1. Bibliapi jasutʼiy palabrata, ¿imasmanta parlanapajtaj oqharikoj kasqa?

PILLAPIS “jasutʼisqayki” niwajtinchejqa, chay rato yuyanchej mayta seqʼoykunawanchejta. Jinapis Bibliapeqa, jasutʼiy palabrata oqharikun, pitapis munakuywan yuyaychanamanta, yachachinamanta ima parlanapaj (Pro. 1:2-7; 4:11-13). Jehová Diostaj munakuwasqanchejrayku jasutʼispa cheqanchawanchej, yuyaychawanchejtaj. Imajtinchus payqa wiñaypaj kausakunanchejta munan (Heb. 12:6). Arí, Jehová Diosqa uj tata jina allinninchejpajpuni castigaspa wanachiwanchej.

2, 3. ¿Imatataj uj mama ninman wawanta kasukuyta yachachinanpaj? (Patapi kaj fotosta qhawariy).

² Uj wawita wasi ukhupi pelotawan pujllashasqanpi piensarina. Pujllashajtintaj maman ninman: “Ama pujllaychu, pajtataj imatapis pʼakirpashawaj”, nispa. Jinapis chay wawaqa mamanta mana kasuspa, pujllashallanmanpuni. Jinapitaj uj yurituta pʼakirpanman. Mamantaj wawanta kasukuyta yachachinanpaj ajinata ninman: “Wawitáy kusukunallawayki karqa. Jinamanta mana imapis kashanmanchu karqa. Kunanqa mana kasukuwasqaykirayku uj semanata jina mana  pelotawan pujllankichu. Ajinamanta reparanaykipaj, kʼamisusqayku, imatapis nisusqayku ima allinniykipajpuni kasqanta”, nispa. Chay wawaqa maman kʼamisqanrayku ichapis phiñakunman. Chaywanpis reparakonqa tatasninta mana kasukojtenqa, mana allinchu rinanta.

³ Cristianosqa Diospa llajtanmanta kanchej (1 Tim. 3:15). Chayrayku Jehová Diosqa derechoyoj leyesta churapunawanchejpaj, mana kasukojtinchejtaj castiganawanchejpaj. Chantapis Jehová Diospa castigonqa reparachiwanchej imaraykuchus payta kasukuy allinninchejpajpuni kasqanta (Gál. 6:7). Jehová Diosqa mayta munakuwanchej, nitaj munanchu sufrinanchejta (1 Ped. 5:6, 7).

4. 1) ¿Imawantaj Jehová Dios runasman yachachimunanchejta munasqa? 2) ¿Imatataj qhepan parrafospi yachakusunchej?

⁴ Bibliaj yuyaychaykunasnenqa runasta, jinallataj wawasninchejtapis yanapanman Jesuspa yachachisqasninman tukunankupaj. Chayrayku cristianosqa Bibliawanpuni runasman yachachimunchej, cheqan kajta ruwayta yachanankupaj, Jesuspa kamachiykunasnintapis kasukunankupaj (2 Tim. 3:16; Mat. 28:19, 20). Arí, Jehová Diosqa Palabranwanpuni runasta yachachimunanchejta munan. Ajinamanta paykunapis wajkunata Jesuspa yachachisqasninman tukuchimunankupaj (Tito 2:11-14 leey). Kunantaj qhepan parrafospi yachakusunchej, Jehová Diosqa munakuwasqanchejrayku castigawasqanchejta. Yachakullasuntaj Dioswan kʼamichikojkunamanta, imaynatachus Jehová Dios, Jesús ima wajkunata kʼamisqankumanta, yuyaychasqankumantapis.

5. ¿Jehová Dios cheqanchashawajtinchej pʼenqaypichu rikhurichiwanchej?

⁵ Jehová Diosqa munakuwasqanchejrayku yachachiwanchej, cheqanchawanchejtaj. Chantapis payqa qayllallanpipuni kananchejta munan, ajinamanta wiñaypaj kausakunanchejpaj (1 Juan 4:16). Jehová Diosqa cheqanchashawajtinchej mana pʼenqaypi rikhurichiwanchejchu, nitaj ni imapaj valesqanchejta niwanchejchu (Pro. 12:18). Astawanpis payqa allin ruwasqasninchejta qhawan, nitaj munayninta ruwanapaj obligawanchejchu. Chaytaqa sumajta reparasunman imaynatachus Jehová Dios Biblianejta, publicacionesnejta, tatasninchejnejta, ancianosnejtataj yuyaychawasqanchejpi. Ancianosqa, uj hermano juchapi urmananpaj jinaña kashasqanta reparaspa, kʼachamanta chay hermanota cheqanchanku. Chayta ruwaspaqa Jehová Dios jina munakuyniyoj kasqankuta rikuchinku (Gál. 6:1).

