1. ¿Imatataj yuyayniyoj tatas ruwaj kasqanku wawasninku niraj bautizakushajtinku?

UJ PACHA, hermana Blossom Brandt sutiyoj nerqa: “31 de diciembre de 1934 watapi bautizakorqani. Niraj bautizakushaspataj, tatasniyta sapa kuti nej kani: ‘Bautizakuyta munani’, nispa. Paykunataj chay kutispi sumajta yuyaychariwaj kanku. Imajtinchus entiendenayta munarqanku, bautizakuy mana pujllakuy jinallachu kasqanta”, nispa. Ashkha tataspis, Blossompa tatasnin jinallataj, wawasninkuta sumajta yanapayta munanku bautizakunankupaj. Imajtinchus yachanku bautizakunankupaj mana yanapajtinku, wawanku Jehová Diosmanta karunchakunanta (Sant. 4:17). Arí, yuyayniyoj tatasqa, wawasninkuta yanapankupuni niraj bautizakushajtinku sumaj cristianos kanankupaj.

2. 1) ¿Imatataj congregacionesta waturej hermanos reparasqanku? 2) ¿Imamantataj kay yachaqanapi parlarisunchej?

² Congregacionesta waturej hermanosqa, reparasqanku ashkha Testigospa wawasninku mana bautizasqaschu kasqankuta. Chay jovenesqa 16 watayojmanta 23 watayojkama jina kanku. Paykunaqa tantakuykunaman rinku, predicamunku, Jehovaj  testigosnin kasqankutataj yuyakunku. Ichá wakin jovenesqa mana bautizakunkuchu, tatasninku wawallaraj kasqankuta nisqankurayku chayri waj imasrayku. Kay yachaqanapitaj parlarisunchej, imaraykuchus wakin tatas wawasninkuta mana yanapasqankuta bautizakunankupaj.

3. ¿Imamantataj Blossompa tatasnin llakikusqanku?

³ Qallariypi, hermana Blossommanta parlarerqanchej. Paypa tatasnenqa, llakisqa kasharqanku bautizakunanpaj wawallaraj kasqanmanta. Yachaytataj munarqanku, imillitanku entiendesqantachus manachus bautizakuy mana pujllakuy jinallachu kasqanta. Kunantaj yachakusun, imaynatachus tatas reparayta atisqankuta, wawasninku bautizakunankupaj wakichisqañachus manachus kasqankuta.

4. ¿Imaynatataj Mateo 28:19, 20 versículos tatasta yanapanman?

⁴ (Mateo 28:19, 20 leey). Bibliaqa, mana ninchu mashkha watayoj kaspachus bautizakuna kasqanta. Jinapis tatasqa, mana qonqanankuchu tiyan wawasninkuta Jesuspa yachachisqasninman tukuchiyta. Chanta, ¿imatataj Jesuspa yachachisqasnin ruwanku? Jesuspa yachachisqasnenqa, sumajta entiendenku imatachus Jesús yachachisqanta, chayman jinataj kausakunku. Chayrayku tatasqa, wawasninkuman nacekusqankumantapacha Jehová Diosmanta yachachinanku tiyan. Ajinamanta wawasninku Jehová Diosllapaj kausakunankupaj, Jesuspa yachachisqasninmantaj tukunankupaj. Biblia nisqanman jinaqa, wawitasqa atinkuman imatapunichus Biblia yachachisqanta entiendeyta, chayman jinataj kausakuyta. Chaywanpis ñuñoj wawitasqa, mana bautizakuyta atinkumanchu.

5. ¿Imatataj Timoteomanta yachakusunman?

⁵ Timoteoqa jovencitomantapacha Jehová Diosta sirviyta qallarerqa. Apóstol Pablo nisqanman jinataj, “wawitamantapacha” Diospa Palabranmanta yachakorqa. Timoteomanqa mamanwan awelitanwan Diosmanta yachacherqanku. Ajinamanta Timoteoqa, tatan mana creyente kajtinpis imatachus yachakusqanpi sinchʼita creerqa (2 Tim. 1:5; 3:14, 15). Chantá 20 watayoj jina kashaspataj, congregacionpi sumaj llankʼaykunataña japʼerqa (Hech. 16:1-3).

