1. ¿Imajtintaj Jehovawan pusachikunanchej tiyan? Kikinchariy.

 KAYPI piensarina: Uj montepi chinkarpasunman. Chaypitaj kanman monte animales, venenoyoj plantas, imaymana khurustaj. Chantapis uj rumiwan jaytʼakuspa urmaykusunman. Chay imaspi mana rikukunapaj, ¿maytacharí agradecekusunman chay lugarta rejsej runa pusawajtinchej? Kay mundopis chay monte jina. Urmachinawanchejpaj imaymana trampas tiyan, chaytaj Jehovamanta karunchawasunman. Pero Jehová aswan sumaj Pusawajninchejqa. Payqa niwanchej may ñantachus rinanchejta mana ima trampapi urmanapaj, paraisokamataj chayanapaj, chaypitaj wiñaypaj kausakusunchej.

2. ¿Imaynatá Jehová pusawanchej?

² ¿Imaynatá Jehová pusawanchej? Astawanqa Palabrannejta. Chantapis sutinpi llankʼaj runasnejta pusallawanchejtaj. Chaykunamanta ujnintaj kanku “allin kamachi yuyayniyoj”. Paykunaqa sumaj yachachiykunata mikhunata jina qowanchej, chaytaj allin kajta ajllanapaj yanapawanchej (Mat. 24:45). Pero mana paykunanejllatachu Jehovaqa pusawanchej. Congregacionesta waturej hermanos, ancianospis kallpachawanchej, llakiypi rikukojtinchejtaj sumajta yuyaychariwanchej ñaupajllamanpuni rinapaj. Jehovaman mayta agradecekunchej kay qhepa pʼunchaykunapi ajina sumajta pusawasqanchejmanta. Ajinamanta Jehovaj amigosnin kayta atillanchejpuni, kausayman apaj ñantataj puriyta atillanchejpuni.

3. ¿Imatá kay yachaqanapi yachakusun?

³ Ichapis wakin kutisqa Jehovawan pusachikuyta mana atillasunmanchu. Astawanraj Jehovaj yuyaychaykunasnin pantaj runasnejta chayamuwasqanchejrayku. ¿Imarayku? Paykunaj nisqankoqa ichapis mana munasqanchejman jinachu kanman. Chayri yuyaychaykunasninkoqa mana allinchu kasqanta chayri  pantashasqankuta yuyasunman. Chayraykutaj chay yuyaychaykuna mana Jehovamantachu kasqanta nisunman. Chay kutispeqa Jehová llajtanta pusashasqanpi astawan atienekunanchej tiyan, paywan pusachikuypis sumajpuni kasqanpi. Chaypi astawan atienekunapajqa kay yachaqanapi kinsa yuyaychaykunata qhawarisun. 1) Ñaupa tiempopi, ¿imaynatá Jehová llajtanta pusarqa? 2) ¿Imaynatá kay tiempopi Jehová pusashawanchej? 3) ¿Ima bendicionestataj japʼisun Jehovawanpuni pusachikuspa?

¿IMAYNATÁ JEHOVÁ ISRAELITASTA PUSARQA?

4, 5. ¿Imaynatá Jehová rikucherqa israelitasta Moisesnejta pusashasqanta? (Dibujota qhawariy).

⁴ Jehovaqa Moisesta ajllarqa israelitasta Egiptomanta kacharichinanpaj, payta ajllasqanta israelitas sutʼita reparanankupajtaj señalesta churarqa. Chaymanta ujnintaj karqa pʼunchaypi chhoqo phuyu, tutanpitaj chhoqo nina kʼanchay (Éxo. 13:21). Moisesqa chay chhoqo phuyuta qhaterqa, chayrayku paywan israelitaswanqa chay puka mar qochaman chayarqanku. Israelitaspa ñaupaqenkupeqa mar qocha kasharqa, qhepankupitaj egipcio ejército, yuyarqankutaj ni mayman ayqeyta atinankuta. Chayrayku sinchʼitapuni mancharikorqanku, yuyarqankutaj Moisés maytapuni pantaykusqanta paykunata chay lugarman pusaspa. Pero mana ajinachu karqa, Jehovapuni Moiseswan chay lugarman pusacherqa (Éxo. 14:2). Chaypitaj tʼukunapaj jina uj milagrowan paykunata salvarqa (Éxo. 14:26-28).

