1, 2. 1) ¿Imaynatataj yanaparqa ashkha cristianosta Dios jina yuyasqanku? 2) ¿Imatataj kay yachaqanapi yachakusunchej?

CANADAMANTA uj hermana nin: “Dios jina yuyayqa, yanapawan aswan kusisqa kanaypaj, llakiykunatapis atipanaypaj”, nispa. Brasilmanta uj hermanotaj nin: “23 watasña casarasqa kani. Dios jina yuyasqaykutaj, qhariwarmi kausayniykupi kusisqa kausakunaykupaj yanapawarqayku”, nispa. Filipinasmanta uj hermanotaj nin: “Dios jina yuyayqa yanapawan sonqo tiyasqa kanaypaj, tukuy hermanoswantaj allinta kausakunaypaj”, nispa.

² Reparanchej jina, Dios jina yuyayqa tukuy imapi yanapawanchej. Jinapis, ¿imatataj ruwasunman Dios jina yuyanallapajpuni? Chaypajqa sumajta entiendenanchej tiyan, Dios jina yuyaj runasmanta imatachus Biblia nisqanta. Kay yachaqanapitaj yachakusunchej imaynachus Dios jina yuyaj runa kasqanta, pikunachus Dios jina yuyasqankutapis. Chantapis yachakusunchej imaynatachus Cristo jina yuyay, Dios jina yuyanapaj yanapawasqanchejta.

3. Biblia nisqanman jina, ¿runa jinalla yuyajwan, Dios jina yuyajwan kikinchu kasqanku?

³ Apóstol Pabloqa sutʼincharqa imaynachus ‘runa jinalla  yuyaj’ runa kasqanta, imaynatajchus ‘Dios jina yuyaj’ runa kasqanta (1 Corintios 2:14-16 leey). Runa jinalla yuyajqa, “Diospa atiyninmanta jamoj imasta qhesachan. Imaraykuchus paypajqa wampoj thautisqan jinalla, manataj chay imasta entiendeyta atinchu”. Jinapis Dios jina yuyaj runaqa, “tukuy imata allinta reparayta atin”, Cristo jina yuyananpajtaj kallpachakun. Chayrayku Pabloqa Dios jina yuyanapaj yuyaychawarqanchej. Kunantaj astawan yachakunachej, runa jinalla yuyajwan, Dios jina yuyajwan imaspiwanchus mana kikinchu kasqankuta.

4, 5. ¿Imaynataj runa jinalla yuyaj runa kasqa?

⁴ Runa jinalla yuyajqa, munaynillanta maskʼan kay mundomanta runas jina yuyasqanrayku. Pablotaj nerqa: ‘Kay mundoj yuyaynenqa wayra jina tukuynejpi kashan, mana kasukoj runaspitaj trabajashan’, nispa (Efe. 2:2). Chayrayku runasqa, sajra imasllata ruwanku allinninkuta maskʼaspa. Nitaj kallpachakunkuchu Diospa kamachiykunasninman jina kausakunankupaj. Chantapis runa jinalla yuyajqa, payllapi yuyan, kapuyniyoj kayllatataj maskʼan.

⁵ Biblia nisqanman jinataj, ‘runaj sajra munayninpa ruwasqasnillanta’ ruwan (Gál. 5:19-21). Chantá Pabloqa Corintomanta cristianosman ñaupaj kaj cartanpi nillarqataj, imastawanchus runa jinalla yuyaj runa ruwasqanta. Chay jina runaqa wajkunaj chʼampayninman satʼikun, runasta tʼaqanachin, chʼajwasta rikhurichin, wajkunawan juzgadoman chayachinakun, autoridadesta mana respetanchu, mikhuyllaman, ujyayllamantaj qokun. Chantá ima juchatapis ruwarpallan (Pro. 7:21, 22). Judasqa, chay jina runasmanta jinata nerqa: “Paykunapeqa Diospa atiynin mana kanchu”, nispa (Jud. 18, 19).

6. ¿Imaynataj Dios jina yuyaj runa kasqa?