6. ¿Imaynatataj tatas wawasninkuta yanapankuman?

⁶ Mana tukuy wawaschu kikin kanku. Wakin wawasqa, rato Bibliata entiendenku, bautizakuytataj munanku. Wakintaj bautizakunankupaj mana ñaupariyta atillankuchu. Tatasqa, wawasninku mana ñaupariyta atisqankuta reparaspa, mana tanqanankuchu tiyan bautizakunankupaj. Astawanqa sumajtaraj yanaparinanku tiyan ñauparinankupaj. Ajinamantataj tatasqa may kusisqas kanqanku, astawanraj wawasninku Proverbios 27:11 (leey) versiculota kasukojtinku. Chaywanpis tatasqa, mana qonqanankuchu tiyan wawankuta Jesuspa yachachisqanman tukuchinanku kasqanta. Chayrayku tatasqa, piensarinkuman wawasninku bautizakunankupaj Bibliata sumajtañachus manachus entiendesqankuta.

7. ¿Bautizakunapaj Bibliamanta tukuy imatapunichu yachana kasqa?

⁷ Tukuy tatas munanku wawasninku Bibliata sumajta entiendenankuta. Chayrayku tukuy atisqankuta yachachinankupaj kallpachakunku. Wawasninkutaj, Bibliata sumajta entiendespa Diospa munayninta ruwayta munanqanku. Chaywanpis wawasqa, Diospa munayninta ruwanankupaj,  bautizakunankupajtaj, Bibliamanta mana tukuy imatapunichu yachananku tiyan. Imajtinchus bautizakuspañapis Bibliamanta yachakullanqankupuni, imaynatachus tukuy cristianos yachakushallanchejpuni, ajinata (Colosenses 1:9, 10 leey). Kunantaj qhawarinachej, bautizakunapaj imastachus yachakunanchejpuni kasqanta.

8, 9. 1) ¿Imataj uj carcelerowan kasqa? 2) ¿Imatataj carceleromanta yachakusunman?

⁸ Apóstol Pabloqa, 50 watapi, Filipos llajtapi kaj congregacionta iskay kutitaña waturikoj risqa. Chay kutipitaj runasqa, Pablota Silastawan qhasimanta carcelman wisqʼaykuchisqanku. Chay tutataj, ujllata jallpʼa sinchʼita kharkatitisqa, carcelpa punkusnintaj kicharirakusqanku. Carcelerotaj cárcel punkusta kicharasqasta rikuspa, presos ayqesqankuta yuyasqa. Chayrayku espadanta orqhospa wañuchikuyta munasqa. Pablotajrí sinchʼita qhaparispa nisqa: “¡Ama wañuchikuychu! Tukuyniyku kaypi kakushayku”, nispa. Chantá Pablowan Silaswanqa, carceleroman, familianmanwan Jesusmanta yachachisqanku. Carcelerowan familianwanqa Jesuspi creesqanku, reparasqankutaj Jesusta kasukunanku kasqanta. Chay ratopachataj paywan tukuy familianwan bautizakusqanku. Chay carceleromanta familianmantawan, tatasqa mayta yachakunkuman (Hech. 16:25-33).

⁹ Chay carceleroqa romano karqa, ichá uj jubilasqa soldado. Nitaj Diospa Palabranmanta yacharqachu. Chayrayku cristiano kananpajqa, sumajta Diospa Palabranmanta yachakunan karqa. Entiendenantaj karqa, imatachus Jehová Dios kamachisninmanta munasqanta. Chantapis Jesuspa nisqasninta kasukunan karqa. Chaykunata yachakuspataj bautizakorqapacha. Chay carceleroqa bautizakuytawanpis Diospa Palabranmanta yachakullarqapuni. Chayrayku wawanchej Jehová Diosta munakuspa, kasukuyta munaspataj bautizakuyta munasqanta niwajtinchejqa, ancianoswan parlarinankuta nisunman. Ancianostaj reparanqanku, wawanchej bautizakunanpaj wakichisqañachus manachus kasqanta. * Chantapis wawanchejqa bautizakuytawan, Jehová Diosmanta yachakullanqapuni, imaynatachus noqanchejpis Jehová Diosmanta yachakushallanchejpuni, ajinata (Rom. 11:33, 34).

