1. ¿Imatataj David ruwasqa Jehová Diosta munakusqanrayku?

REY David nerqa: “Tata Diosqa jatunmin, mayta yupaychanapaj jinapuni”, nispa (Sal. 145:3). Davidqa Jehová Diosta mayta munakorqa. Chayrayku Jehová Diosta ‘tantakuypi yupaycharqa’ (Sal. 22:22; 40:5). Noqanchejpis David jina Jehová Diosta munakunchej. Chayrayku pay jina nisunman: “Ñawpa tatayku Israelpa Señornin Tata Dios, qanqa wiñaymanta wiñaypaj bendecisqa kay”, nispa (1 Cró. 29:10-13).

2. 1) ¿Imaynatataj Jehová Diosta jatunchasunman? 2) ¿Tukuypis comentayta atillanchejchu? 3) ¿Imatataj qhepan parrafospi yachakusunchej?

² Jehová Diosta jatunchasunman tantakuykunapi comentaspa. Chaywanpis wakin hermanosqa mayta comentayta munaspapis manchachikunku. Chayrayku qhepan parrafospi yachakusunchej imaraykuchus tantakuypi comentana kasqanta. Chaymantataj yachakusunchej imatachus ruwana kasqanta comentayta mana manchachikunapaj. Yachakullasuntaj imaynatachus wakichikuna kasqanta sumajta comentanapaj.

3. Hebreos 13:15 nisqanman jina, ¿imaraykutaj tantakuykunapi comentana kasqa?

³ Comentaspa Jehová Diosta jatunchanchej (Sal. 119:108). Tantakuypi comentaspaqa Jehová Diosman “uj jaywanatapis jaywashasunman jina” (Hebreos 13:15 leey). Chaytataj sapa uj ruwananchej kashan. Imaraykuchus ni pipis cuentanchejmanta comentaspa Jehová Diosta jatunchapuwasunmanchu.

4, 5. ¿Jehová Dios niwanchejchu comentashaspa sumajta parlananchejta?

⁴ Jehová Diosqa mana niwanchejchu tukuypis comentashaspa  sumajta parlananchejta. Imaraykuchus payqa yachan tukuypis mana kikinchu kasqanchejta, yachallantaj mana kikin tiempoyojchu kasqanchejta, waj imastawan. Chayrayku Jehová Diosqa tantakuypi comentajtinchej mayta kusikun. Imatachus Jehová Dios israelitasman nisqanpi piensarina. Pay nerqa kapuyniyoj israelitas ovejata, chayri cabrata apapunankuta, pobrestaj “iskay tortolasta, chayrí iskay paloma irpasta”. Manapuni chaykunata apayta atejkunataj “iskay kilos sumajnin ñutʼu jakʼuta” apapunankuta nerqa (Lev. 5:7, 11). Jakʼu barato kajtinpis, Jehová Diosqa “sumajnin ñutʼu jakʼuta” qojta jatunpaj qhawaj.

⁵ Chayqa reparachiwanchej Jehová Diosqa atisqallanchejta mañawasqanchejta. Chayrayku payqa mana niwanchejchu comentashajtinchej Apolos jinapuni chayri Pablo jinapuni sumajta parlananchejta (Hech. 18:24; 26:28). Astawanpis payqa munan comentananchejpaj tukuy atisqanchejta kallpachakunanchejta. Wajcha viudamanta yuyarikunachej. Payqa iskay qolqesitusta qolqe churana cajasman churarqa. Tukuy kapusqanta churasqanraykutaj, Jehová Diosqa chay viudata jatunpaj qhawarqa (Luc. 21:1-4).

6. 1) Hebreos 10:24, 25 nisqanman jina, ¿comentajkunata uyarispa kusikunchejchu? 2) ¿Imaynatataj comentajkunata agradecekusunman?

⁶ Tantakuykunapi comentaspaqa purajmanta kallpachanakunchej (Hebreos 10:24, 25 leey). Mayta kusikunchej tantakuypi tukuy imaymana comentariosta uyarispa. Por ejemplo, kusikunchej wawasta pisi parlayllapi, tukuy sonqotaj comentajta uyarispa. Kusikullanchejtaj uj hermanota chayri uj hermanata imatachus yachakusqanmanta tukuy sonqo comentajta uyarispa. Mayta kusikullanchejtaj manchachikojkunata comentajta uyarispa chayri parlayninchejta yachakushajkunata uyarispa (1 Tes. 2:2). Comentajkunataqa tantakuy tukukojtin agradecekusunman. Ichapis nisunman comentariosninku mayta kallpachawasqanchejta. Purajmanta kallpachanakunapajtaj noqanchejpis comentasunman (Rom. 1:11, 12).

