1, 2. ¿Pikunataj estudiosta yanapankuman bautismoman chayanankupaj?

FIYI suyumanta hermana Amy nin: “Estudiashajtiy, Bibliamanta yachakoyqa mayta gustawaj. Yacharqani chay yachachiwasqankoqa, cheqapuni kasqanta. Jinapis hermanoswan masichakusparaj kausayniyta cambiarqani, bautizakorqanitaj”, nispa. ¿Imatá chaymanta yachakusunman? Tukuy hermanos yanapakojtinku, estudiosqa bautismoman chayayta atisqankuta.

² Congregación wiñananpajqa, tukuy yanapakuyta atinchej (Efe. 4:16). Vanuatu suyumanta Leilani sutiyoj precursora nin: “Runasqa niyta yachanku: ‘Uj wawata uywanapajqa, rancho entero yanapakun’, nispa. Bibliamanta yachakojkunawanpis kikillantaj kasqanta niyman. Uj runa bautismoman chayananpajqa, tukuynin congregación yanapakun”, nispa. ¿Imaynatá rancho entero yanapakun uj wawa sumajta wiñananpaj? Uj wawataqa, tatan, maman, tatasninpa rejsisqasnin, profesoresnin ima kallpacharinku, yachachinkutaj. Ajinamanta chay wawaqa sumajta wiñakun. Ajinallataj Bibliamanta yachakojkunawanpis. Congregacionpeqa tukuyninchej estudiosta yuyaycharisunman, kallpacharisunman, allin kausayninchejwantaj yachachisunman. Chayta ruwaspaqa, estudiosta bautismoman chayanankupaj yanapasun (Pro. 15:22).

3. ¿Imatá kinsa hermanospa nisqankumanta yachakunchej?

³ Uj runaman Bibliamanta yachachishanchej chay, ¿imaraykutaj waj hermanoswan yanapachikunanchejpuni tiyan? Moldavia suyumanta Ana sutiyoj precursora especial nin: “Estudiosninchej ñaupariyta qallarejtinku, mana sapallanchejmanta allinta yanapariyta atisunmanchu”, nispa. Chay suyullamantataj Dorín sutiyoj precursor especial nin: “Wakin hermanospa nisqankoqa, estudiosniypa sonqonkuman chayan. Noqaqa mana piensallarqanipischu  chayta niytaqa”, nispa. Leilanipis nin: “Hermanos estudiosta munakuywan parlapayajtinku, paykunawan kʼachas kajtinku ima, estudiosqa Diospa llajtanpuni kasqanchejta reparanku”, nispa (Juan 13:35).

4. ¿Imastataj kay yachaqanapi yachakusun?

⁴ Ichapis ninchej: “Noqaypataqa mana estudiosniy kapuwanchu, ¿imaynatá estudiosta ñauparinankupaj yanapaymanri?”, nispa. Jinapis tukuyninchej Bibliamanta yachakojkunata yanapariyta atinchej. Chayrayku kay yachaqanapeqa, uj hermanota estudionman compañarispa imatachus ruwanata yachakusun. Chantá yachakusun, imaynatachus reunionesman jamoj estudiosta yanaparinata. Yachakullasuntaj imaynatachus ancianos, estudiosta bautismoman chayanankupaj yanaparinankuta.

5. ¿Imapajtaj uj hermanota estudionman compañarinchej?

⁵ Uj estudiotaqa, yachachejninpuni Bibliata entienderichinan tiyan. Chayrayku uj hermanota estudionman compañaspaqa, mana paypa cuentanmanta yachachejchu rinchej, manaqa yanaparillaj rinchej (Ecl. 4:9, 10). ¿Imaynatá compañanchej chay hermanota sumajta yanaparisunman? Chayta qhepan parrafospi yachakusun.

6. Proverbios 20:18 nisqanman jina, ¿imatataj ruwananchej tiyan uj hermanota estudionman compañanapaj?

⁶ Sumajta wakichikuna. Uj hermanota chayri hermanata estudionman compañasun chayqa, estudionmanta tumpata willarinawanchejta nina (Proverbios 20:18 leey). Yachachej hermanota tapurisunman: “¿Imaynataj estudioyki? ¿Imamantataj paywan estudianayki kashan? ¿Imatataj astawan sutʼita entiendenanta munanki? ¿Imata ninaytaj chayri imata ruwanaytaj mana allinchu kanman? ¿Imaynatá estudioykita ñauparinanpaj yanapayman?”, nispa. Chay imasta yachaspaqa, compañanchej chay hermanota sumajta yanapayta atisun. Jinapis payqa, mana tukuy imitatapunichu estudionmanta willanawanchej tiyan. Joy sutiyoj misionera nin: “Compañawanku chay hermanasmanqa, estudiosniymanta tumpata willariytapuni yachani. Ajinamanta paykunaqa, estudiosniyta astawan yanapariyta munanku. Chantapis imaynatachus yanaparinankuta yachankuña”.

