1. Salmo 18:46 nisqanman jina, ¿imawantaj David Jehovata kikincharqa?

 KAY mundopeqa imapis ujllata cambian. Chayraykutaj kausayninchej kaymanta jinalla qʼalata cambianman. Chay kutispitaj Jehovamanta yanapata mañakuyta atinchej, chayta yachaytaj mayta sonqochawanchej. Ñaupaj yachaqanapi yachakorqanchej Jehovaqa kausaj Dios kasqanta, yanapanawanchejpajtaj chaypipuni kashasqanta. Pay yanapawasqanchejta rikuspaqa, David jina aswan sutʼita reparanchej ‘Jehová Diosmin kausaj Dios’ kasqanta (Salmo 18:46 leey). Jehová kausaj Dios kasqanta niytawan, Davidqa Diosta uj ‘chhankawan’ kikincharqa, chhankataj mana kausayniyojchu. ¿Imaraykutaj David chayta nerqa?

2. ¿Imastataj kay yachaqanapi yachakusun?

² Kay yachaqanapi yachakusun imaraykuchus Biblia Jehovata uj chhankawan kikinchasqanta, imatatajchus chay kikinchay paymanta yachachiwasqanchejta. Yachakullasuntaj imatachus ruwanata payta pakakunanchej Chhankata jina qhawanapaj. Tukuchanapajtaj imaynasmantachus pay jina ruwanata yachakusun.

¿IMARAYKUTAJ JEHOVÁ UJ CHHANKA JINA?

3. ¿Bibliapi pikunataj nerqanku Jehová “pakakuna Chhanka” kasqanta? (Dibujota qhawariy).

³ Bibliaqa Jehovata uj chhankawan kikinchan paymanta wakin imasta yachachinawanchejpaj. Ashkha versiculospi Jehovaj kamachisnenqa imaynachus pay kasqanmanta jatunchanku, uj chhankawantaj kikinchanku. Bibliapeqa Deuteronomio 32:4 versiculopi ñaupaj kutirayku nin Jehovaqa “pakakuna Chhanka” kasqanta. Anapis orakushaspa nerqa: “Mana pipis kanchu Diosniyku jina pakakuna chhankaqa”, nispa (1 Sam. 2:2). Habacucqa Jehovata nerqa: “Pakakuna Chhankáy”, nispa (Hab. 1:12). 73 Salmota qhelqajtaj nerqa: “Diosqa sonqoyta waqaychan, paymin pakakunay chhanka”, nispa (Sal. 73:26). Jehová Diospis pay kikinmanta nerqa “pakakuna Chhanka” kasqanta  (Isa. 44:8). Jehovamanta kinsa imasta qhawarina imaraykuchus pakakuna Chhanka kasqanta yachanapaj. Qhawarinallataj imatachus ruwanata pay “pakakunanchej Chhanka” kananpaj (Deu. 32:31).

4. ¿Imaraykutaj ninchej Jehová pakakunanchej kasqanta? (Salmo 94:22).

⁴ Jehovaqa pakakunanchej. Sinchʼita paramojtenqa uj cuevapi pakakusunman. Ajinallatataj llakiykunapi rikuspaqa Jehovapi pakakusunman (Salmo 94:22 leey). Payqa jarkʼawanchej, niwanchejtaj kay mundopi sufrisqanchejqa mana wiñaypajchu kananta. Jehovaqa nillawanchejtaj imaschus llakichiwanchej, sufrichiwanchej chay tukuy imasta qhepaman wiñaypaj chinkachinanta (Eze. 34:25, 26).

5. ¿Imatá ruwasunman Jehovapi pakakunanchejpaj?

⁵ Jehovapi pakakunchej paymanta mañakuspa. Paytaj “sonqo tiyaykuyta” qowanchej, chaytaj sonqonchejta, yuyayninchejtawan waqaychan (Fili. 4:6, 7). Artiom sutiyoj hermanomanta parlarina. Payqa Diospi creesqanrayku carcelpi kasharqa. Payta tapuykachananpajtaj uj runata churarqanku. Chay runaqa hermanota mayta kʼumuykachacherqa, wakin imasta rimarinanpajtaj ashkha kutispi taporqa. Pay nin: “Sapa tapuykachaj jamuwajtin desesperación japʼiwaj. Chayrayku Jehovamanta mayta mañakoj kani sonqoyta tiyaykuchinanta, yachaytataj qonawanta. Diosta manapuni wasancharqanichu tapuykachawaj runa imata ruwajtinpis. Jehovaqa uj perqa jina jarkʼawarqa”, nispa.