⁶ Dios jina yuyaj runaqa, Diosman qayllaykunanpaj, pay jina imatapis ruwananpajtaj kallpachakullanpuni (Efe. 5:1). Kallpachakullantaj Jehová Diosta astawan rejsinanpaj. Diosta Tatanta jina qhawasqanraykutaj, kausayninpi kamachiykunasninta kasukunpuni (Sal. 119:33; 143:10). Arí, ‘Diospa atiyninpa poqoyninman’ jina kausakun, nitaj sajra runas jinachu (Gál. 5:22, 23).

7. Biblia nisqanman jina, ¿imaynataj Dios jina yuyaj runa kasqa?

⁷ Dios jina yuyajkunaqa, kusisqas kanku. Jesuspis jinata nerqa: “Kusisqa kanku Diosmanta yachakuyta munasqankuta reparakojkunaqa, imaraykuchus cielopi kaj Gobiernoqa paykunajta kanqa”, nispa (Mat. 5:3). Romanos 8:6 nin: “Aychaj munayninpi yuyayqa wañuyman pusan. Diospa atiyninpi yuyaytajrí kausayman pusan, sonqo tiyaykuymantaj”, nispa. Arí, Dios jina yuyasun chayqa, Dioswan allinpi kasun, sonqo tiyasqa kasun, aswan qhepamantaj wiñaypaj kausakusunchej.

8. ¿Imajtintaj Dios jina yuyanapaj kallpachakunanchej kasqa?

⁸ Sajra runaspa chaupinpi tiyakusqanchejrayku, runasqa sajra yuyayninkuta chimpachiwasunman. Chayrayku Dios jina yuyanapajqa, kallpachakunallapuni tiyan. Diospa nisqasninta sonqonchejman mana churaspaqa, sajra runas jina yuyayta qallarisunman. Kunantaj yachakusunchej, imatachus  ruwanata mana sajra runaspa yuyayninkuwan chimpaykuchikunapaj. Yachakullasuntaj, imatachus ruwanata Dios jina yuyanapaj.

9. 1) Dios jina yuyaj runasmanta, ¿imatataj yachakusunman? 2) ¿Pikunamantataj qhepan parrafospi yachakusunchej?

⁹ Noqanchejqa, Dios jina yuyaj runasmanta allin imasta yachakusunman, imaynatachus uj wawita tatanmanta allin imasta yachakun, ajinata. Runa jinalla yuyaj runasmantapis, yachakullasunmantaj mana paykuna jina yuyanapaj (1 Cor. 3:1-4). Bibliaqa willawanchej wakin runas Dios jina yuyasqankuta, wakintaj runa jinalla yuyasqankuta. Dios jina yuyajkunamanta wakenqa kaykuna karqanku: Jacob, María, Jesús ima. Paykunamantataj qhepan parrafospi yachakusunchej.

10. ¿Jacob Diospa nisqasnin juntʼakunanpi atienekusqachu?

¹⁰ Jacobqa, noqanchej jinallataj ashkha llakiykunapi rikukorqa. Paytaqa hermanon Esaú wañurpachiyta munarqa, suegronpis chʼaukiyarparqa. Jinapis Jacobqa, Dios jina yuyasqanrayku imatachus Jehová Dios Abrahanman nisqan juntʼakunanpi atienekorqa. Jehová Diosqa Abrahanman nerqa, miraynin jatun nacionman tukunanta. Chayrayku Jacobqa familianta sajra imasmanta jarkʼarqa (Gén. 28:10-15). Jacobqa sajra runaspa chaupinpi tiyakuspapis, Jehová Diospa munayninman jinapuni kausakorqa. Uj pacha, Jacobta Esaú wañuchiyta munarqa. Chayrayku Jacobqa, Jehová Diosmanta jinata mañakorqa: “Libraway ari wawqey Esaúpa makinmanta”, nispa. Chantá nillarqataj: “Qan niwarqanki allin rinawanta tukuy imapi, mirayniypis  mama qocha tʼiyu chhika kananta mana yupay atina”, nispa (Gén. 32:6-12). Arí, Jacobqa Jehová Diospa nisqasnin juntʼakunanpi atienekorqapuni.