7. ¿Imaraykutaj nisunman tantakuykunapi comentay allinninchejpaj kasqanta?

⁷ Tantakuykunapi comentayqa allinninchejpaj (Isa. 48:17). Tantakuykunapi comentayta munaspaqa, sumajta wakichikusunchej. Jinamantataj Diospa Palabranta sumajta  entiendesunchej, chayman jinataj kausakusunchej. Chantapis comentanapaj wakichikojtinchejqa, tantakuypi mana puñurpasunchu, imaraykuchus comentanapaj makita sapa rato oqharishasunchej. Tantakuykunapi comentaspaqa, imastachus comentasqanchejta mana qonqapusunchu.

8, 9. 1) Malaquías 3:16 nisqanman jina, ¿Jehová Dios comentananchejpaj kallpachakusqanchejta jatunpajchu qhawan? 2) Tantakuykunapi comentanapuni kasqanta yachaspapis, ¿comentayta atillanchejchu?

⁸ Jehová Diosqa kusikun comentajtinchej. Jehová Diosqa comentasqanchejta uyarin. Tantakuykunapi comentanapaj kallpachakusqanchejtataj jatunpaj qhawan (Malaquías 3:16 leey). Chantapis bendicioneswan juntʼachimuwanchej (Mal. 3:10).

⁹ Reparanchej jina, tantakuykunapi comentananchejpuni kashan. Chaywanpis ichá wakenqa comentayta manchachikunchejraj. Ajina kajtinpis ama phutikunachu. Imaraykuchus qhepan parrafospi Bibliaj yuyaychaykunasninta qhawarisunchej, Diospa wakin kamachisninmantapis yachakusunchej. Chaykunaqa yanapawasunchej mana manchachikuspa ashkhata comentanapaj.

10. 1) ¿Comentashaspa manchachikunchejchu? 2) Comentayta manchachikuspa, ¿imatataj rikuchinchej?

¹⁰ Ichapis manchachikunchej comentashajtinchejpuni qallunchej watakunawanchejta. Chaywanpis mana noqallanchejchu manchachikunchej. Wakin comentajkunapis comentashaspa tumpata manchachikunkupuni. Sapa ujninchej reparakunanchej tiyan imatachus manchachikusqanchejta. Wakenqa ichapis manchachikunchej comentashaspapuni comentarionchejta qonqarpananchejta chayrí pantaykunanchejta. Wakintaj ichapis manchachikunchej comentarionchej mana wajkunajta jinachu sumaj kananta. Ajinata manchachikuspaqa rikuchinchej kʼumuykukoj sonqo kasqanchejta, wajkunatataj kurajninchejta jina qhawasqanchejta. Jehová Diostaj llampʼu sonqosta  munakun (Sal. 138:6; Fili. 2:3). Chaywanpis Jehová Diosqa munan comentaspa payta jatunchananchejta, hermanostapis tantakuykunapi kallpachananchejta (1 Tes. 5:11). Jehová Diosqa munakuwasqanchejrayku comentanapaj kallpata qowasunchej.

11. ¿Imatataj Biblia yuyarichiwanchej?

¹¹ Bibliaj wakin yuyaychaykunasninta qhawarinachej. Bibliaqa yuyarichiwanchej parlashaspa tukuypis pantasqanchejta (Sant. 3:2). Chayrayku Jehová Dioswan, hermanosninchejwanqa, mana suyankuchu mana pantaspa comentananchejta (Sal. 103:12-14). Hermanosninchejqa familianchej kanku, munakuwanchejtaj (Mar. 10:29, 30; Juan 13:35). Chayrayku comentashaspa pantaykojtinchejqa entiendewasunchej.

12, 13. ¿Imatataj Nehemiasmanta Jonasmantawan yachakusunman?