6. ¿Imaraykutaj Jehovapi atienekuyta atinchej? (Isaías 26:3, 4).

⁶ Jehovaqa atienekunapaj jina. Uj chhankaqa pachanpi, mana jaykʼajpis kuyurinchu. Jehovapis ajinallataj, chaypipuni kanqa yanapanawanchejpaj. Paypi atienekuyta atinchej, imaraykuchus payqa “wiñaypaj Chhanka” (Isaías 26:3, 4 leey). Payqa kausaj Dios, chayrayku chaypipuni kanqa nisqasninta juntʼananpaj, mañakusqasninchejta uyarinawanchejpaj, yanapata necesitashajtinchejtaj yanapanawanchejpaj. Chantapis Jehovaqa payta sirvejkunata munakullantaj, chayrayku paypi atienekuyta atillanchejtaj (2 Sam. 22:26). Payqa mana jaykʼajpis qonqaponqachu imatachus paypaj ruwasqanchejta, bendeciwasunpunitaj (Heb. 6:10; 11:6).

7. ¿Imaynatá Jehovapi atienekuy yanapawanchej? (Fototawan qhawariy).

⁷ Chantapis Jehová pakakunanchej Chhanka kananpajqa paypi tukuy sonqo atienekuna tiyan. Llakiy tiempospi rikukuspapis payta kasukoyqa allinninchejpajpuni (Isa. 48:17, 18). Jehová yanapawasqanchejta rikuspataj, astawan paypi atienekusunchej. Ajinamanta sutʼita reparanchej Jehovaj yanapayninwanqa ima pruebatapis aguantayta atisqanchejta. Wakin llakiykunapi rikukojtinchejqa ni pi yanapayta atiwasunmanchu. Chaywanpis yachanchej Jehovaqa chaypipuni kananta, nitaj jaykʼajpis saqenawanchejta. Vladímir sutiyoj hermano nerqa: “Carcelpi kashaspa ni jaykʼaj jina repararqani Diosqa qayllaypipuni kashasqanta. Chaypeqa sapallay kasharqani, nitaj imatapis ruwayta atiymanchu karqa chaymanta  llojsinpunaypaj. Chayrayku Jehovapi astawan atienekorqani”, nispa.

8. 1) ¿Imaraykutaj ninchej Jehová mana cambiasqanta? 2) Jehová uj chhanka jina kasqanta yachay, ¿imapajtaj yanapawanchej? (Salmo 62:6, 7).

⁸ Jehovaqa kasqan jinallapuni. Jehovaqa uj jatun chhanka jina sinchʼita sayan, kasqan jinallapunitaj. Imaynachus kasqan, imatachus ruwayta munasqanpis kikillanpuni, mana cambianchu (Mal. 3:6). Adanwan Evawan contranpi oqharikojtinku, Jehovaqa mana cambiarqachu imatachus runaspaj ruwayta munasqanta. Apóstol Pabloqa nerqa Jehovaqa “imaynachus kasqanman jinapuni tukuy imata” ruwasqanta (2 Tim. 2:13). ¿Ima niytá munan chay? Ima kajtinpis chayri imata wajkuna ruwajtinkupis payqa kikillanpuni kanqa, munayninpis kamachiykunasninpis mana cambianqachu. Chayta yachasqanchejrayku, llakiykunapi kashajtinchej pay yanapanawanchejpi atienekunchej, yachanchejtaj ruwasaj nisqanta juntʼanantapuni (Salmo 62:6, 7 leey).

9. ¿Imatataj yachakuwaj hermananchej Tatianamanta?

⁹ Chantapis Jehovata uj chhankata jina qhawanapajqa, yuyarikunanchejpuni tiyan imaynachus pay kasqanta, imatachus jallpʼapaj, runaspajpis ruwayta munasqanta. Chaytaj yanapawasun sinchʼi llakiykunapi kaspa sonqo tiyasqa kanapaj, nitaj llakiywan atipachikunapaj (Sal. 16:8). Ajina karqa hermananchej Tatianawan, Diospi creesqanrayku wasinpi preso kashajtin. Pay nin: “Obligawarqanku wasiypi sapallay qhepakunaypaj. […] Qallariypeqa sapitallay kayta mana atillarqanichu, ashkha kutispitaj desanimakorqani”, nispa. ¿Imataj payta yanaparqa chay jina llakiyta aguantananpaj, nitaj llakiyninwan atipachikunanpaj? Payqa tʼukurerqa Jehovata munakusqanrayku ajinapi rikukushasqanpi, nitaj Jehovaj munayninmanta qonqakorqachu. Pay nin: “Yuyarikorqani Jehovata munakusqayrayku, payta kusichiyta munasqayrayku presochasqa kashasqayta. Chaytaj yanapawarqa mana noqallapi yuyanaypaj”, nispa.

