1. Tatanchej Jehová jina kayta munasqanchejrayku, ¿imata ruwanapajtaj kallpachakunchej?

TATANCHEJ Jehovaqa mayta munakuwanchej (Juan 3:16). Noqanchejtaj pay jina kayta munanchej. Chayrayku tukuyta khuyakunapaj, familianchejta jinataj munakunapaj, mayta kallpachakunchej. Astawanraj ‘creeypi kaj hermanosninchejtaʼ munakuyta munanchej (Gál. 6:10; 1 Ped. 3:8). Cristiano hermanosninchej familianchej jina kasqankurayku, llakiypi kajtinku yanapayta munanchej.

2. ¿Imatá kay yachaqanapi yachakusun?

² Jehová Diospa familianmanta kayta munajkunaqa, ashkha llakiykunasniyoj kanqanku (Mar. 10:29, 30). Kay mundoj tukukuynin astawan qayllaykamusqanrayku, ichapis astawan pruebaspi rikukusun. ¿Imaynatá cristianos yanapanakusunman? Kay yachaqanapi Lotmanta, Jobmanta, Noemimantawan yachakusun. Yachakullasuntaj hermanosninchej ima llakiykunapichus rikukusqankuta, imaynatachus paykunata yanaparinanchejta ima.

3. 1) 2 Pedro 2:7, 8 nisqanman jina, ¿imapitaj Lot pantarqa? 2) ¿Imaspitaj Lot rikukorqa?

³ Lotqa, Sodoma llajtapi kausakuyta ajllaspa mayta pantaykorqa. Chay llajtamanta runasqa, millay kausayniyoj karqanku (2 Pedro 2:7, 8 leey). Chay lugar kausanapaj sumaj kajtinpis, Lotqa chay llajtaman risqanrayku, sinchʼi llakiykunapi rikukorqa (Gén. 13:8-13; 14:12). Ichapis Lotpa warmenqa chay llajtata chayri chay llajtamanta wakin runasta munakusqanrayku, Jehová Diosta mana kasukorqachu. Chayraykutaj Dios azufre  nina parata chay llajtaman parachimojtin wañorqa. Lotpa iskay warmi wawasnintajrí, chay llajtamanta qhariswan casarakunanku karqa. Chay qharistaj Sodomapi wañorqanku. Ajinapi Lotqa wasinta, tukuy kapuyninta, warmintapis pierderqa (Gén. 19:12-14, 17, 26). Lot chay jina llakiykunapi kashajtin, Jehová Diosqa paywan mayta pacienciakorqa.

4. ¿Imaynasmantá Jehová Dios Lotwan pacienciakorqa? (Kay revistaj tapanpi dibujota qhawariy).

⁴ Lot Sodoma llajtapi tiyakuyta ajllajtinpis, Jehová Diosqa paymanta khuyakorqa. Chayrayku payta, familiantawan salvananpaj angelesninta kacharqa. Jinapis Lotqa Sodoma llajtamanta apurayta llojsinanmantaqa, “mana usqhayta puririyta aterqachu”. Chayrayku Jehovaj angelesnenqa, Lotta, “warminta, iskaynin ususisninkutawan makisninkumanta llajtamanta jawaman aysarqanku” (Gén. 19:15, 16). Chantá angelesqa paykunaman nerqanku orqosman ayqekunankuta. Jinapis chayta ruwanankumantaqa, Lotqa aswan qayllapi kaj llajtitaman ayqekuyta mañakorqa (Gén. 19:17-20). Jehovaqa Lotta pacienciawan uyarerqa, mañakusqantataj ruwarqa. Jinapis aswan qhepaman, Lotqa chay llajtitapi tiyakuyta manchachikorqa, orqosmantaj tiyakoj riporqa, maymanchus Jehová Dios ñaupajta rinanta nerqa, chayman (Gén. 19:30). Jehová Diosqa Lotwan maytapuni pacienciakorqa. Qhepan parrafospeqa, imaynatachus Jehová jina ruwananchejta yachakusun.

5, 6. ¿Imaynatá 1 Tesalonicenses 5:14, Diosninchej jina ruwanapaj yanapawanchej?

