HERMANA Sylvianaqa precursora, 27 watayojtaj. Pay nin: “Amigasneyqa kusisqa cuentariwaj kanku, karu lugarespi yanapakoj risqankumanta. Chayta uyarispaqa, sonqoy aysawaj paykuna jina ruwanaypaj. Iskayrayaspataj nikoj kani: ‘Pisi hermanoslla kanku chaypi, nichá yanapakuyta atiymanchu’”, nispa.

Ichá noqanchejpis Sylviana jina, karu lugaresman yanapakoj riyta munarqanchej. Jinapis ichá nikorqanchej: “Karu lugarespi nichá yanapakuyta atiymanchu”, nispa. Ajina kajtenqa kallpachakunallapuni. Imajtinchus Jehová Diosqa yanapawasunchej, imaynatachus ashkha hermanosta yanaparqa karu lugarespi yanapakamunankupaj, ajinata. Wakin hermanosqa, ashkha problemasta atipananku karqa. Kunanqa Madagascar suyuman ripoj hermanosmanta parlarina. Madagascarqa uj isla.

Kay 2007 watamantapacha, 11 suyusmanta * 70 kuraj hermanos Madagascarman yanapakoj riporqanku. Casi tukuyninkutaj precursores kanku. Madagascarpi tiyakoj runasqa, Bibliamanta uyarikullanku. Chantapis Madagascarmanta ashkha hermanosqa, camposninman riporqanku, Bibliamanta yachachimunankupaj. Kunanqa wakin hermanospa experienciasninkumanta parlarina.

Hermanonchej Louismanta señoran Perrinemantawan parlarina. Paykunaqa 30 watayoj jina kanku. Kay 2012 watapitaj Francia suyumanta Madagascarman riporqanku. Niraj ripushaspataj, unaytaña piensasqanku, waj suyuman yanapakoj ripunankupi. Hermana Perrine nin: “Mayta manchikoj kani, waj suyuman ripuyta. Phutikojtaj kani, familiayta, hermanosta, wasiyta, waj ruwanasniytapis saqepunaymanta. Pero chay manchikuyta atipaytawan Madagascarman riporqayku. Chaypeqa Jehová Dios maytapuni yanapawarqayku. Chaytaj Diospi astawan atienekunaypaj yanapawarqa”, nispa. Hermano Louistaj nin: “Kay suyupi primera vez Jesuspa Wañuyninta Yuyarinapaj tantakuyman  rerqayku, chay chʼiseqa 10 estudiosniykupuni jamorqanku”, nispa.

Louiswan Perrinewanqa, jatun llakiykunapi rikukuspa, Diospa yanapayninta mañakorqanku. Ajinamanta Madagascarpi qhepakunallankupajpuni (Fili. 4:13). Hermano Louis nin: “Jehová Dios uyariwasqaykuta repararqayku. Imajtinchus sonqo tiyaykuyta qowarqayku. Franciamanta amigosniykupis cartasnejta sonqochawarqayku. Maytataj kallpachawarqayku ñaupajllamanpuni rinaykupaj. Jinamanta mana Franciaman kutiporqaykuchu. Runastataj Bibliamanta yachachishallaykupuni”, nispa (Fili. 4:6, 7; 2 Cor. 4:7).

Jehovaqa, Louista Perrinetawan mayta bendicerqa, chay llakiyta aguantasqankurayku. Louis nin: “Octubre de 2014 watapi, Franciaman invitawarqayku Casarasqa Cristianospaj Escuelaman *. Chayman reyqa uj sumaj bendición karqa”, nispa. Louiswan Perrinewanqa mayta kusikorqanku, chay escuelamanta Madagascarllamantaj kachasqankumanta.

Hermanonchej Didier señoran Nadinewanqa Franciamanta kanku. Paykunaqa 2010 watapi, Madagascarman riporqanku. Chay kutipajqa 50 watayoj jina karqanku. Didier nin: “Jóvenes kashaspaqa precursores karqayku. Chantá kinsa wawasniykuta uywarqayku. Kinsantinku jatunyarqojtinkuña, piensarerqayku waj suyuman yanapakoj rinaykupi”, nispa. Nadinetaj nin: “Wawasniyta saqeyta mayta manchikoj kani. Pero uj pacha wawasniyku jinata niwarqayku: ‘Waj suyuman predicaj ripunkichej chayqa, maytapuni kusichiwasqayku’, nispa. Chaytaj mayta kallpachawarqayku. Chantá Madagascarman riporqayku. Wawasniykuwanqa sapa kuti parlariykupuni, karupi kajtiykupis”, nispa.

