1. ¿Imatataj Jesús willawanchej?

ÑAUPAJ yachaqanapi yachakorqanchej, Jehová Diosqa uj sumaj michejwan kikinchakusqanta. Payqa ovejitasninta mayta munakun. Ujnin ovejitan chinkajtintaj maskʼanpacha. Chayrayku paymanta karunchakoj israelitasman nerqa: “Noqaman kutirikamuychej, noqataj qankunaman kutirimusaj”, nispa. Kunanpis Jehová Diosqa, paymanta karunchakojkunaman kikillantataj nin. Chaytataj yachanchej kayta nisqanrayku: “Noqa Tata Diosqa kasqay jinallapuni kani” (Mal. 3:6, 7). Jehová Dioswan angeleswanqa, uj chinkasqa ovejitallapis kutinpojtin, mayta kusikunku. Chaytataj Jesús willawanchej (Luc. 15:10, 32).

2. ¿Imastataj kay yachaqanapi yachakusun?

² Kay yachaqanapi Jesuspa kinsa kikinchaykunasninmanta parlarisun. Chay kikinchaykunaqa, Diosmanta karunchakoj hermanosta yanapanamanta parlan. Chantapis chay hermanosta yanapanapaj, imaynachus kananchej kasqanta yachakusun. Yachakullasuntaj paykunata yanapay, may sumaj kasqanta.

3, 4. Lucas 15:8-10 versiculosmanta warmi, ¿imaraykutaj chinkachisqan qolqeta maskʼarqa?

³ Jehová Diospa llajtanman kutinpuyta munajkunata tarinapaj, mayta kallpachakunanchej tiyan. Jesusqa ujnin kikinchayninpi, dracma qolqeta chinkachej warmimanta parlarqa. Chay kikinchaytaj Lucas libropi kashan. Chay kikinchaymanta warmeqa, chinkachisqan qolqenta mayta maskʼarqa. Imaraykuchus chay qolqeqa, may valorniyoj paypaj karqa. Jesusqa chay kikinchaywan yachacherqa, chinkasqa kajta mana saykʼuspa maskʼana kasqanta (Lucas 15:8-10 leey).

⁴ Jesús nillarqataj, kikinchayninmanta warmeqa qolqenta tarikapuspa, mayta kusikusqanta. Jesuspa tiempopi wakin judía mamasqa,  warmi wawanku casarakushajtin chunka dracma qolqeta qoj kanku. Ichapis qolqenta chinkachikoj warmeqa, chayta ruwayta munarqa. Chay warmeqa qolqenta wasillanpi chinkachisqanta yacharqa. Chayrayku mecherota japʼichiytawan maskʼaj churakorqa. Jinapis qolqenta mana tarerqachu, imajtinchus mecheroqa mana chaykamapunichu sumajta kʼanchan. Chayrayku tukuynin wasintañataj sumajsituta picharqorqa. Jinapitaj dracma qolqenqa jallpʼa qollupi kʼanchaywan lliphipirerqa. Chay warmeqa qolqenta tarikapusqanmanta, mayta kusikorqa. Chayrayku amigasninman, vecinasninman ima nerqa: ‘Tarikapuni chinkachisqay qolqeyta’, nispa.

5. ¿Imaraykutaj congregacionmanta karunchakoj hermanosta maskʼana tiyan?

⁵ ¿Imatá Jesuspa kikinchayninmanta yachakunchej? Imatapis chinkachispaqa, tarinanchejkama maskʼana kasqanta. Ajinallatataj congregacionmanta karunchakoj hermanosta maskʼamunanchej tiyan. Ichapis paykunaqa, unayña congregacionmanta karunchasqa kashanku. Chantapis wakenqa, ichá waj lugarman tiyakoj ripunku. Chay lugarmanta hermanostaj, mana paykunata rejsinkuchu. Jinapis wakin chiriyapoj hermanosqa, ichá mayta munashanku Jehová Diosman kutinpuyta. Paykunaqa Jehovata watejmanta noqanchejwan khuska sirviyta munashanku. Jinapis yanaparinata necesitanku.

6. ¿Imaynatá chiriyapoj hermanosta maskʼaypi yanapakusunman?

