Noqaqa 1939 wata qallariyta Inglaterrapi nacekorqani. Tatasneyqa niraj casarashaspa, 1920 watas chaynejpi Bibliamanta yachakusqanku. Chayrayku wawa kashajtiy, tatasniywan khuska reunionesman rej kani. Diosmanta Parlayta Yachanapaj tantakuymanpis anotachikorqani. Ñaupaj kaj discursoyta qoshaspaqa, sojta watitasniyojlla karqani. Microfonoman alcanzanaypajpis uj cajitata churapuwarqanku. Manchay mancharisqapuni kasharqani, imaraykuchus tukuy uyarejkuna kuraj hermanos karqanku.

Tatayqa predicanaypaj Bibliamanta willayniyoj tarjetitata ruwapuwarqa. Pusaj watitayoj kashajtiy, primera vez sapitallay uj wasiman chimparqani. Wasiyoj llojsimojtin, chay tarjetitata leerinanpaj jaywarqani, “Sea Dios veraz” nisqa librotataj saqerqani. Manchay kusisqapuni kasharqani, chay ratotaj tatayman correspa willamorqani. Reunionespis predicacionpis, mayta yanapawarqa Jehová Diospaj astawan llankʼayta munanaypaj.

Bibliata estudiaypis mayta gustallawajtaj. Astawanraj gustawarqa, tatay Torremanta Qhawaj revistata japʼinaypaj anotachiwajtin. Sapa revista chayamuwajtin, chay rato leerqoj kani. Jinamanta creeyniy sinchʼiyarqa, Jehová Diosmantaj kausayniyta qoporqani.

1950 watapi, tatasniywan khuska Estados Unidosman uj jatun tantakuypaj rerqayku. Chay tantakoyqa, “Aumento de la Teocracia” nisqa sutikorqa. Jueves 3 de agosto diapaj tantakoyqa, sutikorqa “Misionerospa llankʼayninkumanta”. Chay pʼunchayqa hermano Carey Barber bautizakojkunapaj discursota qorqa. Payqa aswan qhepaman, Diospa Llajtanta Kamachejkunamanta ujnin karqa. Hermano Barberqa discursonta tukuchashaspa, bautizakojkunapaj iskay tapuykunata  ruwarqa. Noqataj sayariytawan “arí” nispa kuticherqani. Jinapis yakuman yaykuyta manchachikorqani, imaraykuchus mana nadayta yacharqanichu. Chayrayku tiuyqa piscinakama pusawarqa, niwarqataj: “Ama manchachikuychu wawáy, hermanos yanapasonqanku”, nispa. Jinapunitaj karqa. Bautizakushajteyqa ni chakisnillaypis pampaman chayarqachu. Uj hermano bautizawarqa, waj hermanotaj piscinamanta orqhowarqa. Chaypachaqa 11 watitasniyoj kasharqani. Jinapis sutʼita yacharqani imatachus ruwashasqayta. Chay pʼunchaymantapacha, Jehová Diosqa cheqan ñanllatapuni pusashawan.

Colegiota tukuchaytawan precursor kayta munarqani. Jinapis profesoresneyqa universidadman yaykunaypaj tanqawarqanku. Paykunata kasuspataj universidadman yaykorqanipuni. Jinapis repararqani, universidadqa Jehová Diosmanta karunchashawasqanta. Chayrayku casi watataña kashaspapis, saqepuyta munarqani. Jehová Diosman orakuytawan, profesoresniyman uj cartapi willarqani watata juntʼaytawan llojsipunayta. Universidadmanta llojsipuytawan, chay rato precursor kayta qallarerqani. Yacharqanitaj Jehová yanapanawantapuni.

Noqaqa experienciayoj precursormanta yachakuyta munarqani. Chayrayku Londres llajtapi kaj sucursalta tapukorqani, mayqen hermanotachus compañayta atisqayta. Sucursalmanta hermanostaj, Wellingborough llajtitaman kachawarqanku hermano Bert Vaiseyta compañanaypaj. Chay llajtitamanqa julio de 1957 watapi chayarqani. Hermano Bertmanta ashkha imasta yachakorqani. Payqa sonqo kʼajaywan predicaj, yanapawarqataj predicacionpaj uj sumaj horariota ruwakunaypaj. Congregacionniykupeqa pusajlla karqayku, sojta hermanas, iskay hermanos. Tantakuykunapaj wakichikusqay, asignacionesniyta juntʼaypis, mayta yanapawarqa Jehovapi astawan atienekunaypaj, creeyniymanta parlanaypajpis.

