Leejkunaj tapuyninku
Salmo 12:7 nin: “Diosníy, paykunata cuidanki”, nispa. Chayta nispa, ¿‘wajchasmantachu’ parlashan (versículo 5) chayri ‘Jehová Diospa nisqasninmantachu’ parlashan (versículo 6)?
7 versiculoj ñaupaqenpi, qhepanpi kaj versículos nisqanman jina, chayqa parlashan runasmanta.
Salmo 12:1-4 versiculospi nin: “Atienekunapaj jina runasqa chinkapunku”, nispa. Kunantaj qhawarina Salmo 12:5-7 versículos imatachus nisqanta.
“Jehová Diosqa nin: ‘Wajchasta kʼumuykachachinku,
wajchasta ñakʼarichinku,
chayrayku noqa oqharikusaj wajchasta libranaypaj.
Noqamin wajchasta salvasaj chay chejnikojkunamanta’, nispa.
Jehová Diospa nisqasnenqa may llimphu.
Tʼuru hornopi llimphuchasqa qolqe metal jina, qanchis kutita ninapi chʼuwachasqa jina.
Qanmin Jehová Diosníy, paykunata cuidanki.
Qanmin sajra runasmanta sapa ujninkuta wiñaypaj jarkʼanki”.
Versículo 5 nin Diosqa “wajchasta” librananta.
Versículo 6 nin “Jehová Diospa nisqasnenqa may llimphu” kasqanta, “hornopi llimphuchasqa qolqe metal jina”. Chay versículo nisqanman jinapunitaj, cristianosqa Diospa Palabranta jatunpaj qhawanchej (Sal. 18:30; 119:140).
Kunantaj Salmo 12:7 versiculota qhawarina. Chaypi nin: “Qanmin Jehová Diosníy, paykunata cuidanki. Qanmin sajra runasmanta sapa ujninkuta wiñaypaj jarkʼanki”, nispa. ¿Pikunamantataj parlashan “paykunata”, “sapa ujninkuta” nispa?
6 versiculopi Jehovaj ‘nisqasninmanta’ parlashasqanrayku wakinkuna yuyankuman versículo 7 “paykunata” “sapa ujninkuta” nispa Diospa nisqasninmanta parlashasqanta. Noqanchejqa yachanchej Diosqa Bibliata sumajta cuidasqanta, jarkʼasqantapis, ashkha runas Bibliaman churanakojtinkupis, Bibliata chinkachiyta munajtinkupis (Isa. 40:8; 1 Ped. 1:25).
Jinapis versículo 5 nin jina, Jehovaqa “wajchasta” jarkʼallantaj. Payqa ñaupa tiempopi wajchasta, kʼumuykachachisqa kajkunatapis yanaparqa, salvarqataj. Kay tiempopipis chayta ruwallanqapuni (Job 36:15; Sal. 6:4; 31:1, 2; 54:7; 145:20).
Chayrayku versículo 7 “paykunata”, “sapa ujninkuta” nispa, ¿pikunamantataj parlashan?
Kay salmopi nikusqanman jina, entiendechin runasmanta parlashasqanta.
Salmo 12:1 versiculopi, Davidqa parlarqa ‘atienekunapaj jina runasmanta’, pikunatachus sajra runas chʼaukiyarqanku chaykunamanta. Aswan qhepapitaj nin Jehovaqa chay sajra imasta parlajkunaj contranpi oqharikunanta. Kay salmoqa sutʼita reparachiwanchej Jehová llajtanta cuidanantapuni, imaraykuchus Jehovaj “nisqasnenqa may llimphu”.
Chayrayku, versículo 7 “paykunata cuidanki”, “sapa ujninkuta wiñaypaj jarkʼanki” nispaqa, nishan pikunatachus sajra runas kʼumuykachachinku chaykunata Dios cuidananta.
“Paykunata”, “sapa ujninkuta” nispa traducikorqa hebreopi masoretaspa qhelqasqasninkumanta. Griego parlaypi Septuaginta nisqapitaj, 7 versiculopi iskay kutita “noqaykuta” nispa nin. Chayta nispataj parlashan wajchasmanta, kʼumuykachachisqa kajkunamantawan. 7 versiculotaj nin atienekunapaj jina runasqa ‘sapa ujninku’ jarkʼasqa kanankuta. ¿Pikunamantataj jarkʼasqa kananku karqa? “Sajra runasmanta”, pikunachus “imatapis ruwarpallanku” chaykunamanta (Sal. 12:7, 8). Arameo parlayman tijrachisqa qhelqasqaspipis, “paykunata” nispa nillantaj. 7 versiculoj qallariynin nin: “Qanmin SEÑORNÍY, cheqan runasta jarkʼanki. Qanmin paykunata kay mita sajra runasmanta wiñaypaj jarkʼanki”, nispa. Kaypis rikuchillawanchejtaj Salmo 12:7 versiculoqa, mana Diospa nisqasninmantachu parlashasqanta.
Chayrayku kay versiculoqa “atienekunapaj jina” runasman uj suyakuyta qon, Dios paykunata cuidananpi atienekunankupaj.
