1. Mateo 24:9 nisqanman jina, ¿imajtintaj runas chejnikuwasqanchejmanta mana tʼukunchejchu?

JEHOVÁ DIOSQA munakunapaj, wajkuna munakunawanchejpaj ima ruwawarqanchej. Chayrayku pipis chejnikuwajtinchejqa, llakikunchej, wakin kutistaj mancharikunchej. Europamanta hermana Gloria * nin: “14 watasniyoj kashajtiy, mamayqa Jehovata sirvisqayrayku chejnikuwarqa. Chayrayku mayta llakikorqani, sapallay kashasqaytataj yuyarqani. Piensarqani mana allin wawachu kasqayta”, nispa. Hermano Danylopis nin: “Soldadosqa testigo kasqayrayku maqawarqanku, tukuy imasta niwarqanku, kʼumuykachachiwarqankutaj. Chayta ruwawajtinku mancharikorqani, llakikorqanitaj”, nispa. Runas ajinata ruwawajtinchej, mayta sonqonchej nanawanchej. Jinapis mana chaymanta tʼukunchejchu. Jesusqa nerqaña runas chejnikunawanchejta (Mateo 24:9 leey).

2, 3. ¿Imaraykutaj runas chejnikuwanchej?

² Jesús nerqa jina, yachachisqasnenqa “mana kay mundomanta runas jinachu” kanchej. Chayrayku chejnisqa kanchej (Juan 15:17-19). Noqanchejqa Jehovallata yupaychanchej. Chayrayku gobiernosta respetaspapis, mana diosta jinachu qhawanchej. Nillataj banderata, escudota chayri chayman rijchʼakoj imasta jatunchanchejchu. Chantapis Jehovalla kamachinanpaj derechoyoj kasqanta ninchej. Satanaswan mirayninwantajrí, mana ajinatachu yuyanku (Gén. 3:1-5, 15). Chantapis runasman willamunchej, Diospa Gobiernollan allin kausayta apamunanta, mana kasukojkunatataj chinkachinanta (Dan. 2:44; Apo. 19:19-21). Chay willayqa llampʼu sonqo runasta kusichin, sajra runastataj phiñachin (Sal. 37:10, 11).

³ Runasqa chejnikullawanchejtaj, Diospa kamachiykunasninta  kasukusqanchejrayku. Paykunaqa Jehovaj kamachiykunasninta mana allinpajchu qhawanku. Astawanpis khuchichakuyta, chayman rijchʼakoj millay imastapis allillanpaj qhawanku. Jehová Diosqa chay imasta ruwasqankurayku Sodoma, Gomorra llajtasta chinkacherqa (Jud. 7). Noqanchejpis chay millay imasta juchapaj qhawanchej. Chayrayku runasqa asipayawanchej, noqanchejpajtaj sajrata rimanku (1 Ped. 4:3, 4).

4. ¿Imatá ruwasunman runas chejnikuwajtinchej?

⁴ ¿Imatá ruwasunman runas chejnikuwajtinchej, imaymanasta niwajtinchej ima? Jehová Dios yanapanawanchejpi tukuy sonqo creena. Chayta ruwaspaqa, aguantayta atillasun. Creeyninchejqa “uj jatun jarkʼakuna escudo jina”. Chaytaj “Kuraj Supaypa laurashaj tukuy flechasninta thasnuyta” atin (Efe. 6:16). Chaywanpis mana sinchʼi creeyniyojllachu kananchej tiyan, manaqa munakuyniyoj kananchej tiyan. Munakuyniyoj kaspaqa, ‘mana usqhayllata phiñakusunchu’, tukuy imatataj aguantasun (1 Cor. 13:4-7, 13). Chayrayku qhepan parrafospi yachakusun, imaynatachus Jehovata, hermanosninchejta, enemigosninchejtapis munakuy yanapawasqanchejta.

5. ¿Imatá Jesús Jehovata munakusqanrayku ruwarqa?

⁵ Jesusqa wañuchinankupaj uj chʼisi faltashajtin, discipulosninman nerqa: “Tatayta munaku[ni]. Chayrayku imaynatachus Tatay kamachiwarqa ruwanayta, ajinata ruwashani”, nispa (Juan 14:31). Jesusqa Jehovata munakusqanrayku, tukuy imata aguantarqa. Noqanchejpis Jehovata munakuspa, llakiykunata aguantayta atisunman.

