1, 2. 1) ¿Imatataj wakin tatas yuyanku wawanku bautizakuyta munajtin? 2) ¿Jehová Diosman kausayninchejta qoy pujllakuy jinallachu kasqa? (Patapi kaj fotota qhawariy).

UJ HERMANOQA, uj jatun tantakuypi bautizakojkunata iskay tapuykunata ruwarqa. Bautizakojkunamanta ujnintaj, María karqa. Discursota qoj hermanoj tapusqanmantaj sutʼita, kallpawantaj kuticherqa. Chantá Mariaqa bautizakorqa. Chaytataj tatasnin rikorqanku.

² Mariaj tatasnenqa, may kusisqa kasharqanku wawanku Jehová Diosman kausayninta qosqanmanta, bautizakusqanmanta ima. Chaywanpis mamanqa, María niraj bautizakushajtin llakisqa kasharqa. Ajinatataj yuyaj: “Mariaqa wawallaraj. Nirajsina bautizakunanpaj wakichisqachu kashan. Ichá suyarikullanman”, nispa. Ashkha tataspis, Mariaj maman jinallataj yuyanku, wawanku bautizakuyta munajtin (Ecl. 5:5). Ajinata yuyanku, imajtinchus yachanku Jehová Diosman  kausayninchejta qoy, bautizakuy imaqa, mana pujllakuy jinallachu kasqanta (“ Jehová Diosman nina munayninta ruwanata”, nisqata qhawariy).

3, 4. 1) Apóstol Pedro, ¿imawantaj bautismota kikinchasqa? 2) ¿Imaraykutaj Pedro kikincharqa bautismota Noé arcata ruwasqanwan?

³ Apóstol Pedroqa, bautismota kikincharqa Noé arcata ruwasqanwan. Pedro nerqa: “Chay imaswan ninakoj bautismomin qankunatapis salvashasunkichej”, nispa (1 Pedro 3:20, 21 leey). Noeqa, Jehová Diospa munaynintapuni ruwayta munarqa, chaytataj rikucherqa arcata ruwaspa. Arí, Noeqa arcata tukucharqa Jehová Diospa munayninman jinapuni. Chayrayku Noé, familian ima Jatun Parapi salvakorqanku. Kunantaj qhawarinachej imatachus Pedro, Noemanta yachachiyta munawasqanchejta.

⁴ Runasqa, sutʼita repararqanku Noé, Diospi creesqanrayku arcata ruwasqanta. Noqanchejpis uj runata bautizakojta rikuspaqa, reparanchej chay runa Jesuspa yachachisqanman tukusqanta, Jehová Diospa munayninta ruwayta munasqanrayku, Jesucristo kausarimusqanpi creesqanraykutaj. Bautizakojkunaqa, Noé jinallataj Jehová Diosta kasukunku, munaynintataj ruwanku. Jehová Diostaj sajra runasta chinkachishajtin, kasukojkunata salvanqa, imaynatachus Noeta Jatun Parapi salvarqa, ajinata (Mar. 13:10; Apo. 7:9, 10). Chayrayku salvakunapajqa, Jehová Diosman uj mañakuypi munaynillanta ruwananchejta ninanchej tiyan, bautizakunanchejtaj tiyan. Bautizakunapaj wakichisqaña kashaspapis, mana usqhayta bautizakojtinchejqa, ichapis wiñay kausayta mana japʼisunmanchu.

5. ¿Imatataj kay yachaqanapi yachakusunchej?

⁵ Reparanchej jina, salvakunapajqa bautizakunapuni  tiyan. Chayrayku kay yachaqanapi yachakusunchej, imatachus Biblia bautismomanta nisqanta. Chantá yachakusunchej imatachus ruwana kasqanta niraj bautizakushaspa. Yachakullasuntaj ima yuyaywanchus wawasninchejman, estudiosninchejmanpis Bibliamanta yachachinanchej kasqanta.