¹² Comentayta mana manchachikunapaj Nehemiasmanta, Jonasmantawan parlarinachej. Nehemiasqa uj reypa wasinpi trabajarqa. Payqa Jerusalén llajtaj perqasnin thuñisqa kasqanta, punkusnintaj ninaj ruphasqan kasqanta yachaspa mayta llakikorqa (Neh. 1:1-4). Reytaj llakisqata rikuspa Nehemiasta taporqa: ‘¿Imamanta llakisqa uya kashankiri?’, nispa. Nehemiastaj chay ratopacha sinchʼita mancharikorqa. Chaywanpis reyman niraj imatapis nishaspa orakorqa. Jinamantataj reyqa Diospa llajtanta yanaparqa (Neh. 2:1-8). Nehemiasmanta yachakunchej niraj comentashaspa orakunapuni kasqanta. Jonasmantañataj parlarina. Jehová Diosqa Jonasman nerqa ninivitasman chinkachisqa kanankuta willamunanta. Jonastajrí kasunantaqa manchariymanta waj ladoman ayqerikaporqa (Jon. 1:1-3). Chaywanpis Jehová Diosqa Jonasta yanaparqa ninivitasman willananpaj. Ninivemanta runastaj Jonasta uyarispa salvakorqanku (Jon. 3:5-10). Reparanchej jina, Jehová Diosninchejqa comentayta manchachikojtinchejpis Jonasta jina yanapawasunchej. Noqanchejqa mana ni imata manchachikunachu kashan. Imaraykuchus hermanosninchejqa mana ninivitas jinachu sajras kanku.

¹³ Kunantaj qhawarinachej imaynatachus wakichikuna kasqanta sumajta comentanapaj, ajinamanta hermanosninchejta kallpachanapaj.

14. 1) ¿Imaraykutaj tantakuykunapaj sumajta wakichikunanchej kasqa? 2) ¿Maykʼajtaj tantakuykunapaj wakichikusunman?

¹⁴ Tantakuykunapaj wakichikuna. Sumajta wakichikunapaj tiempochakusunchej chayqa, mana manchachikuspa comentasunchej (Pro. 21:5). Chaywanpis mana tukuychu uj rejllata wakichikunchej. Hermananchej Eloisemanta parlarina. Payqa viuda, 80 watas kurajniyojñataj. Nintaj: “Torremanta Qhawaj revistataqa casi semana faltashajtin wakichikuyta qallarini. Ajinata ruwaspaqa tantakuypi sumajta japʼeqani”, nispa. Hermananchej Joytaj nin: “Torremanta Qhawaj revistataqa tantakuypaj uj día faltashajtin estudiani, ajinamanta tantakuypi  yuyarikunaypaj”, nispa. Payqa semanantin trabajan. Hermanonchej Ikemanta parlarina. Payqa ashkha ruwanasniyoj, chantapis anciano jina, precursor jinataj sirvishan. Pay nin: “Torremanta Qhawaj revistataqa mana ujllapichu estudiani. Manaqa sapa día uj chhikanta estudiani”, nispa.

15. ¿Imaynatataj tantakuykunapaj sumajta wakichikusunman?

¹⁵ Tantakuykunapaj sumajta wakichikunapajqa, ñaupajtaqa Jehová Diospa yanapanta mañakunanchej tiyan (Luc. 11:13; 1 Juan 5:14). Chaymantataj yachaqanaj titulonta, subtitulosninta, dibujosninta, recuadrosnintawan qhawaykusunman. Ajinamanta yachasunchej imamantachus chay yachaqana parlashasqanta. Jinaspataj sapa parrafota estudiana, textosnintapis leena. Chaymantataj tʼukurina imastachus comentananchejpi. Sumajta wakichikuspaqa, chay yachaqanas kausayninchejpi yanapawasunchej, chantapis mana manchikuspa comentasunchej (2 Cor. 9:6).

16. 1) ¿Bibliata estudianapaj ima yanapastaj kapuwanchej? 2) ¿Imaynatataj chaykunawan yanapachikushanchej?