6. Romanos 5:3-5 nisqanman jina, ¿imaynataj kanchej kay mundomanta runas chejnikuwajtinchej?

⁶ ¿Imajtintaj Jehovaj kamachisnin qhatiykachasqa kaspapis payta sirvillankupuni? Payta munakusqankurayku. Jesuspa apostolesninmanta parlarina. Judiospa Jatun Juntankumanta kajkunaqa, paykunaman kamacherqanku niña predicanankuta. Apostolestajrí nerqanku: “Noqaykoqa Diostapuni kamachejniykuta jina kasunayku tiyan runasta kasunaykumantaqa”, nispa (Hech. 5:29; 1 Juan 5:3). Kay tiempopipis, gobiernosqa may chhika hermanosninchejta qhatiykachashanku, ñakʼarichishanku ima. Jinapis paykunaqa, Jehovata munakusqankurayku sirvishallankupuni. Tukuy cristianostaj ajina kanchej. Runas chejnikuwajtinchej llakisqa kanamantaqa, kusisqa kanchej (Hech. 5:41; Romanos 5:3-5 leey).

7. ¿Imatá ruwasunman familianchej chejnikuwajtinchej?

⁷ Jehovata sirviyta munasqanchejrayku, ichapis familianchej chejnikuwasun. Chaytaj mayta llakichiwasunman. Familianchejqa Bibliata testigoswan estudiasqanchejrayku, ichá niwasun engañachikushasqanchejta, chayri niña yuyayninchejpichu kashasqanchejta (Marcos 3:21, kikinchay). Chantapis ichá kʼumuykachachiwasun, chayri imatapis ruwawasun. Chaymantataj mana tʼukunanchejchu tiyan. Imajtinchus Jesús nerqa: “Runaj enemigosnenqa kikin wasillanmantataj kanqanku”, nispa (Mat. 10:36). ¿Chaywan nisharqachu familiasninchej chejnikuwajtinchej, noqanchejpis paykunata chejnikunanchej kasqanta? Mana. Astawanpis Jehovata munakusqanchej yapakusqanman jina, runastapis astawan munakunallanchejtaj tiyan (Mat. 22:37-39). Jinapis Diostapuni ñaupajta kasukunanchej tiyan, runasta kasunamantaqa.

8, 9. ¿Imataj Gloriata yanaparqa aguantananpaj?

⁸ Hermana Gloriamanta watejmanta parlarina. Payqa maman churanakojtinpis, Jehovata sirvishallanpuni. Pay nin: “Mamaywan khuska Bibliata estudiayta qallarerqayku. Jinapis sojta killanman reunionesman riyta munajtiy, churanakuyta qallariwarqa. Mamayqa Diospa llajtanta wasanchajkunawan parlakushasqa. Paykunaj yachachisqankuta creespa, testigosmanta  sajrata parlaj. Chantapis tukuy imasta niwaj, chujchaymanta japʼiwaj, kunkaymanta qʼallpiwaj, publicacionesniytapis wijchʼupuwaj. Jinapis 15 watasniyoj bautizakorqani. Mamaytaj nipuni testigo kanayta munarqachu. Chayrayku maypichus maleante jovenesta internanku, chayman internaykamuwarqa. Familianchej munakunawanchej, cuidanawanchej kashajtin, chayta ruwawajtinchejqa mayta llakikunchej”.

⁹ ¿Imataj Gloriata yanaparqa aguantananpaj? Pay nin: “Mamay churanakuyta qallariwarqa, chay diapuni Bibliata leeyta tukorqani. Chayrayku sutʼita yacharqani cheqa religionta tarisqayta, Jehová mayta munakuwasqantapis. Sapa kuti Diosmanta mañakoj kani, paytaj uyariwajpuni. Maleantespaj internadonkupi kashajtiy, uj hermana wasinman invitawarqa, Bibliatataj estudiaj kayku. Hermanosqa reunionespipis mayta kallpachawaj kanku, familiankuta jinapuni qhawawarqanku. Runasqa chejnikuspa imatapis ruwawasunman. Jinapis Jehovaqa paykunamanta aswan atiyniyoj”.

10. ¿Imatataj Jehová Dios ruwanqapuni?

¹⁰ Apóstol Pablo nerqa: ‘Mana imapis tʼaqayta atiwasunmanchu Diospa munakuyninmantaqa. Chay munakuytaqa Dios rikuchin Señorninchej Cristo Jesusnejta’, nispa (Rom. 8:38, 39). Uj tiempota sufrejtinchejpis, Jehovaqa ni jaykʼaj saqerpariwasunchu. Payqa sonqochawasun, kallpachawasuntaj. Hermana Gloriaj kausayninpi rikunchej jinataj, Jehovaqa hermanosnejta yanapayta atiwanchej.

11. 1) Juan 15:12, 13 versiculospi, ¿imatataj Jesús yachachisqasninman kamacherqa? 2) ¿Imaynatá Jesuspa kamachisqan yachachisqasninta yanaparqa?

