaqellanpichu, manaqa runaspa ñaupaqenkupipis”, nispa (2 Corintios 8:18-21 leey). Kay tiempopipis Diospa llajtanta ñaupajman apajkunaqa, Esdras jina, Pablo jinataj sumaj yuyaywan qolqeta apaykachanku.

13. ¿Imaraykutaj Diospa llajtanpi wakin cambios ruwakusqa?

¹³ Wakin familiasqa allinta qhawarikunku mana imapipis qolqenkuta gastarparinallankupaj. Wakintaj pisillataña trabajanku, Jehová Diospaj astawan llankʼanankupaj. Ajinallatataj Diospa llajtanta ñaupajman apajkunaqa, wakin cambiosta ruwarqanku, qolqeta mana anchata gastakunanpaj. Ajinamantataj hermanospa churasqanku qolqeta sumajta apaykachakorqa. Imaraykuchus kunallanraj Diospa llajtanpi, jatuchej Betel wasis, jatun tantakuna wasis waj imaspiwan ruwakorqa. Chaykunapitaj may chhika qolqe gastakorqa.

14, 15. ¿Imaspitaj churasqanchej qolqeta apaykachakushasqa?

¹⁴ Unaytaña Diosta sirvej hermanosqa, kay tiempopi may chhika bendicionesta japʼishasqankuta ninku. Imajtinchus kay tiempopi kapuwanchej, Internetpi jw.org jinallataj JW Broadcasting nisqa. Kapullawanchejtaj, Diospa Palabran Biblia ashkha parlaykunapi. Kay 2014, 2015 wataspitaj 14 llajtaspi, ashkha suyuspaj jatun tantakuykuna ruwakorqa. Chaykunataj karqa jatuchaj pelota kanchaspi. Chay jatun tantakuykunaqa, “Ñaupajtaqa Diospa Reinonta maskʼana” nisqa sutikorqa. Chay tantakuykunaman rejkunaqa, may kusisqas kasharqanku.

¹⁵ May chhika hermanos, Jehová Diosman may agradecesqas kashanku, imastachus Diospa llajtan qowasqanchejmanta. Asiapi sirvej uj qhariwarmi, jinata nerqa:  “Uj juchʼuy llajtitaman kachawarqayku. Chayrayku wakin kuti Diospa llajtanmanta karupi kasqaykuta yuyaj kayku. Qonqapojtaj kayku mundontinpi predicakushasqanmanta. Jinapis JW Broadcasting nisqata qhawaspa, reparakorqayku mundontinpi hermanosniyku kasqanta. Chay llajtitamanta hermanospis JW Broadcasting nisqata qhawaspa, mayta kusikunku. Ninkutaj Diospa Llajtanta Kamachejkunata astawan rejsisqankuta. Diospa llajtanmanta kasqankutataj, may jatunpaj qhawasqankuta”, nispa.

16. 1) ¿Imaspitaj churasqanchej qolqeta apaykachakushallasqataj? 2) ¿Imaschus Diospa llajtanpi ruwakusqan yanapashawanchejchu?

¹⁶ Mundontinpi casi 2.500 Tantakuna Wasista ruwakushan, wakintataj allinchakushan. Honduras suyumanta uj congregacionmanta hermanosqa nerqanku: “Mayta munarqayku uj Tantakuna Wasiyoj kayta. Mundontinmanta hermanos qolqesitunkuwan yanapakusqankuraykutaj uj Tantakuna Wasiyoj kayku. May kusisqapuni kashayku Diospa llajtan mundontinpi uj familia jina kasqanchejmanta”, nispa. Ashkha hermanosqa mayta kusikullankutaj Biblia, publicaciones ima parlayninkupi kajtin. Jinallataj sinchʼi wayra, sinchʼi para kajtin hermanos yanapajtinku. Wakin hermanostaj mayta kusikunku, carritoswan predicaspa.

17. ¿Imajtintaj nisunman Jehová Diospa yanapaynillanwan tukuy imata ruwasqanchejta?

¹⁷ Runasqa, mana entiendeyta atinkuchu yanapakusqanchej qolqellawan tukuy imata ruwasqanchejta. Uj kuti, jatun empresapi contador jina trabajaj runa, Betelta rejsej risqa. Payqa mana creeyta atisqachu, Betelpi trabajajkuna mana sueldoyoj kasqankuta. Nillataj creeyta atisqachu, tukuy imapis ruwakusqanta, runas munasqankuman jina qosqankullawan. Nitaj ni imatapis ruwakusqanta, qolqeta tantanapaj. Chantá chay contador nisqa: “Mana creenapaj jinapuni ruwasqaykichejqa”, nispa. Arí, Jehová Diospa yanapaynillanwan tukuy imata ruwanchej (Job 42:2).

18. 1) ¿Ima bendicionestataj japʼisunchej kapuyninchejwan yanapakojtinchej? 2) Wawasninchejman, kunallanraj bautizakojkunaman ima, ¿imaynatataj yachachisunman qolqesitunkuwan yanapakuyta?

¹⁸ Jehová Diosqa, munan kapuyninchejwan yanapakunanchejta, jallpʼantinpi predicakunallanpajpuni. Diostaj niwanchej kapuyninchejwan yanapakojtinchej bendecinawanchejta (Mal. 3:10). Nillawanchejtaj mana michʼakuspa yanapakojtinchej, tukuy imapi allin rinawanchejta (Proverbios 11:24, 25 leey). Chantapis nillawanchejtaj may kusisqas kananchejta, imaraykuchus “aswan kusiy wajman qoriy, qorichikunamanta nisqaqa” (Hech. 20:35). Noqanchejqa wawasninchejman, kunallanraj bautizakojkunaman ima, parlasqanchejwan ruwasqanchejwantaj yachachisunman kapuyninchejwan yanapakuyta. Ajinamanta paykunaqa may kusisqa kanqanku, ashkha bendicionestataj japʼenqanku.

19. ¿Imatataj kay yachaqanapi yachakorqanchej?

¹⁹ Tukuy ima kapuwasqanchejqa Jehová Diospata. Tukuy imanchejwan Diospa llajtanta yanapakuspataj, rikuchinchej Diosta munakusqanchejta, agradecekusqanchejtataj tukuy imata noqanchejrayku ruwasqanmanta (1 Cró. 29:17). Israelitas Diospa templon ruwakunanpaj kapuyninkumanta qoshajtinku, mayta ‘kusikorqanku, Diosman tukuy sonqosninkuwan qosqankurayku’ (1 Cró. 29:9). Jehová Diospa llajtanta kapuyninchejwan yanapakunallapuni, ajinamanta may kusisqa, sonqo juntʼasqataj kasunchej.