Didierwan Nadinewanqa, malgache parlayta mana yachakuyta atillarqankuchu. Chayrayku Nadine asirispa jinata nerqa: “Niña 20 watayojchu kayku”, nispa. Paykunaqa qallariypi francés parlaypi congregacionman risharqanku. Chaymantaraj malgache parlaypi congregacionman cambiakorqanku. Nadine nin: “Wasimanta wasi predicashaspaqa, ashkha kʼacha runasta tariyku. Paykunaqa Bibliamanta mayta yachakuyta munanku. Chay runasqa, Bibliata estudiachejtiyku mayta agradecekuwayku. Qallariypeqa, mana creeyta atillarqanichu, ashkha runasman yachachishasqayta. Kay suyupi precursora jina Diosta sirvispaqa mayta kusikuni. Sapa paqarin jatarispa jinata nini: ‘Predicamuspa, watejmanta Diosta jatunchasaj’”, nispa.

Hermanonchej Didierqa, malgache parlayta yachakushajtin imachus pasasqanmanta yuyarikullanpuni. Pay nin: “Uj pacha, tantakuypi tapuykunata ruwasharqani. Hermanos kutichimusqankuta mana entiendesqayraykutaj, agradecekullaj kani. Jinapi uj hermana pantasqata kutichimusqa, noqataj agradecekullarqani. Jinapis chay hermanaj qhepanpi tiyakojkunaqa, señasta ruwamuwarqanku pantaykusqanta ninawankupaj. Chantá waj hermano  comentamorqa, paytaj chay hermanaj comentasqanta allinchaykorqasina”, nispa.

Hermanonchej Thierrymanta señoran Nadiamantawan parlarina. Paykunaqa 2005 watapi, uj jatun tantakuypi Vayamos tras metas que honran a Dios nisqa dramata qhawasqanku. Chay dramaqa Timoteoj kausayninmanta karqa, sonqonkumantaj chayasqa. Chayrayku Thierrywan Nadiawanqa karu lugarman yanapakoj riyta munasqanku. Thierry nin: “Chay dramata qhawaytawan, mayta tʼajllarikorqayku. Señoraymantaj nerqani: ‘¿Maypitaj yanapakamusunman?’, nispa. Paytaj niwarqa: ‘Noqapis chayta nisharqani’”, nispa. Jinapi paykunaqa karu lugarpi yanapakamunankupaj wakichikuyta qallarerqanku. Nadia nin: “Pisimanta pisi, wakin cosasniykuta venderaporqayku. Tukuy cosasniykutaj, tawa maletaslla karqa”, nispa.

Kay 2006 watapi, Thierrywan Nadiawanqa Madagascarman riporqanku. Nadiataj nin: “Kay lugarmanta runasqa kʼachas kanku”, nispa.

Jinapis sojta watanman, uj jatun llakiypi rikukorqanku. Imajtinchus Nadiaj mamanqa, urmaykuspa umanta takarpakusqa, ujnin makintataj pʼakirpakusqa. Nadiaj mamanqa Marie-Madeleine sutikun. Payqa Franciapi tiyakusharqa. Chayrayku Nadiaqa, mamanpa doctorninwan parlarerqa. Chantataj mamanta taporqa, paykunawan Madagascarman ripuyta munasqantachus manachus. Mamantaj 80 watayojña kaspapis, paykunawan riporqa. Nadiaj mamanqa waj suyupi tiyakuymanta jinata nin: “Kay llajtaman mana yachaykukuyta atishallanichu. Pero kusikuni congregacionpi tumpitallatapis yanapakuspa. Mayta kusikuni, waway qosanwan kaypi yanapakushasqankumanta”, nispa.

Riana sutiyoj hermanomantañataj parlarina. Payqa 22 watayoj, Madagascar suyoj inti llojsimuy ladomanta, Alaotra Mangoro nisqa lugarmanta. Chay lugarqa monterara. Hermano Rianaqa colegiopi sumaj notasniyoj kasqanrayku, profesional kayta munasqa. Chaywanpis Bibliata estudiashaspa, jinata Jehová Diosman nisqa: “Colegiota tukunaypaj mana aplazakusajchu chayqa, precursor kasaj”, nispa. Rianaqa colegiota tukuytawan precursor karqa. Uj precursorpa wasinman riporqa. Uj trabajotataj maskʼakorqa wakin diasllata trabajananpaj. Hermano Riana nin: “May kusisqapuni kashani, precursor jina Diosta sirvispa”, nispa.

