1, 2. ¿Imapí kausayninchej Lotpa kausayninman rijchʼakun?

 KAY tiempomanta runas millay kausayniyoj kasqankuta rikuspa, Lot jinallataj sientekunchej. Payqa “mayta llakikorqa sajra runas mana pʼenqakuspa juchata ruwasqankumanta”. Imaraykuchus payqa yacharqa Tatanchej Jehovaqa chay millay ruwaykunata maytapuni chejnikusqanta (2 Ped. 2:7, 8). Chantapis Lotqa Jehovata mayta munakusqanrayku, payta respetasqanrayku chejnikullarqataj chay runaspa millay ruwaykunasninkuta. Kay tiempopipis wakin runasqa Diospa kamachiykunasninta tumpata respetanku, wakintaj ni tumpitata respetankuchu. Chay runaspa chaupinkupi kausakuspapis sichus Diosta munakusun, payta manchachikuytataj yachakusun chayqa, llimphu kausayniyojllapuni kayta atisun (Pro. 14:2).

² Chaypajtaj Jehovaqa Proverbios libropi imatachus nisqanwan yanapawanchej. Tukuy cristianos qharis kaspapis, warmis kaspapis, jóvenes kaspapis chayri mayorcitos kaspapis, Proverbios libromanta sumaj yuyaychaykunawan mayta yanapachikusunman.

3. Proverbios 17:3 nisqanman jina, ¿imaraykutaj sonqonchejta jarkʼayta munanchej? (Fotostawan qhawariy).

³ Jehovaqa sonqosta allinta qhawaykurin, chayrayku sonqonchejta jarkʼananchej tiyan. Runaqa ñawisninpa rikusqallanta qhawan, Jehovatajrí yachan imachus runaj sonqonpi kasqanta (Proverbios 17:3 leey). Jehovaqa yuyaychaykunasninta sonqonchejpi japʼikushasqanchejta rikuspa munakuwanchej. Chay yuyaychaykunasnin sonqonchejpi juntʼa kashan chayqa, mana  saqesunchu ni Satanaspis, ni mundonpis millay llulleriosninkuwan, ni qʼewisqa kamachiykunasninkuwan pantachinawanchejta (Juan 4:14; 1 Juan 5:18, 19). Jehovaman astawan qayllaykusqanchejman jinataj astawan payta munakusun, astawantaj payta respetasun. Mana ni imata ruwasunchu Tatanchej Jehovaj sonqonta nanachinapaj jina, nitaj yuyallasunpischu contranpi juchallikuyta. Juchaman urmanapaj jina kashaspataj tapurikusun: “Chay jinata munakuwaj Tataypa sonqonta, ¿imaynatataj nanachiymanri? Payqa tukuy imata noqarayku ruwan”, nispa (1 Juan 4:9, 10).

4. Jehovata manchachikusqanrayku, ¿imatataj Marta ruwarqa juchata ruwayman sonqon aysajtin?

⁴ Croacia suyumanta hermananchej Marta khuchichakuy juchapi urmananpaj jina kasharqa. b Pay qhelqarqa: “Yuyay chinkasqa jina kasharqani. Khuchichakuy juchata ruwayman sonqoy aysashawarqa, chayrayku mana qhesachayta atillarqanichu uj ratollata kusichinawanta yachaspapis. Chay kutipi Jehovata manchachikusqay jarkʼawarqa”, nispa. ¿Imaynatá jarkʼarqa? Martaqa Jehovaj sonqonta nanachiyta manchachikusqanrayku, chay juchata ruwaspa imachus qhatirinanpi piensarerqa. Noqanchejpis juchata ruwayman tanqasqa kaspaqa kikillantataj ruwasunman. Nipuni allinchu kanman Jehovaj sonqonta nanachinanchejqa, paytataj niña wiñaypaj yupaychananchejqa (Gén. 6:5, 6).