⁵ Ichapis uj hermanonchejqa Lot jinallataj mana allinta ajllasqanrayku, problemaspi rikukunman. Jina kajtin, ¿imatá ruwasunman? Ichá chay hermanota niyta munasunman: “Juchaykirayku ñakʼarishanki”, nispa (Gál. 6:7). Juchanraykupuni ñakʼarishan chaypis, ama chayta ninachu. Astawanpis imaynatachus Jehová Dios Lotta yanaparqa, ajinallatataj hermanonchejta yanapana. Qhawarina imaynatachus chayta ruwanata.

⁶ Jehová Diospa angelesnenqa, mana Lotta Sodomamanta llojsinallantachu nerqanku. Paykunaqa makinmanta japʼispa ayqecherqanku. Noqanchejpis ajinallatataj ruwasunman. Ichapis uj hermano problemaspi rikukunanpaj jina imatapis ruwashan. Chayta rikuspaqa payta reparachisunman, yanaparisunmantaj. Bibliaj nisqanta mana chay ratochu kasukun chayqa, paywan pacienciakuna. Lotta yanaparqanku chay iskay ángeles jina kana. Hermanonchejta yanaparispa ama saykʼunachu, nitaj paymanta karunchakunachu. Astawanqa payta yanaparinapaj tukuy atisqanchejta ruwana (1 Juan 3:18). Hermanonchej Bibliaj nisqanta kasukunanpaj, ichá makinmantapis japʼispa jina yanapananchej kanqa (1 Tesalonicenses 5:14 leey).

7. Jehová Diosninchej jina, ¿imastataj hermanosninchejpi qhawasunman?

⁷ Jehová Diosqa mana Lotpa pantasqasnintachu qhawarqa. Astawanpis apóstol Pedrowan, Lot cheqan runa kasqanta qhelqacherqa. Jehová Dios pantasqasninchejta mana qhawasqanmanta, mayta kusikunchej (Sal. 130:3). Noqanchejpis Jehová jina kasunman, hermanosninchejpa allin ruwasqasninkuta astawan qhawaspa. Chayta ruwaspaqa, hermanosninchejpaj aswan pacienciayoj kasunchej. Paykunataj yanapananchejta saqekullanqanku.

8. ¿Imatá ruwasunman wajkunamanta khuyakunapaj?

⁸ Jobqa mana Lot jinachu pantarqa. Jinapis payqa, sinchʼi llakiykunapi rikukullarqataj. Jobqa tukuy kapuyninta pierderqa, niña sumajpaj qhawasqachu karqa, millay onqoyniyojtaj karqa. Tukuynin wawasnintaj  wañuporqanku. Chantapis kinsa amigosnin sonqochanankumantaqa juchachallarqanku. ¿Imaraykutaj chay kinsa amigosnin Jobmanta mana khuyakorqankuchu? Paykunaqa mana Jobpa llakiyninta entienderqankuchu. Chayraykutaj Jobmanta pantasqata parlarqanku, mana khuyakuspataj juchacharqanku. ¿Imatataj ruwasunman mana paykuna jina kanapaj? Ñaupajtaqa yuyarikuna Jehová Dioslla sapa runaj llakiyninta sumajta yachasqanta. Chantá hermanonchej llakiyninta willariwajtinchej, sumajta uyarina. Nitaj uyarinallachu, manaqa llakiyninta llakiyninchejta jina qhawana. Chayta ruwaspaqa, hermanonchejmanta tukuy sonqo llakikusqanchejta rikuchisun.

9. Wajkunamanta khuyakuspa, ¿imatataj mana ruwasunchu, imaraykutaj?

⁹ Llakisqa hermanonchejmanta khuyakuspaqa, mana problemasninta wajkunaman cuentakusunchu. Cuento qʼepi kajkunaqa hermanosta tʼaqanachinku, nitaj congregacionta kallpachankuchu (Pro. 20:19; Rom. 14:19). Chay jina runasqa mana yuyaychakuspalla parlarparinku, llakisqa kajpa sonqontataj nanachinku (Pro. 12:18; Efe. 4:31, 32). Chayrayku llakisqa hermanonchejpa allin ruwasqasninta astawan qhawana. Piensarinataj imaynatachus payta llakiyninpi yanaparinata.

10. ¿Imatá Job 6:2, 3 yachachiwanchej?