⁵ Moisesqa 40 watasta chhoqo phuyuta qhaterqa, ajinamanta Diospa llajtanta chʼin jallpʼapi pusaykachananpaj. a Wakin kutis Jehovaqa, chay chhoqo phuyuta Moisespa toldon pataman tiyaykuchej, chaytataj tukuy rikuyta atej kanku (Éxo. 33:7, 9, 10). Jehovaqa chay chhoqo phuyumantapacha Moiseswan parlaj. Moisestaj kamachiykunasninta llajtanman willaj (Sal. 99:7). Chayrayku israelitasqa sutʼita repararqanku Jehovapuni Moisesta ajllasqanta paykunata pusananpaj.

6. ¿Imatá israelitas ruwarqanku Jehová paykunata pusashajtinpis? (Números 14:2, 10, 11).

⁶ Jehovaqa sutʼita rikucherqa sutinpi parlananpaj Moisesta ajllasqanta, llakikunapaj jinataj casi tukuy israelitas payta qhesacharqanku (Números 14:2, 10, 11 leey). Moisesta kutin kutita qhesachasqankurayku, Jehovaqa mana saqerqachu Sumaj Jallpʼaman yaykunankuta (Núm. 14:30).

7. ¿Pikunataj Jehovawan pusachikorqanku? (Números 14:24; dibujotawan qhawariy).

⁷ Jinapis wakin israelitasqa Jehovawan pusachikullarqanku. Por ejemplo Jehová nerqa: “Calebtajrí tukuy sonqowan kasukullawarqapuni”, nispa (Números 14:24 leey). Chayrayku Diosqa Calebta bendicerqa, saqerqataj Canaanpi maypichus tiyakuyta ajllakunanta (Jos. 14:12-14). Sumaj Jallpʼaman yaykoj israelitaspis, Caleb jinallataj Jehovawan pusachikorqanku. Jehovaqa Josuetañataj ajllarqa Moisespa cuentanmanta israelitasta pusananpaj, israelitastaj “Josueta jatunpaj qhawarqanku tukuy kausayninpi” (Jos. 4:14). Chayrayku Jehovaqa paykunata bendicerqa, Sumaj Jallpʼaman yaykunankutataj saqerqa (Jos. 21:43, 44).

8. ¿Imaynatá Jehová reyespa tiemponpi llajtanta pusarqa? (Dibujotawan qhawariy).

⁸ Watasninman Jehovaqa juecesta churarqa llajtanta pusanankupaj. Aswan qhepamantaj reyespa tiemponkupi, profetastañataj churarqa chayta ruwanankupaj. Diosta kasukoj reyesqa, chay profetaspa yuyaychasqankuta  uyarerqanku. Uj kuti rey Davidtaqa profeta Natán cheqancharqa, paytaj kʼumuykukoj sonqowan chayta japʼikorqa (2 Sam. 12:7, 13; 1 Cró. 17:3, 4). Rey Jehosafattaj profeta Jahazielta kasukorqa, Judapi tiyakojkunatataj nerqa Diospa profetasninpi creenankuta (2 Cró. 20:14, 15, 20). Rey Ezequiastaj, llakiy tiempospi kashaspa profeta Isaiaspa yanapayninta mañakorqa (Isa. 37:1-6). Reyes Jehovata kasukojtinkoqa pay bendicerqa, nacionninkutataj jarkʼarqa (2 Cró. 20:29, 30; 32:22). May sutʼipuni karqa Jehová llajtanta profetasnejta pusashasqanqa. Jinapis Israelmanta ashkha reyesqa paykunata mana uyarerqankuchu (Jer. 35:12-15).

¿IMAYNATÁ JEHOVÁ ÑAUPA TIEMPOMANTA CRISTIANOSTA PUSARQA?

9. ¿Imaynatá Jehová ñaupa tiempomanta cristianosta pusarqa? (Dibujotawan qhawariy).

⁹ Pentecostés 33 watapi Jehovaqa cristiana congregacionta rikhuricherqa. Chay tiempopi, ¿imaynatá Jehová llajtanta pusarqa? Jesusta churarqa congregacionmanta uma kananpaj (Efe. 5:23). Pero Jesusqa mana sapa uj cristianowanchu parlaj imatachus ruwananta ninanpaj, manaqa Jerusalenpi apostolesnejta, ancianosnejta paykunata ñaupajman pusarqa (Hech. 15:1, 2). Chantapis sapa congregacionpi ancianosta churarqa congregacionta pusanankupaj (1 Tes. 5:12; Tito 1:5).

10. 1) Ñaupa tiempomanta cristianos, ¿kamachiykunata kasukorqankuchu? (Hechos 15:30, 31). 2) ¿Imaraykutaj ñaupa tiempomanta wakin Jehovaj sutinpi llankʼajkunata qhesacharqanku? (“ ¿Imaraykutaj wakinkuna Diospa sutinpi llankʼaj runasta qhesachanku?” nisqa recuadrota qhawariy).