6. ¿Jehová Dios congregacionpi wakin ruwanasta qhasimantachu qhechuwasunman?

⁶ Jehová Diosqa jatun juchapi urmajtinchej munakuwasqanchejrayku mana yuyaychallawasunmanchu, manaqa ancianosnejta congregacionpi wakin ruwanasta qhechuwasunman. Chaytaj reparachiwasunman, Bibliata astawan ukhunchananchej kasqanta, yachakusqanchejpitaj tʼukurina kasqanta, Diosmantataj mañakunapuni kasqanta. Chaykunata ruwaspataj, astawan Jehová Diosman qayllaykusunchej (Sal. 19:7). Tiemponmantaj ima ruwanastachus congregacionpi pierderqanchej, chaykunata watejmanta japʼisunman. Chantapis Jehová Diosqa uj hermanota jatun juchapi urmajtin ancianosnejta congregacionmanta qharqonman. Imajtinchus mana munanchu juchallikoj hermano pantachinawanchejta (1 Cor. 5:6, 7, 11). Chantapis congregacionmanta qharqochikojqa, reparanqa mana qhasimantachu qharqochikusqanta. Chayta reparakuspataj, congregacionman kutinpuyta munanqa (Hech. 3:19).

7. 1) ¿Pitaj Sebná kasqa? 2) ¿Imayna runamantaj Sebná tukusqa?

⁷ Kunanqa iskay runasmanta yacharikunachej,  pikunachus Jehová Dioswan kʼamichikorqanku chaykunamanta. Ujnenqa Sebná, ujnintaj hermanonchej Graham. Sebnaqa uj israelita karqa, rey Ezequiaspa tiemponmanta. Rey Ezequiaspa wasinpitaj mayordomo karqa (Isa. 22:15). Chaywanpis Sebnaqa umata oqhariyta qallarerqa, jatunchachikuytataj munarqa. Chantapis aya pʼampanata aswan patanej chhankapi ruwachikorqa, ‘mentasqa carretaspitaj’ purerqa (Isa. 22:16-18).

8. 1) ¿Imatataj Jehová Dios ruwasqa Sebná umata oqharisqanrayku? 2) ¿Sebná cargonta qhechuchikojtinpis qʼellikusqachu?

⁸ Sebná umata oqhariyta qallarisqanrayku, Diosqa ‘mayordomo kayninta’ qhechuspa Eliaquinman qoporqa (Isa. 22:19-21). Chay tiempopitaj Asiriamanta rey Senaqueribqa, Jerusalenta japʼikapunanpaj wakichikusharqa. Chayrayku Senaqueribqa israelitasta mancharichiyta munaspa, mana maqanakuspallataj jaywaykukunankuta munaspa, ashkha soldadosta capitanesnintawan Jerusalenman kacharqa (2 Rey. 18:17-25). Rey Ezequiastaj chay soldadoswan parlanankupaj, Eliaquimta, iskay runastawan kacharqa. Chay iskay runasmanta ujnenqa, Sebná karqa. Payqa chay kutipaj Ezequiaspa qhelqerin kasharqa. Chayta yachayqa reparachiwanchej Sebnaqa, kʼumuykukoj kayta yachakusqanta, nitaj llakiywan atipachikuspa qʼellikusqanta, qhelqeri cargotapis tukuy sonqo japʼikusqanta. Kunanqa imastachus Sebnamanta yachakuyta atisqanchejmanta parlarina.

9-11. 1) ¿Imastataj yachakusunman Sebnamanta? 2) ¿Imatataj yachakusunman imaynatachus Jehová Dios Sebnata cheqanchasqanmanta?

⁹ Sebná jatunchakusqanrayku cargonta qhechuchikusqanqa, reparachiwanchej “runaykachaypa qhepantapacha urmanaqa” chayamusqanta (Pro. 16:18). Congregacionpi wakin ruwanasta japʼisqanchejrayku, ichapis hermanosqa aswan kurajpaj qhawawasunman. Ajinapi rikukuspaqa, llampʼu sonqoyojllapuni kanapaj kallpachakuna. Yuyarikunataj ima ruwanatapis Jehová Diosmanta japʼisqanchejta (1 Cor. 4:7). Chayrayku apóstol Pablo nerqa: “Ama qankuna kikiykichejmanta aswan sumaj kasqaykichejta yuyakuychejchu. Manachayqa maychus kajllata qankunamanta yuyaychej”, nispa (Rom. 12:3).

