1, 2. 1) ¿Imaraykutaj Jesuspa wañuyninta pisi imasllawan yuyarikunchej? 2) Jesusmanta yachakushaspa, ¿imayna kasqantataj reparasunchej?

TUKUYPIS yachanchej imaynatachus Jesuspa Wañuyninta Yuyarinapaj tantakuy apakusqanta. Chay tantakuypajqa mana ashkha imastachu wakichikun. Chaywanpis, ¿imaraykutaj Jesuspa wañuyninta pisi imasllawan yuyarikunchej?

² Imaraykuchus Jesús yachacherqa wañuyninta yuyarikunapaj pisi imaslla necesitakusqanta. Tʼukuna imastapis pisi parlayllapi, entiendenapaj jinallataj yachacherqa (Mat. 7:28, 29). Kunantaj astawan yachakusunchej Señorpa Cenanmanta. Yachakullasuntaj imatachus Jesús ruwasqanta, imatachus nisqantawan. Ajinamantataj reparasunchej Jesús may llampʼu sonqopuni kasqanta, mana manchachikusqanta, maytataj munakuwasqanchejta. Yachakullasuntaj imasta ruwaspachus Jesús jina kananchejta.

3. 1) Mateo 26:26 al 28 versículos nisqanman jina, ¿Señorpa Cenan ruwakunanpaj ashkha imastachu wakichikorqa? 2) ¿Imawantaj ninakunku mana levadurayoj tʼantawan, vinowan ima?

³ Jesusqa Pascuata mikhuytawan 11 apostolesninman kamacherqa wañuyninta yuyarinankuta. Chay Cenapajqa mana ashkha imastachu wakicherqanku. Manaqa Pascuata mikhusqankumanta puchoj mana levadurayoj tʼantallata mikhorqanku, puchoj vinollatataj ujyarqanku (Mateo 26:26-28 leey). Chaypacha Jesusqa apostolesninman nerqa: ‘Kay tʼanta cuerpoywan ninakun, vinotaj yawarniywan ninakun, chaytaj jichʼasqa kanqa ashkha runaspa juchasnin pampachasqa kananpaj’, nispa. Apostolesqa yacharqanku chay chʼisipaj pisi imaslla necesitakusqanta.

4. ¿Imatataj Jesús Martaman nisqa?

 ⁴ Señorpa Cenanpaj killasllaña faltashajtin Jesusqa Lazarota, Martata, Mariatawan waturikamorqa. Paykunamantaj yachacherqa. Martatajrí ashkha ruwanaswan musphasharqa, sumaj mikhunata Jesuspaj waykʼupuspa. Jesustaj sumajllawan nerqa: “Imaschus necesitakusqanqa pisilla kanku chayri ujlla”, nispa (Luc. 10:40-42). Chayrayku Jesusqa apostolesninwan cenananpaj pisi imasllatataj wakicherqa. Kunantaj qhawarinachej imatachus Jesusmanta yachakusqanchejta.

5. 1) Jesús apostolesninwan cenananpaj pisi imasllata wakichisqanta yachaspa, ¿imatataj rikucherqa? 2) Filipenses 2:5 al 8 versículos nisqanman jina, ¿imajtintaj nisunman Jesús kʼumuykukoj sonqo kasqanta?

⁵ Jesusqa parlasqanwan ruwasqanwantaj rikucherqa kʼumuykukoj sonqo kasqanta. Chayraykuchá apostolesninwan cenananpaj pisi imasllata wakicherqa (Mat. 11:29). Jesusqa yacharqa tukuy runasrayku wañunanta. Yachallarqataj Jehová Dios kausarichimuspa Reyta jina cielopi churananta. Chaywanpis mana jatunchakorqachu, wañuynin sumaj yuyarisqa kananpaj uj jatun mikhuyta waykʼuchispa. Astawanpis discipulosninman nerqa wañuyninta yuyarinankupaj tantakuyta watapi uj kutillata ruwanankuta, pisi imasllawantaj (Juan 13:15; 1 Cor. 11:23-25). Ajinamanta Jesusqa kʼumuykukoj sonqo kasqanta rikucherqa. Maytapuni kusikunchej Reyninchej Jesús kʼumuykukoj sonqo kasqanmanta (Filipenses 2:5-8 leey).

6. ¿Imaynatataj sufrispapis Jesús jina kʼumuykukoj sonqo kasunman?