6, 7. 1) ¿Imaraykutaj runas Juanwan bautizachikorqanku? 2) ¿Imaraykutaj Jesús bautizakusqa?

⁶ Bibliaqa niwanchej, Juan Bautista runasta bautizayta qallarisqanta (Mat. 3:1-6). Runasqa, Juanwan bautizachikoj kanku Moisespa Leyninta pʼakisqankumanta pesachikusqankuta rikuchinankupaj. Chantapis Juanqa, Jesusta bautizarqa (Mat. 3:13-17). Chaywanpis Jesusqa mana juchamanta pesachikusqanraykuchu bautizakorqa, imajtinchus payqa mana pantaj runachu karqa (1 Ped. 2:22). Astawanpis bautizakorqa, Diospa munayninta tukuy sonqo ruwayta munasqanta rikuchinanpaj (Heb. 10:7).

⁷ Jesús, Diosmanta willayta qallarisqantawan, yachachisqasnenqa runasta bautizayta qallarerqanku (Juan 3:22; 4:1, 2). Chay runaspis, bautizakorqanku Moisespa Leyninta pʼakisqankumanta pesachikusqankuta rikuchinallankupajtaj. Jinapis Jesús kausarimusqanmanta qhepaman, runasqa Diospa munayninta ruwanankupaj bautizakunanku karqa.

8. 1) ¿Imatataj Jesús 33 watapi kamachisqa? 2) ¿Imajtintaj bautizakuyta munaj runa Jesusta kasukunanpuni kasqa?

⁸ Jesusqa 33 watapi wañuymanta kausarimuytawan, 500 kuraj tantasqa runasman rikhurerqa. Paykunamanta wakenqa qharis, warmis, ichá wawitas ima karqanku. Ichá chay kutipi, Jesús nerqa: “Rispa, tukuy laya runasta yachachisqasniyman tukuchimuychej, bautizaspa Tata Diospa sutinpi, Wawanpa sutinpi, atiyninpa sutinpiwan. Yachachimuychej paykunaman imastachus noqa kamacherqaykichej, chayta paykunapis kasukunankupaj”, nispa (Mat. 28:19, 20; 1 Cor. 15:6). Arí, Jesusqa yachachisqasninman tukuchimunankuta kamacherqa. Chantapis nillarqataj, ‘yugonman churakojkuna’, nisunman paypa qhepanta riyta munajkunaqa, bautizakunanku kasqanta (Mat. 11:29, 30). Bautizakuyta munajtaj, Jesusta kasukunanpuni tiyan. Jehová Diosqa, Jesusta kasukuspa bautizakoj runasllata allinpaj qhawan. Imajtinchus payqa, Jesusnejta munayninta juntʼanqa. Chantapis Biblia nisqanman jina, apostolespa tiemponmanta wakin runasqa, yacharqanku Jesuspa yachachisqanman tukunankupaj bautizakunankupuni kasqanta. Chayrayku paykunaqa bautizakunapaj wakichisqaña kaspa bautizakojpacha kanku (Hech. 2:41; 9:18; 16:14, 15, 32, 33).

9, 10. 1) ¿Imatataj yachakusunman eunuco runa bautizakusqanmanta? 2) ¿Imatataj yachakusunman Pablo bautizakusqanmanta?

⁹ (Hechos 8:35, 36 leey). Etiopiamanta eunuco runamanta parlarina. Payqa judioswan Diosta yupaychaj. Uj kutipitaj Jerusalenpi Diosta yupaychaytawan, wasinman kutipusharqa. Jinapi Jehová Diosqa, Felipeman uj angelta kacharqa, chay eunuco runaman “Jesusmanta sumaj willaykunata” willananpaj. Eunucotaj sutʼita entienderqa, Jesusta Señorninta jina qhawanan kasqanta. Jehová Diospa munayninta ruwayta munasqanraykutaj, bautizakorqapacha.

