1. ¿Ima llakiykunasniyojtaj ichá kashanchej?

CRISTIANOSQA imaymana problemasniyoj kanchej. Ichá congregacionmanta pillapis sonqonchejta nanachiwanchej (Sant. 3:2). Chayrí trabajomanta, manaqa colegiomanta compañerosninchej, Jehovata sirvisqanchejrayku asipayawanchej (1 Ped. 4:3, 4). Manachayrí familiaresninchej mana reunionesman rejta saqewanchejchu, chayri mana predicananchejta munankuchu (Mat. 10:35, 36). Sinchʼi llakiykunasniyoj kaspaqa, ichapis niña Jehovata sirviyta munasunmanchu. Jinapis Jehová Diosqa, chay llakiykunata aguantanapaj yanapawasun. Payqa yachayta, kallpatawan qowasun.

2. Romanos 15:4 nisqanman jina, ¿imaynatataj Diospa Palabranta leey yanapawasunman?

² Jehová Diosqa, imaynatachus wakin kamachisnin llakiykunata aguantasqankuta, Palabranpi qhelqacherqa. Chaytataj noqanchej yachakunanchejpaj ruwarqa. Payllataj chayta apóstol Pablowan qhelqacherqa (Romanos 15:4 leey). Chayrayku Bibliapi Diospa kamachisninmanta leeyqa, sonqochawasun, ñaupajman rinallapajpunitaj yanapawasun. Jinapis mana Bibliata leenallachu tiyan, manaqa chay leesqanchejman jina yuyayninchejta, sonqonchejtapis cambiana tiyan. Chayta ruwajtillanchej, Bibliapi leesqanchej yanapawasun. Llakiykunapi kashaspa imaynatachus Bibliawan yanapachikunata qhawarina. Chaypajqa kay tawa imasta ruwasunman: 1) Diosmanta mañakuna, 2) rikushasunmanpis jina yuyana, 3) tʼukurina, 4) yachakusqanchejman jinataj ruwana. Qhepan parrafospi, imaynatachus chay tawa imasta ruwanata yachakusun. * Chantá chayman  jina rey Davidpa kausayninta, apóstol Pabloj kausaynintawan tumpata estudiasun.

3. 1) Niraj Bibliata leeshaspa, ¿imatá ruwananchej tiyan? 2) Filipenses 4:6, 7; Santiago 1:5 nisqanman jina, ¿imaynatá Diosmanta mañakuy yanapawasunman?

³ Ñaupaj kaj, Diosmanta mañakuna. Niraj Bibliata leeshaspa, Jehovamanta mañakuna sumaj yuyaychaykunata tarinapaj yanapanawanchejta. Ichapis uj llakiyniyoj kashanchej, nitaj yachanchejchu imatachus ruwananchejta. Jina kajtin, Jehovamanta mañakusunman, Palabranpi ima yuyaychayllatapis tarinapaj yanapanawanchejta (Fili. 4:6, 7; Sant. 1:5).

4. ¿Imatá ruwasunman Bibliata astawan sutʼita entiendenapaj?

⁴ Iskay kaj, rikushasunmanpis jina yuyana. Jehová Diosqa chayta ruwayta atinapaj ruwawarqanchej. Bibliata leeshaspaqa, imaschus kashasqanpi piensarina. Pimantachus leeshanchej, chay runapis kasunman jina yuyana. Imastachus rikushasqanpi tʼukurina. Llakisqachus kusisqachus kashasqanta reparana. Chay imasta ruwaspaqa, Bibliaj nisqanta astawan sutʼita entiendesun.

5. ¿Imaspitaj tʼukurisunman, chanta imaynatá chayta ruwasunman?

⁵ Kinsa kaj, tʼukurina. Bibliapi leesqanchejpi tʼukurina. Imaynatachus chayman jina ruwanapipis piensarina. Chayta ruwaspaqa, imatachus leesqanchejta aswan sumajta entiendesun. Bibliata leeyqa wasita ruwanapaj materialesta wakichiy jina. Tʼukuriytaj chay materialeswan wasita ruway jina. Leesqanchejpi sumajta tʼukurinapajqa, kay kinsa tapuykunaman kutichisunman: “Leerishani chay versiculosmanta runa, ¿imatataj ruwarqa llakiykunasninta atipananpaj? ¿Imaynatá Jehová payta yanaparqa? ¿Imaynatá kay yachakusqay llakiyniypi yanapawanman?”.

6. ¿Imaraykutaj Bibliapi yachakusqanchejman jina ruwananchej tiyan?