Chaymanta qhepaman, cuartelman mana risqayrayku, uj tiempota carcelpi karqani. Llojsimuytawantaj uj precursora especialta rejserqani. Payqa Bárbara sutikorqa, 1959 watapitaj casarakorqayku. Noqaykoqa mayllapipis Jehovata sirvinaykupaj wakichisqa kasharqayku. Jinapi Lancashire nisqa lugarman kachawarqayku. Chay lugarqa Inglaterraj patanejninpi kashan. Chaymantaqa enero de 1961 watapi, Ñaupajman Apajkunapaj Escuelaman invitawarqanku. Chay escuelaqa Londres Betelpi ruwakorqa, uj killatataj karqa. Chay escuela tukukuyta, congregacionesta waturispa sirvinayta niwarqanku. Chantá señoraywan khuska, experienciayoj hermanota visitasninpi iskay semanata compañarqayku. Chayqa karqa Birmingham nisqa llajtapi. Chaymantataj Lancashiremanta, Cheshiremantawan congregacionesta waturej riporqayku.

Agosto de 1962 watapi vacacionpi kashajtiyku, uj carta sucursalmanta chayamuwarqayku. Chay carta ukhupeqa, Galaad Escuelaman rinapaj uj solicitud kasqa. Señoraywan khuska Jehová Diosman orakorqayku. Chantá chayta juntʼachiytawan, chay rato sucursalman apachiporqayku.  Chaymanta phishqa killanman, ñapis Nueva York llajtaman 38 clasepaj risharqaykuña. Chay escuelaqa chunka killasta ruwakorqa.

Escuelapeqa Bibliamanta, imaynachus Diospa llajtan kasqanmanta, imastachus mundontinpi hermanos ruwashasqankumanta ima yachakorqayku. Chaypachaqa 24 watasniyoj kasharqani, Barbarataj 23 watasniyoj. Chayrayku compañerosniykumanta mayta yachakorqayku. Noqaqa sapa día hermano Fred Ruskwan trabajanay karqa. Payqa ujnin yachachejniyku karqa. Chay hermanoqa yachachiwarqa, pitapis Bibliaj nisqanman jinapuni yuyaycharinayta. Chantapis chay escuelapeqa, experienciayoj hermanos discursosta qoj kanku. Wakin karqanku: hermano Nathan Knorr, Frederick Franz, Karl Klein ima. Hermano A. H. Macmillanpis discursonpi mayta yachachiwarqayku. Payqa discursonpi sutʼincharqa, imaynatachus Jehová Dios llajtanta yanapasqanta 1914 watamanta 1919 wata qallariykama.

Galaad Escuela tukukuyta, hermano Nathan Knorrqa Burundi suyuman kachanawaykuta willawarqayku. Chay ratotaj Bibliotecaman Anuario librosta maskʼaj rerqayku. Yachayta munarqayku mashkha hermanoschus Burundipi kasqankuta. Jinapis ni imata tarerqaykuchu, imaraykuchus niraj chay suyupi predicakushasqachu. Noqaykoqa ni Africatapis, ni Burunditapis rejserqaykuchu. Chayrayku Burundiman riyta tumpata manchachikusharqayku. Jinapis Jehová Diosman orakuytawan, Burundiman riporqayku.