¹⁰ Saulomantañataj parlarina. Payqa judío karqa. Jehová Diostaj judiosta  ajllakorqa llajtan kananpaj. Chaywanpis Diosqa, paykunata qhesacharqa mana kasukusqankurayku. Saulotaj chayta mana yachaspa, judiospa costumbresninta tukuy sonqo juntʼashallarqapuni. Chayrayku cristianosta mayta qhatiykacharqa. Jinapis uj kuti, Jesusqa cielomantapacha Sauloman parlamorqa. Saulotaj, Jesuspa nisqanta kasukorqapacha. Ananiaswantaj yanapachikorqa, “jatarispataj bautizachikorqa” (Hech. 9:17, 18; Gál. 1:14). Chaymantapacha Sauloqa, apóstol Pablo sutiwan rejsisqa karqa. Reparanchej jina Sauloqa, Jehová Dios Jesusnejta munayninta juntʼashasqanta yachaytawan bautizakorqapacha (Hechos 22:12-16 leey).

11. 1) ¿Imaraykutaj Bibliamanta yachakojkuna bautizakuyta munanku? 2) ¿Pillapis bautizakojtin kusikunchejchu?

¹¹ Kay tiempomanta ashkha runaspis, eunuco runa jina, Saulo jinataj, Bibliaj nisqasninta entiendeytawan, tukuy sonqo kausayninkuta Diosman qopuspa bautizakuyta munanku. May chhika runastaj jatun tantakuykunapi bautizakunku. Chay jatun tantakuykunapeqa, bautizakuyta munajkunapaj uj sumaj discurso tiyan. Noqanchejtaj maytapuni kusikunchej, pillapis bautizakojtin, astawanraj wawasninchej bautizakojtinkoqa. Kay septiembre de 2016 watamanta, agosto de 2017 watakama, 284.000 kurajpuni bautizakorqanku, Jehová Diospa munayninta ruwayta munasqankuta rikuchinankupaj (Hech. 13:48). Paykunaqa sutʼita entienderqanku, cristianos kanankupaj bautizakunankupuni kasqanta. Kunantaj yachakusunchej bautizakunapaj imastachus ruwana kasqanta.

12. ¿Imatataj ruwanan kasqa Bibliamanta yachakoj bautizakunanpaj?

¹² Bibliamanta yachakojqa, niraj bautizakushaspa Jehová Diosmanta sumajta yachakunan tiyan. Yachanallantaj tiyan imachus Diospa munaynin kasqanta, salvanawanchejpajtaj imatachus ruwasqantapis (1 Tim. 2:3-6). Chaykunata yachajtenqa aswan creeyniyoj kanqa. Chaytaj yanapanqa Diospa kamachiykunasninta kasukunanpaj (Hech. 3:19). Chay imasta ruwayqa may sumajpuni, imajtinchus Diosqa chayta ruwajkunallata allinpaj qhawan (1 Cor. 6:9, 10). Chantapis bautizakuyta munajqa, tantakuykunaman, predicacionmanpis rinanpuni tiyan, estudiosniyojtaj kanan tiyan. Cristoj yachachisqan kayta munajqa, chaykunata ruwananpuni tiyan (Hech. 1:8). Chaykunata ruwasparaj bautizakuyta munajqa, uj mañakuypi Jehová Diosman ninman, payllapajña kausananta, chantataj bautizakuyta atinman.

13. Bibliamanta yachachishaspa, ¿imatataj mana qonqanachu kasqa?

¹³ Wawasninchejman chayri estudiosninchejman Bibliamanta yachachishaspaqa, yuyarikunanchej tiyan Jesuspa yachachisqasnin kanankupaj, bautizakunankupuni kasqanta. Chayta mana qonqasunchu chayqa, ima ratopis paykunaman niyta atisunchej, imajtinchus Jehová Diosman kausayninkuta qonankupuni kasqanta bautizakunankupaj. Arí, munanchej wawasninchej, estudiosninchejpis ñauparinallankutapuni bautizakunankukama.