¹⁰ Ñaupa tiempomanta cristianos, ¿japʼikusqanku kamachiykunata kasukorqankuchu? Arí, casi tukuyninku sonqomantapacha kasukorqanku. Paykunaqa “maytapuni kusikorqanku” kallpachasqa kasqankumanta (Hechos 15:30, 31 leey). Kay tiempopirí Jehová, ¿imaynatá llajtanta pusashan?

¿IMAYNATÁ JEHOVÁ KAY TIEMPOPI PUSAWANCHEJ?

11. ¿Imaynapí yachakun Jehová runasnejta llajtanta pusashasqanta? Sutʼinchariy.

¹¹ Kay tiempopipis Jehovaqa llajtanta pusashallanpuni Palabrannejta, Wawannejta ima, payqa congregacionmanta uma. ¿Sutʼitachu reparanchej Jehová runasnejta llajtanta pusashallasqantapuni?  Arí. Piensarina imachus kasqanta 1800 wata qhepata. Charles Russellwan yanapajkunasninwanqa repararqanku 1914 wataqa may importantepuni kasqanta Diospa Gobiernonpaj (Dan. 4:25, 26). ¿Imaynapí chayta repararqanku? Bibliaj profeciasninta estudiaspa. Jehovataj chay estudiasqankuta bendicerqa. Imachus 1914 watapi pasasqanqa, sutʼita reparachiwarqanchej Diospa Gobiernon kamachiyta qallarisqanta. Chay watapi Primera Guerra Mundial qallarerqa, wañuchej onqoykuna karqa, terremotos, yarqhaykuna ima (Luc. 21:10, 11). Chaypi sutʼita reparakorqa Jehovaqa chay kʼacha sonqoyoj runasnejta llajtanta yanapashasqanta.

12, 13. ¿Imatataj ruwakorqa Segunda Guerra Mundial kashajtin astawan predicakunanpaj?

¹² Piensarinallataj imachus Segunda Guerra Mundial kashajtin karqa chaypi. Centralninchejmanta cargoyoj hermanosqa imatachus Apocalipsis 17:8 nisqanta estudiarqanku, entienderqankutaj Armagedonqa mana Segunda Guerra Mundial pasaytachu chayamunanta. Manaqa uj tiempo tukuy ima allillan kanan karqa, chaypitaj runasman astawan predicayta atinkuman karqa. Chayrayku chay tiempopi Diospa llajtanqa uj imata ruwanankuta nerqa, chaytaj mana allinchu kaspa jinarqa. Paykunaqa Colegio Superior Bíblico de la Watchtower de Galaad nisqa escuelata rikhuricherqanku (kunantaj sutikun Galaad Escuela). Chay escuelaqa karqa misionerosta wakichinapaj, ajinamanta waj lugarespi predicamunankupaj, yachachimunankupaj ima. Guerra kashajtinpis, hermanosta waj suyusman kacharqanku. Chantapis allin kamachi yuyayniyojqa Curso en el Ministerio Teocrático nisqata rikhuricherqa, chaypi tukuy publicadoresta yanapanankupaj aswan sumaj yachachejkuna kanankupaj. b Tukuy chaytaj Jehovaj kamachisninta wakicherqa imatachus aswan qhepaman ruwananku karqa chaypaj.

¹³ Sutʼita reparanchej Jehovaqa chay tiempopi llajtanta pusasqanta. Segunda Guerra Mundial tukukusqantawan, Jehovaj kamachisnenqa ashkha lugarespi mana ima jarkʼayniyoj predicayta atillarqanku. Chayraykutaj ashkha runas Jehovata rejserqanku, kunantaj mundo enteropi predicakushan.

14. ¿Imajtintaj Jehovaj llajtanpi, ancianospi ima atienekusunman? (Apocalipsis 2:1; fototawan qhawariy).

¹⁴ Kay tiempopipis Diospa Llajtanta Kamachejkunaqa, Cristowan pusachikushallankupuni. Paykunaqa imatachus kamachisqanku Jehová yuyasqanman jina, Jesús yuyasqanman jinapuni kananta munanku. Chay kamachiykunatataj congregacionesta waturej hermanosnejta, chayri ancianosnejta congregacionesman chayachinku. c Ajllasqa cristianosmanta ancianosqa Cristoj “paña makinpi” kashanku, chayllatataj nisunman tukuy ancianosmantapis (Apocalipsis 2:1 leey). Yachanchej jina ancianosqa pantaj runas kanku, chayrayku wakin kutisqa pantaykunku Moisés jina, Josué jina, apóstoles jinataj (Núm. 20:12; Jos. 9:14, 15; Rom. 3:23). Chaywanpis sutʼita yachanchej Jesusqa allin kamachi yuyayniyojta, ancianostapis sumajta yanapashasqanta, yanapallanqapunitaj “kay mundoj imasnin tukukunankama” (Mat. 28:20). Chayrayku ni imarayku iskayrayananchejchu tiyan chay hermanosnejta pusashawasqanchejmanta.