5. ¿Imatá Leomanta yachakunki?

⁵ Jehovata manchachikusun chayqa, mana wajkunatachu juchachasun mana allintachu purisqanchejmanta, nitaj yuyasunchu mana allin amigoswan puriy allillan kasqanta. Chayta yachakorqa República Democrática del Congo suyumanta hermanonchej Leo. Payqa bautizakusqanmanta tawa watasninman mana allin amigoswan puriyta qallarerqa. Payqa yuyarqa, amigosnin sajra imasta ruwajtinkupis, mana amigosnin jinachu ruwaspaqa mana Jehovaj  contranpichu juchallikushasqanta. Jinapis pisi tiempollapi amigosnin jina ruwayta qallarerqa, machaykuyta, khuchichakuy juchata ruwaytapis. Jinallapi piensarerqa imastachus testigo tatasnin yachachisqankupi, imayna kusisqatajchus ñaupajpi kasqanpi. Payqa yuyayninman churakorqa, ancianospa yanapanwantaj Jehovaman kutinporqa. Leoqa kunan anciano, precursor especial jinataj kusisqa sirvishan.

6. ¿Imayna warmismantataj kay yachaqanapi parlarisun?

⁶ Kunanqa Proverbios 9 capitulota ukhuncharisun, chaypeqa iskay warmismanta parlan: Ujnenqa yachaywan ninakun, ujnintaj mana yuyayniyoj kaywan (Romanos 5:14; Gálatas 4:24, kikinchay). Qhepan parrafosta ukhuncharishaspa, yuyarikuna Satanaspa mundonqa khuchichakuy juchata ruwayllapi, pornografiata qhawayllapi yuyashasqanta (Efe. 4:19). Chayrayku Jehovata manchachikuyta yachakunallanchejpuni tiyan, sajra kajmantataj karunchakunanchej tiyan (Pro. 16:6). Tukuyninchej qharispis warmispis, Proverbios 9 capitulowan mayta yanapachikusunman. Chay capituloqa iskay warmismanta parlan. Chay warmistaj mana yachayniyojkunata, nisunman “mana allin yuyayniyojkunata” parlapayashanku, “wasiyman yaykumuychej, mikhurikuychej” nispapis nishankuman jina (Pro. 9:1, 5, 6, 13, 16, 17). Jinapis ujnin warmeqa allinman pusan, ujnin warmitaj mana allinman. Chayta qhawarina.

7. Proverbios 9:13-18 nisqanman jina, ¿imataj pasan ‘mana yuyayniyoj warmej’ invitadosninwan? (Dibujotawan qhawariy).

⁷ Ñaupajtaqa “mana yuyayniyoj” warmi wajyarikusqanmanta parlarina (Proverbios 9:13-18 leey). Chay warmeqa mana pʼenqarikuspa nin: “Mana yachayniyojkuna, kayman jamuychej”, nispa. Ajinata mana yachayniyojkunata invitakun paywan mikhurikunankupaj. Chay warmej wasinman yaykojkuna, ¿imapitaj rikukunku? ‘Chay warmej wasinpeqa ashkha wañusqas kashanku’, chayrayku paykunapis ajinallapitaj rikukunku. Proverbios libropeqa ajina warmimanta mana kayllapichu parlan. Ñaupaj capitulospi parlanña “mana allin kausayniyoj warmimanta”, ‘qhencha warmimantapis’. Chaypi nin: “Wasinman reyqa wañuyman chayaywan ninakun”, nispa (Pro. 2:11-19). Proverbios 5:3-10 versiculospi nillantaj ‘mana allin kausayniyoj warmimanta’ cuidakunata. Paymanta nin: “Chakisnillantaj wañuyman chayachin”, nispa.

8. “Mana yuyayniyoj” warmej parlasqanta uyarejkuna, ¿imatataj ajllananku tiyan?