10, 11. 1) ¿Imatataj wakin tatas wawasninku ruwanankuta munanku niraj bautizakushajtinku? 2) ¿Imajtintaj allin kanman wawasninchejta Diosman astawan qayllaykunankupaj yanapananchej?

¹⁰ Wakin tatasqa, wawasninku niraj bautizakushajtinku, munanku universidadpi estudiaspa sumaj profesionniyoj kanankutaraj. Ichá ajinata yuyaj tatasqa, allillanta ruwashasqankuta yuyankuman. Chaywanpis allin kanman piensarinanku, wawanku universidadpi estudiaspa sonqo juntʼasqachus manachus kananpi. Piensarillankumantaj, wawankuta profesional kananpaj tanqasqanku, Bibliaj nisqanman jinachus manachus kasqanpi. Chantapis piensarinkuman, imatachus Jehová Dios kausayninchejpi ñaupajman churananchejta munasqanpi (Eclesiastés 12:1 leey).

¹¹ Chantapis tatasqa, mana qonqananchejchu tiyan, kay sajra mundomanta runas jina yuyayqa, Diospa contranpi kasqanta. Chayrayku wawasninchejta Diosman astawan qayllaykunankupaj yanapana.  Ajinallamanta Kuraj Supaypa trampasninpi mana urmanqankuchu, nitaj kay mundomanta runas jinachu ruwanqanku (Sant. 4:7, 8; 1 Juan 2:15-17; 5:19). Chaywanpis wawasninchejta profesional kanankupaj, sumaj trabajoyoj kanankupajtaj tanqajtinchejqa, Jehová Diosmanta karunchachisunman. Imajtinchus wawasninchejqa yuyanqanku chay imasta ñaupajman churana kasqanta, Diosta sirvinamanta nisqaqa. Chayrayku Testigo tatasqa, manapuni munasunmanchu wawasninchej universidadpi kay sajra mundoj imasninta yachakunankuta. Astawanqa munanchej Jehová Diosta tukuy sonqo sirvispa kusikunankuta (Salmo 1:2, 3 leey).

12. ¿Imajtintaj wakin tatas mana munankuchu wawanku bautizakunanta?

¹² Uj pacha uj hermana, jinata nerqa: “Mana munarqanichu waway bautizakunanta, juchallikuspa congregacionmanta qharqochikunanta yuyasqayrayku”, nispa. Ashkha tatasqa, chay hermana jinallataj yuyanku. Chayrayku suyanku wawanku bautizakunanpaj jovenyanantaraj, mana ima juchapi urmananpaj (Gén. 8:21; Pro. 22:15). Chantapis yuyanku, wawanku mana bautizasqa kajtenqa mana qharqochikunanta. Chaywanpis ajinata yuyayqa mana allinchu (Sant. 1:22).

13. ¿Wawas mana bautizakuspapis Diosman cuentata qonankuchu kanqa?

¹³ Tukuy tatasqa munanchej wawasninchej bautizakunankupaj wakichisqaña kajtinku bautizakunankuta. Chaywanpis mana yuyananchejchu tiyan wawasninchej Diosman mana cuentata qonankuta, mana bautizasqa kasqankurayku. Imaraykuchus tukuy wawasqa, allin kajta yachashaspa, mana chayman jina ruwajtinku, Diosman cuentata qonankupuni kanqa (Santiago 4:17 leey). Kʼacha tatasqa, wawasninkuman yachachinkupuni Jehová Diospa kamachiykunasninta kasukuyta, sajra kajtataj chejnikuyta. Chantapis kallpachakunku Diospa kamachiykunasninman jina kausakunankupaj. Ajinamanta wawasninku Diosta kasukuyta munanankupaj (Luc. 6:40). Wawasninkutaj Jehová Diosta kasukuyta munasqankurayku, ni ima juchatapis ruwayta munanqankuchu (Isa. 35:8).