7. ¿Imajtintaj pitapis estudionman compañanapaj wakichikunapuni tiyan?

⁷ Pillatapis estudionman compañasun chayqa, imatachus yachachenqa chayta sumajta wakichikuna (Esd. 7:10). Hermano Dorinmanta parlarerqanchejña. Pay nin: “Compañawan chay hermano sumajta wakichikojtenqa, sumajta yanapawan. Chayrayku mayta kusikuni, ajina hermanos compañawajtinku”,  nispa. Yachachejpis, compañajpis sumajta wakichikojtinkoqa, estudiosqa sutʼita reparanku. Chantá paykunapis kikinta ruwayta munanku. Chayrayku pitapis estudionman compañasun chayqa, imatachus yachachenqa chayta, sumajta wakichikuna. Mana allinsituta wakichikuyta atispataj, imatachus yachachenqa chayta, tumpallatapis yachananchej tiyan.

8. ¿Imatá ruwasunman mañakuyninchej estudiota yanaparinanpaj?

⁸ Pimanpis Bibliamanta yachachinapajqa, Jehovaj bendicionninta mañakunchejpuni. Chayrayku pitapis estudionman compañasun chayqa, ñaupajmanta piensarina imatachus mañakushaspa ninanchejta. Ajinamanta estudiota yanapanapaj jina mañakusun (Sal. 141:2). Japonmanta hermananchej Hanae nin: “Yachachejniywan jamoj hermanaj mañakuyninta yuyarikunipuni. Payqa mañakushaspa, Jehovawan sumaj amigonwan jinapuni parlarej. Noqapis pay jinallataj mañakuyta munarqani. Payqa mañakushaspa sutiyta oqharejpuni. Chaypi munakuwasqanta repararqani”.

9. Santiago 1:19 nisqanman jina, ¿imatataj ruwananchej tiyan yachachejta sumajta yanaparinapaj?

⁹ Yachachejta yanaparina. Nigeriamanta Omamuyovbi sutiyoj precursora especial nin: “Compañeranchej yachachisqanchejta sumajta uyarin chayqa, estudiota yanapananpaj jinapuni imatapis yaparin. Chantapis mana ashkhatachu parlaykun. Imaraykuchus yachan, estudiachej hermanapuni estudionta yachachinan kasqanta”, nispa. Pitapis estudionman compañanchej chay, ¿imaynatá yachasunman ima ratochus yanaparinata? (Pro. 25:11). Chaypajqa estudionman yachachishajtin, sumajta uyarina (Santiago 1:19 leey). Ajinallamanta sumajta yanapariyta atisun. Jinapis niraj imata nishaspa, sumajta piensarinanchej tiyan. Mana allinchu kanman ashkhata parlaykunanchej. Nillataj allinchu kanman hermano yachachishajtin pantachinanchej, chayri estudioman waj imasmanta parlaykunanchej. Chanta, ¿imaynatá yanapakusunman? Uj kikinchaywan sutʼincharisunman, tapuykunata ruwasunman chayri pisi palabrasllawan imitatapis nisunman. Ajinamanta estudiota sumajta entiendenanpaj yanaparisun. Jinapis wakenqa ichá ninchej: “Mana ajinata yanapanaypaj sirvinichu”, nispa. Chaywanpis estudiosta kallpacharispa, paykunawan kʼacha kaspa ima, mayta paykunata yanapasunman.

10. ¿Imaynatataj estudiosta experiencianchejwan yanapasunman?

¹⁰ Estudiosman experiencianchejta willarina. Paykunaman willarisunman: imaynapichus Bibliata estudiayta qallarisqanchejta, imaynatachus uj llakiyta atipasqanchejta, chayri imaynatachus Jehová kausayninchejpi yanapawasqanchejta (Sal. 78:4, 7). Chay willarisqanchejqa, yachakojpa creeyninta kallpachanman, bautizakuyta munananpajtaj yanapanman.  Chantapis llakiyninta imaynatachus atipananta yachananpaj yanapanman (1 Ped. 5:9). Brasilmanta Gabriel sutiyoj precursor nin: “Estudio kashajtiy, hermanospa experienciankoqa mayta yanapawarqa. Paykunaj kausayninkuta yachaspa, repararqani Jehová llakiykunasninchejta yachasqanta. Chayrayku nej kani: ‘Paykuna llakiyninkuta atipanku chayqa, noqapis atillaymantajʼ, nispa”.