⁶ Jesús jina kʼumuykukoj sonqo kanapajqa, mana allinnillanchejtachu maskʼana, manaqa wajkunaj allinnintaraj maskʼana (Fili. 2:3, 4). Jesusqa mayta sufrichinankuta, wañuchinankutataj yachaspapis, discipulosninmanta astawan llakikorqa. Chayrayku chay chʼisi japʼichisqa kanankama discipulosninta yachacherqa, sonqocharqa, kallpacharqataj (Juan 14:25-31). Chayta ruwaspa rikucherqa wajkunaj allinnintaraj maskʼasqanta. Noqanchejpis Jesús jina kʼumuykukoj sonqo kasunman wajkunaj allinninkuta maskʼaspa.

7. Jesús apostolesninman wañuyninta yuyarinankuta kamachisqantawan, ¿imatataj rikucherqa?

⁷ Jesusqa apostolesninman wañuyninta yuyarinankuta kamachisqantawan mana manchachikoj kasqanta rikucherqa.  Jesusqa pʼenqaypi rikhurichisqa kananta yachaspapis, Diospa contranta parlan ninankuta yachaspapis, wañuchisqa kananta yachaspapis, mana manchachikuspa Diospa munayninta ruwarqa (Mat. 26:65, 66; Luc. 22:41, 42). Jesusqa Jehová Diosta kasukorqa, sutinta jatuncharqa, Jehová Dioslla sumaj kamachej kasqanta rikucherqa. Kausaynintapis qorqa juchasninchejmanta pesachikuspa wiñay kausayta japʼinanchejpaj. Chantapis discipulosninta wakicherqa ima problematapis atipanankupaj.

8. 1) ¿Imatataj Jesús discipulosninman nerqa? 2) ¿Imaynatataj Jesuspa discipulosnin mana manchachikoj kasqankuta rikucherqanku?

⁸ Jesusqa mana manchachikoj kasqanta rikuchillarqataj discipulosninpa allinninta maskʼaspa, nitaj payllapichu yuyarqa. Jesusqa Judasta kachapuytawan discipulosninman tʼantata mikhunankupaj qorqa, vinotapis ujyanankupaj qorqa, kikinta ruwanankutataj kamacherqa wañuyninta yuyarinankupaj. Ajinamanta ajllasqa cristianos yuyarikunankupaj imapajchus Jesús wañusqanta, mosoj tratopi kasqankutataj (1 Cor. 10:16, 17). Jesusqa discipulosnin mana Diosta wasanchanankupaj, cielopitaj kanankupajqa nerqa imatachus paywan Tatanwan discipulosnin ruwanankuta munasqankuta (Juan 15:12-15). Chantataj ima pruebaspichus rikukunankuta nerqa. Nillarqataj pay jina kallpachakunankuta chayri mana manchachikunankuta (Juan 16:1-4a, 33). Tiemponman Jesuspa discipulosnenqa Jesús jina mana manchachikoj kasqankuta rikuchillarqankupuni. Mana manchachikoj kasqankuta rikucherqanku purajmanta yanapanakunankupaj ñakʼarispa (Heb. 10:33, 34).

9. ¿Imasta ruwaspataj mana manchachikoj kasqanchejta rikuchisunman?

⁹ Kay tiempopipis Jesús jinallataj mana manchachikoj kasqanchejta rikuchisunman.  Chaytataj rikuchisunman Jehová Diosta yupaychasqankurayku qhatiykachasqa hermanosta yanapaspa. Wakin hermanosninchejtaqa qhasillamanta carcelman wisqʼaykunku. Ajinapi rikukoj hermanosta yanapanapaj tukuy atisqanchejta ruwananchej tiyan, ichapis kacharinankupaj autoridadeswan parlasunman (Fili. 1:14; Heb. 13:19). Mana manchachikoj kasqanchejta rikuchillasunmantaj Jehová Diosmanta “mana manchachikuspa” willamuspa (Hech. 14:3). Runas qhatiykachawajtinchejpis, churanakuwajtinchejpis Jesús jina Diospa Gobiernonmanta willamushallanchejpuni. Kunantaj qhawarinachej imastawanchus ruwayta atisqanchejta mana manchachikunapaj.

10. ¿Imastataj ruwasunman Jesuspa Wañuyninta Yuyarinapaj tantakuypaj semanas faltashajtin?