⁶ Tawa kaj, yachakusqanchejman jina ruwana. Jesús nisqanman jina, yachakusqanta mana ruwaj runaqa, tʼiyu patapi wasita ruwakoj runaman rijchʼakun. Chay runaj wasenqa, sinchʼi wayras chayri paras jamojtin urmapunpacha. Tiemponta, qolqenta gastasqantaj qhasillapaj (Mat. 7:24-27). Ajinallataj noqanchejwanpis kanman. Yachakusqanchejman jina mana ruwasunman chayqa, qhasillapaj kanman orakusqanchej, rikushasunmanpis jina leesqanchej, tʼukurisqanchejpis. Imajtinchus problemas jamuwajtinchej chayri qhatiykachasqa kajtinchej, mana sinchʼita sayayta atisunmanchu. Jinapis Bibliapi yachakusqanchejman jina ruwasun chayqa, aswan sumajta imatapis ruwasun, sonqo tiyasqataj kasun. Creeyninchejpis aswan sinchʼi kanqa (Isa. 48:17, 18). Kaykamaqa Bibliata estudianapaj tawa imasta yachakunchej. Qhepan parrafospitaj chayman jina Davidpa kausayninmanta yachakusun.

7. ¿Pejpa kausayninmantataj yachakusun?

⁷ ¿Mayqen amigonchejpis chayri familianchejpis sonqonchejta nanachiwarqanchejchu? Jina kajtin, rey Davidpa kausaynin mayta yanapawasunman. Paytaqa wawan Absalón wasancharqa, gobiernontataj qhechuyta munarqa (2 Sam. 15:5-14, 31; 18:6-14).

8. ¿Imatataj Jehovaman willakusunman, chanta imatá mañakusunman?

⁸ Ñaupaj kaj, Diosmanta mañakuna. Davidpa kausayninmanta leerishaspa, Jehovaman sutʼita willakuna wajkuna sonqonchejta nanachiwasqanchejrayku imaynachus kashasqanchejta (Sal. 6:6-9). Chantá chay llakiyta aguantanapaj, ima yuyaychayllatapis tarinapaj yanapanawanchejta mañakuna.

9. ¿Imastataj Absalón ruwarqa?

⁹ Iskay kaj, rikushasunmanpis jina yuyana. Davidpa kausayninmanta leeshaspa, imaynachus kashasqanpi piensarina. Paypa wawan  Absalonqa watasta israelitaspa sonqonkuta suwarqa (2 Sam. 15:7). Tatanpa contranpi oqharikunanpaj wakichisqaña kajtintaj, tukuy Israel ayllusman kachaswan willacherqa reyña kasqanta. Absalonqa Ahitofelpa sonqontapis suwarqa, payman kutisqa kananpaj. Ahitofelqa Davidpa sumaj amigon, umachajnintaj karqa. Absalonqa rey kaytawan, tatanta wañuchinanpaj qhatiykacharqa. Davidtaj ichá chaypacha sinchʼi onqosqa kasharqa (Sal. 41:1-9). Ajinapi wawan wañuchiyta munasqanta willarqanku. Chayrayku Davidqa Jerusalenmanta ayqekorqa. Aswan qhepaman Absalonpa soldadosnin, Davidpa soldadosninwan maqanakorqanku. Chaypitaj Davidpa soldadosnin atiparqanku, Absalontataj wañucherqanku.

10. ¿Imastataj David ruwayta atinman karqa?

¹⁰ Davidpa munasqa wawan Absalonwan, amigon Ahitofelwan contranpi oqharikojtinku, imaynachus David kashasqanpi piensarina. Paykunaqa Davidpa sonqonta mayta nanacherqanku, wañuchiytapis munarqanku. Davidqa amigosninmanta niyta atinman karqa: “Ichá paypis Absalonman kutisqa kashan”, nispa. Niñataj paykunapi atienekunmanchu karqa. Chayrí payllapi piensaspa, sapallan ayqekuyta munanman karqa. Manachayrí llakiyninwan atipachikuspa ni imanakuyta atinmanchu karqa. Jinapis chayta ruwananmantaqa, Davidqa llakiyninta aguantarqa. Qhepan parrafopi yachakusun imaynatachus chayta ruwasqanta.

11. ¿Imastá David llakiypi kashaspa ruwarqa?

¹¹ Kinsa kaj, tʼukurina. ¿Imastataj Davidmanta yachakusunman? Kay tapuypi piensarina: “¿Imastá David llakiypi kashaspa ruwarqa?”. Davidqa mana mancharikorqachu, nitaj mana yuyaychakuspalla imatapis ruwarqachu. Nillataj llakiyninwan atipachikuspa pachanpi qhepakorqachu. Astawanpis Jehová Diosmanta, amigosninmantawan yanapata mañakorqa. Chantá imatachus ruwananta yuyaychakusqanman jina ruwarqa. Davidqa manchay sonqo nanasqa kaspapis, mana phiñakorqachu, nitaj yuyarqachu tukuynin amigosnin wasanchajkuna kasqankuta. Astawanpis Jehovapi, amigosninpipis atienekullarqapuni.