11, 12. ¿Imaraykutaj reunionman jamoj estudiosta saludarinanchejpuni tiyan?

¹¹ Uj estudio bautismoman chayananpajqa, reunionesman jamunanpuni tiyan, chaypi yachakusqanman jinataj kausanan tiyan (Heb. 10:24, 25). Chayrayku uj estudio reunionman jamojtenqa, jamunallanpajpuni kallpacharisunman. Qhepan parrafospi, imaynatachus chayta ruwanata yachakusun.

¹² Allin jamusqa kasqankuta nina (Rom. 15:7). Uj estudio salonman jamojtin sumajta saludarisun chayqa, ichapis reunionesman jamuyta munallanqapuni. Chayrayku reunionman jamojtenqa, mana manchachispalla sumajta saludarina, wajkunamanpis rejsirichina. Ama yuyanachu yachachejnillan chayta ruwanan kasqanta. Ichapis yachachejnenqa, manaraj reunionman chayamunchu, chayri congregacionpi ruwanasninta atiendeshan. Chantapis imatachus estudios willawasqanchejta sumajta uyarina, yanaparinataj. ¿Imaraykutaj chayta ruwananchej tiyan? Imatachus hermano Dimitri nisqanta qhawarina. Payqa manaraj unaychu bautizasqa kashan, jinapis siervo ministerialña. Pay nin: “Ñaupaj kutipi reunionman rispa, salón punkupi mancha manchalla sayakusharqani. Chayllapi uj hermano salonman pusaykuwarqa. Yaykojtiykama tukuy hermanos sumajta saludariwarqanku. Chayta rikuspa maytapuni tʼukorqani. Chayrayku ‘sapa diallapis chay jina tantakuykuna kanman’ nispa nerqani. Ni maypi chayta rikorqanichu”.

13. ¿Imaynatataj kausayninchej estudiosta yanapanman?

¹³ Kausayninchejwan yanapana. Estudiosqa Bibliaj nisqanman jina kausakusqanchejta rikuspa, cheqa religionpuni kasqanchejta reparanqanku (Mat. 5:16). Moldaviamanta Vitali sutiyoj precursor nin: “Estudio kashaspa, rikorqani testigosqa Bibliaj nisqanman jinapuni kausasqankuta, yuyasqankuta ima. Chaypi yacharqani, paykunapuni cheqa religión kasqankuta”.

14. ¿Imaynatá estudiosta kausayninchejwan yanapasunman?

¹⁴ Estudiosqa bautizakunankupaj, Bibliaj nisqanman jina kausakunanku tiyan. Chaytaj wakin kutis mana atikullanchu. Jinapis paykunapuni Biblia kausayninchejpi yanapawasqanchejta rikonqanku chayqa, paykunapis kikinta ruwayta munanqanku (1 Cor. 11:1). Hermananchej Hanaemanta watejmanta parlarina. Pay  nin: “Hermanosqa Bibliamanta yachakusqayman jinapuni kausakusharqanku. Paykunaqa wajkunata kallpacharej kanku, perdonaj kanku, munakojtaj kanku. Chantapis wajkunamanta allintapuni parlaj kanku. Noqapis paykuna jina kayta munarqani”.

15. Proverbios 27:17 nisqanman jina, ¿imaraykutaj reunionesman jamoj estudiospa amigosninku kana?

¹⁵ Amigosninku kana. Bibliamanta yachakojkuna reunionesman jamusqankuman jina, paykunata yanapanallapuni (Fili. 2:4). ¿Imaynatá chayta ruwasunman? Paykunata astawan rejsinapaj kallpachakusunman. Kausayninkupi imatapis cambianku chayqa, allinta ruwasqankuta nisunman. Chantapis tapurisunman familiankumanta, trabajonkumanta, Bibliata estudiaspa imaynachus rishasqanmanta ima. Jinapis ama pʼenqachinapaj jina imatapis tapuykunachu. Estudioswan parlarinapaj kallpachakusun chayqa, paykunaj amigonkuman tukusun. Ajinamantataj bautizakuyta munanankupaj yanapasun (Proverbios 27:17 leey). Hermananchej Hanaemanta watejmanta parlarina. Payqa kunan precursora regular kashan. Pay nin: “Noqaqa reunionesman riyta qallarisqaymantapacha, hermanoswan hermanaswan amigosta ruwakorqani. Chayrayku reunionesman mana faltakuyta munajchu kani. Saykʼusqa kaspapis rejpuni kani. Hermanoswan hermanaswan parlarikoyqa, mayta gustawaj. Mana testigo amigosniytapis niña faltacharqanichu. Jehovata, hermanosta, hermanastapis astawan munakusqayrayku bautizakorqani”.

