MIÉRCOLES 18 de enero de 2023 watapi, uj sumaj willay ruwakorqa jw.org paginapi. Hermanonchej Gage Fleegle, chantá Jeffrey Winder Diospa Llajtanta Kamachejkunamanta kanankuta nikorqa. Iskayninku ashkha watastaña tukuy sonqo Jehovata sirvishanku.

Hermanonchej Fleegleqa wiñakorqa Pensilvaniamanta inti yaykuy ladopi (Estados Unidospi). Paymanqa tatasnin Jehovamanta yachacherqanku. Jovencito kashajtin campoman riporqanku, chaypitaj predicanapaj yanapa necesitakorqa. Pisi tiemponmantaj, payqa 20 de noviembre de 1988 watapi bautizakorqa.

Tatasnenqa kallpachajpuni kanku Jehová Diospaj tiempo juntʼasqata llankʼananpaj. Wasinkumantaj wajyarikoj kanku congregacionesta waturej hermanosta, betelitasta ima. Chaypi payqa repararqa chay hermanos may kusisqas kasqankuta. Bautizakusqanmanta pisi tiemponman, 1 de septiembre 1989 watapi, precursor regular jina sirviyta qallarerqa. Iskay watasninmantaj Brooklyn Betelpi sirviyta qallarerqa, chaytaqa 12 watasninmantapacha ruwayta munarqa. Chaypeqa octubre de 1991 watapi sirviyta qallarerqa.

Chaypi librosta ruwanapaj tallerpi pusaj watasta llankʼarqa. Chantá Departamento de Servicio nisqaman kacharqanku. Chay tiempopitaj uj mashkha watasta ruso congregacionpi sirverqa. 2006 watapitaj Nadiawan casarakorqa. Chaymantapachataj iskayninku Betelpi sirvishanku. Iskayninku portugués parlaypi sirverqanku. Kunantaj 10 watasmanta astawanña castellano parlaypi sirvishanku. Departamento de Servicio nisqapi ashkha watastaña yanapakusqantawan, hermano Fleegletaqa Yachachinapaj Comisionmanta oficinapi yanapakunanta nerqanku. Chaymantataj Willaypaj Comisionmanta oficinapi yanapakunanta nerqanku. Marzo de 2022 watapitaj, Diospa Llajtanta Kamachejkunamanta  Willaypaj Comisionpi yanapakunanta nerqanku.

Hermanonchej Windertaj Murrieta llajtapi wiñakorqa (Californiapi). Tatasnenqa testigos kanku, Jehovamantataj yachacherqanku. Payqa 29 de marzo de 1986 watapi bautizakorqa. Qhepan killapachataj precursor auxiliar kayta qallarerqa, nitaj chayta saqeyta munarqachu mayta gustasqanrayku. Pisi diasninmantaj 1 de octubre de 1986 watapi, precursor regular kayta qallarerqa.

Jovencito kashaspa hermanonchej Winderqa, iskaynin kuraj hermanosninta visitarej rerqa. Paykunaqa chay kutipi Betelpi sirvisharqanku. Chayrayku paypis nikorqa edadniyojña kaspa Betelman rinanpaj solicitudta juntʼachinanta. Mayo de 1990 watapitaj Wallkill Betelman invitarqanku.

Chaypeqa ashkha imaspi yanapakorqa: Departamento de Limpiezapi, Departamento de la Hacienda nisqapi chantá Betel oficinapi. 1997 watapitaj Angelawan casarakorqa, chay kutimantapachataj iskayninku Betelpi sirvishanku. 2014 watapitaj Warwickman kacharqanku. Chaypi hermanonchej Winderqa centralninchejta ruwaypi yanapakorqa. 2016 watapitaj Pattersonman riporqanku, Centro Educativo de la Watchtower nisqaman. Chaypi yanapakorqa Servicios de Audio y Video nisqapi, tawa watasninmantaj Warwickman kuterqanku. Chaypitaj hermano Windertaqa Llankʼajkunapaj Comisionmanta oficinapi yanapakunanpaj churarqanku. Marzo de 2022 watapitaj, Diospa Llajtanta Kamachejkunamanta Llankʼajkunapaj Comisionman churarqanku yanapakunanpaj.

Chay hermanosqa Jehovamanta may sumaj regalos kanku (Efe. 4:8). Diosmanta paykunapaj mañapunchej Gobiernonrayku sinchʼita llankʼasqankuta bendecinallanpajpuni.