⁶ ¿Pikunataj chiriyapoj hermanosta maskʼaypi yanapakunkuman? Tukuyninchej yanapakuyta atisunman: ancianos, precursores, chay hermanospa familiaresninku, waj hermanos ima. Chayrayku familiaresninchejpi amigosninchejpiwan piensarina. ¿Mayqennillankupis congregacionmanta karunchasqachu kashan? ¿Imatá ruwasunman mayllapipis predicashaspa chiriyapoj hermanowan tinkuspa? Chay hermanota tapurisunman, sichus ancianos visitarinankuta munasqanta. Munajtintaj numeronta jaywachikusunman chayri maypichus tiyakusqanta tapurisunman ancianosman willarinanchejpaj.

7. ¿Imatá hermano Tomasmanta yachakusunman?

⁷ ¿Imaynatá ancianos Jehová Diosman kutinpuyta munajkunata maskʼankuman? Imatachus hermano Tomás * ruwasqanmanta parlarina. Payqa Españapi tiyakun, ancianotaj. Hermano Tomasqa 40 hermanosmanta astawanña, Diospa llajtanman kutinpunankupaj yanapan. Pay nin: “Ñaupajtaqa wakin hermanosta tapurini, sichus yachanku chiriyapoj hermanos maypichus tiyakusqankuta. Chantá tukuynin hermanosta tapurillanitaj, sichus chiriyapoj hermanosta chayri hermanasta rejsisqankuta. Casi tukuy hermanos willariwankupacha, imaraykuchus yachanku chay hermanosta maskʼaypi yanapakushasqankuta. Chantá chay hermanosta waturikoj rini. Paykunata waturikushaspaqa tapurini: ‘¿Mayqen familiarniykipis congregacionmanta karunchasqallatajchu kashan?’, nispa. Ajinata tapurini, paykunatapis Jehovaman kutinpunankupaj yanaparinaypaj. Imaraykuchus wakinpa wawasninkoqa reunionesman jamoj kanku, predicajpis llojsejña kanku”, nispa.

8. Lucas 15:17-24 nisqanman jina, ¿imaynatá chinkaj qhari wawata tatan japʼikaporqa?

⁸ ¿Imaynataj kananchej tiyan Diosman kutinpuyta munajkunata yanapanapaj? Jesuspa ujnin kikinchayninmanta mayta yachakusunman. Payqa chay kikinchaypi wasinmanta ripoj jovenmanta parlarqa (Lucas 15:17-24 leey). Chay kikinchaymanta jovenqa, tukuy kapuyninta usucherqa. Jinapis yuyayninman churakuspa, tatanpa wasinman kutiporqa. Tatantaj payta rikuytawan, taripamuspa abrazaykorqa, muchʼaykorqataj. Ajinamanta wawanta mayta  munakusqanta rikucherqa. Jovenqa tatanman nerqa: “Tatáy, Diospa contranta, qanpa contraykitawan juchallikuni. Manaña ‘wawáy’ ninawaykipaj jinachu kani”, nispa. Tatantajrí wawanmanta mayta khuyakorqa. Chayrayku wawanta kusiywan japʼikaporqa. Payqa mana uj peonninta jinachu japʼikaporqa, manaqa munasqa wawanta jina. Chayta rikuchinanpajtaj, aswan sumaj ropata churaykorqa, anillotapis qorqa, uj fiestatataj ruwaporqa.

9. Chiriyapoj hermanosta yanapanapaj, ¿imastá ruwana tiyan? (“ Diospa llajtanman kutinpuyta munajkunata yanaparina” nisqa recuadrota leeriy).

⁹ Jehová Diosninchejqa, chinkaj jovenpa tatan jina. Payqa chiriyapoj hermanosta, hermanastapis mayta munakun, congregacionman kutinpunankutataj munan. Noqanchejpis pay jina kanapaj kallpachakuna, chay hermanostataj congregacionman kutinpunankupaj yanaparina. Paykunata yanapanapajqa, paykunawan pacienciakuna. Chantapis paykunata khuyakuna, entiendena, munakunataj. ¿Imaraykutaj chayta ruwananchejpuni tiyan? Chanta, ¿imaynatá chayta ruwasunman? Chayta qhepan parrafospi yachakusun.

