NOQAQA Graz nisqa llajtitamanta kani, Austria suyumanta. Qanchis watitayoj kashajtiy, tatasneyqa católica escuelaman churawarqanku. Chay escuelapi rikorqani curaswan monjaswanqa millay imasta ruwasqankuta. Chayrayku mamayman nerqani waj escuelaman churanawanta. Niraj chay wata tukukushajtintaj waj escuelaman churawarqa.

Chaymantataj tatasneyqa, uj internadoman churawarqanku. Uj tutaqa, soldados bombasta llajtayman kachaykamorqanku. Tataytaj internadoman jamuspa Schladming nisqa llajtaman apakapuwarqa pakakunaykupaj. Chay llajtitaman chayashajtiykoqa uj puenteta pasarqayku, pasasqaykutawantaj soldadosqa chay puenteta bombawan phirirparqanku. Waj kutipitaj, awelitaywan patiopi kashajtiyku soldadosqa avionmantapacha baleamuwarqayku. Chaynejta, guerra tukukunanpajña kashajtin repararqayku gobiernospis, iglesiapi kajkunapis qhasi manakajlla kasqankuta.

Mamayqa 1950 watapi, Jehovaj testigosninwan Bibliamanta yachakuyta qallarerqa. Noqataj mamayman yachachisqankuta uyarikoj kani. Wakin kutistaj mamaywan tantakuykunaman rej kani. Mamayqa, Jehovaj testigosnin Bibliamantapuni yachachisqankuta reparaspa, 1952 watapi bautizakorqa.

Rej kayku chay congregacionqa mana gustawajchu. Imajtinchus kuraj hermanitaslla karqanku. Chaywanpis uj pachaqa, waj congregacionman rispa, sonqoypi nikorqani: “Kay congregacionpi jovenespis kasqankoqa”, nispa. Chantá llajtaykuman kutipuspa, mana faltakuspa reunionesman riyta qallarerqani. Jinapitaj repararqani Bibliamantapuni yachakushasqayta. Reparallarqanitaj Jehová Diosqa kamachisninta ni imarayku saqerparisqanta, ima llakiypi rikukojtinkupis yanapasqantapuni (Sal. 3:5, 6).

Imatachus Jehová Diosmanta yachakusqaytaqa, wajkunamanpis willariyta munarqani. Chayrayku hermanosniyman willarispa  qallarerqani. Kuraj hermanasneyqa profesoras karqanku, karupitaj trabajaj kanku. Trabajarqanku chay comunidadesmantaj rerqani, Bibliamanta yacharichej. Jinamantataj tukuy hermanosniy Jehovaj testigosninman tukorqanku.

Predicayta qallarisqaymantapacha, casi iskay semanasninman uj señorawan Bibliata estudiayta qallarerqani. Chay señoraqa treintayoj jina karqa. Payqa usqhayllata ñauparerqa, bautizakorqataj. Qosanpis iskaynin wawasninpis bautizakullarqankutaj. Chay señoraman Bibliamanta yachacheyqa, mayta yanapawarqa creeypi sumaj sayasqa kanaypaj. Imajtinchus noqamanqa ni pipis Bibliamanta yachachiwarqachu. Chayrayku chay señoraman yachachinaypajqa, noqaraj Bibliata sumajta entiendenay karqa. Bibliata ukhunchaspataj imatapunichus Biblia yachachisqanta astawan entienderqani. Jinamantataj Jehová Diospa munayninta ruwayta munasqayrayku, abril de 1954 watapi bautizakorqani.

Kay 1955 watapitaj, jatun tantakuykunaman rinaypaj, Alemaniaman, Franciaman, Inglaterramanwan viajarqani. Inglaterrapi kashaspataj hermano Albert Schroederta rejserqani. Payqa Galaad escuelapi yachachej. Tiemponmantaj Diospa Llajtanta Kamachejkunamanta ujnin karqa. Uj diataj chay hermanowan waj hermanospiwan Inglaterrapi kaj jatun museoman rerqayku. Chaypitaj hermano Albertqa hebreo parlaypi qhelqasqa Bibliasta rikuchiwarqayku. Niwarqaykutaj chay Bibliaspi Diospa sutin rikhurisqanta. Chayta yachayqa, Jehová Diospi astawan atienekunaypaj yanapawarqa. Chayraykutaj sonqoypi nikorqani: “Imapis kachun, noqaqa Diosmanta willallasajpuni”, nispa.

Chaynejtataj 1 de enero de 1956 watapi, precursora regular kayta qallarerqani. Tawa killanmantaj, precursora especialta jina Mistelbach nisqa llajtaman kachawarqanku. Chaypeqa ni uj hermanollapis karqachu. Compañerayqa precursora especialllataj karqa. Paywanqa mana yachanakuyta atillarqaykuchu. Imajtinchus noqaqa diecinueveyoj jinallaraj karqani, compañeraytaj veinticincoyojña. Noqaqa llajtamanta karqani, paytaj campomanta. Chantapis noqaqa pʼunchaykama puñoj kani, payrí laqha laqhata jatarejña. Chʼisisnintaj tutakama imatapis ruwaspa qhepakoj kani, paytaj temprano puñukapuyta munaj. Ajinapis Bibliaj yanapayninwan uj yuyayllaman chayayta aterqayku. Khuskataj, kusisqa Jehová Diospa sutinta runasman rejsichimorqayku.