12. ¿Imaynatá Jehová Davidta yanaparqa?

¹² ¿Imaynatá Jehová Dios Davidta yanaparqa? Davidpa kausayninta astawan estudiaspa, Jehovapuni payta yanapasqanta yachanchej. Jehovaqa Davidman kallpata qorqa llakiyninta aguantananpaj (Sal. 3:1-8, qallariyninpi qhelqasqa ima). Chantapis Davidta bendicerqa, yuyaychakusqanman jina ruwananpaj. Jehovaqa Davidpa amigosnintapis, Absalonpa soldadosninta atipanankupaj yanaparqa.

13. Pipis sonqonchejta nanachiwajtinchej, ¿imaynatá David jina ruwasunman? (Mateo 18:15-17).

¹³ Tawa kaj, yachakusqanchejman jina ruwana. Piensarina imaynatachus David jina ruwananchejpi. Ima problematapis chay rato allinchanapaj kallpachakuna. Pillapis sonqonchejta nanachiwanchej chayqa, imatachus Jesús Mateo 18 capitulopi nisqanman jina ruwasunman (Mateo 18:15-17 leey). Jinapis ama imatapis phiñasqa kashaspa ruwanachu. Astawanpis Jehovamanta mañakuna sonqonchejta tiyaykuchinanta. Chantá problemanchejta allinchanapaj yachayta mañakuna. Amigosninchejpipis atienekunallapuni, yanapanawanchejtataj saqekuna (Pro. 17:17). Astawanqa imatachus Jehová Palabranpi niwasqanchejta ruwana (Pro. 3:5, 6).

14. ¿Maykʼajtaj yanapawasunman 2 Timoteo 1:12-16; 4:6-11, 17-22?

¹⁴ Ichapis Jehovata sirvisqanchejrayku, familiasninchej churanakuwanchej. Chayrí suyunchejmanta gobierno mana Jehovata yupaychajta saqewanchejchu, chayri wakin imasllata  ruwajta saqewanchej. Jina kajtin, imatachus apóstol Pablo carcelpi kashaspa qhelqasqan, mayta yanapawasunman. Chay qhelqasqanqa kay versiculospi kashan: 2 Timoteo 1:12-16; 4:6-11, 17-22. *

15. ¿Imastá Jehovaman willakusunman, chanta imatá mañakusunman?

¹⁵ Ñaupaj kaj, Diosmanta mañakuna. Pabloj qhelqasqanta niraj leeshaspa, Jehovaman llakiyninchejta willakuna. Imaynachus kashasqanchejtapis sutʼita nina. Chantá Jehovamanta mañakuna, Pabloj qhelqasqanpi sumaj yuyaychaykunata rikuchinawanchejta. Ajinamanta imatachus ruwananchejta yachasun.

16. ¿Ima llakiypitaj Pablo kasharqa?

¹⁶ Iskay kaj, rikushasunmanpis jina yuyana. Pablopis kasunman jina yuyana. Payqa Romapi carcelpi cadenaswan watasqa kasharqa. Aswan ñaupajtaña carcelpi kajtinpis, chay kutipeqa wañuchinallankutaña suyakusharqa. Wakin amigosninpis payta saqerparerqanku. Chantapis Pabloqa niña kallpanpichu kasharqa (2 Tim. 1:15).

17. ¿Imatataj Pablo niyta atinman karqa?

¹⁷ Pabloqa mana nerqachu: “Kayta chayri jaqayta ruwayman karqa chayqa, nichá carcelpi kashaymanchu karqa”, nispa. Payqa manallataj Asiamanta hermanos saqerparisqankumanta phiñakorqachu. Nillataj yuyarqachu waj amigosninpis kikillantaj kasqankuta. Astawanpis amigosninpi, Jehová bendecinanpi ima atienekullarqapuni. Imaraykuchus chayta ruwasqanta qhepan parrafopi yachakusun.

18. ¿Imatataj Pablo ruwarqa llakiypi kashaspa?

