1. ¿Imaraykutaj Jesuspa nisqanta kasukunanchej tiyan?

JESUSQA qhepa pʼunchaykunamanta parlaspa nerqa: “Allinta qhawarikuychej, pajtataj sonqoykichej atipachikunman [...] kay kausaypa llakiykunasninwan” chayri kay kausaypa afanninwan (Luc. 21:34). ¿Imaraykutaj Jesuspa nisqanta kasukunachej tiyan? Imaraykuchus tukuypis problemasniyoj, llakiykunasniyoj ima kanchej.

2. ¿Ima llakiykunapitaj wakin hermanosninchej rikukusqanku?

² Wakin kutisqa ashkha problemas ujllapi qhatiriwasunman. Wakin hermanosninchejpa llakiykunasninkumanta parlarina. Juan * sutiyoj hermanonchejqa, esclerosis múltiple * nisqa onqoyniyoj. Señoran saqerparejtin, payqa sonqo pʼakisqa qhepakorqa. Paykunaqa 19 watasta casarasqas karqanku. Chantá iskay warmi wawasnin Jehová Diosta wasancharqanku. Hermanonchej Robertowan señoran Lindawantaj, waj jina llakiykunapi rikukorqanku. Iskayninku mana trabajoyoj qhepakorqanku, wasinkutapis pierderqanku. Chantá doctoresqa, hermananchej Lindaman nisqanku corazonninmanta onqosqa kasqanta, chay onqoytaj wañuchiyta atisqanta. Chantá nillasqankutaj, cuerponqa onqoykunamanta manaña jarkʼayta atisqanta.

3. ¿Imatataj Filipenses 4:6, 7 Jehovamanta niwanchej?

³ Munakuyniyoj Tatanchej Jehovaqa, ruwawasqanchejrayku llakiykunasninchejta sumajta yachan, yanapaytataj munawanchej (Filipenses 4:6, 7 leey). Bibliaqa parlan, Diospa kamachisnin llakiykunapi kasqankumanta, imaynatachus Jehová  Dios paykunata yanapasqanmanta ima. Qhepan parrafospi paykunamanta parlarisun.

4. 1) ¿Ima llakiykunapitaj Elías rikukorqa? 2) ¿Imatataj Elías ruwarqa Jehová Diospa yanapayninta rikunanpaj?

⁴ Profeta Eliasqa Jehová Diosta sajra tiempopi yupaycharqa, ashkha llakiykunapitaj rikukorqa. Payqa rey Achabpa tiemponpi kausarqa. Chay reyqa Jehovata wasancharqa, Jezabelwantaj casarakorqa. Jezabelqa sajra warmi karqa, Baal diostataj yupaychaj. Paykunaqa israelitasta Baalta yupaychanankupaj tanqarqanku, Jehovaj ashkha profetasnintataj wañucherqanku. Jinapis profeta Eliastaqa mana wañucherqankuchu. Eliasqa Jehovapi atienekusqanrayku yarqhay tiempopi mana wañorqachu (1 Rey. 17:2-4, 14-16). Payqa Jehovapi atienekullarqataj, Baalpa profetasninta, payta yupaychajkunata ima pʼenqaypi rikhurichinanpaj. Chay kutipi israelitasta kallpacharqa Jehová Diosta yupaychanankupaj (1 Rey. 18:21-24, 36-38). Eliasqa llakiypi kashajtin, tukuy imaymanamanta rikorqa Jehová Dios yanapasqanta.

5, 6. 1) Kay 1 Reyes 19:1-4 nisqanman jina, ¿imaynataj Elías kasharqa? 2) ¿Imaynatá Jehová Dios Eliasta munakusqanta rikucherqa?

⁵ (1 Reyes 19:1-4 leey). Reina Jezabel Eliasta wañuchinanta nejtin, Eliasqa mayta mancharikorqa. Chayrayku payqa Beerseba llajtaman ayqekorqa. Manchay phutisqa kasqanraykutaj wañuyllataña munarqa. ¿Imarayku ajinata yuyarqa? Imaraykuchus “Eliasqa noqanchej jina” pantaj runalla karqa (Sant. 5:17). Ichapis  payqa problemasninrayku, saykʼusqa kasqanrayku ima, sinchʼi llakisqa kasharqa. Eliasqa tukuy imata ruwarqa israelitas Jehová Diosta yupaychanankupaj. Israelitastaj mana kasukorqankuchu. Chayrayku Eliasqa imastachus ruwasqan qhasillapaj kasqanta yuyarqa, piensarqataj payllaña Jehová Diosta yupaychashasqanta (1 Rey. 18:3, 4, 13; 19:10, 14). Eliaspa nisqan mayta tʼukuchiwajtinchejpis, Jehová Diosqa paypa llakiyninta sumajta entienderqa.

⁶ Eliasqa imaynachus kashasqanta Jehová Diosman willakorqa. Paytaj mana kʼamiykorqachu, astawanpis kallpacharqa (1 Rey. 19:5-7). Chaymantaraj Jehová Diosqa, Eliasta munakuywan cheqancharqa. Chaypajtaj jatun atiyninta rikucherqa. Chantapis Eliasman nerqa, 7 mil israelitasraj Baalta mana yupaychasqankuta (1 Rey. 19:11-18). Jehovaqa Eliasta munakusqanta, ruwasqasninwan rikucherqa.