16. ¿Imatataj ruwasunman estudios ñauparinallankupajpuni?

¹⁶ Bibliamanta yachakojkuna ñauparisqankuman jina, paykunata hermanosninchejñapis kankuman jinata qhawana. Chayta ruwasunman, paykunata wasinchejman wajyarikuspa (Heb. 13:2). Moldaviamanta Denís sutiyoj hermano nin: “Estudiosllaraj kashajtiyku, hermanosqa noqata, señoraytawan wasinkuman wajyarikuwaj kayku. Chaypitaj imaynatachus Jehová paykunata yanapasqanta willariwaj kayku. Chayqa mayta kallpachawarqayku. Noqaykupis paykuna jina kausakuyta munarqayku. Chayrayku Jehová Diosman chimpapuyta munarqayku”, nispa. Chantá uj estudio predicaj llojsiyta qallarejtin, paywan predicaj llojsisunman. Brasilmanta hermano Diego nin: “Predicayta qallarishajtiy, hermanosqa ujtaj ujtaj noqawan predicaj kanku. Chaypi paykunata astawan rejserqani, maytataj yachakorqani. Jehová Diosta, Jesustapis astawan munakorqani”.

17. ¿Imaynatá ancianos estudiosta yanaparinkuman?

¹⁷ Bibliamanta yachakojkunapaj tiempochakuychej. Ancianos, estudioswan munakuywan parlarejtiykichej, paykunawantaj kʼachas kajtiykichej, bautizakuyta munanankupaj yanapankichej. Chayrayku reunionespi paykunawan  parlarinaykichejpaj tiempochakuychejpuni. Comentayta qallarejtinkutaj, sutinkumanta parlariychej. Chantapis allin kanman, hermanosta, hermanastapis estudionkuman compañanaykichej. Chayta ruwankichej chayqa, estudiosta mayta yanapankichej. Nigeria suyumanta Jackie sutiyoj precursora nin: “Ancianosqa estudiosniyman compañawankupuni. Ashkha estudiostaj chayta rikuspa tʼukunku. Ujnin estudioy niwarqa: ‘Pastorneyqa ni jaykʼaj chayta ruwanmanchu. Payqa qhapajkunallata visitarin, pagajtillankutaj’, nispa”. Kunanqa chay estudio reunionesman rishanña.

18. ¿Imaynatataj ancianos Hechos 20:28 nisqanta juntʼankuman?

¹⁸ Hermanosta yachachiychej, sumajta ruwasqankutataj niychej. Ancianos, qankunaqa hermanosta, hermanastapis yanapanaykichej tiyan, sumajta predicanankupaj, sumajta yachachinankupaj ima (Hechos 20:28 leey). Chayrayku allin kanman estudiosninkuman compañanaykichej. Sichus paykuna ñaupaqeykichejpi yachachiyta manchachikunku chayqa, qankuna chay kutipi yacharichinaykichejta niychej. Jackiemanta parlarerqanchejña. Pay nin: “Ancianosqa estudiosniymanta tapuriytapuni yachawanku. Uj estudioyta imitallapipis mana yanapariyta atishanichu chayqa, paykunaqa sumajta yuyaychariwanku”, nispa. Ancianosqa hermanosta, hermanastapis sumajta kallpacharinkuman estudiosman yachachinallankupajpuni (1 Tes. 5:11). Jackie nillanpuni: “Ancianos kallpachariwasqankoqa, mayta kusichiwan. Paykunaqa allinta ruwashasqayta niwankupuni. Palabrasninkoqa qʼoñi diapi qhasa yakitu jina. Ancianos kallpachariwasqankoqa, allinta ruwashasqayta reparachiwan. Chayrayku estudiosniyman kusiywan yachachillanipuni” (Pro. 25:25).

19. ¿Imatataj tukuyninchej ruwayta atinchej?

¹⁹ Mana estudiosniyojchu kanchej chaypis, estudiosta bautismoman chayanankupaj yanapasunman. Pitapis estudionman compañaspaqa, yanaparinapaj ñaupajsitumanta sumajta wakichikuna. Jinapis mana anchata parlaykunachu tiyan. Estudios reunionesman jamojtinkutaj, paykunawan kʼachas kana, kausayninchejwantaj yacharichina. Ancianos, qankunapis estudiosta kallpachanaykichejpaj tiempochakuychej. Chantapis hermanosta, hermanastapis estudiosninkuman yachachinankupaj yanapariychej, allinta ruwashasqankutataj niychej. Yachakunchej jina, tukuyninchejpuni estudiosta imaynallamantapis yanapariyta atinchej. Paykuna Tatanchej Jehovata munakojtinku, payta sirvejtinkutaj, mayta kusikunchej.