1. ¿Imatataj Jehová Dios yachan Jesuspa Wañuyninta Yuyarinapaj tantakuyman rejtinchej? (Kay revistaj tapanta qhawariy).

JALLPʼANTINPI Jesuspa Wañuyninta Yuyarinapaj tantakuymanqa may chhika runas rinchej. Jehová Diostaj yachan imastachus sapa ujninchej ruwasqanchejta chay tantakuyman rinapaj. Yachallantaj pikunachus sapa wata chay tantakuyman risqankuta. Wakin runasqa, Jesuspa Wañuyninta Yuyarinapaj tantakuyman rinku qhatiykachasqa kaspapis. Wakintaj mana sapa semana reunionesman rispapis, Jesuspa Wañuyninta Yuyarinapaj tantakuymanqa rinkupuni. Jehová Diosqa yachan pikunachus chay tantakuyman por primera vez risqankuta. Wakin runasqa chay tantakuyman qhawarejlla rinku.

2. ¿Imatataj qhepan parrafospi yachakusunchej?

² Jehová Diosqa maytachá kusikun Jesuspa Wañuyninta Yuyarinapaj tantakuyman may chhika runas risqankumanta (Luc. 22:19). Chaywanpis Jehová Diosqa mana may chhika runas risqankumantachu kusikun, manaqa imayna sonqowanchus chay tantakuyman risqankumanta kusikun. Qhepan parrafospi yachakusunchej mana Jesuspa Wañuyninta Yuyarinapaj tantakuyllamanchu rina kasqanta, manaqa sapa semanapis. Jehová Diosqa sapa semana chay tantakuykunata munakuwasqanchejrayku wakichipuwanchej.

3. ¿Imapajtaj tantakuykunaman rinchej?

³ Tantakuykunaman rinchej Jehová Diosta jatunchanapaj, chaypi Jehová Dios yachachinawanchejpaj ima. Noqanchejqa munanchej  Jehová Dioswan, llajtanta ñaupajman apajkunawan ima yachachinawanchejta (Isa. 30:20; Juan 6:45). Jatunchakoj runastajrí mana pipis yachachinankuta munankuchu (3 Juan 9).

4. 1) ¿Imatataj rikuchinchej tantakuykunaman rispa? 2) 1 Corintios 11:23 al 26 nisqanman jina, ¿Jesuspa Wañuyninta Yuyarinapaj tantakuymanta faltakunachu kasqa?

⁴ Tantakuykunaman rispaqa rikuchinchej llampʼu sonqo kasqanchejta, Jehová Dios yachachinawanchejta munasqanchejta ima. Jesuspa Wañuyninta Yuyarinapaj tantakuymanpis mana tanqasqa jinallachu rinchej. Manaqa rinchej llampʼu sonqo kasqanchejrayku, Jesusta kasukusqanchejraykutaj. Jesús nerqa: “Kayta ruwallaychejpuni noqamanta yuyarikuspa”, nispa (1 Corintios 11:23-26 leey). Jesuspa Wañuyninta Yuyarinapaj tantakoyqa, yanapawanchej sumaj kausayta japʼinanchejpi astawan creenapaj, yuyarichiwanchejtaj Jehová Dios mayta munakuwasqanchejta. Chaywanpis Jehová Diosqa yachan mana Jesuspa Wañuyninta Yuyarinapaj tantakuyllapichu kallpachasqa kayta, sonqochasqa kaytapis necesitasqanchejta. Chayrayku payqa sapa semana tantakuykunata wakichipuwanchej, niwanchejtaj mana faltakuspa chay tantakuykunaman rinanchejta. Llampʼu sonqo kaspaqa Jehová Diosta kasukusunchej. Chantapis wakichikusunchej tantakuykunaman rinapaj, manataj tantakuykunamanta faltakusunchu.

5. ¿Imatataj llampʼu sonqo runas ruwanku?