¹⁰ Chantapis Jehová Diosqa, Sebnaj cargonta qhechorqa cambiananta yachasqanrayku (Pro. 3:11, 12). Sebnamanta yachakusunman, congregacionpi ima ruwanasta pierdespapis, mana phiñakunata, nitaj qʼellikunata. Astawanqa tukuy atisqanchejta Jehová Diosta sirvikunallatapuni. Chantapis ama qonqanachu Jehová Diosqa munakuwasqanchejrayku, cheqanchawasqanchejta. Nillataj qonqanachu Jehová Diosqa kʼumuykukoj sonqoyojkunata maychus tiemponpi jatunchananta (1 Pedro 5:6, 7  leey). Kʼumuykukoj sonqoyoj kasunchej chayqa, Jehová Diospa yuyaychaykunasninta tukuy sonqo japʼikusunchej, aswan kʼacha runasmantaj tukusunchej.

¹¹ Jehová Dios imaynatachus Sebnata cheqanchasqanmantapis mayta yachakullasunmantaj. Jehová Diosqa sajra ruwaykunata chejnikun, jinapis juchallikoj hermanosta munakullanpuni. Chantapis Jehová Diosqa astawan allin imasta ruwasqankuta qhawashan. Chayrayku tukuy tatas, ancianos ima, allin kanman Jehová Dios jina wawasninkuta, hermanostapis cheqanchananku chayri castigananku (Jud. 22, 23).

12-14. 1) ¿Imatataj wakin hermanos ruwaj kasqanku kʼamichikuspa? 2) ¿Imaynatataj uj hermanota Biblia yanapasqa?

¹² Wakin hermanosqa, congregacionpi wakin ruwanasninkuta qhechuchikojtinku chayri ancianos kʼamirejtinku qʼellikuspa Jehová Diosmanta, hermanosmantapis karunchakunku (Heb. 3:12, 13). Ajina kajtinpis, karunchakojkunataqa yanapayta atisunmanraj. Grahammanta parlarina. Payqa congregacionmanta qharqochikusqa, tiemponmantaj kutinpusqa. Congregacionman kutinpuspañapis, mana rejchu predicacionman, nitaj tantakuykunamanpis. Uj ancianotaj Grahampa amigon kananpaj mayta kallpachakusqa. Tiemponmantaj Grahamqa chay ancianota nisqa: “Bibliamanta yacharichiway ari”, nispa.

¹³ Chay anciano nin: “Grahamqa anchata jatunchakoj. Chantapis congregacionmanta qharqosqanku ancianospaj mayta rimaj. Chayrayku Bibliawan sutʼincharqani jatunchakoyqa mana allinchu kasqanta. Paytaj Bibliaj nisqasninta entiendespa, reparakorqa jatunchakuspa mana allintachu ruwashasqanta. Imaraykuchus Grahamqa jatunchakusqanrayku hermanospaj puraj uya jina rimasharqa. Chayta reparakuspataj kallpachakorqa manaña wajpa contranta rimananpaj. Chayrayku tantakuykunaman mana faltakuspa riyta qallarerqa, Bibliatapis sumajta estudiarqa, Diosmantataj mana saqespa mañakorqa. Chantapis kallpachakorqa familianman Diosmanta yachachinanpaj. Ajinamanta señoranwan, wawasnin aswan kusisqa kasharqanku”, nispa (Luc. 6:41, 42; Sant. 1:23-25).

¹⁴ Chantá chay anciano nillarqapuni: “Uj kuti Grahamqa niwarqa: ‘Unay watastaña Diospa llajtanpi kaspapis, precursor jinataj llankʼaspapis, kunanraj Jehová Diosta munakusqayta niyman’, nispa. Pisi tiemponmantaj Grahamqa microfonoswan yanapakorqa. Kusisqataj kasharqa chay llankʼaywan. Noqaqa Grahammanta yachakuni Jehová Dios kʼumuykukoj sonqoyoj kajta, payta kasukojtataj bendecisqantapuni”, nispa.

15. ¿Jatunchakojtinchej hermanosninchej kʼamirisqanchejta japʼikullankumanchu?

¹⁵ Bibliamanta sumajta yachachiyta munanchej chayqa, noqanchejraj sumajta Bibliata estudiananchej tiyan (1 Tim. 4:15, 16). Ajinallataj hermanosninchejta kʼamirinanchej kajtenqa, Bibliallawantaj yanapachikunanchej tiyan, kʼumuykukoj sonqotaj kananchej tiyan. Hermanosninchej kʼumuykukoj sonqo kasqanchejta reparajtinkoqa, yuyaycharisqanchejta, kʼamirisqanchejtapis japʼikullawasunchej, respetawasunchejtaj. Kunantaj Jesusmanta yachakuna.

16. 1) ¿Jesús runasman yachachishaspa jatunchakojchu? 2) ¿Imaynatataj Jesús yachachisqasninta cheqanchasqa?

