Jehovata kusichinanchejpajqa creeyniyoj kananchej tiyan. Chaywanpis Bibliaqa nin “mana tukuy runaschu creejkuna” kasqankuta (2 Tes. 3:2). Apóstol Pabloqa chayta nispa, pikunachus payta qhatiykacharqanku chay “may sajra runasmanta” parlasharqa, nerqataj paykunamanta jarkʼasqa kayta necesitasqanta. Jinapis chay nisqanman jinallataj waj runaspis kanku. Wakin runasqa Dios kasqan sutʼi kashajtinpis, manapuni Dios tukuy imata ruwasqanpi creeyta munankuchu (Rom. 1:20). Wakintaj ninku Diospi creesqankuta, chaywanpis “Diospi creeni” nispallaqa mana Jehovata kusichisunmanchu.

Diosta kusichinapajqa mana iskayrayananchejchu tiyan Dios kasqanmantapuni, sinchʼi creeyniyojkunatataj bendecisqanmanta (Heb. 11:6). Creeyniyoj kayqa espíritu santoj poqoyninmanta ujnin kashan. Chayrayku espíritu santota japʼinapajqa Jehovamanta mañakunanchej tiyan qonawanchejpaj (Luc. 11:9, 10, 13). Diosninchejqa Palabrantapis espíritu santonwan yuyaychaspa qhelqacherqa. Chayrayku Bibliata leenanchej tiyan, imatachus leesqanchejpi tʼukurinanchej tiyan, chayman jinataj ruwananchej tiyan. Ajinamanta espíritu santowan kausayninchejpi yanapachikusun, creeyninchejtaj Dios munasqanman jina kanqa.