⁸ “Mana yuyayniyoj” warmej parlasqanta tukuy uyarejkunaqa, ajllananku tiyan chay invitacionta japʼikuytachus manachus. ¿Maykʼajtaj noqanchejpis ajinapi rikukusunman? Khuchichakuy juchapi urmanapaj tanqasqa kajtinchej,  chayri pornografiamanta uj foto kaymanta jinalla rikhuriwajtinchej. Chay kutispi, ¿imatá ruwasunman?

9, 10. ¿Imajtintaj mana khuchichakuy juchapi urmananchejchu tiyan?

⁹ ¿Imaraykutaj khuchichakuy juchamanta ayqekunanchej tiyan? Proverbios libro nisqanman jina, chay “mana yuyayniyoj” warmeqa nin: “Yakutaqa suwasqatapuni aswan miskʼita tomarikunchej”, nispa. ¿Imawantaj ninakun chay ‘yaku’? Bibliapeqa casado kausaypi qhariwarmi jina puñuykuyta frescarikoj yakituswan kikinchan (Pro. 5:15-18). Casadosqa qhariwarmi jina kusisqas puñuykuyta atillanku. Suwasqa ‘yaku’ kajtintajrí mana ajinachu. Chay suwasqa yakusqa ichapis ninakun mana casaraspalla qhariwarmi jina puñuykuywan. Chaytaj Diospa leyninta pʼakin. Khuchichakojkunaqa pakayllapi chayta ruwanku suwa jina. Chay ‘suwasqa yakoqa’ paykunapaj may miskʼi kaspa jinanman, pakayllapi ruwashasqankuta yuyasqankurayku. Jinapis paykunallataj engañakushanku. Jehovaqa tukuy imata qhawamushan, paytaqa mana engañankumanchu. Jehovaj ñaupaqenpi mana allinpaj qhawasqa kayqa may llakiypuni, manapuni miskʼi yaku jinachu (1 Cor. 6:9, 10). Jinapis mana chay llakiyllapichu rikukunkuman.

¹⁰ Khuchichakuy juchapi purejkunaqa ichapis pʼenqakunkuman, pisipaj qhawakunkuman, mana munashaspalla onqoj rikhurinkuman, chayri familiankuta tʼaqanachinkuman. Chayrayku amapuni kasunachu “mana yuyayniyoj” warmej invitacionninta. Khuchichakuy juchapi urmajkunamanta ashkhasqa mana Jehovallamantachu karunchakunku, manaqa wañuchej onqoykunatapis japʼikunku, chaywantaj wañunku (Pro. 7:23, 26). Proverbios 9:18 versiculoqa nin “chay warmej invitadosnenqa Sepultura ukhupiña kashasqankuta”. Ajina kajtin, ¿imajtintaj chay chhika runas chay invitacionta japʼikunkuri? (Pro. 9:13-18).

11. ¿Imaraykutaj pornografiata qhaway manapuni allinchu?

¹¹ Pornografiaqa tukuynejpi kashan uj trampa jina. Wakenqa yuyanku chayta qhaway allillan kasqanta, jinapis mana ajinachu. Pornografiata qhawaj runasqa may llakiypipuni rikukunku, ni paykunata, ni wajkunatapis respetankuñachu, nitaj chayta qhawayta saqeyta atillankuchu. Khuchichakuy imasta qhawaj runasqa mana yuyayninkumanta chayta orqhoyta atillankuchu, nitaj qonqaytapis. Chantapis pornografiata qhawayqa sajra kajta munapayayta mana chinkachinchu, manaqa astawan rijchʼarichin (Col. 3:5; Sant. 1:14, 15). Chantapis pornografiata qhawajkunamanta ashkhasqa khuchichakuy juchapi urmankupuni.