¹⁸ Kinsa kaj, tʼukurina. Kay tapuyman kutichina: “¿Imatá Pablo ruwarqa llakiypi kashaspa?”. Pabloqa wañuchinankuta yachaspapis, Jehová Diosta jatunchayta ñaupajman churarqa. Chantapis wajkunata kallpachaypi piensarqa. Pabloqa Jehovapi atienekusqanrayku, paymanta kutin kutita mañakorqa (2 Tim. 1:3). Chantá saqerparej amigosninpi yuyananmantaqa, payta yanaparej amigosninman tukuy sonqo agradecekorqa. Chantapis Pabloqa Diospa Palabranta estudiallarqapuni (2 Tim. 3:16, 17; 4:13). Jehovawan Jesuswan payta munakusqankumantapis, mana iskayrayarqachu. Payqa yacharqa, Jehovawan Jesuswan mana saqerparinankuta, tʼinkantataj qonankuta.

19. ¿Imaynatá Jehová Pablota yanaparqa?

¹⁹ Jehovaqa ñaupajmantaña Pabloman willarqa, cristiano kasqanrayku qhatiykachasqa kananta (Hech. 21:11-13). ¿Imaynatá Jehová Pablota yanaparqa? Payqa Pabloj mañakuyninta uyarerqa, kallpacharqataj (2 Tim. 4:17). Pabloqa tʼinkanta japʼinanpaj, Diospaj sinchʼita llankʼarqa. Chayta japʼinanmantataj mana iskayrayarqachu. Jehová Diostaj, Pablota amigosninwan yanapacherqa.

20. Romanos 8:38, 39 imatachus nisqanpi piensarispa, ¿imaynatá Pablo jina ruwasunman?

²⁰ Tawa kaj, yachakusqanchejman jina ruwana. Imaynatachus Pablo jina ruwananchejpi piensarina. Noqanchejpis pay jinallataj mana qonqananchejchu tiyan, creeyninchejrayku qhatiykachasqa kananchejta (Mar. 10:29, 30). Ajina llakiypi kashaspa sinchʼita sayanapajqa, Jehovamanta yanapata mañakunallapuni, Palabrantapis estudianallapuni, Jehová Diosta jatunchaytataj ñaupajman churana. Payqa ni jaykʼaj saqerpariwasunchu. Munakuyninmantaqa ni imapis, nitaj pipis tʼaqawasunchu. Chayta ni jaykʼaj qonqananchejchu tiyan (Romanos 8:38, 39 leey; Heb. 13:5, 6).

21. ¿Pikunamanta yachakuytaj hermana Ayata, Hectortawan yanaparqa?

²¹ Imayna llakiyniyoj kajtinchejpis, Diospa  kamachisninmanta yachakoyqa mayta kallpachawasunman. Japonmanta Aya sutiyoj precursora nin: “Noqaqa carritowan predicayta mayta manchachikoj kani. Jinapis Jonaspa kausayninmanta leereyqa, niña manchachikunaypaj yanapawarqa”, nispa. Indonesiamanta Hector sutiyoj joventaj nin: “Tatasneyqa mana testigoschu kanku. Rutpa kausayninmanta yachakoyqa, Jehovata sirviyta munanaypaj yanapawarqa”, nispa.

22. ¿Imatataj ruwananchej tiyan Diospa kamachisninpa kausayninkuwan sumajta yanapachikunanchejpaj?

²² ¿Ima yanapastaj kapuwanchej Diospa kamachisninmanta yachakunapaj? Kapuwanchej videos, Bibliamanta dramas, Creeyninkumanta yachakunachej nisqa libropis. * Chay yanapasqa, Bibliapi parlakusqan runasmanta sumajta sutʼinchariwanchej. Jinapis niraj chaykunamanta yachakushaspa, Jehovamanta mañakuna yanapanawanchejpaj jina yuyaychaykunata tarinapaj. Chantapis pimantachus yachakushanchej, chay runapis kasunman jina piensarina. Imatachus ruwasqanpi tʼukurina. Chantá imaynatachus Jehová llakiyninta aguantananpaj yanapasqanpi piensarina. Chaymantataj yachakusqanchejman jina ruwana. Jehová yanapanta qowasqanchejmantapis agradecekuna. Chaytataj ruwasunman wajkunata kallpacharispa, yanaparispa ima.

23. Isaías 41:10, 13 nisqanman jina, ¿imatataj Jehová Dios niwanchej?

²³ Kay mundoqa Satanaspa makinpi kashan. Chayrayku kausayqa, manchay llakiy. Wakin kutistaj llakiykunaqa atipayta munawanchej (2 Tim. 3:1). Jinapis mana anchata llakikunanchejchu tiyan, nitaj manchikunanchejchu tiyan. Jehovaqa yachan ima llakiykunasniyojchus kashasqanchejta. Chantapis payqa paña wakinwan japʼinawanchejta niwanchej (Isaías 41:10, 13 leey). Chayrayku mana iskayrayanchejchu Jehová yanapanawanchejmanta. Payqa llakiykunasninchejta aguantanapaj Palabrannejta kallpachawanchej.