Roboampa tantanqa Salomón karqa. Salomonqa israelitasta 40 watasta kamacherqa (1 Rey. 11:42). Roboamqa tatan Salomón wañupusqantawan, Sichemman rerqa rey churasqa kananpaj (2 Cró. 10:1). Roboamqa ichapis manchachikorqa reyña kaspa, tatan Salomón jinachus chayri manachus sumaj yachaywan kamachinanmanta, problemastapis allinchananmanta.

Roboamqa kamachiyta qallarishaspa uj problemata allinchanan karqa. Imajtinchus israelitasqa wakin runasta Roboamman ajinata nichimusqanku: “Tataykeqa ancha sinchʼita sirvichikuwaj kayku; kunanqa qan pisiyachiy ari chay sinchʼi trabajota, chay chhika llasa yugota jina pataykuman churawasqaykumanta, noqaykutaj qanta sirvisqayku”, nispa (2 Cró. 10:3, 4).

Roboamtaj chayta uyarispa ichapis piensarerqa israelitasta kasojtin, manaña tukuy ima patapichu kausakunanta, jinallataj familiaresnin, kamachisninpis. Piensarillarqatajchá israelitasta mana uyarejtin, paykuna contranpi sayaykunankuta. Chayrayku Roboamqa, tatan Salomonta yanapaj kanku, chay kurajkunawan yuyaychachikorqa. Chay kurajkunataj Roboamta nisqanku israelitasta uyarinanta. Roboamtajrí chay kurajkunata mana kasukuspa joveneswan yuyaychachikorqa. Chay jovenesta uyarispataj israelitasman jinata kuticherqa: “Tatayqa sinchʼita trabajachisorqachej, noqatajrí astawanraj trabajachisqaykichej. Tatayqa lazowan seqʼosorqachej, noqarí puntampi titi bolasniyoj lazowan seqʼosqaykichej”, nispa (2 Cró. 10:6-14).

Roboammanta yachakunchej, kuraj hermanospa sumaj yuyaychayninkuta kasukunapuni kasqanta. Imajtinchus paykunaqa unaytaña Jehová Diosta sirvisqankurayku, sumajta yuyaychawasunman allin kajtapuni ruwanapaj (Job 12:12).

Roboamqa soldadosta tantaykuytawan Israelpa contranpi maqanakoj riyta yuyarqa. Jinallapi Jehová Diosqa profetan Semaiasta kacharqa Roboamta ninanpaj: “Ama israelitas wawqesniykichejpa contrankupi maqanakoj riychejchu. Sapa ujniykichej wasiykichejman kutipuychej, imaraykuchus kaytaqa noqapuni ruwani”, nispa (1 Rey. 12:21-24). *

Roboamqa ichapis Diosta mana kasukuyta atillanmanchu karqa. Imajtinchus israelitasqa paymanta asikuspa, ichapis jinata nerqanku: “Puntampi titi bolasniyoj lazowan seqʼonawanchejta nerqa, nitaj atinchu”, nispa (2 Cró. 13:7 kikinchay). Chaywanpis Roboamwan, tukuy soldadosninwanqa Jehová Diospa “nisqanta kasuspa, wasinkuman kutiporqanku”.

Noqanchejqa Roboammanta yachakullasunmantaj, runas asikuwajtinchejpis Jehová Diosta kasukunapuni kasqanta. Imajtinchus Jehová Diosqa kasukojtinchej bendeciwasunpuni (Deu. 28:2).

Diosqa Roboamta bendicerqa kasukusqanrayku. Imajtinchus Roboamqa Judá aylluta, Benjamín ayllutawan kamachillarqapuni. Chantapis sinchʼi jarkʼachasqa llajtasta jataricherqa, wakin llajtastataj may jinatapuni sinchʼiyacherqa (2 Cró. 11:5-12). Uj tiempotataj Jehová Diosta kasukullarqapuni. Chayrayku Diosta maskʼayta munajkunaqa Jerusalenman rerqanku Jehová Diosta yupaychaj, Roboamtataj sinchʼita sayachej. Imajtinchus chay chunka ayllusqa llulla diosesta yupaychasharqanku (2 Cró. 11:16, 17). Roboamqa Jehová Diosta kasukusqanrayku reinonta sumajta sayacherqa.