⁵ Jehová Diosqa tukuyta tantakuykunaman wajyarikun yachachinanpaj. Sapa watataj may chhika llampʼu sonqo runas tantakuykunaman jamunku (Isa. 50:4). Wakin runasqa Jesuspa Wañuyninta Yuyarinapaj tantakuyman jamuspa tantakuykunasninchejman jamuyta qallarinku (Zac. 8:20-23). Kunallanraj tantakuykunaman jamojkuna, jinallataj noqanchejpis mayta kusikunchej Jehová Dios yachachiwasqanchejmanta. Payqa yanapawajninchej, salvawajninchejtaj (Sal. 40:17). Maytapuni kusikunchej Jehová Dioswan munasqa Wawanwan tantakuykunapi yachachiwasqanchejmanta (Mat. 17:5; 18:20; 28:20).

6. ¿Imatataj uj runa ruwasqa llampʼu sonqo kasqanrayku?

⁶ Sapa wata mayta kallpachakunchej Jesuspa Wañuyninta Yuyarinapaj tantakuyman tukuy runasta invitanapaj. Ashkha llampʼu sonqo runastaj chay tantakuyman jamunku. Uj hermanoqa pasaj wataspi uj runata Jesuspa Wañuyninta Yuyarinapaj tantakuyman invitasqa, chay runataj hermanoman nisqa: “Mana jamuyta atisajchu”, nispa. Chaywanpis chay runaqa Jesuspa Wañuyninta Yuyarinapaj tantakuyman risqa. Invitarqa chay hermanotaj chay runata rikuspa mayta kusikusqa. Chay runaj sonqontaj mayta qhallallarisqa hermanos chunka makiwan japʼisqankumanta. Chayrayku tukuy tantakuykunaman mana faltakuspa riyta qallarisqa. Watantinpitaj kinsa kutillata tantakuykunamanta faltakusqa. Chay runata imachus cambiananpaj yanapasqanmanta, invitarqa chay hermano nin: “Payqa may llampʼu sonqo”, nispa. Chayqa reparachiwanchej Jehová Diospuni chay runata llajtanman pusamusqanta. Kunantaj chay runaqa Testigoña (2 Sam. 22:28; Juan 6:44).

7. ¿Imastaj yanapawanchej llampʼu sonqo kanapaj?

⁷ Tantakuykunapi yachakusqanchej, Bibliata leesqanchejpis yanapawanchej llampʼu sonqos kanapaj. Jesuspa Wañuyninta Yuyarinapaj tantakuypaj semanas faltashajtin, tantakuykunapi Jesusmanta astawan yachakunchej, yachakullanchejtaj Jesús kʼumuykukoj sonqo kasqanrayku kausayninta qosqanta. Chantapis chay tantakuy qayllata Bibliamanta ajllasqa versiculosta leenchej, mayqenkunapichus parlan Jesuspa wañuyninmanta, kausarimuyninmantawan. Chaykunata yachaspaqa Jesucristo kausayninta noqanchejrayku qosqanta mana pisipajchu qhawasunchej. Astawanpis kallpachakusunchej Jesús jina llampʼu sonqo kanapaj, imapi rikukuspapis Diospa munayninta ruwanapaj ima (Luc. 22:41, 42).

8. ¿Imatataj Jesús ruwasqa mana manchachikusqanrayku?

⁸ Jesusqa mana manchachikoj runa karqa. Noqanchejpis pay jina kayta atisunman. Jesús mana manchachikoj runa kasqanqa sutʼi yachakorqa manaraj wañuchisqa kashajtin. Payqa yacharqa enemigosnin kʼumuykachachinankuta, jasutʼinankuta, wañuchinankutataj (Mat. 20:17-19). Chaywanpis wañuchisqa kayta mana manchachikorqachu. Chayrayku Getsemaní huertapi japʼichisqa kananpajña kashajtin apostolesninman nerqa: “Sayariychej, jaku ripuna. ¡Qhawaychej! Japʼichiwajqa qayllaykamunña”, nispa (Mat. 26:36, 46). Jinapi ashkha runas Jesusta japʼej chayarqanku. Jesustaj ñaupajman thaskirispa paykunata nerqa: ‘Noqa Jesús kani’, nispa. Chantá nillarqataj: “Saqeychej yachachisqasniy ripunankuta”, nispa (Juan 18:3-8). Chayqa sutʼita reparachiwanchej Jesús mana manchachikoj runa kasqanta. Noqanchejqa ajllasqa cristianos kaspapis chayri waj ovejasmanta kaspapis mayta kallpachakunanchej kashan Jesús jina mana manchachikunapaj.