¹⁶ Bibliata estudianapaj yanapaswan yanapachikuna. Jehová Diosqa tantakuykunapaj sumajta wakichikunapaj llajtannejta ashkha yanapasta qowanchej. Por ejemplo, JW Library^® nisqa programata qowanchej. Chay programapi tantakuykunapaj publicacionesta uraqachikusunman. Ajinamanta celularninchejpi chayri tabletanchejpi mayllapipis kashaspa tantakuykunapaj wakichikuyta atisunchej chayri leeyta, grabacionestapis uyariyta atisunchej. Wakin hermanosqa celularninkupi estudianku trabajonkupi samarikushaspa chayri escuelankupi recreopi kashaspa chayri autopi rishaspa. Chantapis wakin yachaqanasta sumajta ukhunchanapajqa Watchtower Library nisqa programawan yanapachikusunman chayri INTERNETPI BIBLIOTECA Watchtower^™ nisqawan yanapachikusunman.

17. 1) ¿Imaraykutaj ashkha comentariosta wakichikunanchej kasqa? 2) ¿Imatataj yachakusunman Jehová amigoyki kachun: Kutichinaykipaj wakichikuy nisqa videomanta?

¹⁷ Ashkha comentariosta wakichikuna. Wakin kutisqa ashkhas ujllapi makita oqharinchej. Chaynejta ichá mana noqanchejtapunichu comentachiwasunman. Chantapis ichá partenta tiemponpi tukunanrayku wakillanta comentachinman. Qallariypi mana comentachiwajtinchejqa mana phiñakunachu, nitaj ninachu “imapajñataj makiyta oqharisajri” nispa. Astawanpis ashkha comentariosta wakichikuna, ajinamanta ujllatapis comentanapaj. Chantapis Bibliata leenapaj makita oqharisunman, mana leespalla comentanapajpis kallpachakusunman. *

18. ¿Allinchu kasqa unayta comentananchej?

 ¹⁸ Pisi parlayllapi comentana. Pisi parlayllapi comentaspaqa astawan wajkunata kallpachanchej. Chayrayku kallpachakusunman 30 segundosllapi comentanapaj (Pro. 10:19; 15:23). Allinpuni kanman experienciayoj hermanos 30 segundosllapi comentananku, tukuypis paykunamanta yachakunankupaj. Unayta, mana entiendey atinata comentajtinkoqa, wajkunaqa ichapis comentayta manchachikunkuman, “mana paykuna jina comentayta atisajchu” nispa. Pisi parlayllapi comentajtinchejrí, wajkunapis comentayta atenqanku. Parrafoj tapuyninman kutichinanchej kajtenqa, allin kanman tapuyllaman sutʼita kutichinanchej, parrafontinmanta parlanamantaqa. Tapuyman kutichikojtinñaqa waj imastawan yapaykurisunman (“¿Imatá comentasunman?” nisqa recuadrota qhawariy).

19. ¿Imatataj ruwasunman parteyoj hermano comentachinawanchejpaj?

¹⁹ Parteyoj hermanota nisunman ima parrafopichus comentachinawanchejta. Chaypajqa allin kanman niraj tantakuy qallarishajtin chay parteyoj hermanowan parlarinanchej. Comentachinawanchejta nerqanchej chay párrafo ukhunchakushajtenqa, tapusqantawankama makinchejta altota oqharinanchej tiyan rikumunawanchejpaj.

20. ¿Imajtintaj nisunman tantakuykuna amigoswan mikhuy jina kasqanta?

²⁰ Tantakuykunaqa uj jatun mikhuypi ashkha amigoswan mikhurikuy jina. Wakin hermanos uj mikhuyman invitawasqanchejpi piensarina. Paykunaqa ichapis niwasunman imitallatapis aparinanchejta. Noqanchejtaj ichapis tumpata manchachikusunman imatachus apananchejmanta. Chaywanpis gustasqanku imasta apanapaj kallpachakusunman, ¿icharí? Ajinallataj tantakuykunawanpis. Jehová Diosqa tantakuykunaman tukuyta wajyarikuwanchej, chaytaj uj jatun mikhuy jina (Sal. 23:5; Mat. 24:45). Jehová Diostaj kusikun sonqomantapacha imitallatapis aparejtinchej, nisunman comentajtinchej. Chayrayku tantakuykunapaj sumajta wakichikuna, tantakuykunapi comentanapajtaj kallpachakuna. Ajinamanta mana mikhullasunchu, nisunman mana uyarillasunchu, manaqa wajkunatapis kallpachasunchej.