¹⁰ Mana manchachikunapajqa Jesucristo wañusqanrayku wiñay kausayta japʼinanchejpi tʼukurisunman (Juan 3:16; Efe. 1:7). Chaytataj ruwasunman Jesuspa Wañuyninta Yuyarinapaj tantakuypaj semanas faltashajtin. Chantapis chay diaspaj ajllasqa versiculosta leesunman, tʼukurisunmantaj imaschus pasasqanpi niraj Jesusta wañuchishajtinku. Ajinamanta Jesuspa Wañuyninta Yuyarinapaj tantakuypi, tʼantata vinotawan qhawaspa Jehová Dios preciowan juchamanta kacharichiwasqanchejta entiendesunchej. Entiendellasuntaj Jesucristo mayta munakuwasqanchejrayku kausayninta qosqanta. Jesuswan Jehová Dioswan imastachus noqanchejrayku ruwasqankuta yachaspaqa, astawan Jehová Diospi suyakusunchej, tukukuykamataj imatapis aguantasunchej (Heb. 12:3).

11, 12. ¿Imastataj yuyarichiwanchej Jesuspa Wañuyninta Yuyarinapaj tantakuy?

¹¹ Jesuspa Wañuyninta Yuyarinapaj tantakoyqa, mana Jehová Dios preciowan kacharichillawasqanchejtachu yuyarichiwanchej.  Manaqa yuyarichillawanchejtaj Señorninchej Jesús kʼumuykukoj sonqo kasqanta, manataj manchachikoj kasqanta. Jesús ajina kasqanmantataj mayta kusikunchej. Imajtinchus kunanqa cielopi Kuraj kaj Sacerdote jina Diosmanta yanapata mañapushawanchej (Heb. 7:24, 25). Chayrayku tukuy sonqo Jesusta kasukuna. Pay kamachiwarqanchej wañuyninta yuyarinanchejta (Luc. 22:19, 20). Jesuspa Wañuyninta Yuyarinapaj tantakuytataj sapa wata ruwanchej, 14 de nisán ima diamanchus urmasqanman jina.

¹² Jesuspa Wañuyninta Yuyarinapaj tantakuy pisi imasllawan ruwakusqanqa, yuyarichillawanchejtaj mayta munakuwasqanchejrayku kausayninta qosqanta. Jesusqa kay jallpʼapi kashaspa runasta munakusqanrayku rejsisqa karqa.

13. 1) Juan 15:9 chanta 1 Juan 4:8 al 10 versículos nisqanman jina, ¿imaynatataj Jehová Dioswan Jesuswan munakuwasqanchejta rikucherqanku? 2) ¿Tukuytachu yanapawanchej Jehová Dioswan Jesuswan munakuwasqanchej?

¹³ Jesusqa kay jallpʼapi kashaspa Tatan jinapuni mayta munakuwasqanchejta rikucherqa (Juan 15:9; 1 Juan 4:8-10 leey). Chay jinatapuni munakuwasqanchejrayku kausayninta qorqa. Imastachus Jehová Dioswan Jesuswan ruwasqankoqa, tukuyta yanapawanchej ajllasqa cristianos kajtinchejpis chayri ‘waj ovejasmanta’ kajtinchejpis (Juan 10:16; 1 Juan 2:2). Jesucristo mayta munakuwasqanchejta, allinninchejtataj maskʼasqanta reparallasunmantaj, paypa wañuyninta yuyarinapaj tantakuy pisi imasllawan ruwakusqanpi.

14. Jesús ajllasqa cristianosta munakusqanrayku, ¿ashkha imaswanchu wañuyninta yuyarinankuta kamachisqa?

¹⁴ Jesusqa ajllasqa cristianosta munakusqanrayku wañuyninta yuyarinankupaj mana kamacherqachu uj jatun mikhuyta wakichinankuta, manaqa pisi imasllawan yuyarinankuta kamacherqa. Chayrayku ajllasqa cristianosqa unaymantapachaña imapi rikukuspapis Jesuspa Wañuyninta Yuyarinapaj tantakuyta ruwayta atillarqanku. Wakenqa carcelpi wisqʼasqa kaspapis chay tantakuyta ruwarqanku (Apo. 2:10). Chayta ruwaspaqa Jesuspa nisqanta juntʼarqanku. Jesusqa kamacherqa wañuyninta yuyarinankuta.