7. Jehová Dios Eliaspa llakiyninta entiendesqanta yachay, ¿imaynatá sonqochawanchej?

⁷ Ichá noqanchejpis Elías jina sinchʼi llakisqa kashanchej. Jehová Dios Eliaspa llakiyninta entiendesqanta yachayqa, mayta sonqochawanchej. Payqa noqanchejpa llakiyninchejtapis entiendellantaj. Tatanchej Jehovaqa imaynachus kasqanchejta sumajta yachan, rejsintaj yuyasqanchejta, sonqonchejtapis (Sal. 103:14; 139:3, 4). Elías jina Jehovaman llakiyninchejta saqesun chayqa, payqa llakiyninchejta aguantanapaj yanapawasun (Sal. 55:22).

8. ¿Imaynatá Jehová Dios llakiypi kashajtinchej yanapawasun?

⁸ Sinchʼi llakisqa kashaspaqa, mana allinta yuyayta qallarisunman, nitaj imapajpis valorniyojchu kasunman. Ajinapi rikukojtinchej, Jehová Dios yanapayta atiwasqanchejmanta yuyarikuna. ¿Imaynatá pay yanapawanchej? Tatanchej Jehovaqa tukuy llakiyninchejta payman willakunanchejta niwanchej. Paytaj mañakusqanchejta uyariwasunpuni (Sal. 5:3; 1 Ped. 5:7). Chayrayku tukuy problemasninchejta payman willakuna. Jehová Diosqa mana Eliasman jinachu parlamuwasunchej. Jinapis Palabrannejta, llajtannejta ima parlamuwasun. Bibliapi wakin runaspa kausayninkumanta leespaqa, sonqochakunchej, suyakuyniyojtaj kanchej. Hermanosninchejpis kallpachallawasunmantaj (Rom. 15:4; Heb. 10:24, 25).

9. ¿Imaynatá uj sumaj amigo yanapawasunman?

⁹ Jehová Diosqa, profeta Eliasta llakiyninpi yanapananpaj uj sumaj amigota qorqa. Payqa Eliseowan yanapachikunanta nerqa. Noqanchejpis uj sumaj amigoyoj kasunchej chayqa, chay amigonchej llakiypi kashajtinchej yanapawasun (2 Rey. 2:2; Pro. 17:17). Jinapis ichá llakiyninchejmanta parlarinapaj, mana uj sumaj amigo kapuwanchejchu. Jina kajtin, Jehová Diosmanta mañakuna sumaj amigota tarinapaj. Ajinamanta llakisqa kashajtinchej, chay amigonchej sonqochawasun.

10. 1) Eliaspa llakiykunasnin, ¿kallpachawanchejchu? 2) ¿Imaynatá Isaías 40:28, 29 yanapawanchej?

¹⁰ Jehovaqa Eliasta llakiyninta aguantananpaj kallpacharqa, yanaparqataj payta sirvinallanpajpuni. Eliaspa llakiykunasnenqa, noqanchejtapis kallpachawanchej. Ichapis sinchʼi llakiykunapi kashaspa, saykʼusqalla, sonqo pʼakisqataj kasunchej. Jinapis Jehová Diosmanta mana kacharikusunchu chayqa, payqa kallpata qowasun yupaychanallanchejpajpuni (Isaías 40:28, 29 leey).

11. ¿Imaynataj Ana llakiykunasninrayku kasharqa?

¹¹ Bibliamanta waj runaspis llakiykunapi rikukullarqankutaj. Anamanta parlarina. Payqa  mana wawasniyoj kayta aterqachu. Qosanpa ujnin warmintaj, Anata asipayaspa mayta kʼumuykachachej (1 Sam. 1:2, 6). Chayrayku Anaqa sonqon ukhupi may llakisqa kasqanrayku, waqallajpuni, ni mikhuytapis munajchu (1 Sam. 1:7, 10).

12. ¿Imaynataj David kasharqa ashkha llakiykunapi rikukuspa?

¹² Rey Davidpis ashkha llakiykunapi rikukullarqataj. Wakin llakiykunasninmanta parlarina. Payqa ashkha kutispi pantasqanrayku, qʼala sonqo pʼakisqa kasharqa (Sal. 40:12). Chantapis munasqa wawan Absalón paypa contranpi oqharikorqa, wañorqataj (2 Sam. 15:13, 14; 18:33). Chantá Davidta sumaj amigon wasancharqa (2 Sam. 16:23–17:2; Sal. 55:12-14). Davidqa imayna llakisqapunichus kashasqanta, ashkha salmospi qhelqarqa. Jehová Diospi tukuy sonqo atienekusqantapis qhelqallarqataj (Sal. 38:5-10; 94:17-19).

13. ¿Imaynataj uj salmista sajra runaspa kausayninkuta rikuspa kasharqa?