9. 1) ¿Imaraykutaj mana tantakuykunaman riyta atillasunmanchu? 2) ¿Ejemplonchejwan carcelpi kaj hermanosta yanapasunmanchu?

⁹ Ichapis tantakuykunaman mana riyta atillasunmanchu onqosqa kasqanchejrayku, manchay phutisqa kasqanchejrayku, familiaresninchej chayri autoridades churanakuwasqanchejrayku. Ajinapi rikukuspapis tantakuykunaman mana manchachikuspa rinapaj mayta kallpachakuna. Ichapis tʼukurisunman Jehová Diosta sirvisqankurayku carcelpi kashanku chay hermanospi. Paykunataqa ejemplonchejwan yanapasunman (Heb. 13:3). Llakiyniyoj kaspapis Jehová Diosta tukuy sonqo yupaychanallapuni. Imajtinchus carcelpi kaj hermanosqa chayta yachaspa mayta kallpachakonqanku, creeyninkupis astawan sinchʼiyanqa, Jehová Diostapis kasukullanqankupuni. Apóstol Pablopis Romapi presochasqa kashaspa, hermanos Diosta tukuy sonqo sirvishallasqankutapuni yachaspa mayta kallpachakorqa (Fili. 1:3-5, 12-14). Pabloqa ichá carcelmanta kacharichisqa kananpaj pisi tiempollaña faltashajtin chayri kacharichisqa kasqantawan Hebreosman cartanta qhelqarqa. Chay cartanpi Pabloqa Diosta tukuy sonqo sirvej hermanosman nerqa: “Familia jina munanakullaychejpuni”, nispa. Nillarqataj tantakuykunaman riyta ama saqenankuta (Heb. 10:24, 25; 13:1).

10, 11. 1) ¿Pikunatataj Jesuspa Wañuyninta Yuyarinapaj tantakuyman invitasunman? 2) Efesios 1:7 nisqanman jina, ¿imaraykutaj paykunata invitanapuni kasqa?

¹⁰ Mana manchachikoj runas kasqanchejta rikuchisunman Jesuspa Wañuyninta Yuyarinapaj tantakuyman familiaresninchejta, trabajomanta compañerosninchejta, vecinosninchejta ima invitarispa. Paykunata invitarispaqa Jehová Diosman Jesusmanwan may agradecesqa kasqanchejta rikuchisunchej. Jehová Dioswan Jesuswanqa juchamanta kacharichiwarqanchej. Munanchejtaj familiaresninchej, trabajomanta compañerosninchej, vecinosninchej ima chayta reparanankuta. Munallanchejtaj yachanankuta imaynatachus ‘Diospa jatun khuyakuyninta’ tarinankuta (Efesios 1:7 leey; Apo. 22:17).

¹¹ Chantapis tantakuykunaman rispaqa rikuchillanchejtaj munakuyniyoj runas kasqanchejta.  Jehová Dioswan Jesuswanpis rikucherqanku munakuyniyoj kasqankuta.

12. 1) ¿Imaraykutaj nisunman tantakuykuna Jehová Diosta Jesustawan astawan munakunapaj yanapawasqanchejta? 2) 2 Corintios 5:14, 15 nisqanman jina, ¿pi jina kanapajtaj kallpachakunanchej kasqa?

¹² Jehová Diosta, Jesustawan munakusqanchejrayku tantakuykunaman rinchej. Tantakuykunataj yanapawanchej astawan paykunata munakunapaj. Chantapis tantakuykunapeqa imatachus paykuna noqanchejrayku ruwasqankuta sapa kuti yuyarichiwanchej (Rom. 5:8). Jesuspa Wañuyninta Yuyarinapaj tantakuytaj yuyarichiwanchej Jehová Dios may jinatapuni munakuwasqanchejta. Yuyarichillawanchejtaj mana payta rejsejkunatapis munakusqanta. Noqanchejqa Jehová Diosman may agradecesqa kasqanchejrayku sapa día kallpachakunchej Jesús jina kanapaj (2 Corintios 5:14, 15 leey). Jehová Dios Wawanta qosqanrayku sonqonchej aysawanchej payta jatunchanapaj. Diostaqa jatunchasunman tantakuykunapi sonqomantapacha comentaspa. 

