KAY “qhepa pʼunchaykunapeqa”, Jehová Dios ñaupajman pusashawanchej, yanapashawanchejtaj qayllallanpipuni kananchejpaj (2 Tim. 3:1). Chayrayku kamachiwasqanchejta kasukunanchej tiyan. Israelitasqa chʼin pampasta puriykachashajtinku, cornetaspa waqasqanta kasukunanku karqa. Noqanchejpis paykuna jinallataj kasukunanchej tiyan.

Jehová Diosqa Moisesman nerqa: ‘Iskay cornetasta qolqe metalmanta ruwakuy martillowan takaspa. Chaykunaqa kanqa runasta tantachimunapaj, jinallataj maymanpis puririnapaj’, nispa (Núm. 10:1, 2). Israelitas imatachus ruwanankuta yachanankupaj, sacerdotesqa mana chay cornetasta uj rejllatachu waqachinanku karqa (Núm. 10:3-8). Kay tiempopi Diospa kamachisninpis, cornetaspa waqayninkuta jina uyarillanchejtaj. Chaykunataj kanku: Jatun tantakuykunaman wajyariwasqanchej, ancianosta wakichikusqan, Diospa llajtanpi imapis cambiasqan ima. Kay yachaqanapitaj chaykunamanta parlarisun.

Wakin kutisqa, tukuynin israelitas Diosta yupaychana toldoj punkunpi tantakunanku karqa. Chay punkutaj toldoj inti llojsimuynej ladonpi kasharqa. Jehová Dios ajinata tantakunankuta nejtin, sacerdotesqa iskaynin cornetasta waqachej kanku (Núm. 10:3). Tukuy israelitastaj chayta sutʼita uyarej kanku. Imajtinchus paykunaqa, Diosta yupaychana toldoj tawantin ladosninpi jarasqa kasharqanku. Chay toldoj punkun qayllapi jarasqa kajkunaqa, ichá ratolla chayaj kanku. Jinapis aswan karitupi kajkunaqa, nichá chay ratochu chayaj kanku. Imajtinchus astawan purinanku karqa. Imayna kajtinpis, tukuyninku rinanku karqa Jehovaj kamachisqasninta uyarinankupaj.

Kay tiempopeqa niña Diosta yupaychana toldoman rinchejchu. Jinapis jatuchaj tantakuykunaman, chayman rijchʼakoj sumaj tantakuykunaman ima wajyarisqas kanchej. Chaypeqa sumajta yachakunchej, kamachiykunatapis japʼinchej. Mundontinmanta tukuy cristianosqa, chay tantakuykunapi kikinta yachakunchej, maytataj kusikunchej. Wakin cristianosqa, chay tantakuykunaman chayanankupaj karusta rinku, wakintaj mana. Jinapis chay tantakuykunaqa tukuyta yanapawanchej.

Karu lugarespi tiyakoj hermanosninchejpis, chay tantakuykunawan yanapachikullankutaj. Jatun tantakuykunaman mana chayayta atispapis, chay tantakuymanta grabakusqanta qhawayta chayri uyariyta atinku. Ajinamanta chaypipis kashankuman jina kanku. Chaytaj ajina karqa, centralninchejmanta uj hermano Benín suyupi sucursalta waturishajtin. Chaypachaqa uj sumaj tantakuy ruwakorqa, 44.131 runastaj tantakorqanku. Jinapis Arlit nisqa qhoya llajtitamanta hermanosqa, mana chay tantakuyman riyta aterqankuchu. Imaraykuchus chay  juchʼuy llajtitaqa, may karupi kashan. Chaytaj Níger nisqa suyumanta, Sahara nisqa chʼin pampaspi kashan. Jinapis Arlit llajtitamanta hermanosqa, chay sumaj tantakuyta videopi qhawarqanku. Chaypajtaj 21 runas tantakorqanku. Paykunaqa chay tantakuypipis kashankuman jina karqanku. Uj hermano qhelqarqa: “Maytapuni agradecekuyku kay tantakuyta qhawachiwasqaykumanta. Chaywanqa rikuchiwayku mayta munakuwasqaykuta”, nispa.

Sacerdotes uj cornetallata waqachejtinkoqa, sapa ayllumanta “tukuy kurajkunalla” Diosta yupaychana toldoj ñaupaqenpi tantakoj kanku (Núm. 10:4). Chaypitaj Moisesqa paykunata yachachej, kamachiykunatapis qoj. Ajinamanta ayllusninkuta sumajta yanapanankupaj. Chay kurajkuna kasunman karqa chayqa, chay ratochá risunman karqa, yachachikusqantapis sumajtachá uyarisunman karqa.