12. Sajra munayninchejta rijchʼarichinanpaj jina fotos rikhuriwajtinchej, ¿imatá ruwananchej tiyan?

¹² Celularninchejpi pornografiamanta foto rikhurimuwajtinchej, ¿imatá ruwasunman? Chay ratopacha uj ladota qhawarina. ¿Imataj chaypaj yanapawasunman? Yuyarikuna Jehovawan sumaj amigos kasqanchej ni imawan kikinchakusqanta. Pero wakin fotosqa mana pornografiamantapunichu kankuman. Jinapis sajra munayninchejta noqanchejpi rijchʼarichinman. Chay jina fotostapis mana qhawanachu tiyan. Imaraykuchus mana munasunmanchu ni sonqollanchejpipis qhenchachakuyta (Mat. 5:28, 29). Tailandia suyumanta David sutiyoj anciano nin: “Tapurikuytapuni yachani: ‘Kay fotos mana pornografiamantapunichu kajtinpis, ¿munanmanchu Jehová qhawanallayta?’, nispa. Chaypi piensareyqa yanapawan allin kajtapuni ajllanaypaj”.

13. ¿Imataj yanapawasun allin kajta ajllanapaj?

¹³ Jehovaj sonqonta nanachiyta manchachikusun chayqa, atillasun allin kajta ajllayta. Chayraykuchá Proverbios 9:10 nin: “Jehová Diosta manchachikuymin yachaypa qallariynenqa”, nispa. Chaytaqa Proverbios 9 capituloj qallariyninpi sutʼita reparanchej. Chaypeqa ‘cheqa yachayta’ uj warmiwan kikinchan.

14. ¿Ima invitaciontaj kallantaj Proverbios 9:1-6 versiculospi?

¹⁴ (Proverbios 9:1-6 leey). Kaypeqa Jehová invitashawanchej. Payqa Ruwawajninchej, yachaypis paymanta jamun (Pro. 2:6; Rom. 16:27). Kay kutipeqa qanchis machonesniyoj jatun wasimanta parlawanchej. Chayqa reparachiwanchej Jehovaqa ni imata michʼakuwasqanchejta. Payqa chunka makiwan japʼikuwanchej yuyaychaykunasninta tukuy kasukojkunata.

15. ¿Imata ruwananchejpajtaj Dios invitawanchej?

¹⁵ Jehovaqa mana michʼachu, payqa ashkha imasta qowanchej. Chayqa sutʼi reparakun Proverbios 9 capitulopi parlaj warmipi, pichus ‘cheqa yachaywan’ ninakun. Chay warmeqa tukuy imata sumaj wakichisqataña japʼin, aychatapis, vinotapis sumajtaña wakerqochin, mesanmanpis tukuy imataña churan (Pro. 9:2). Chantapis “cheqa yachayqa” 4, 5 versiculospi mana allin yuyayniyojkunata nin: “Tʼantata ruwarqani, jamuspa mikhurikuychej”, nispa. ¿Imajtintaj payta kasunanchej tiyan? Imajtinchus Jehovaqa wawasninta jarkʼayta munan, yachaytataj qoyta munan. Payqa mana munanchu sajra imaspi rikukusparaj yachakunanchejta, nillataj munanchu qhepamanraj “amallapis kayta ruwaymanchu karqa” nispa purinanchejta. Chayrayku “Diosqa sumaj yachayta waqaychan cheqan kausayniyoj runaspaj” (Pro. 2:7). Jehovata manchachikusun chayqa payta kusichiyta munasun, yuyaychaykunasninta kasukuytapis. Chayta ruwaspataj kusisqa kasun (Sant. 1:25).