Roboamqa reinonta allinta sayachispaña, Jehová Diospa leyesninta manaña kasukorqachu. Llulla diosestataj yupaychayta qallarerqa. Ichapis chaykunata ruwarqa maman amonita kasqanrayku (1 Rey. 14:21). Tukuy israelitaspis Roboam jinallataj ruwarqanku. Chayrayku Jehová Diosqa saqerqa Egiptoj reynin Sisac, Judapi jarkʼachasqa llajtasta japʼikapunanta (1 Rey. 14:22-24; 2 Cró. 12:1-4).

Roboamqa maytachá manchachikorqa, Egiptomanta soldados Jerusalén llajtaman maqanakoj chayajtinku. Imajtinchus Roboamqa chay llajtapi tiyakoj. Chaypacha profeta Semaiasqa Roboamman jamorqa, jinataj Judamanta kaj kurajkunamanwan, paykunamantaj nerqa: “Tata Diosqa nisunkichej: Qankuna noqata qonqarpariwasqaykichejrayku, noqaqa Sisacpa makinman saqerparisqaykichej”, nispa. Jinapi Israelmanta kurajkuna, chantá Roboampis juchayoj kasqankuta reparakuspa kʼumuykukorqanku, nerqankutaj: “Tata Diosqa noqanchejwan cheqan kajta ruwashan”, nispa. Kʼumuykukusqanraykutaj Jehová Diosqa Roboamta librarqa, nitaj saqerqachu Jerusalén thuñisqa kananta (2 Cró. 12:5-7, 12).

Chantá Roboamqa Judá aylluta kamachillarqapuni. Niraj wañupushaspataj wawan Abías rey kananta munasqanrayku, wakin wawasninman ashkha imasta qorqa, ajinamanta mana Abiasman sayaykunankupaj (2 Cró. 11:21-23). Roboamqa chayta sumajta umachakuspa ruwarqa, manataj joven kashaspa jinachu.

Roboamqa kamachishajtin wakin imasta allinta ruwaspapis, mana Jehová Diosta kusicherqachu. Chayrayku Biblia paymanta jinata nin: “Roboamqa sajra kajta ruwarqa, imaraykuchus mana cheqan sonqowanchu Tata Diosta maskʼarqa”, nispa (2 Cró. 12:14).

Roboamqa Diosta wakin kutis kasukorqa, Diospa llajtanraykutaj wakin imasta allinta ruwarqa. Chaywanpis Roboamqa mana Jehová Diosman qayllaykorqachu, nitaj Diospa ñaupaqenpi allinpaj qhawasqa kayta maskʼarqachu. Chayrayku pantaykorqa, llulla diosestataj yupaycharqa. Chantapis pantaykuspa mana tukuy sonqochu  pesachikorqa, manaqa wajkuna nisqankuraykulla (2 Cró. 11:3, 4; 12:6). Chaynejta sajra kajllatapuni ruwarqa. Roboamqa ni imapi awelon David jinachu karqa. Davidqa jatun juchaspi urmaspapis tukuy sonqo pesachikorqa. Jehová Diostapis tukuy sonqo munakorqa, cheqan kajtataj ruwarqa (1 Rey. 14:8; Sal. 51:1, 17; 63:1).

Roboampa kausaynenqa reparachiwanchej Jehová Dios allin ñawiwan qhawanawanchejpajqa, paypa munayninta ruwana kasqanta, paymantaj qayllaykuna kasqanta. Familianchejpaj trabajana kajtinpis, Jehová Diosta kusichinapaj mayta kallpachakunanchej tiyan.

Diosta kusichinapajqa payta sonqomantapacha munakunanchej tiyan. Chaypajqa Bibliata tukuy tiempo sumajta estudiananchej tiyan, mana saykʼuspataj Diosmanta mañakunanchej tiyan, imaynatachus nina lauranallanpajpuni llantʼata churanchej, ajinata (Sal. 1:2; Rom. 12:12). Diosta sonqomantapacha munakusunchej chayqa, imatapis Diosta kusichinapaj jinapuni ruwasunchej. Pantajtinchejtaj Diosmanta perdonta mañakusunchejpacha, tukuy sonqotaj pesachikusunchej. Ajinamanta mana Roboam jinachu pantasunchej. Astawanqa cheqan kajllatapuni ruwasunchej (Jud. 20, 21).