Ancianosqa mana congregacionmanta dueñoschu kanku. Chayrayku mana “patrones jinachu” Diospa ovejitasninta michinku (1 Ped. 5:1-3). Jinapis mayta kallpachakunku Diospa ovejitasninta sumajta qhawanankupaj. Chayrayku astawan yachachisqa kanankupaj wajyarisqa kajtinku, tukuy sonqo rinku. Wakenqa Ñaupajman Apajkunapaj Escuelaman wajyarisqa kanku. Chayman rej ancianosqa, congregacionta astawan sumajta yanapanankupaj yachakunku. Ajinata yachakusqankurayku, paykunapis noqanchejpis, Jehová Diosman astawan qayllaykunchej. Chay escuelaman mana rinchejchu chaypis, ancianospa yachakusqankoqa noqanchejtapis yanapawanchej.

Sacerdotesqa wakin kutis cornetasta sinchʼita waqachej kanku. Chayta uyarispataj, israelitasqa yachaj kanku Jehová Dios ñanta puririnankuta munasqanta (Núm. 10:5, 6). Paykunaqa Jehová Diospa kamachisqanman jina campamentosninkuta oqharinanku karqa. Chaypajtaj mayta kallpachakunanku karqa. Wakenqa nichá kuyuriyta munallajchu kanku. ¿Imaraykú chayta ninchej?

Ichá paykunaqa yuyaj kanku, sapa rato puririnanku kasqanta, nitaj tiempowanchu willachisqankuta. Biblia nin: “Wakin kutispeqa uj chʼisillata chay phuyu qhepakoj, qʼayantintaj tutamanta oqharikoj”, nispa. Wakin kutistaj phuyoqa, uj “mashkha pʼunchaykunata, chayri uj killata”, chayri astawan unayta qhepakoj (Núm. 9:21, 22). ¿Mashkha lugarespitaj israelitas jarakorqanku? Números libropi 33 capituloqa, 40 lugaresta jina oqharin.

Israelitasqa “jatun manchachikuna chʼin pampasta” puriykachashajtinku, wakin kutis sachʼasniyoj lugarpi jarakoj kanku (Deu. 1:19). Chay lugares sumaj kasqanrayku, manachá chay lugaresmanta kuyuriyta munallajchu kanku.

Sacerdotes cornetasta sinchʼita waqachejtinkoqa, tukuynin ayllus uyarej kanku. Ichá wakin israelitasqa, puririllaytaña munaj kanku. Jinapis turnonkuta suyakunanku karqa. Imaraykuchus cornetas ñaupaj kutipi waqajtinku, inti llojsimuynejpi jarakoj ayllusraj puririnanku karqa. Chaykunataj karqanku: Isacar ayllu, Judá ayllu, Zabulón ayllu ima (Núm. 2:3-7; 10:5, 6). Chantá sacerdotesqa, cornetasta watejmanta waqachillajtaj kanku. Chaytaj karqa ura ladopi jarasqa ayllus puririnankupaj. Ajinata cornetasta waqachillajpuni kanku, tukuynin israelitas puririnankukama.

Diospa llajtanpi imapis cambiajtin, ichapis mana chayman yachaykukuyta atillarqanchejchu. Ichá yuyarqanchej, Diospa llajtanpi ashkha imas cambiashasqanta. Chayrí imastachus ruwasharqanchej chayman, sumaj yachasqa karqanchej, kikillantapunitaj ruwayta munarqanchej. Jinapis chay mosoj ruwaykunaman yachaykukunapaj kallpachakorqanchej. Chaytaj pacienciapaj, tiempopajtaj karqa. Chantapis yacharqanchej chay mosoj ruwayman yachaykukojtinchej, Jehová Dios bendecinawanchejta.

Moisespa tiemponpi, Jehová Diosqa may chhika qharista, warmista, wawasta ima chʼin pampasta pusaykacharqa. Manachus paykunata cuidanman karqa, nitaj yanapanmanchu karqa chayqa, israelitasqa wañunkumanchá karqa. Kunanpis kay sajra mundoj tukukuynin tiempopi kashanchej. Jinapis Jehová Dios pusaykachashawanchej. Payqa yanapashawanchej qayllallanpipuni kanapaj, creeyninchejpis sinchʼillapuni kananpaj. Chayrayku cornetaj waqayninta kasukoj israelitas jina kana, Jehová Diostataj kasukunapuni.