15. ¿Imaynatataj hermanonchej Harold King Jesuspa Wañuyninta Yuyarikusqa?

¹⁵ Jehová Diosta munakojkunaqa tukuy atisqankuta ruwarqanku Jesuspa Wañuyninta Yuyarinankupaj. Noqanchejpis chay tantakuyta ruwashallanchejpuni, wakin kutis mana atinapaj jina kajtinpis. Chaymanta parlaspa hermanonchej Harold Kingmanta parlarina. Paytaqa China suyupi uj carcelpi sapallanta wisqʼaykorqanku. Chayrayku Jesuspa wañuyninta yuyarinanpajqa imastachus tarisqallanwan tʼantata vinotawan pakayllapi wakichej. Fechata yachananpajtaj tanteyarej. Jesuspa Wañuyninta Yuyarinapaj chʼisitaj sapallan carcelpi takej, orakoj, discursajtaj.

16. ¿Imaynatataj wakin hermanasninchej Jesuspa Wañuyninta Yuyarikusqanku?

¹⁶ Wakin hermanasninchejmanta parlarina. Paykunaqa Iskay kaj Guerra Mundialpi carcelpi wisqʼasqas karqanku. Paykunaqa Jesuspa Wañuyninta Yuyarinapaj tantakuyta ruwanankupaj kausayninkuta wañuy pataman churarqanku. Chay tantakuypaj pisi imaslla necesitakusqanrayku pakayllapi Jesuspa Wañuyninta Yuyarinapaj tantakuyta ruwayta aterqanku. Paykuna nerqanku: “Uj pacha uj asientoman yuraj telata qhataykorqayku, chay patamantaj tʼantata vinotawan churarqayku. Muyuyninpitaj sayaykorqayku. Mana wajkunawan reparachikunaykupajqa mana  luzta japʼicherqaykuchu, manaqa uj velallata japʼichikorqayku. [...] Chay jinamanta rikucherqayku Diospa sutinta tukuy kallpaykuwan jatunchanallaykutapuni”, nispa. Chay hermanasqa sinchʼi creeyniyojpuni karqanku. Sutʼita reparanchej Jesús mayta munakuwasqanchejta wañuyninta pisi imasllawan yuyarikunata kamachiwasqanchejpi.

17. ¿Imaspitaj piensarisunman?

¹⁷ Jesuspa Wañuyninta Yuyarinapaj tantakuy qayllaykamushasqanrayku, piensarisunman imaynatachus wajkunata Jesús jina munakunanchejpi. Piensarillasunmantaj hermanosninchejpa allinninkuta maskʼashasqanchejpichus manachus. Chantapis piensarisunman imallatachus hermanosninchej ruwayta atisqankupi. Chantá tukuy atisqanchejta kallpachakusunman Jesús jina wajkunata khuyakuyta yachanapaj (1 Ped. 3:8).

18, 19. 1) Manaña Jesuspa Wañuyninta Yuyarinapaj tantakuyta ruwajtinchejpis, ¿imatataj mana qonqasunchu? 2) ¿Imapajtaj kallpachakunanchej kashan?

¹⁸ Tumpamantawan Jesusqa jatun ñakʼariy tiempopi jamonqa, jallpʼapi kaj ajllasqa cristianostataj cieloman pusakaponqa. Chay kutimantapachataj manaña Jesuspa Wañuyninta Yuyarinapaj tantakuyta ruwasunchu (1 Cor. 11:26; Mat. 24:31).

¹⁹ Manaña Jesuspa Wañuyninta Yuyarinapaj tantakuyta ruwajtinchejpis, mana qonqasunchu Jesús kʼumuykukoj sonqo kasqanta, mana manchachikoj kasqanta, mayta munakuwasqanchejtataj. Chantapis Paraisopeqa Jesuspa Wañuyninta Yuyarinapaj tantakuymanta wajkunaman willariyta atisunchej. Chayta uyarispa maytachá kallpachakonqanku. Chaywanpis noqanchejqa kunan kallpachakunanchej kashan Jesús jina kʼumuykukoj sonqo kanapaj, mana manchachikoj kanapaj, mayta wajkunata munakunapaj ima. Chayta ruwanapaj kallpachakojtinchejqa Jehová Dios mayta bendeciwasunchej (2 Ped. 1:10, 11).