Burundipeqa tukuy ima waj jina karqa. Chay lugarqa manchay qʼoñi, runaspa costumbresninkupis uj jina karqa. Chantapis francés parlayta yachakunayku karqa. Wasitapis maskʼakunayku karqa. Burundiman chayasqaykumanta iskay dianman, Galaad Escuelamanta ujnin compañeroyku visitariwarqayku. Payqa Harry Arnott sutikorqa, Zambia suyumantaj kutipusharqa. Harryqa uj wasita maskʼaysiwarqayku, chaypitaj tiyakorqayku. Burundimanta runasqa, niraj Jehovaj testigosninta rejserqankuchu. Chayrayku pisi tiemponman, autoridadesqa churanakuyta qallariwarqayku. Jinapis sumajta predicayta qallarisharqayku. Jinallapi autoridades niwarqayku, chaypi quedakunaykupaj permisota orqhonayku kasqanta. Tukuy imata ruwajtiykupis mana permisota qowarqaykuchu. Chayrayku Uganda suyuman riporqayku.

 Jinapis chayman mana papelesniyojlla yaykushasqaykumanta mancharisqa kasharqayku. Chaywanpis Jehová Diospi atienekorqayku. Chayasqaykutawan uj hermano yanapawarqayku. Payqa Canadá suyumanta chay lugarman sirvej ripusqa. Hermanoqa fronterapi kaj autoridadeswan parlaripuwarqayku, papelesniykuta orqhonaykukama chaypi tiyakojta saqenawaykupaj. Autoridadestaj Ugandapi quedakojta saqewarqayku. Jinapi repararqayku Jehová yanapashawasqaykuta.

Burundimanta nisqa, Ugandamanta runasqa testigosta rejserqankuña. Imajtinchus 28 hermanosña predicasharqanku. Noqaykoqa Kampala nisqa llajtapi predicayta qallarerqayku. Chaypeqa inglesta parlaj runasta tarerqayku. Jinapis runasqa luganda parlayta astawan parlaj kasqanku. Chayrayku paykunata yanapanaykupaj, chay parlayta yachakuyta qallarerqayku. Ashkha wataspi chʼuwitata parlayta aterqayku. Jinapis yachakuytawanqa, estudiosniykuta sumajta yanapayta aterqayku. Paykunataj imachus sonqonkupi kasqanta willariwarqayku.

Runasman Bibliamanta yachachispaqa, may kusisqa kasharqayku. Jinapis astawanraj kusikorqayku, Kenia sucursalmanta hermanos, tukuynin Ugandata predicaspa purimunaykuta niwajtiyku. Chay purimusqaykupeqa, qhawarinayku karqa may lugaresmanchus precursores especialesta kachanankuta. Wakin lugaresmanta runasqa, ni jaykʼaj Jehovaj testigosninwan parlasqankurajchu. Jinapis noqaykuwan may kachʼaspuni karqanku, mikhunitatapis qoriwaj kayku.

Chaymanta uj jina viajestañataj ruwarqani. Kampala llajtamanta, Mombasa llajtaman iskay diata trenpi viajarqani. Chay llajtaqa Kenia suyupi kashan, mar kantupitaj. Mombasamantataj barcota japʼiytawan Seychelles nisqa churusman rerqani. Chay churusqa océano Índico nisqapi kashan. 1965 watamanta 1972 watakama, señoraywan khuska chay lugaresta sapa kuti visitarqayku. Qallariypeqa chay lugarespi iskay testigoslla karqanku. Chaymanta uj grupoman tukorqa, chay grupotaj congregacionman tukorqa. Aswan qhepamanqa Eritrea, Etiopía, Sudán suyuspi kaj hermanosta visitallarqanitaj.

Ugandapi kashajtiyku, militares ujllata gobiernoman yaykorqanku. Chaymantapacha manchay chʼajwas Ugandapi karqa. Chaypachaqa Marcos 12:17 nisqanta kasukuy sumajpuni kasqanta repararqani. Chaypi nin: “Cesarpata kajtaqa Cesarman qopuychej”, nispa. Gobiernoqa kamacherqa, tukuy forasteros wasinku qayllapi policía wasipi anotachikunankuta. Noqaykutaj chay rato kasukorqayku. Pisi diasninman Kampalapi waj misionerowan autopi purisharqayku. Jinallapi policías japʼiwarqayku. Paykunaqa chay suyuta wateqajkunamanta tumpawarqayku. Chantá policiaman apawarqayku, chaypitaj jefenkuman misioneros kasqaykuta nerqayku. Paytaj ni uyarillaytapis munawarqaykuchu. Chantá policiaswan wasiyku qayllapi policiaman apachiwarqayku. Chayman chayasqaykutawan, chaypi trabajaj policiaqa rejsirpawarqaykupacha. Paykunamantaj nerqa: “Anotachikunkuña, kacharipuychej”, nispa.