10. ¿Imatataj ruwasunman Jehovata pakakunanchej Chhankata jina qhawanapaj?

¹⁰ Tumpamantawan manchay llakiy tiempos chayamonqa, chaypitaj ni jaykʼaj jina Jehovapi atienekunanchej kanqa. Chayrayku kunanmantaña paypi astawan atienekuna tiyan. Ajinamanta aguantanapaj yanapata necesitashajtinchej, pay yanapanawanchejmanta mana iskayrayasunchu. Chaypajqa imaynatachus Jehová ñaupa tiempomanta kamachisninta yanapasqanmanta Bibliapi leerina. Chantapis kay tiempopi hermanosninchejta yanapasqanmanta leerinallataj. Chay leesqanchejpi tʼukurina, reparanataj Jehovaqa paykunapaj uj chhanka jina kasqanta. Chayta ruwaspaqa Jehovata pakakunanchej Chhankata jina qhawasun.

JEHOVÁ JINA KANA

11. ¿Imaraykutaj Jehová jina ruwananchej tiyan? (“ Joven, kayta ruwawaj” nisqa recuadrotawan qhawariy).

¹¹ Wakin imasta yachakunchejña imaraykuchus Jehová uj chhanka jina kasqanmanta. Kunantaj  yachakuna imaynatachus pay jina ruwanata. Jehová jina kanapaj astawan kallpachakuspaqa, congregacionmanta hermanostapis astawan yanapayta atisun. Jesusqa Simonman Cefas sutita churarqa, chaytaqa Pedro nispa traducikun, niytataj munan “rumi” (Juan 1:42). Jesusqa chayta nispa nisharqa Pedroqa congregacionmanta hermanosta sonqochananta, sinchʼita sayanankupajtaj yanapananta. Bibliaqa nillantaj ancianosqa “jatun chhankaj llanthun jina” congregacionmanta hermanosta jarkʼasqankuta (Isa. 32:2). Pero tukuypis Jehová jina kaspa congregacionpi purajmanta kallpachanakusunman (Efe. 5:1).

12. ¿Imastataj ruwasunman hermanospaj pakakunanku kananchejpaj?

¹² Wajkunaj pakakunanku kana. Desastres kajtin, chʼajwas chayri guerras kajtin, hermanosninchejpaj pakakunanku kanapajqa, ichapis paykunata wasinchejman wajyarikunanchej kanqa. Kay ‘qhepa pʼunchaykunapi’ tukuy imapis aswan mana allinman tukonqa. Chayrayku sapa kuti purajmanta astawan yanapanakunanchej kanqa (2 Tim. 3:1). Chantapis hermanosninchejpaj pakakunanku kallasunmantaj paykunata sonqochaspa, Diosman qayllaykunankupajtaj yanapaspa. Chaypajqa Tantakuna Wasipi hermanosta munakuywan japʼikuna. Ajinamanta yanapakunchej congregacionpi tukuy kusisqas kanankupaj, munakuytaj kananpaj. Kay tiempopeqa manaña munakuy kanchu. Chayrayku hermanosninchej tantakuykunaman jamojtinkoqa, munanchej jarkʼasqas, munasqastaj kanankuta.

13. ¿Imaynatá ancianos hermanospa pakakunanku jina kankuman? (Fototawan qhawariy).

¹³ Ancianosqa llakiypi tarikoj hermanospaj pakakunanku jina kayta atinkuman. Paykunaqa uj desastre kajtin chayri uj hermanota de emergencia hospitalman apana kajtin, chay rato yanapakunku. Chantapis hermanosta Bibliawan  yuyaycharinku, kallpacharinkutaj. Uj anciano kʼacha kajtin, wajkunamanta llakikojtin, uyariytataj yachajtin, hermanosqa paypa yanapayninta maskʼanqanku. Chantapis ancianos ajina kajtinku, hermanosqa munasqas sientekunku, Bibliaman jina imata yuyaychajtinkupis chay rato japʼikunku (1 Tes. 2:7, 8, 11).

14. ¿Imatataj ruwasunman wajkuna noqanchejpi atienekunankupaj?