10. ¿Imaraykutaj chiriyapoj hermanosta yanapanapaj pacienciayoj kananchej tiyan?

¹⁰ Chiriyapoj hermanosqa, mana chay ratochu Jehová Diosman kutinpunku. Chayrayku pacienciayoj kananchej tiyan. Paykunamanta ashkhasqa, ancianos, waj hermanos ima kutin kutita waturisqankutawanraj kutinporqanku. Asiamanta hermananchej Nancy nin: “Congregacionmanta uj amigay mayta yanapawarqa. Payqa sullkʼa hermanitanta jina munakuwarqa. Imastachus ñaupajta khuska ruwasqaykuta yuyarichiwaj. Chantapis imaynachus kashasqayta willarejtiy, pacienciawan uyariwaj, yuyaychariwajtaj. Payqa ima ratopis yanapariwajpacha, sumaj amigapuni karqa”, nispa.

11. ¿Imaraykú wakin hermanos khuyakunanchejta, entiendenanchejtataj necesitanku?

 ¹¹ Chiriyapoj hermanosmanta wakenqa, sonqo nanasqa kashanku. Khuyakuywan entiendeywantaj, paykunapaj uj sumaj jampi jina. Wakin chiriyapoj hermanosqa, ichapis waj hermano sonqonkuta nanachisqanta mana qonqayta atinkuchu. Phiñasqallapuni kasqankuraykutaj, congregacionman mana kutinpunkuchu. Ichapis paykunaqa, contrankupi sajrata ruwasqankuta piensanku. Chayraykutaj uyarinanchejta, entiendenanchejta ima necesitanku (Sant. 1:19). Hermana Mariaqa, uj tiempota congregacionmanta karunchakorqa. Pay nin: “Noqaqa munarqani uyarinawankuta, sonqocharinawankuta, yanaparinawankutataj”, nispa.

12. ¿Imaraykutaj Diospa munakuynin waskha jina?

¹² Jehová Diosqa llajtanta munakusqanta uj waskhawan kikincharqa. ¿Imaraykutaj Diospa munakuynin waskha jina? Ukhu tʼoqoman urmaykusqanchejpi piensarina. Chay tʼoqopi kashajtinchej, ichá pipis mikhunata chayri yakuta pasarichimuwanchej. Ajinata yanapariwasqanchejmantaqa mayta agradecekusunman. Jinapis chay tʼoqomanta mana llojsimuspaqa wañusunman. Chayrayku pillapis uj waskhawan chayri uj pitawan, chay tʼoqomanta orqhonawanchejta munasunman. Jehová Diosqa paymanta karunchakoj israelitasman nerqa: ‘Munakuywan waskhawan jina aysamuykichej’, nispa (Ose. 11:4). Kunanpis Jehová Diosqa, ajinallatataj chiriyapoj hermanosman nin. Ichá chay hermanosqa, problemasninkurayku chayri llakiykunasninkurayku, ukhu tʼoqopi jina kashanku. Jehová Diosqa munakuyninwan waskhawan jina paykunata chay tʼoqomanta orqhomuyta munan. Ajinamanta paypa qayllanpi watejmanta kanankupaj. Noqanchejtaj Jehová Diospa makinman churakusunman, chay hermanosta noqanchejnejta yanapananpaj.

13. ¿Imatataj uj hermanoj experiencianmanta yachakusunman?

 ¹³ Chiriyapoj hermanosninchejqa, yachananku tiyan Jehová Diospis, noqanchejpis paykunata munakusqanchejta. Noqanchejtaj chayta yuyarichisunman. Ñaupaj yachaqanapi, hermano Pablomanta parlarqanchej. Payqa 30 watas kurajta Diospa llajtanmanta karunchakorqa. Pay nin: “Uj paqarin wasiymanta llojsisharqani. Chayllapi uj kuraj hermanita chimpaykamuwarqa. Payqa manchay miskʼi simiwan parlapayawarqa. Noqaqa juchʼuy lloqallitu jinapuni waqarikorqani. Jehová Diospis paynejta parlashawanman jina karqa. Chayrayku congregacionman kutinpunayta nerqani”, nispa.