Chantá ashkha llakiykunapiraj rikukorqayku, Jehová Diostaj mana saqerpariwarqaykuchu (2 Cor. 4:7-9). Uj kuti, uj ranchitopi predicashajtiyku runasqa alqosninkuwan kachaykuwarqayku. Chay jatuchaj alqostaj muyuykuwarqayku, janchʼarparinawaykupajñataj kasharqanku. Compañeraypa makinta japʼispataj, Jehová Diosmanta mañakorqani: “Kay alqos janchʼurpawasqayku chay, usqhayllata wañuchiwachuyku ari”, nispa. Chay alqostaj, jinallapi chupanku khiwirispa riporqanku. Chayta rikuspaqa, Jehová Dios jarkʼashawasqaykuta repararqayku. Chaymantataj ranchitontinpi predicallarqaykupuni. Runastaj sumajta uyariwarqayku. Ichapis sumajta uyariwarqayku, alqos ni imanawasqaykuta rikusqankurayku chayri mana manchachikuspa willallasqaykutapuni rikusqankurayku. Tiemponmantaj chay lugarmanta wakin runasqa, Jehovaj testigosninman tukorqanku.

 Waj kutipitaj waj llakiypiñataj rikukorqayku. Chay kuteqa, alojakorqayku chay wasimanta dueño machasqa chayamorqa, jinata nispa: “Maytaj chay Testigos, wañurpachisaj runasta molestamusqankurayku”, nispa. Señorantaj mana chʼinyachiyta aterqachu. Noqaykutaj altos patamantapacha tukuy parlasqankuta uyarisharqayku. Chayrayku usqhayllata punkuman sillasta tauqaykuytawan qʼepichakorqayku. Punkuta kicharispataj rikorqayku, chay runa jatun cuchillo oqharisqa wicharimusqanta. Chayrayku ujnin punkunta llojsiytawan, huerta chaupinta qʼepisniyku qʼepirisqa ayqekorqayku.

Jinaspataj uj alojamientopi alojakorqayku. Chay alojamientopi qhepakusqaykoqa allinpuni karqa. Centropi kasqanrayku, wakin estudiosniykoqa chayman jamuyta atillaj kanku Bibliamanta yachakunankupaj. Killasninmanqa, cuartoykupi libromanta yachaqanapaj tantakuyta, Torremanta Qhawaj revistata estudianapaj tantakuytawan ruwayta qallarerqayku, 15 jinataj tantakoj kayku. Chaypeqa watata jinapuni qhepakorqayku.

Mistelbach llajtapeqa wata kurajta qhepakorqani. Chantá Feldbach llajtamantañataj kachawarqanku, waj compañerawan. Chay llajtapeqa nillataj uj congregación karqachu. Juchʼuy kʼullu wasipitaj tiyakorqayku altos patapi. Wayrataj juskʼitusninta phukuykamoj. Chayrayku periodicowan chay juskʼitusta tapaj kayku. Yakutapis pozomanta orqhoj kayku. Chaywanpis killasninmanqa, kusisqas kasharqayku uj grupo sayarisqanmanta. Chantá pisi tiemponman uj familiamanta 30 runaspuni bautizakorqanku.

Ajinamantataj, repararqani Jehová Diosqa yanapashawasqantapuni, Gobiernonta ñaupajman churasqayrayku. Chayrayku, tukuy sonqo niyman Jehová Diosqa ni jaykʼaj saqerparinawanta (Sal. 121:1-3).

1958 watapitaj Estados Unidospi uj jatun tantakuy ruwakorqa, chaytaj iskay estadionespi apakunan karqa. Chayman rinaypajtaj uj solicitudta juntʼacherqani. Chay kutipi Austria sucursalmanta hermanosqa, niwarqanku: “¿Galaad escuelaman clase 32 nisqaman riyta munawajchu?”, nispa. Noqataj nerqani: “Riyta munani”, nispa.

Galaad escuelapi kashaspaqa, hermano Martin Poetzingerpa ladonpi tiyakorqani. Hermano Martintaqa, Hitlerpa soldadosnin carcelpi maytapuni ñakʼarichisqanku. Tiemponmantaj, payqa Diospa Llajtanta Kamachejkunamanta  ujnin karqa. Galaad escuelapi kashajtiyku, payqa inglesta mana allinta entiendespa chhichispa alemán parlaypi niwaj: “¿Imatataj nishanri?”, nispa.