13. ¿Imata ruwaspataj Jehová Diosta, Jesusta ima mayta munakusqanchejta rikuchisunman?

¹³ Jehová Diosta, Jesusta ima mayta munakusqanchejta rikuchisunman tukuy imata paykunarayku ruwaspa. Ichapis tantakuykunasninchejman rinapaj mayta kallpachakushanchej. Wakinpataqa semanapi tantakuykunasninchej ichapis trabajonchej pasayta qallarin. Chaynejta ichapis may saykʼusqa kashasunman. Chantapis sabadosta chayri domingosta samariyta munaspapis tantakuyninchejman rinchej. Saykʼusqa kaspapis tantakuykunaman risqanchejqa mana qhasichu, imaraykuchus Jehová Diosqa yachan mayta kallpachakushasqanchejta. Chantapis tantakuykunaman rinanchejpaj tukuy atisqanchejta kallpachakuspaqa, Jehová Diosta mayta munakusqanchejta rikuchisunchej. Jehová Diostaj chayta mana qonqanqachu (Mar. 12:41-44).

14. ¿Imatataj Jesusmanta yachakusunman?

¹⁴ Jesusmantaqa mayta yachakusunman. Payqa wajkunaj allinninkutapuni maskʼarqa. Payqa mayta munakuwasqanchejrayku kausayninta qorqa. Mana chayllachu, payqa sapa día yachachisqasninpa allinninkuta ñaupajman churarqa. Chayrayku Jesusqa may saykʼusqa kaspapis chayri phutisqa kaspapis yachachisqasninwan tantakoj (Luc. 22:39-46). Chantapis Jesusqa yachachisqasninta sirverqa, manataj suyarqachu sirvinankuta (Mat. 20:28). Jehová Diosta hermanosninchejtawan Jesús jina tukuy sonqo munakusunchej  chayqa, tukuy atisqanchejta ruwasunchej Jesuspa Wañuyninta Yuyarinapaj tantakuyman rinapaj, sapa semana tantakuykunaman rinapajpis.

15. ¿Pikunata yanapanapajtaj astawan kallpachakusunman?

¹⁵ Diospa llajtanmanta kasqanchejrayku tukuy atisqanchejta ruwanchej Jehová Diosmanta runasman yachachimunapaj, ajinamanta paykunapis Diospa llajtanmanta kanankupaj. Chaywanpis astawan kallpachakunanchej tiyan chiriyapoj hermanosninchejta yanapanapaj (Gál. 6:10). Paykunata munakusqanchejta rikuchisunman tantakuykunaman jamunankupaj kallpachaspa, Jesuspa Wañuyninta Yuyarinapaj tantakuyman wajyarispa ima. Chiriyapoj hermanonchej Tatanchej Jehovaman kutinpojtin mayta kusikunchej, imaynatachus Jehová Diospis, Jesuspis kusikunku, ajinata (Mat. 18:14).

16. 1) ¿Imapajtaj purajmanta kallpachanakuna kasqa? 2) ¿Imapajtaj tantakuykuna yanapawasunchej? 3) ¿Imatataj Juan 3:16 yuyarichiwanchej?

¹⁶ Kunanmantapacha kallpachakuna tukuy runasta Jesuspa Wañuyninta Yuyarinapaj tantakuyman invitanapaj. Chay tantakoyqa kay watapi 19 de abril chʼisi apakonqa (“Tukuy runasta invitana” nisqa recuadrota qhawariy). Watantintaj purajmanta kallpachanakuna tantakuykunaman mana faltakuspa rinapaj. Diamanta diaqa juicio pʼunchay aswan qayllitapiña kashan. Chayrayku ama tantakuykunamanta faltakunachu. Tantakuykunaqa yanapawasunchej llampʼu sonqo kanapaj, mana manchachikunapaj, munakuyniyoj kanapajtaj (1 Tes. 5:8-11). Jehová Dioswan Jesuswan mayta munakuwasqanchejmanta agradecesqa kasqanchejqa ruwasqasninchejpi yachakuchun (Juan 3:16 leey).