JEHOVAWANPUNI PUSACHIKOYQA MAY SUMAJ

15, 16. ¿Imatá yachakunki Jehovawan pusachikojkunamanta?

¹⁵ Jehovawanpuni pusachikoyqa kay tiempopi mayta yanapawanchej. Andymantawan, warmin Robynmantawan parlarina. Paykunaqa Jehová pisi imasllawan kausakunanchejta yuyaychawanchej chayman jina ruwarqanku (Heb. 13:5). Chayraykutaj construccionpi yanapakuyta aterqanku. Robyn nin: “Juchʼuy lugarsituspi qhepakoj kayku. Ashkha kutispitaj ni cocinaykupis karqachu waykʼukunaykupaj. Noqamanqa fotota orqhoy mayta gustawan. Pero ashkha camarasniyta, waj imasniytapis vendepunay karqa. Chay imasta vendepushaspaqa waqarikorqanipuni. Jinapis Abrahampa warmin Sara jina kayta munarqani. Nitaj qhepata qhawariyta munarqanichu, manaqa ñaupajllamanpuni riyta munarqani”, nispa (Heb. 11:15). ¿Kusisqachu kashanku chay ruwasqankuwan? Pay nillanpuni: “May kusisqas kashayku, imaraykuchus yachayku Jehovaman tukuy kapuwasqaykuta qoshasqaykuta. Jehovapaj llankʼaspaqa paraisopipis kashaykuman jina sientekuyku”, nispa. Qosan Andyrí, ¿ima nintaj? Pay nin: “Maytapuni kusikuyku Jehovapaj tukuy atisqaykuta llankʼasqaykumanta”, nispa.

 ¹⁶ Jehovawanpuni pusachikuy, ¿imaynamantá yanapallawanchejtaj? Hermananchej Marciamanta parlarina. Colegiomanta llojsiytawan, yuyaychasqankuman jina precursora regular kayta munarqa (Mat. 6:33; Rom. 12:11). Pay nin: “Uj universidadpi niwarqanku tawa wataspaj becata pagapunawankuta. Chaywanpis noqaqa Jehovapaj astawan llankʼayta munarqani. Chayrayku institutollaman yaykorqani uj oficiota yachakunaypaj, ajinamanta precursora jina sirvinaypaj. Chay ruwasqayqa may sumajpuni karqa. Kunantaj precursora regular kani. Pisillata trabajasqayraykutaj Betelpi yanapakuyta atini, waj sumaj imaspipis”, nispa.

17. ¿Imaynamantá yanapallawanchejtaj Jehovawanpuni pusachikuy? (Isaías 48:17, 18).

¹⁷ Wakin kutispi Jehovaj llajtanqa yuyaychaykunata qowanchej. Chaytaj jarkʼawanchej qolqeta munakuyman mana urmanapaj, nillataj Diospa kamachiykunasninta pʼakej imasta ruwanapajpis. Chay kutispi Jehovawan pusachikoyqa allinnillanchejpajtaj. Ajinamanta sonqonchejqa mana imamantapis juchachawanchejchu, ashkha problemasmantataj librakunchej (1 Tim. 6:9, 10). Chantapis Jehovapaj astawan llankʼayta atinchej. Chaytaj mayta kusichiwanchej, sonqo tiyaytataj qowanchej (Isaías 48:17, 18 leey).

18. ¿Imajtín qan Jehovawanpuni pusachikuyta munanki?

¹⁸ Jehovaqa runasnejllatapuni llajtanta pusanqa manchay ñakʼariy tiempopi, Cristo waranqa watasta kamachishajtinpis (Sal. 45:16). Chay tiempopi munasqanchejta waj ladoman churananchej kajtinpis, ¿kasukullasunpunichu? Kunanmantapachaña kasukusun chayqa, aswan qhepamanpis kasukuyta atillasuntaj. Chayrayku Jehovawanpuni pusachikuna, cuidanawanchejpaj churan chay runastapis kasukunallapuni (Isa. 32:1, 2; Heb. 13:17). Ashkha imasrayku Jehovapi atienekusunman. Pay yanapawanchej ni ima paymanta karunchanawanchejpaj, paraisokamataj chayananchejpaj, maypichus kusisqa wiñaypaj kausakusunchej.