11. ¿Imajtintaj nisunman María Diospa munayninman jinapuni kausakusqanta?

¹¹ Mariamantañataj parlarina. Mariataqa Jehová Dios, Jesuspa maman kananpaj ajllarqa. Imajtinchus Mariaqa Diospa munayninman jinapuni kausakorqa. Chaytataj reparasunman, imaynatachus Jehová Diosta jatunchasqanpi Zacariasta, Elisabettawan waturikushajtin (Lucas 1:46-55 leey). Chay kutipi Mariaqa rikucherqa Diospa Palabranta jatunpaj qhawasqanta, sumajtataj rejsisqanta (Gén. 30:13; 1 Sam. 2:1-10; Mal. 3:12). Chantá Mariaqa, Josewan casarasqaña kaspapis, mana puñuykorqachu Jesús nacekunankama. Imaraykuchus paykunaqa, Jehová Diospa munayninta ruwayta munarqanku (Mat. 1:25). Chantapis Mariaqa, imastachus Jesús wiñasqanman jina ruwasqanta, yachachisqantapis uyarerqa. Chay uyarisqantataj Mariaqa ‘sonqonpi sumajta waqaycharqa’ (Luc. 2:51). Imaraykuchus Mariaqa yacharqa Mesías chayamunanta. Chayrayku allin kanman Mariamanta yachakunapaj kallpachakunanchej. Pay jinataj Diospa kamachiykunasninta kasukunanchej, Diospa munaynintataj ruwananchej.

12. 1) ¿Jehová Dios jinachu imatapis Jesús ruwaj? 2) ¿Imatataj Jesús jina ruwasunman? (18 paginapi dibujosta qhawariy).

¹² Jesusmantañataj parlarina. Payqa, Diospa munayninta ruwaspapuni kausakorqa. Chayrayku paymantaqa mayta yachakusunman. Jesusqa, Jehová Dios jina yuyaj, ruwaj, kamachiykunasninta kasukoj, wajkunamantapis khuyakoj (Juan 8:29; 14:9; 15:10). Arí, Jesusqa Jehová Dios jina khuyakuyniyoj karqa. Imaraykuchus profeta Isaiasqa Dios khuyakuyniyoj kasqanta nerqa. Marcostaj Jesuspis khuyakuyniyoj kasqanta nerqa (Isaías 63:9; Marcos 6:34 leey). Chayrayku Jesús jina noqanchejpis runasta khuyakuna, yanapanataj. Chantá Jesús jina tukuy sonqo Diosmanta runasman willamuna, yachachimunataj (Luc. 4:43). Chaykunata ruwaspaqa, Jehová Dios jina yuyasqanchejta rikuchisunchej.

13, 14. 1) ¿Imatataj ashkha hermanos ruwanku? 2) Raquelmanta chayri Reylenemanta parlariy.

¹³ Kay tiempopipis ashkha hermanosqa, mayta kallpachakunku Cristo jina ruwanankupaj. Paykunaqa sonqo kʼajaywan Diosmanta willanku, wajkunata khuyakunku, wasinkumanpis wajyarikunku. Chantá juchasapas kaspapis, mayta kallpachakunku kʼachas kanankupaj, Jehová Dios jina ruwanankupajtaj. Hermana Raquelmanta parlarina. Payqa Brasilmanta, nintaj: “Maytapuni gustawaj mundomanta runas jina vestikuy. Chayrayku mana maychus kajtachu vestikoj kani. Bibliamanta yachakusqaymantapachataj, Dios jina yuyanaypaj kallpachakorqani. Jinapis kausayniyta cambiaytaqa mana atillarqanichu. Chaywanpis repararqani, aswan kusisqa kasqayta Diosmanta yachakuspa, payta kasukuspa ima”, nispa.