16. Alain Jehovata manchachikusqanrayku, ¿imata ruwaytataj ajllarqa chanta imaynataj rerqa?

¹⁶ Jehovata manchachikoyqa allin imasta ajllanapaj yanapawanchej. Ajina karqa Alainwan, payqa anciano, uj escuelapitaj profesormanta trabajan. Pay nin: “Ashkha compañerosneyqa yuyanku pornografiamanta peliculasqa qhariwarmi jina puñuykuymanta yachachinapaj allin kasqanta”, nispa. Alaintaj yacharqa mana jinachu kasqanta. Imatachus ruwasqanmanta nin: “Jehovaj sonqonta nanachiyta manchachikusqayrayku manapuni chay peliculasta qhawayta munarqanichu. Compañerosniymantaj sutʼincharqani imaraykuchus chay peliculasta mana qhawasqayta”, nispa. Chayta ruwaspa Alainqa ‘cheqa yachaypa’ yuyaychasqanman jina ruwasharqa. Cheqa yachayqa nin: “Yachaypa ñanninta cheqanta puriychej”, nispa (Pro. 9:6). Wakin compañerosnenqa chayta ruwasqanmanta mayta tʼukorqanku. Chayraykutaj Bibliata estudiayta, tantakuykunaman riytapis qallarerqanku.

17, 18. ‘Cheqa yachayta’ japʼikojkuna, ¿ima bendicionestataj kay tiempopiña japʼinku, qhepamanrí ima bendiciontataj japʼenqanku? (Dibujotawan qhawariy).

¹⁷ Jehovaqa chay iskay warmisnejta sutʼita rikuchiwanchej, aswan qhepaman kusisqa kausakunapaj  imatachus ruwanata. “Mana yuyayniyoj warmeqa imatapis parlallan”, payta kasojkunataj khuchichakuy juchawan ‘miskʼirichikunku’. Paykunaqa uj rato kusirikuyllapi yuyanku, manataj piensarinkuchu imaspichus chayrayku rikukunankupi, nitaj reparakunkuchu ‘Sepulturaman’ chayanankuta (Pro. 9:13, 17, 18).

¹⁸ ‘Cheqa yachayta’ kasukojkunatataj may allinpuni rin. Paykunaqa mayta kusirikunku Jehovaj yachachiykunasninta ashkhata japʼispa (Isa. 65:13). Jehovaqa profeta Isaiasnejta niwanchej: “Allinta uyariwaychej, allin kajta mikhuychej, sumaj mikhunastataj miskʼita mikhurikunkichej”, nispa (Isa. 55:1, 2). Ajinapuni. Noqanchejqa Jehovaj munakusqanta munakuyta, chejnikusqantataj chejnikuyta yachakushanchej (Sal. 97:10). Chantapis mayta kusikunchej ‘cheqa yachaywan’ yanapachikunankupaj wajkunata invitaspa. Proverbios 9 capitulopi warmej sirvientasnin jina kanchej. Paykunaqa ‘llajtaj pata lomasninmanta wajyamunku’. Paykuna jina ninchej: “Mana yachayniyojkuna, kayman jamuychej”, nispa. Noqanchejpis chay invitacionta uyarejkunapis, kay tiempopiña ashkha bendicionesta japʼishanchej, pero aswan qhepamanpis bendicionesta japʼillasuntaj. Yachaypa ‘ñanninta cheqanta purillasunpuni’ chayqa wiñaypaj kausakuyta atisun (Pro. 9:3, 4, 6).

19. Eclesiastés 12:13, 14 nisqanman jina, ¿imatataj ruwananchej tiyan? (“ Jehovata manchachikuy, ¿imapí yanapawanchej?” nisqa recuadrota qhawariy).

¹⁹ (Eclesiastés 12:13, 14 leey). Qhepa pʼunchaykunapi kausakushanchej, sajra ruwaykunawan muyurisqataj. Jinapis noqanchejqa Jehovata manchachikuyllatapuni munanchej. Ajinamanta sonqonchejta jarkʼasun, llimphu kausayniyojllapuni kasun, Jehovaj qayllallanpipunitaj kasun. Payta munakusqanchejrayku, maytataj respetasqanchejrayku, runasta invitallasunpuni cheqa yachayta maskʼanankupaj, chaywantaj tukuy atisqankuta yanapachikunankupaj.