Familiaresnintaj mana entienderqankuchu, pay imajtinchus mana profesional kayta munasqanta. Hermano Riana nin: “Tatay, tioy, awelitaypa hermanan ima, profesional kanaytapuni munarqanku. Noqarí precursor jinallapuni Diosta sirviyta munarqani”, nispa. Chantapis hermano Rianaqa, pisi hermanoslla kanku chayman ripuyta munarqa. Riana nin: “Uj kuti, suwas wasiyman yaykuykorqanku. Casi tukuy cosasniytataj apakapusqanku. Jinapitaj Jesuspa nisqanta yuyarikorqani. Pay nerqa: ‘Valorniyoj imastaqa cielopi tantaychej’, nispa. Chayrayku Diospaj astawan llankʼayta munarqani”, nispa (Mat. 6:19, 20). Rianaqa, Madagascar suyoj ura kantunman riporqa. Chayqa, tiyakusharqa chaymanta 1.300 kilometrosninpi karqa, chʼaki lugartaj. Chaypitaj Antandroy ayllumanta runas tiyakunku. Kunantaj qhawarina imajtinchus hermano Riana chay lugarman ripusqanta.

Suwas niraj wasinman yaykuykushajtinku, uj killa ñaupajta Rianaqa Antandroy ayllumanta iskay runasman Bibliamanta yachachiyta qallarisqa. Rianaqa chay runaspa parlayninkuta tumpata yachakusqa. Astawantaj chay runasman yachachiyta munarqa. Pay nin: “Jehová Diosmanta mañakorqani, Antandroy ayllumanta runas tiyakunku chayman ripunaypaj”, nispa.

Rianataj chay lugarpi mana trabajota tariyta atillarqachu. Uj runataj jinata nirpasqa: “¿Imamantaj kayman jamunkiri?, runasqa llajtaykiman rinku trabajota maskʼakoj”, nispa. Iskay semananmantaj Rianaqa, uj jatun tantakuyman rerqa. Qolqe pisisqanraykutaj mana yacharqachu imatachus ruwananta. Jatun tantakuy tukukushajtintaj, uj hermano bolsillonman qolqeta churaykusqa. Rianataj  chay qolqewan Antandroyman kutispa, uj tiendata kicharisqa yogurta vendenanpaj. Paytaj nin: “Jehová Dios maychus tiemponpi yanapawasqanta repararqani. Chantapis Antandroy ayllumanta runasman astawan Bibliamanta yachachiyta aterqani. Congregacionpipis ashkha ruwaykuna karqa. Sapa iskay semanataj discursota qojpuni kani. Diosqa llajtannejta sumajtapuni yachachiwarqa”, nispa. Rianaqa kunankama Antandroy ayllumanta runasman Bibliamanta yachachishallanpuni.

Jehová Diosqa, bendicen paypa munayninta ruwanankupaj kallpachakojkunata (Isa. 65:16). Bendecillawasuntaj paypaj astawan ruwajtinchej, ima llakiytapis aguantajtinchej ima. Hermana Sylvianamanta parlarina. Payqa Madagascarmanta. Qallariypitaj paymanta parlarerqanchejña. Sylvianaqa yuyarqa karu lugarpi mana yanapakuyta atisqanta. Pay nin: “Noqaqa cojita kasqayrayku purispa saykʼurpanipacha”, nispa.

Cojita kaspapis Sylvianaqa, Sylvie Ann precursorawan karu llajtitaman yanapakoj riporqanku. Chaytaj karqa 2014 watapi. Jehová Diostaj Sylvianata, mayta bendicerqa. Pay nin: “Uj watata chay lugarpi yanapakusqaytawan, estudioy Doratine bautizakorqa, uj jatun tantakuypi”, nispa.

Chay hermanospa experienciasninkumanta mayta yachakusunman. Yachakusunman karu lugaresman yanapakoj rinapaj, ima llakiytapis atipajtinchejqa, Jehová Dios yanapanawanchejtapuni. Imaraykuchus Dios nin: “Noqa kallpachasqayki, yanapallasqaykitaj”, nispa (Isa. 41:10). Runasta astawan yanapaspaqa, Jehová Diosman astawan qayllaykunchej. Chantapis pisi hermanoslla tiyan chay lugarespi yanapakuspaqa, wakichikunchej paraisopi runasman yachachinapaj. Hermano Didier nin: “Karu lugarespi yanapakoyqa, wakichiwanchej paraisopi yanapakunapaj”, nispa. Noqanchejpis chay hermanos jina karu lugarman rispa tukuy sonqo yanapakamusunman.