¹³ ‘Diospa wasinpi’ sirvej salmistamantañataj parlarina. Ichapis payqa levita Asafpa mirayninmanta karqa. Paypis sinchʼi llakisqallataj kasharqa. Chay salmistaqa sajra runaspa kausayninkumanta envidiakorqa. Chayraykutaj manaña kusisqachu, nitaj sonqo juntʼasqachu kasharqa. Chantapis Jehová Dios kamachisninta bendecisqanmanta iskayrayarqa (Sal. 73:2-5, 7, 12-14, 16, 17, 21).

14, 15. ¿Imatataj yachakusunman Anamanta, rey Davidmanta, uj salmistamantawan?

¹⁴ Ana, rey David, salmistapis llakiypi kashaspa, Jehová Dioswan yanapachikorqanku. Kinsantinkutaj tukuy llakiyninkuta Diosman sutʼita willakorqanku. Chantapis Jehovata yupaychaj kanku chay lugarman, mana  faltakuspa rillarqankupuni (1 Sam. 1:9, 10; Sal. 55:22; 73:17; 122:1).

¹⁵ Khuyakuyniyoj Jehová Diosninchejqa, paykunaj mañakuyninkuta uyarerqa. Anaqa manaña llakikorqachu (1 Sam. 1:18). Davidtaj qhelqarqa: “Cheqan sonqoyoj runapaj imaymana llakiykuna rikhurin; chaywampis Tata Diosqa tukuy chay llakiykunamanta payta orqhon”, nispa (Sal. 34:19). Salmistataj repararqa Jehová Dios payta “paña makinwan” japʼisqanta, sumaj yuyaychaykunawantaj yanapasqanta. Pay takerqa: “Noqarí Diosman qayllakusaj. Noqapajqa chaymin aswan sumajqa. Tukuy Atiyniyoj Tata Dios, qanmin pakakunay kanki”, nispa (Sal. 73:23, 24, 28). ¿Imatataj paykunamanta yachakunchej? Ichapis wakin kutis ashkha problemasniyoj kasqanchejrayku, sinchʼi llakisqas kasunman. Ajinapi kashaspa, Jehová Dios imaynatachus kamachisninta yanapasqanpi piensarina, paymanta mañakuna, imatachus niwasqanchejtataj kasukuna (Sal. 143:1, 4-8).

16. ¿Imaraykutaj Jehová Diosmanta, hermanosmantawan mana karunchakunachu kasqa?

¹⁶ ¿Imatawan yachakunchej Anamanta, rey Davidmanta, salmistamanta ima? Jehová Diosmanta, hermanosmantawan, mana karunchakunachu  kasqanta (Pro. 18:1). Hermananchej Nancyqa, qosan saqerparisqanrayku mayta sufrerqa. Pay nin: “Ashkha diasta ni pita rikuyta munarqanichu, nitaj piwanpis parlayta munarqanichu. Jinapis wajkunamanta karunchakuspaqa, aswan llakisqalla karqani”, nispa. Ajinapi Nancyqa wajkunata yanaparej churakorqa. Pay nin: “Wajkuna llakiyninkuta willariwajtinku sumajta uyarej kani. Imaynachus kashasqankuta yachaspa, llakiyneyqa ni imapis karqachu”, nispa.

17. ¿Maypitaj kallpata watejmanta japʼisunman?

¹⁷ Tantakuykunapeqa mayta kallpachakunchej. Chaypeqa Jehová Dios yanapawanchej, sonqochawanchejtaj (Sal. 86:17). Chaypeqa Jehová Diosninchej atiyninnejta, Palabrannejta, hermanosnejta ima kallpachawanchej. Chantapis hermanoswan ‘purajmanta kallpachanakunchejʼ (Rom. 1:11, 12). Hermananchej Sofía nin: “Noqataqa Jehová Dios, hermanoswan ima, llakiyniyta aguantanaypaj yanapawarqanku. Tantakuykunaman manapuni faltakojchu kani. Astawan predicaspa, congregacionpipis astawan yanapakuspaqa, niña llakiykunasniypi yuyanichu”, nispa.

18. Llakisqa kashajtinchej, ¿imatá Jehová Dios ruwan?

¹⁸ Llakisqa kashaspaqa, Jehová Dios tumpitamantawan tukuy llakiykunata chinkachinanta yuyarikuna. Payqa kunanpis yanapayta munawanchej. Tatanchej Jehovaqa kallpata qowanchej llakiykunawan mana llauchhiyananchejpaj. Payqa problemasninchejta atipayta munananchejpajpis yanapawanchej (Fili. 2:13).

19. ¿Imatataj Romanos 8:37-39 versiculosmanta yachakusunman?

¹⁹ (Romanos 8:37-39 leey). Apóstol Pabloqa, Jehová Diospa munakuyninmanta ni ima tʼaqayta atiwasqanchejta nerqa. Jinapis, ¿imaynatá llakiypi kaj hermanosninchejta yanapasunman? Qhepan yachaqanapi yachakusunchej, imaynatachus paykunata Jehová jina khuyakunanchejta, yanaparinanchejta ima.