¹¹ Jesusqa wañuchinanku qayllata yachachisqasninman nerqa: “Purajmanta munanakuychej”, nispa (Juan 15:12, 13 leey). Jesús chayta nerqa, yachachisqasnin ujchasqallapuni kanankupaj, runas chejnikojtinkutaj sinchʼita sayanankupaj. Tesalónica llajtapi hermanosmanta parlarina. Chay hermanosqa, qallariymantapacha qhatiykachasqa karqanku. Jinapis paykunaqa sinchʼita sayarqanku, purajmantataj munanakorqanku (1 Tes. 1:3, 6, 7). Chayta ruwajtinkupis, Pabloqa paykunaman nerqa: “Hermanosníy, mañakuyku astawanraj munakuypi wiñanaykichejta”, nispa (1 Tes. 4:9, 10). Ajinata munanakuspaqa, llakisqa kajkunata sonqochankuman karqa, llauchʼiyajkunatapis yanapankuman karqa (1 Tes. 5:14). Tesalonicamanta hermanosqa, Pabloj nisqanta kasukorqanku. Chayta yachanchej, imatachus  Pablo paykunaman qhelqasqanpi. Pay qhelqarqa: “Tukuyniykichej purajmanta munanakusqaykichejpis, astawan wiñashan”, nispa (2 Tes. 1:3-5). Tesalonicamanta cristianosqa, llakiypi kaspapis, qhatiykachasqa kaspapis, purajmanta munanakusqankurayku Jehovata sirvillarqankupuni.

12. Uj suyupi guerra kashajtin, ¿imatataj hermanos ruwarqanku purajmanta munanakusqankurayku?

¹² Hermano Danylomanta watejmanta parlarina. Suyunpi guerra kajtinpis, payqa señoranwan khuska reunionesman rillarqapuni. Chantapis tukuy atisqankuta predicarqanku, necesitaj hermanosmanpis mikhunitankumanta qorerqanku. Jinallapi uj día wasinman soldados chayasqanku. Danylo nin: “Soldados niwarqanku: ‘¡Mañana testigo kanaykita niy, sinoqa wañuchisqayku!’, nispa. ‘Mana’ nejtiytaj, maqawarqanku. Chantá mancharichinawankupaj, umay patata balasta pasacherqanku. Niraj ripushaspataj kutimuspa warmiyta abusanankuta niwarqanku. Hermanosqa chayta yachaspa, chay rato waj llajtaman trenpi kachapuwarqayku. Ni jaykʼaj qonqasajchu hermanos chay jina munakuywan yanapawasqaykumanta. Chay llajtaman chayajtiyku, hermanosqa mikhunitata qoriwarqayku, trabajota, wasitapis maskʼaysiwarqayku. Chay llajtitapi tiyakuspataj noqaykupis, guerramanta ayqekamoj hermanosta yanapayta aterqayku”. ¿Imatá Danyloj kausaynin rikuchiwanchej? Hermanosninchejwan munanakojtinchejqa, llakiykunata aguantayta atisqanchejta.

13. ¿Imaynatataj Diospa atiynin yanapawanchej pillapis chejnikuwajtinchej?

¹³ Jesusqa yachachisqasninman nerqa, enemigosninkuta munakunankuta (Mat. 5:44, 45). Chayta ruwaytaj mana atikullanchu. Jinapis Diospa atiyninpa yanapayninwanqa, enemigosninchejta munakuyta atisunman. Diospa atiynenqa yanapawanchej, munakuyniyoj, pacienciayoj, llampʼu sonqoyoj, kʼacha kanapaj ima. Munayninchejwan mana atipachikunapajpis yanapallawanchejtaj (Gál. 5:22, 23). Ajina kaspaqa, familianchej chayri runas chejnikuwajtinchejpis Jehovata sirvillasunpuni. Ashkha runas testigo warminku, qosanku, wawanku chayri vecinonku Bibliaj nisqanman jina kausakusqanrayku, niña testigosta chejnikunkuchu. Wakintaj kunanqa hermanosninchej kanku. Chayrayku chejnikuwanchej chay runasta mana munakuyta atillanchejchu chayqa, Jehovaj atiyninta mañakuna (Luc. 11:13).  Chantapis ama qonqanachu, Jehovaj nisqanta ruwayqa allinninchejpajpuni (Pro. 3:5-7).

14, 15. ¿Imaynatá Romanos 12:17-21 hermananchej Yasminta yanaparqa?

¹⁴ Hermana Yasminmanta parlarina. Qosanqa yuyarqa testigos umanta muyuchishasqankuta. Chayrayku mana testigo kananta munarqachu. Chantapis imaymanasta nispa kʼumuykachachej, familianta tʼaqanachishasqantataj nej. Mana chayllachu, qosanqa hermananchej Yasminta kʼamichinanpaj familiaresninta, uj iglesiapi kamachejta, uj layqata ima minkʼakusqa. Uj pachapis, salonman rispa hermanosta imaymanasta qhapariykamusqa. Hermana Yasminqa, qosan chay tukuy imasta ruwasqanmanta sapa kuti waqaj.