¹⁰ (Job 6:2, 3 leey). Jobqa wakin kutis mana yuyaychakuspalla chayri “usqhayllata” parlarparerqa. Jinapis aswan qhepaman, imatachus nisqanmanta pesachikorqa (Job 42:6). Sinchʼi llakiypi kaj hermanosqa, Job jinallataj mana yuyaychakuspalla imatapis parlarparinkuman, chantaraj pesachikunkuman. Uj hermanonchej ajinata parlarparejtin, ¿imatá ruwasunman? Payta juchachanamantaqa, khuyakuna. Kaytataj yuyarikuna: Jehová Diosninchejqa mana munarqachu problemasniyoj  chayri llakiykunasniyoj kananchejta. Chayrayku ama tʼukunachu, llakiypi kaj hermanonchej imatapis parlarparejtin. Jehovamanta chayri noqanchejmanta pantasqata parlajtinpis, ama usqhayta phiñakunachu, nitaj juchachanachu (Pro. 19:11).

11. Ancianos pitapis yuyaychashaspa, ¿imaynatá Elihú jina ruwankuman?

¹¹ Wakin kuti, sinchʼi llakiypi kaj hermanonchejqa, yuyaycharinanchejta chayri kʼamirinanchejta necesitallantaj (Gál. 6:1). ¿Imaynatá ancianos chay hermanota yanaparinkuman? Elihú jina ruwaspa. Elihuqa Job parlashajtin khuyakuywan uyarerqa (Job 33:6, 7). Chantá Jobta niraj yuyaycharishajtin, imaynachus kashasqanta entienderqa. Ancianospis Elihú jina ruwankuman, llakisqa kajkunata sumajta uyarispa, imaynachus kashasqankuta entiendespa ima. Chayta ruwajtinkoqa, yuyaychasqankuwan llakisqa kajpa sonqonman chayanqanku.

12. Noemij qosan, iskay qhari wawasnin ima wañupojtinku, ¿imaynataj pay kasharqa?

¹² Noemiqa Jehová Diosta munakorqa, tukuy sonqotaj payta sirverqa. Jinapis qosan, iskay qhari wawasnin ima wañupojtinku, sutinta Mara sutiman cambiakuyta munarqa. Chay suteqa, niyta munan “sinchʼi llakisqa chayri phiñasqa” (Rut 1:3, 5, 20, 21). Rutqa Noemij ujnin ñojchʼan karqa. Payqa suegran llakiykunapi kashajtin, mana saqerparerqachu. Rutqa Noemita mana yanaparillarqachu, manaqa parlasqanwanpis sonqocharqa. Payqa Noemita mayta munakusqanta nerqa, miskʼi palabraswantaj kallpacharqa (Rut 1:16, 17).

13. ¿Imaraykutaj viudos kajkuna kallpachanata necesitanku?

¹³ Viuda chayri viudo hermanosninchejqa, kallpachanata necesitanku. Qhariwarmi kausaytaqa, ladonpura wiñaj sachʼaswan kikinchasunman. Chay sachʼaspa saphisninkoqa, tiempowan astawan ujchaykukunku. Chayrayku ujnin sachʼata urmachejtinchej, ujnenqa chʼakipullantaj. Qhariwarmi kausaypis kikillantaj. Ujninku wañupojtin, ujnenqa sinchʼi llakisqa qhepakun. Paulinamanta * parlarina. Paypa qosanqa jinallamanta wañuporqa. Pay nin: “Kausayneyqa ujllapi mana allinman tukorqa, mana piniyoj kasqaytataj yuyarqani. Qosayqa compañeritoy karqa, paywanqa tukuy imamanta parlarikoj kayku. Llakiypipis kusiypipis khuska kaj kayku. Ima llakiyniytapis payman willakoj kani. Pay wañupojtin, imaypis faltawanman jina karqa”, nispa.

14, 15. Viudos chayri viudas kajkunata, ¿imaynatá sonqochasunman?

¹⁴ Viudos chayri viudas kajkunata, ¿imaynatá sonqochasunman? Paykunaman chimpayta manchachikuspapis chayri imatachus ninanchejta mana yachaspapis, paykunawan parlarinapuni. Paulina nillanpuni: “Runasqa llakisqaj sonqonta nanachiyta manchachikusqankurayku, wañuymanta mana parlayta munallankuchu. Jinapis noqapajqa aswan sumaj imallatapis ninawanku, chʼinlla kanankumantaqa”, nispa. Wañupojpa familiaresninkoqa, mana suyankuchu may yachayniyoj runa jina parlananchejta. Paulina nillantaj: “Sonqochanawankupaj imallatapis niwajtinku, mayta agradecekoj kani”, nispa.