14. Lucas 15:4, 5 nisqanman jina, ¿imatataj michej chinkasqa ovejitanta tarikapuspa ruwasqa?

¹⁴ Chiriyapoj hermanosta tariytawanqa, mana saykʼuspa paykunata yanapanallanchejpuni tiyan. Ichapis paykunaqa, Jesuspa kikinchayninmanta chinkaj joven jina llakisqas kashanku. Chantapis ichá Satanaspa mundonpi mayta ñakʼarerqanku. Chayraykutaj ichapis manaña Jehová Diosmanta ñaupajta jinachu japʼikunku. Creeyninkuta kallpachanankupajqa, noqanchej yanaparinanchej tiyan. Jesuspa kikinchayninmanta michej, imatachus ruwasqanmanta parlarina. Chay michejqa, chinkasqa ovejitanta mana saykʼuspa maskʼasqa. Tarispataj ovejitan pisi kallpita kashasqanta reparasqa. Chayraykutaj qʼepiriykukuspa tropaman apakapusqa (Lucas 15:4, 5 leey).

15. ¿Imaynatá yanapasunman congregacionman kutinpoj hermanosta? (“ Uj sumaj yanapa” nisqa recuadrota leeriy).

¹⁵ Chiriyapoj hermanosninchejqa, ichá imallapis jarkʼasqanrayku, congregacionman mana kutinpuyta atishankuchu. Paykunata yanapanapajqa, tiempochakunanchej, kallpachakunanchejtaj tiyan. Chaypajtaj Diospa atiyninwan, Bibliawan,  publicacioneswan ima, yanapachikusunman. Ajinamanta creeyninkuta kallpachanankupaj yanapasun (Rom. 15:1). ¿Imaynatá chayta ruwasunman? Ashkha watastaña kaj anciano nin: “Congregacionman kutinpojkunamanta ashkhas, watejmanta Bibliata estudiachinata necesitanku”, nispa. * Sichus uj anciano chiriyapoj hermanonchejta estudiachinata niwanchej chayqa, chay llankʼayta kusiywan japʼikuna. Chay anciano nillanpuni: “Chiriyapoj hermanota estudiachejqa, sumaj amigonman tukunan tiyan. Ajinamanta chay hermanoqa paypi atienekonqa”, nispa.

16. ¿Imaraykú ángeles yanapawasqanchejta ninchej?

¹⁶ Jehová Diosman kutinpuyta munajkunata tarinapajqa, ángeles yanapashawanchej. Ashkha hermanospa experienciankutaj chayta rikuchiwanchej (Apo. 14:6). Ecuadormanta hermano Silviopi piensarina. Payqa congregacionman kutinpuyta munaspa, Diosmanta tukuy sonqo mañakusqa. Ajinata mañakushajtin, iskay ancianos wasinman chayasqanku. Chay hermanostaj, payta yanaparispa may kusisqa kasharqanku.

17. Chiriyapoj hermanosta yanapaspa, ¿imaynataj kasun?

¹⁷ Chiriyapoj hermanosta Jehovaman kutinpunankupaj yanapaspaqa, mayta kusikusun. Hermano Salvadorpa nisqanta qhawarina. Payqa chiriyapoj hermanosta yapananpaj mayta kallpachakun. Pay nin: “Jehová Diosninchej uj chinkasqa ovejitanta, Satanaspa makinmanta qhechukapojtenqa, wakin kutis kusiymanta waqarikuni. Imaraykuchus payqa yanapakojta saqewan”, nispa (Hech. 20:35).

18. Diospa llajtanmanta karunchasqa kashanki chay, ¿imatataj yuyarikunayki tiyan?

¹⁸ Diospa llajtanmanta karunchasqa kashanki chayqa, yuyarikuy Jehová Diosninchej mayta munakususqanta. Payqa llajtanman kutinpunaykita munan. Kutinpunaykipajqa ichapis mayta kallpachakunayki kanqa. Jinapis Tatanchej Jehovaqa, chinkaj jovenpa tatan jina suyashallasunkipuni. Payqa kutinpojtiyki chunka makiwan japʼikapusonqa.