¹⁴ Filipinasmanta Reylene hermanamantañataj parlarina. Payqa Jehovaj testigonña kashaspa, universidadman yaykorqa, uj sumaj llankʼayniyojtaj karqa. Tiemponmantaj, llankʼayninta  aswan ñaupajman churarqa Diosta sirvinanmanta nisqaqa. Pay nin: “Llankʼaynillayta aswan ñaupajman churaspaqa, mana kusisqachu karqani. Chayrayku Diosta sirviyta ñaupajman churanaypaj kallpachakunay karqa. Kunanqa, imatachus Mateo 6:33, 34 versículos nisqanpi atienekuni. Imaraykuchus yachani Jehová Dios ni jaykʼaj saqerparinawanta”, nispa. Ichapis congregacionninchejpi ajina hermanos tiyan. Chay jina hermanosqa Cristo jina imatapis ruwanankupaj kallpachakunku. Noqanchejtaj paykunamanta mayta yachakusunman (1 Cor. 11:1; 2 Tes. 3:7).

15, 16. 1) ¿Imatataj yachananchej kasqa Cristo jina yuyanapaj? 2) ¿Imatataj leerinanchej kasqa Cristo jina yuyayta yachanapaj?

¹⁵ Bibliaqa 1 Corintios 2:16 versiculopi niwanchej, Cristo jina yuyananchejta. Romanos 15:5 versiculopitaj yuyarichiwanchej, ‘Cristo Jesús jina yuyananchejta’. Chayrayku Cristo jina yuyanapajqa, yachananchej tiyan imatachus pay yuyasqanta, ruwasqanta ima. Jesusqa kausayninpi, Jehová Diosta sirviyta aswan ñaupajman churarqa. Chayrayku Jesús jina yuyanapaj kallpachakunallapuni, ajinamantataj Jehová Diosman astawan qayllaykusunchej.

¹⁶ Jesusqa milagrosta ruwarqa, ashkha runasman yachacherqa, runasmanta khuyakorqa, Diospa munasqanman jinapunitaj kausakorqa. Yachachisqasnintaj chayta rikorqanku. Chayrayku paykuna nerqanku: ‘Noqaykutaj testigos kayku chay tukuy imasta ruwasqanmanta’, nispa (Hech. 10:39). Kay tiempopi Jesusta mana rikuspapis, payta rejsisunman Mateo, Marcos, Lucas, Juan librosta leespa. Chay librosta sumajta leerispa, chaypi tʼukurispataj, Jesús jina yuyayta qallarisunchej. ‘Ajinamantataj purisqanta sumajta qhatisunchej’ (1 Ped. 2:21; 4:1).

17. ¿Jesucristo jina yuyay yanapawasunmanchu?

¹⁷ Cristo jina yuyayqa allinninchejpajpuni. Chayrayku Jesucristota astawan rejsisun chayqa, pay jina yuyayta qallarisunchej, jinamantataj astawan Jehová Diosman qayllaykusunchej. Chantá ima llakiypi rikukuspapis, ñaupajtaqa piensarisunchej imatachus Jesús chay jina llakiypi rikukuspa ruwananpi. Jinamantaqa Diospa munayninman jinapuni imatapis ruwasunchej, llimphu sonqoyojtaj kasunchej. Chayrayku “Señor Jesucristo jina” kausakunapaj kallpachakunallapuni (Rom. 13:14).

18. ¿Imatataj kay yachaqanapi yachakorqanchej?

¹⁸ Kay yachaqanapeqa, yachakorqanchej imaynachus Dios jina yuyaj runa kasqanta. Yachakullarqanchejtaj imaynatachus Jacobwan, Mariawan, Jesuswan ima, Diospa munayninman jina kausakusqankuta. Chantá yachakullarqanchejtaj Jesucristo jina yuyajtinchej, Jehová Diosman astawan qayllaykunanchejta, Dios jinataj yuyananchejta. Qhepan semanataj astawan yachakusunchej, imaynatachus reparakunata Dios jina yuyashasqanchejtachus manachus. Yachakullasuntaj imastawanchus ruwanata Dios jinallapuni yuyanapaj. Chantapis yachakusun imaynatachus Dios jina yuyay, kausayninchejpi yanapawasqanchejta.