14. ¿Imajtintaj ni pita tanqananchejchu kasqa bautizakunanpaj?

¹⁴ Ni pitapis bautizakunanpaj tanqananchejchu tiyan. Imajtinchus Jehová Diosqa, mana pitapis tanqanchu payta sirvinanpaj (1 Juan 4:8). Astawanpis estudiosninchejman  Bibliamanta yachachishaspaqa, reparachinanchej tiyan Jehová Diosman astawan qayllaykunankupaj kallpachakunallankupuni kasqanta. Estudiosninchejtaj, Jehová Diosta rejsispa, imatachus uj cristiano ruwananpuni kasqanta yachaspa ima, bautizakuyta munanqanku (2 Cor. 5:14, 15).

15, 16. 1) ¿Bautizakunapaj mashkhayojtaj kana kasqa? 2) Waj iglesiapi bautizasqaña kaspapis, ¿imaraykutaj watejmanta bautizakunapuni kasqa?

¹⁵ Mashkhayoj kaspapis bautizakuyta atinchej. Wakenqa jóvenes kashaspa bautizakorqanku, Jehová Diostataj kasukushallankupuni. Wakintaj machitusña kashaspa, Bibliamanta yachakuytawan bautizakorqanku. Wakinrí 100 watasniyoj jinaña kashaspa bautizakorqanku.

¹⁶ Uj señoramanta parlarina. Payqa niraj Bibliamanta yachakushaspa, ashkha kutistaña waj iglesiaspi bautizakusqa. Chayrayku yachachejninta tapurisqa, watejmanta bautizakunan kasqantapunichus manachus. Yachachejnintaj Bibliawan sumajta sutʼincharisqa. Jinamanta chay señoraqa, entiendesqa watejmanta bautizakunanpuni kasqanta. Chayrayku 80 watasniyojña kaspapis bautizakusqa. Kay hermanitaj experiencianqa, sutʼita reparachiwanchej, Diospa munayninta yachaspa bautizakojtillanchej, Jehová Dios allinpaj qhawawasqanchejta. Chayrayku waj iglesiaspi bautizakuspapis, Jehovaj testigonman tukunapajqa watejmanta bautizakunapuni tiyan (Hechos 19:3-5 leey).

17. Bautizakuna diapi, ¿imapitaj tʼukurina kasqa?

¹⁷ Uj runa bautizakushajtenqa, tukuypis mayta kusikunchej. Chaywanpis, bautizakojqa chay día sumajta tʼukurinan tiyan Jehová Diospa munayninta juntʼananpaj mayta kallpachakunanpi. Jesuspa yachachisqasnenqa, ‘manaña paykunapajchu kausanku. Astawanqa pichus paykunarayku wañorqa, kausarinporqataj chaypaj kausanku’ (2 Cor. 5:15; Mat. 16:24).

18. ¿Imatataj qhepan yachaqanapi yachakusunchej?

¹⁸ Kay yachaqanapi yachakorqanchej, bautizakoyqa mana pujllakuy jinallachu kasqanta. Chayraykuchá Mariaj mamanqa llakisqa kasharqa. Chantapis, ichá wakin tatasqa ajinata yuyankuman: “¿Waway wakichisqañachu kashanman bautizakunanpaj? ¿Sumajtañachu yachanman Jehová Diosmanta, kausayninta payman qopunanpaj? ¿Bautizakunanpaj profesionniyojrajchu chayri sumaj trabajoyojrajchu kanan kanman? Chanta, ¿imanasajtaj bautizakuspaña juchapi urmajtin?”, nispa. Chaykunamantaqa qhepan yachaqanapi yachakusunchej. Yachakullasuntaj cristiano tatasqa, wawasninkuta yanapananku kasqanta bautizakunankupaj.