Chay listapi kaj imasqa ‘Diospa atiyninpa poqoynin’ nisqa kanku, Gálatas 5:22, 23 versiculospitaj rikhurin. Jinapis Diospa atiynenqa, mana chaypi kaj imasta ruwanallapajchu yanapawanchej.

Pabloqa niraj chay versiculosta qhelqashaspa nerqa: “Runaj sajra munayninpa ruwasqasnenqa [...]: khuchichakuy jucha, millay imasta ruway, millay kausaypi puriy, llulla dioskunata yupaychay, layqerios, chejninakuy, churanakuy, wajkunata sajra ñawiwan qhaway, phiñakuywan atipachikuy, chhoqonakuy, tʼaqanakuy, runaspa yachachiyninta qhatiy, envidiakuy, machaykuykuna, millay fiestaspi puriy, chaykunaman rijchʼakoj waj imaspiwan”, nispa (Gál. 5:19-21). Pabloqa mana “runaj sajra munayninpa” tukuynin ruwasqasninmantachu parlasharqa. Payqa Colosenses 3:5 nisqantapis chayman yapayta atinman karqa. Gálatas 5:22, 23 versiculospipis kikillantataj ruwarqa. Pabloqa chay versiculosta ajinata tukucharqa: “Chay imaspa contranpeqa, mana ima leypis kanchu”, nispa. Griego parlaypi “chay imas” ninapaj oqharikusqan palabraqa, “chay jina imas” nikullanmantaj. Chaytaj Gálatas 5:22, 23 nisqanta astawan entiendenapaj yanapawanchej. Pabloqa mana nisharqachu, Diospa atiynin chay versiculospi kaj imasllapaj yanapawasqanchejta.

Astawan entiendenapaj, Gálatas libropi listata, imatachus Pablo Efesopi cristianosman nisqanwan kikinchana. Pay nerqa: “Kʼanchaypi kausakoyqa niyta munan, tukuy imapi kʼacha kay, cheqan kajta ruway, cheqa kajman jinataj kausakuy”, nispa (Efe. 5:8, 9). Chay listamanta ujqa, “kʼacha kay”. Chaytaj Diospa atiyninpa poqoyninmanta ujnin.

Waj kutipitaj, Pabloqa Timoteoman nerqa: “Kallpachakuy: cheqan kajta ruwanaykipaj, Diosta tukuy sonqo yupaychanaykipaj, creeyniyoj, munakuyniyoj ima kanaykipaj, jinallataj sinchʼita sayanaykipaj, llampʼu sonqotaj kanaykipaj”, nispa (1 Tim. 6:11). Kay listamantaqa kinsalla ‘Diospa atiyninpa poqoyninmanta’ kanku. Chaykunataj kanku: Creeyniyoj kay, munakuyniyoj kay, llampʼu sonqo kay ima. Jinapis Timoteoqa Diospa atiyninta necesitallarqataj: cheqan kajta ruwananpaj, Diosta tukuy sonqo yupaychananpaj, sinchʼita sayananpajpis (Colosenses 3:12; 2 Pedro 1:5-7, kikinchay).

Rikunchej jina, Diospa atiynenqa mana Gálatas 5:22, 23 versiculospi kaj imasta ruwanallapajchu yanapawanchej. Wiñay tukusqa cristianos kanapajqa, waj imastawan ruwananchej tiyan. Ajinamanta mosoj runa kaywan pʼachallikusun. Chay mosoj runa kayqa, “Diospa munayninman jina ruwasqa”, “cheqan kajta ruwanapaj, cheqa sonqotaj kanapaj” (Efe. 4:24).