¹⁶ Jesusqa Tatanta tukuy imapi kasukojpuni, mana atinanpaj jina kajtinpis (Mat. 26:39). Manataj jatunchakojchu, astawanqa runasman nej, imatachus yachachisqanqa Tatanmanta jamusqanta (Juan 5:19, 30). Chantapis Jesusqa, llampʼu sonqo kasqanrayku, Jehová Diosta kasukusqanraykutaj  runasman munakuywan yachachej. Runastaj payman mana manchachikuspa qayllaykullaj kanku (Lucas 4:22 leey). Jesustaj kʼacha palabraswan llakisqasta sonqochaj (Mat. 12:20). Chantapis Jesusqa yachachisqasninta sumajllawan cheqancharqa, mayqenninkuchus aswan kurajpaj qhawasqa kananmanta siminakushajtinku (Mar. 9:33-37; Luc. 22:24-27).

17. ¿Pi jinataj ancianos hermanosta kʼamirinanku kasqa?

¹⁷ Ancianosqa, Jesús jinapuni hermanosta kʼamirinanku tiyan. Chaytataj ruwankuman Bibliaj nisqanman jina. Ajinata ruwaspaqa rikuchenqanku Jehová Dioswan, Jesuswan ima yanapachikushasqankuta. Apóstol Pedroqa ancianosman nerqa: “Diosqa ovejasninta makiykichejman churan, paykunata qhawanaykichejpaj. Chay tropa ovejasta michiychej, sumaj qhawajkuna jina sirvispa. Amataj tanqasqa jinachu sirviychej, manaqa Dios munasqanman jina tukuy sonqowan. Amallataj imata japʼiyta munaspachu chayta ruwaychej, manaqa sirviytapuni munasqaykichejrayku. Diospata kajkunata ama patrones jinachu kamachiychej. Astawanpis sumajta kausaychej, paykuna qankunamanta yachakunankupaj jina”, nispa (1 Ped. 5:2-4). Sichus ancianos Jehová Dioswan, Cristowan ima yanapachikonqanku chayqa, paykunata tukuy imapi allinpuni renqa, hermanospis kusisqas kausakonqanku (Isa. 32:1, 2, 17, 18).

18. 1) ¿Imapajtaj Jehová Dios tatasta churasqa? 2) ¿Imatataj Jehová Dios tatasman qoyta atinman?

¹⁸ Tataspis wawasninkuta cheqanchanallankutaj tiyan. Chayrayku Jehová Diosqa tatasman nin: “Tatas, ama wawasniykichejta phiñachiychejchu. Astawanpis paykunata uywaychej, Jehová Dios nisqanman jina cheqanchaspa, yachachispataj”, nispa (Efe. 6:4). Chaytaqa tatas ruwanankupuni tiyan. Chayrayku Proverbios 19:18 nin: “Wawaykitaqa wananampaj jasutʼiy, tiempo kashajtin, amataj jasutʼinkichu wañuchinaykikamaqa”, nispa. Arí, Jehová Diosqa tatasta churan wawasninkuta cheqanchanankupaj, yachachinankupajtaj. Chaykunata tatas mana ruwajtinkoqa, Jehová Diosman cuentata qonanku kanqa (1 Sam. 3:12-14). Chaywanpis Jehová Diosqa, tatasman yachayta, yuyayta, kallpata ima qon, paykuna yanapayninta mañakojtinku, Bibliaj nisqanman jinataj kausakojtinku (Santiago 1:5 leey).

19, 20. 1) ¿Ima bendicionestataj japʼisunchej Jehová Diospa yuyaychaykunasninta tukuy sonqo kasukojtinchej? 2) ¿Imasmantataj qhepan semana yachakusunchej?

¹⁹ Jehová Diospa yuyaychaykunasninta tukuy sonqo kasukojtinchejqa, may chhika bendicionesta japʼisunchej. Chantapis Jehová Dios jina, Jesús jinataj wajkunata cheqanchajtinchej, yachachejtinchej imaqa, ashkha bendicionesta japʼillasuntaj. Imajtinchus familia ukhupi, congregación ukhupipis mana ima chʼajwapis kanqachu. Astawanqa allin kausay kanqa, imajtinchus tukuypis munanakusunchej, respetanakusunchejtaj. Chantapis aswan qhepaman uj sumaj kausayta japʼisunchej (Sal. 72:7). Jehová Diosqa yachachishawanchej, cheqanchashawanchejtaj paraisopi wiñaypaj uj familia jina ujchasqa kausakunanchejpaj (Isaías 11:9 leey). Chayta mana qonqasunchu chayqa, reparasunchej Jehová Diosqa munakuwasqanchejrayku, allinninchejta munasqanraykutaj jasutʼiwasqanchejta, yachachishawasqanchejtataj.

²⁰ Qhepan semanaqa, astawan yachakusunchej imaynatachus familia ukhupi, congregación ukhupipis wajkunata cheqanchanata, yachachinatapis. Yachakullasuntaj mana munayninchejwan atipachikunata. Chantapis yachakusunchej Jehová Diospa yuyaychaykunasninta kasukunapuni kasqanta.