¹⁵ Williampa señoranpis niraj unaychu wañuporqa. Pay nin: “Wajkuna señoraymanta allinta parlajtinku, mayta sonqochakuni. Reparani señorayta allinpaj qhawasqankuta, munakusqankutataj. Palabrasninkoqa mayta yanapawan, sonqochawantaj. Noqaqa warmisitayta mayta munakorqani, paywanqa tukuy imata ruwaj kani”, nispa. Blancapis  viudallataj. Pay nin: “Wakenqa noqawan khuska Diosmanta mañakunku, wakin versiculostapis leeripuwanku. Chayqa mayta sonqochawan. Qosaymanta parlariwajtinku chayri paymanta parlajtiy uyariwajtinku, mayta yanapawanku”, nispa.

16. 1) Viudos chayri viudas kajkunata, ¿yanaparinallapunichu kasqa? 2) Santiago 1:27 nisqanman jina, ¿imatá ruwananchej tiyan?

¹⁶ Imaynatachus Rutqa Noemita yanapallarqapuni, ajinallatataj noqanchejpis viudo hermanosninchejta yanapanallanchejpuni tiyan. Paulina nillantaj: “Qosay wañupusqantawanqa, ashkhas sonqochaj jamuwarqanku. Tiemponmantaj tukuypa kausayninku kikillanpuni karqa. Noqaj kausayniyrí niña kikinchu karqa. Llakisqa kajkunaqa, killasta chayri watasta yanapanata necesitayku”, nispa. Familianchejmanta pillapis wañupojtin, mana tukuychu kikinta llakikunchej. Wakin viudosqa chayri viudasqa, sapanku kausayman yachaykukullanku. Wakintajrí warminkuwan chayri qosankuwan imatachus ruwaj kanku, chayta yuyarikuspa mayta sufrinku. Jehová Diosninchejqa viudosta viudastawan yanaparinanchejta niwanchej. Chayta ruwaytaj may sumajpuni (Santiago 1:27 leey).

17. Saqerparisqa kajkuna, ¿imarayku sonqochanata necesitanku?

¹⁷ Wakenqa qosanku chayri warminku saqerparejtinku, mayta llakikunku. Juliamanta parlarina. Paypa qosanqa waj warmiwan ripusqa. Pay nin: “Qosaymanta divorciakuspa, mayta llakikorqani. Nisina pay wañupojtinpis,  ajinata llakikuymanchu karqa. Qosay uj accidentepi chayri uj onqoywan wañunman karqa chayqa, mana munayninraykuchu saqerpariwanman karqa. Jinapis paypuni waj warmiwan ripuyta ajllarqa. Chayta ruwawasqanqa, mana valesqayta yuyachiwarqa”, nispa.

18. Manaña qosayojchu chayri warmiyojchu kajkunata yanapanapaj, ¿imastá ruwasunman?

¹⁸ Manaña qosayojchu chayri niña warmiyojchu kajkunaqa, sumaj amigosniyoj kayta necesitanku (Pro. 17:17). ¿Imaynatá paykunata munakusqanchejta rikuchisunman? Imitallatapis paykunapaj ruwapuspa. Ichapis mikhurinapaj wasinchejman wajyarisunman, khuska imallatapis ruwanapaj invitarisunman chayri paykunawan predicaj llojsisunman. Familiapi Diosta yupaychanapaj tantakuyninchejmanpis wajyarisunman. Chay imasta ruwaspaqa, Jehová Diosninchejta kusichisunchej. Imajtinchus payqa sonqo pʼakisqa kajkunaj qayllanpi kashan, “viudasmantaj kutikun” (Sal. 68:5; 147:3).

19. Kay 1 Pedro 3:8 nisqanman jina, ¿imatá ruwayta munanchej?

¹⁹ Tumpamantawanqa Diospa Gobiernon kay jallpʼata kamachenqa, tukuy llakiykunasninchejtataj qonqapusun. Chay pʼunchay chayamunanta mayta suyakushanchej, maypachachus kay llakiy kausay “qonqasqa kanqa, manapunitaj yuyarisqachu kanqa”, chayta (Isa. 65:16, 17). Chay tiempo chayamunankama purajmanta yanapanakuna. Hermanosninchejwan uj familia jina kasqanchejrayku, munanakusqanchejta parlasqanchejwantaj, ruwasqanchejwantaj rikuchina (1 Pedro 3:8 leey).