¹⁵ Jinapis reunionesman rillajpuni. Chaypitaj hermanosqa sonqocharej, kallpacharejtaj kanku. Ancianospis hermanaman nisqanku, Romanos 12:17-21 (leey) nisqanman jina ruwananta. Yasmin nin: “Bibliaj nisqanta kasukoyqa, mana atikullarqachu. Jinapis Jehovaj yanapanta mañakuytawan, chayman jina ruwanaypaj kallpachakorqani. Chayrayku qosay jallpʼata cocinaman jichʼarpajtinpis, chʼinsitumanta picharqani. Imaymanasta niwajtinpis, mana kutichikojchu kani. Onqoykojtinpis atiendej kani”.

16, 17. ¿Imatataj Yasminmanta yachakusunman?

¹⁶ Hermananchej Yasminqa, qosan sufrichejtinpis payta munakullarqapuni, ashkha bendicionestataj japʼerqa. Pay nin: “Qosayqa ni jaykʼaj llullakusqayta yachasqanrayku, manaña noqamanta desconfiarqachu. Religionmanta parlajtiypis respetowan uyariwaj. ‘Allinyakapuna’ nejtiytaj, ‘ya’ niwarqa. Kunanqa payña reunionesmanpis kachawan. Allinta familia jina kausakuyku. Noqawan khuska Jehovata sirvinallantaña suyakushani”.

¹⁷ Hermana Yasminpa kausaynenqa, munakuyniyoj kananchej kasqanta rikuchiwanchej. Imaraykuchus ‘munakuyniyoj runaqa tukuy imata aguantan, tukuy imata suyan, tukuy imapi sinchʼita sayan’ (1 Cor. 13:4, 7). Pikunachus chejnikuwanchej chaykunata munakuspaqa, Jehová Diosta kusichisun. Chantapis chayta ruwajtinchej, ichapis paykunaqa niña chejnikuwasunchu. Mana jina kajtinpis, kusisqa kayta atisunman. Qhepan parrafospi yachakusun, imaraykuchus chayta nisqanchejta.

18. ¿Imajtintaj runas chejnikuwajtinchej kusisqa kanchej?

¹⁸ Jesús nerqa: “Kusisqa kankichej noqarayku runas chejnisojtiykichej”, nispa (Luc. 6:22).  Mana runaswan chejnichikuyta munanchejchu, nitaj runas qhatiykachanawanchejmanta wañurishanchejchu. Chanta, ¿imaraykutaj runas chejnikuwajtinchej kusisqa kanchej? Kinsa imasrayku. Ñaupaj kaj, runas chejnikuwasqanchejta aguantaspaqa, Jehová Diosninchejta kusichinchej (1 Ped. 4:13, 14). Iskay kaj, creeyninchej sinchʼiyan, aswan valorniyojmantaj tukun (1 Ped. 1:7). Kinsa kaj, wiñay kausayta japʼisun (Rom. 2:6, 7).

19. ¿Imaraykutaj apóstoles jasutʼisqa kaspapis kusisqa kasharqanku?

¹⁹ Jesús kausarimusqanmanta pisi tiemponman, apostolesqa runas chejnikojtinkupis kusisqa karqanku. Judiospa Jatun Juntanmanta kajkunaqa, paykunata jasutʼicherqanku, niña Jesusmanta parlanankutataj kamacherqanku. Jinapis apostolesqa “kusisqa riporqanku, Jesuspa sutinrayku ñakʼarisqankumanta” (Hech. 5:40-42). Paykunaqa Jesusta mayta munakusqankurayku, mana enemigosninkuta manchachikorqankuchu. Chantapis sumaj willaykunata “mana saykʼuspa” willallarqankupuni. Kunanpis may chhika hermanos, llakiypi kaspapis sinchʼita sayashanku. Paykunaqa sutʼita yachanku, Jehovaqa imatachus ruwasqankuta, sutinta munakusqankutapis ni jaykʼaj qonqananta (Heb. 6:10).

20. ¿Imamantataj qhepan yachaqanapi parlarisun?

²⁰ Kay sajra mundoj tukukuynin chayamunankama, runasqa chejnikullawasunpuni (Juan 15:19). Jinapis ama manchachikunachu. Jehovaqa payta tukuy sonqo sirvejtinchej, ‘kallpachawasun, jarkʼawasuntaj’. Chaymantataj qhepan yachaqanapi parlarisun (2 Tes. 3:3). Chayrayku Jehovata, hermanosninchejta, enemigosninchejtapis munakunallapuni. Chayta ruwasun chayqa, sinchʼi creeyniyoj kasunchej, hermanosninchejwan ujchasqa kasunchej, Jehová Diostataj jatunchasunchej. Chantapis munakuyniyoj kaspaqa, runas chejnikuwajtinchejpis sinchʼita sayallasunpuni.