¹⁴ Atienekunapaj jina kana. Tukuypis munanchej hermanosqa llakiypi tarikuspa yanaparinanchejpaj noqanchejman jamunankuta (Pro. 17:17). ¿Imatá ruwasunman hermanos noqanchejpi atienekunankupaj? Sapa día kallpachakusunman Jehová jina kanapaj. Chaypajtaj nisqanchejta juntʼanapuni, imatapis maychus tiemponpi ruwana (Mat. 5:37). Chantapis yanapata necesitajkunata yanaparisunman. Uj imata ruwanata kamachiwajtinchejtaj, kamachiykunata japʼisqanchejman jinapuni ruwana.

15. Ancianos de confianza kasqanku, ¿imaynatá hermanosta yanapan?

¹⁵ Atienekunapaj jina ancianosqa hermanosta ashkha imaynasmanta yanapanku. Predicanapaj grupomanta ancianoqa de confianza kanan tiyan. Sichus gruponmanta hermanos chayta reparanqanku chayqa, sapa yanapata necesitaspa payta wajyarenqanku. Ajinamantataj sumaj cuidasqas sientekonqanku. Ancianos hermanosta yanapanankupaj listos kashanku chayqa, hermanosqa may munasqas sientekunku. Chantapis hermanos paykunapi atienekunankupajqa Bibliaman jinapuni, allin kamachi yuyayniyoj publicacionespi yuyaychasqanman jinapuni yuyaychananku tiyan, manataj yuyasqankuman jinallachu. De confianza kasqankuta rikuchillankumantaj, hermanos imatapis paykunaman willarikusqankuta mana wajkunaman willaraspa, nisqankutataj juntʼaspapuni.

16. ¿Imaynatá yanapawanchej kasqanchej jinallapuni kay, chanta imaynatá wajkunatapis yanapan?

 ¹⁶ Kasqanchej jinallapuni kana. Chaypajqa Jehovata tukuy imapi kasukuna, Bibliaj yuyaychaykunasninman jinataj imatapis ajllana. Ajinamanta wajkuna chay ruwasqanchejmanta yachakuyta atenqanku. Diospa Palabranta estudiasunchej, creeyninchejtapis sinchʼiyachisunchej chayqa, cheqa kajpi aswan sinchʼita sayasunchej. Mana iskay sonqoyojchu kasun, kasqanchej jinallapunitaj kasun. Chantapis mana kay mundoj yachachisqasninwan, nitaj kay mundoj yuyayninwanpis kayman jaqayman apaykachachikusunchu (Efe. 4:14; Sant. 1:6-8). Jehovapi, nisqasninpipis creesqanchejqa, mana allin willaykuna chayamuwajtinchej maychus kasqanchejpi sayanapaj yanapawanchej (Sal. 112:7, 8). Llakiypi kashanku chaykunatapis yanapariyta atinchej (1 Tes. 3:2, 3).

17. ¿Imaynatá ancianos congregacionmanta hermanosta yanaparinku?

¹⁷ Ancianosqa munayninkuwan mana atipachikunkuchu, allin yuyayniyoj kanku, llampʼu sonqos, ruwanasninkutapis mana patan urantachu ruwanku. Ancianosqa “cheqa kaj palabramanta” chʼipakusqankurayku hermanosta sinchʼita sayanankupaj yanapanku, kallpachankutaj (Tito 1:9; 1 Tim. 3:1-3). Chantapis ancianosqa wajkuna paykunamanta yachakunankupaj jina kausakunku, hermanostapis waturikunku. Ajinamantataj paykunata yanapanku tantakuykunaman, predicacionmanpis mana faltakuspa rinankupaj, mana saqespataj sapallankupi Bibliata estudianankupaj. Hermanos problemasrayku mayta llakikojtinku, paykunata kallpacharinku Jehovamanta mana qonqapunankupaj, nitaj munayninmantapis.

18. ¿Imaraykutaj Jehovata jatunchayta, paymantaj astawan qayllaykuyta munanchej? (“ Jehovaman qayllaykunapaj yanapa” nisqa recuadrotawan qhawariy).

¹⁸ Imaynachus Jehová kasqanta yachakuytawan, David jina ninchej: “Jehová Diosqa pakakunay Chhanka, pay jatunchasqa kachun”, nispa (Sal. 144:1). Jehovaqa atienekunapaj jina Dios, ajinallapunitaj kanqa. Payqa tukuy kausayninchejpi, machitusña kajtinchejpis, qayllallanpipuni kanapaj yanapawasunchej. Chayrayku mana iskayrayaspa nisunman: “Paymin pakakunay Chhanka”, nispa (Sal. 92:14, 15).