Chay escuela qallarisqanmantapacha kinsa killanman jina, hermano Nathan Knorrqa niwarqayku maypichus misioneros jina Diosta sirvinaykuta. Noqatataj niwarqa Paraguayman rinayta. Sipasitallaraj kasqayraykutaj Paraguay suyuman yaykunaypajqa, tatasniymanta permisota mañakuspa papelta firmachinay karqa. Marzo de 1959 watapitaj, Paraguayman chayarqani. Paraguaypa capitalninpitaj misionerospa wasinkupi tiyakorqani, uj compañerawan.

Pisi tiemponmantaj, Walter Bright sutiyoj hermanowan rejsinakorqayku. Payqa Galaad escuelaman risqa clase 30 nisqaman. Paywantaj casarakorqani. Llakiykunapi rikukuspaqa, Isaías capítulo 41 versículo diezta leejpuni kayku. Chaypi nin: ‘Ama manchachikuychu, imaraykuchus noqaqa qanwanpuni kashani. Chantapis noqaqa Diosniyki kani. Noqa kallpachasqayki’, nispa. Kay versiculoqa, reparachiwaj kayku Jehová Dios ni jaykʼaj saqerparinawaykuta, payta kasukojtiyku, Gobiernontataj ñaupajman churajtiyku.

Casarakusqaykumanta tiemponmantaj, Paraguaypa fronteranman kachawarqayku, chay llajtitataj Brasilwan tinkuypi kasharqa. Chay llajtitamanta curasqa, jovenesta tanqarqanku maukʼa wasiykuta rumiswan chʼanqaranankuta. Chaywanpis predicallarqaykupuni. Qosaytaj policiaspa capitanninwan Bibliata estudiayta qallarerqa. Chay capitantaj sajra runasmanta jarkʼanawaykupaj, policiasta kamacherqa uj semanata wasiyku punkupi sayanankuta. Pisi tiemponmantaj Brasilpa fronteranpiñataj misioneros jina sirvirqayku. Chaypitaj uj sumaj alojamientopi tiyakorqayku. Chaypi kanaykoqa allinpuni karqa. Imajtinchus Paraguay ladopi, Brasil ladopipis reunionesta ruwayta qallarerqayku. Niraj waj ladoman ripushajtiykutaj, chay lugarpi iskay juchʼuy congregacionesña karqa.

Doctoresqa niwarqanku, ni jaykʼaj wawata rejsinayta. Chaywanpis 1962 watapi onqoj rikhurerqani. Chayrayku Estados Unidosman riporqayku, qosaypa familianwan tiyakoj. Familiaykuta qhawanaykuraykutaj, manaña precursores jina kayta aterqaykuchu. Chaywanpis Diospa Gobiernonta ñaupajllamanpuni churarqayku (Mat. 6:33).

Noviembre de 1962 watapi Estados Unidosman chayaspaqa, rikorqayku gringuitoswan yana runitaswan chejninakusqankuta. Chaynejtataj hermanospis waj wajta reunionesta ruwasqankuta, waj ladospitaj predicasqankuta. Chaywanpis pisi tiemponman hermanosqa, gringuitoswan mana gringuitoswan khuskallaña reunionesta ruwarqanku, predicarqankutaj. Imajtinchus repararqanku, Jehová Diosqa tukuy runasta uj rejllata qhawasqanta. Chaynejtataj kunanqa, chay lugarespi ashkha congregaciones tiyan.

Noqapajqa 2015 wata, may llakiy karqa. Imajtinchus qosay wañuporqa umanpi cancerwan. Qosayqa may kʼachapuni karqa. Payqa Jehová Diospaj mayta llankʼarqa, ashkha hermanostataj yanaparqa. Paywanqa 55 watasta tiyakorqayku. Maytataj suyakushani kausarimunanta (Hech. 24:15).

Jehová Diosta 40 watas kurajta precursora jina, misionera jinataj sirvisqaymanta kusisqa kashani. Mayta kusikullanitaj, qosaywan 136 runasta bautismoman chayachisqaykumanta. Qosaywan khuska kashaspa jatuchaj llakiykunapi rikukojtiykupis, Jehová Diosta sirvillarqaykupuni. Chay llakiykunata atipanaykupajqa, Jehová Diosman astawan qayllaykoj kayku. Chantapis pay yanapanawaykupi tukuy sonqo atienekoj kayku. Jehová Diostaj maychus tiemponpi yanapawarqayku, kallpachawarqaykutaj (2 Tim. 4:16, 17).

Qosayta mayta faltachaspapis, precursora kasqay mayta yanapawan mana anchata llakikunaypaj. Runasman wañusqas kausarimunankumanta yachacheyqa, mayta kallpachawan. Jehová Diosqa ni jaykʼaj saqerpariwarqachu. Astawanqa uj tata jina kallpachawarqa, yanapawarqa, justiciata ruwaj paña makinwantaj sayachillawarqapuni (Isa. 41:10).