14. ¿Imaynatataj ancianos wawasta yanapankuman?

¹⁴ Ancianospis wawasta mayta yanapankuman, Diospaj astawan llankʼanamanta parlarispa. Chaymanta parlaspa uj hermana ajinata nerqa: “Sojta watitayoj kashajtiy, hermano Russellwan 15 minutosta parlarerqayku. Payqa yuyaychawarqa imaynasmantachus Diospaj astawan llankʼanaymanta”, nispa. Chay hermanaqa, Russell yuyaycharisqanrayku 70 watas kurajta precursora karqa. Reparanchej jina, miskʼi palabraswan pillapis kallpachariwajtinchejqa, tukuy kausayninchejpi mayta yanapawasunman (Pro. 25:11). Chayrayku ancianosqa, tatasta wawasninkutawan ninkuman Tantakuna Wasipi imallapipis yanaparikunankuta. Wawasmanqa ichá atinankupaj jina ruwanasllata qonkuman.

15. ¿Imaynatataj tukuy hermanos wawasta yanapasunman?

¹⁵ Tukuy hermanospis wawasta mayta yanapallasunmantaj. Ichá wawasta ñauparishasqankuta rikuspa, allinta ruwashasqankuta nisunman. Allinta ruwashasqankuta nillasunmantaj, tantakuypi comentajtinku, tantakuypi ima parteyoj kajtinku, escuelamanta compañerosninkuman predicajtinku  chayri juchaman urmanapaj tanqasqa kashaspa sumajta sayajtinku. Chayrayku allin kanman, tantakuy niraj qallarishajtin chayri tukukojtin, wawaswan parlarinanchejpuni. Chayta ruwajtinchej wawasqa, Diospa llajtanmanta kasqankuta reparanqanku (Sal. 35:18).

16, 17. 1) ¿Imajtintaj wawasninchej bautizakunankupuni kasqa? 2) ¿Imataj mayta kusichiwasunman? (8 paginapi fotota qhawariy).

¹⁶ Israel nacionqa Diospa ajllasqan llajta karqa. Chayrayku israelitaspa wawasninkoqa, nacekusqankumantapacha Diospa llajtanmanta karqanku. Chaywanpis wawasninchejqa niraj Diospa llajtanmantachu kanku, noqanchej bautizasqaña kajtinchejpis. Imajtinchus wawasninchejqa Jehová Diosta munakuyta yachakunanku tiyan. Chayrayku wawasninchejta nacekusqankumantapacha, yanapananchej tiyan, Jesuspa yachachisqanman tukunankupaj, Diosllapaj kausakunankupaj, bautizakunankupaj ima. Paykunaqa chaykunata ruwaspalla jatun ñakʼariy tiempopi salvakuyta atenqanku (Mat. 24:13). Arí, wawasninchejman Jehová Diosmanta yachacheyqa, uj sumaj llankʼay (Efe. 6:4; Sal. 127:3).

¹⁷ Kay yachaqanaj qallariyninpeqa, Blossom Brandt sutiyoj hermanamanta parlarerqanchej. Pay bautizakuyta munajtin, tatasnenqa munarqanku entiendenanta bautizakunanpaj wakichisqañachus manachus kasqanta. Wakichisqaña kasqanta reparaspataj, tatasnenqa bautizakunanpaj yanapallarqankupuni. Blossom bautizakunanpaj uj chʼisillaña faltashajtintaj, tatan chay chʼisi uj mañakuyta ruwasqa. Chay kutimanta parlaspa Blossom nin: “Tatayqa tukuyniykuta qonqorichiwarqayku Jehová Diosmanta mañakunaykupaj. Chantá Jehová Diosman nerqa: ‘Sonqoy mayta qhallallarin, imillitay kausayninta qopususqanmanta’”, nispa. Sojta chunka watasninmantaj, hermana Blossom jinata nerqa: “Ni jaykʼaj qonqasajchu, imatachus tatay chay chʼisi Jehová Diosman nisqanta”, nispa. Noqanchejpis Blossompa tatasnin jina kusikunanchej tiyan, wawasninchej Jehová Diosman qayllaykuspa bautizakojtinku.