Chaypachaqa militares tukuynejpi grupo grupos kasharqanku. Wakin lugarespeqa machasqa kasharqanku. Chayrayku chaynejta pasayqa, manchikunapaj jina karqa. Sapa pasanaykupaj Jehovamanta mañakoj kayku. Paytaj sonqoykuta tiyaykuchej, allillantataj pasaj kayku.  Jinapis 1973 watapi, tukuynin misionerosta Ugandamanta qharqowarqayku.

Chayrayku centralmanta hermanosqa, Costa de Marfilman kachawarqayku. Chay suyoqa, Africaj inti yaykuynin ladopi kashan. Watejmanta waj lugarpi tiyakuyman yachaykukunayku karqa. Runasqa waj costumbresniyoj karqanku. Chantapis francés parlayta yachakunayku karqa, tukuy ladosmanta misioneroswantaj tiyakunayku karqa. Jinapis chay lugarpeqa, ashkha runas Bibliamanta yachakuyta munarqanku. Watejmanta repararqayku, Jehovaqa cheqan ñanta pusashawasqaykuta.

Jinallapi señoray cancerwan onqoykorqa. Qhasillata ashkha suyuspi tratamientota maskʼaspa purimorqayku. Chayrayku 1983 watapi Africamanta riporqayku. Chaytaj mayta llakichiwarqayku.

Ajinamanta Londrespi kaj Betelman chayarqayku. Chaypeqa señoray astawan onqoykorqa, wañuporqataj. Betelmanta hermanosqa mayta sonqochawarqanku. Astawanqa uj qhariwarmi yanapawarqa Jehová Diospi atienekunallaypajpuni. Chaymanta pisi tiemponman, hermana Annta rejserqani. Payqa Betelman yanapakoj jamoj, aswan ñaupajtataj precursora especial kasqa. Annqa Jehová Diosta mayta munakoj. Paywanqa 1989 watapi casarakorqayku. Chaymantapachataj Londres Betelpi sirvishayku.

1995 watamanta 2018 watakama sucursalesta visitaspa yanapakorqani. Chay wataspeqa casi 60 suyusta visitarqani. Sapa suyuta visitaspataj, sutʼita repararqani imaynatachus Jehová chay lugaresmanta hermanosta yanapasqanta.

Chay jina visitasta ruwashaspa, watejmanta Africaman 2017 watapi kuterqani. Mayta kusikorqani señorayman Burundita rejsichispa. Chay lugarpeqa, may ashkha runaspuni testigoman tukusqanku. Chaytaj mayta kusichiwarqayku. 1964 watapi maypichus predicaj kani chay callepeqa, Betel wasi kashan. Kunanqa Burundipi 15.500 willajkunamanta astawanña kanku.

2018 watapi mayqen sucursalestachus visitanaymanta uj listata qowarqanku. Chay listapitaj, Costa de Marfil kasharqa. Abidjan llajtaman kuteyqa, wasiymanpis kutishayman jina karqa. Chaypeqa Betelpi alojakorqayku. Cuartoykupi kashaspa, telefonomanta numerosta qhawasharqani. Jinallapi Sossou sutita rikorqani, uj hermanomantataj yuyarikorqani. Payqa Abidjan llajtapi congregacionesmanta encargado karqa. Chayrayku cuartoyku ladopi kaj hermano Sossouta tapurerqanipacha. Jinapis mana paychu kasqa, manaqa wawan kasqa.

Jehová Diosqa imatachus niwasqanchejta juntʼanpuni. Llakiykunapi kaspapis Jehovapi atienekunchej chayqa, payqa cheqan ñantapuni pusawanchej. Chayrayku señoraywan khuska Jehovata tukuy sonqo sirvillasqaykupuni. Imaraykuchus payqa wiñay kausayman pusawasqayku (Pro. 4:18).