1. ¿Imatataj jovenesmanta nisunman?

CRISTIANO jóvenes, qankunaqa congregacionpi ashkhata yanapakuyta atiwajchej. Joven kasqaykichejrayku kallpaykichejpi kashankichej (Pro. 20:29). Chayrayku hermanosta, hermanastapis mayta yanapayta atiwajchej. Ichapis qankunaqa, mayta siervos ministeriales kayta munashankichej. Jinapis hermanosqa, ichá wawata jinallapuni qhawasunkichej. Chayrí manaraj chay llankʼayta japʼinaykichejpaj jinachu kasqaykichejta yuyanku. Jina kajtin, ama llakikuychejchu. Qankunaqa hermanospa respetonkuta ganakuyta atiwajchej.

2. ¿Imatataj kay yachaqanapi yachakusun?

² Kay yachaqanapeqa, rey Davidmanta, Asamanta, Josafatmantawan parlarisunchej. Asawan Josafatwanqa Judapi reyes karqanku. Chay kinsa reyesmanta parlarishaspaqa, qhawarisunchej ima problemasniyojchus kasqankuta, imatachus ruwasqankuta ima. Chantá yachakusun, imatachus jóvenes paykunamanta yachakuyta atisqankuta.

3. ¿Imaynatataj jóvenes kuraj hermanitosta yanapankuman?

³ Davidqa jovencitollaraj kashaspa, ashkha imasta ruwayta yachakorqa. Payqa Jehovata sumaj amigonpaj qhawarqa. Chantapis arpata tocayta yachakorqa. Chay yachasqanwantaj, Diospa churasqan rey Saulta yanaparqa (1 Sam. 16:16, 23). Jóvenes, ichá qankunapis imallatapis sumajta ruwayta  yachankichej. Jina kajtin, chaywan hermanosta yanapaychej. Tabletta, celularta chayri computadorata sumajta apaykachayta yachanki chayqa, kuraj hermanitosta yacharichiy. Ajinamanta chaypi Bibliata estudiakunankupaj, reunionespaj wakichikunankupaj ima. Chayta ruwanki chayqa, paykunaqa mayta agradecekusonqanku.

4. ¿Imatataj jóvenes Davidmanta yachakunkuman? (Kay revistaj tapanpi dibujota qhawariy).

⁴ Davidqa imatapis kʼuchisitu ruwaj, confianzataj karqa. Payqa jovencitollaraj kashaspa, tatanpa ovejasninta sumajta michej. Wakin kutisqa, chayta ruwananrayku kausaynintapis wañuy pataman churaj. Payllataj rey Saulman nerqa: “Noqa kamachiykeqa tataypa ovejasninta michishajtiy, sichus león, chayrí jukumaripis jamuspa ovejasta apakapusharqa chayqa, qhepanta rispa, siminmantaña ovejitata qhechoj kani”, nispa (1 Sam. 17:34, 35). Davidqa ovejitasta sumajta qhawanan kasqanta yacharqa. Chayrayku phiña animaleswanpis mana manchachikuspa maqanakorqa. Jóvenes, qankunapis David jina kaychej. Ima ruwanatapis japʼispaqa, kʼuchi kʼuchilla ruwaychej.

5. Proverbios 3:32 nisqanman jina, ¿imatataj jóvenes ruwananku tiyan?

⁵ Davidqa jovencitomantapacha Jehová Diospa sumaj amigon karqa. Chaytaj wapu kasqanmanta chayri arpata sumajta tocayta yachasqanmanta, aswan sumaj karqa. Davidqa mana Jehovata Diosninta jinallachu qhawarqa, manaqa sumaj amigonta jina (Proverbios 3:32 leey). Jóvenes, qankunapis Jehovawan sumaj amigos kanaykichejpaj kallpachakuychej. Chayta ruwankichej chayqa, congregacionpi astawan ruwanasta japʼiyta atinkichej.

6. ¿Imatataj wakin runas Davidmanta yuyarqanku?

⁶ Wakin runasqa, Davidta ni imata yachaj lloqallituta jina qhawarqanku. Goliatwan maqanakoj riyta munajtin, rey Saulqa payman nerqa: “Mana riyta atiwajchu chay filisteowan maqanakoj. Qanqa waynallaraj kanki”, nispa (1 Sam. 17:31-33). Niraj chay kashajtintaj, hermanonpis qhella lloqallata jina qhawarqa (1 Sam. 17:26-30). Jinapis Jehová Diosqa, mana ajinatachu Davidmanta yuyarqa. Payqa Davidta sumajta rejserqa. Davidtaj amigon Jehovapi atienekusqanrayku Goliatta atiparqa (1 Sam. 17:45, 48-51).

7. ¿Imatataj jóvenes Davidmanta yachakunkuman?

 ⁷ Jóvenes, ¿imatataj Davidmanta yachakuwajchej? Pacienciayoj kayta. Pikunachus wawamantapacha rejsisunkichej chaykunaqa, mana wiñarqosqaykichejtawanchu kuraj runata jina qhawasonqachej. Jinapis Jehová Diosqa, mana paykuna jinachu qhawasunkichej. Payqa sumajta rejsisunkichej, yachantaj imastachus ruwayta atisqaykichejta (1 Sam. 16:7). ¿Imatawan Davidmanta yachakuwajchej? Jehovawan sumaj amigos kanaykichejpaj kallpachakuychej. Davidqa Diospa ruwasqasninpi sumajta tʼukurej. Ajinamanta Jehovata astawan rejserqa, astawantaj munakorqa (Sal. 8:3, 4; 139:14; Rom. 1:20). Chantapis David jina Jehovamanta kallpata mañakuychej. Ichapis escuelamanta chayri colegiomanta compañerosniykichej, testigo kasqaykichejrayku asipayasunkichej. Jina kajtin, aguantanaykichejpaj Jehovamanta yanapata mañakuychej. Chantapis Bibliapi, publicacionespi, videospi ima yachakusqaykichejman jina ruwaychej. Imaynatachus Jehová yanapasusqaykichejta rikuspaqa, astawan paypi atienekunkichej. Chayta rikuspataj, wajkunapis allinpaj qhawasonqachej.

8, 9. 1) ¿Imatataj David ruwarqa rey jina kamachiyta suyakushaspa? 2) ¿Imatá jóvenes Davidmanta yachakunkuman?

⁸ Davidpa kausayninmanta parlarinallapuni. Payqa rey kananpaj ajllasqa karqa. Jinapis ashkha watasninmanraj Judapi rey jina kamachiyta qallarerqa (1 Sam. 16:13; 2 Sam. 2:3, 4). Davidqa “maykʼajrajchus rey kasajpis” nispa llakikunman karqa. Jinapis ajinata yuyananmantaqa, imatachus ruwayta atisqanta ruwarqa. Davidqa filisteospa jallpʼankuman ayqekuspa, ashkha kutispi israelitaspa enemigosninkuwan maqanakorqa. Ajinamanta Judaj atiyninpi jallpʼasta mana wajkuna japʼikapunankupaj yanapakorqa (1 Sam. 27:1-12).

⁹ ¿Imatataj jóvenes Davidmanta yachakunkuman? Hermanosta tukuy atisqankuta yanapayta. Hermano Ricardomanta * parlarina. Payqa jovencitomantapacha mayta precursor regular kayta munarqa. Ancianostaj manaraj wakichisqachu kasqanta nerqanku. Jinapis payqa mana phiñakorqachu, nitaj nerqachu: “Ni jaykʼaj precursor kayta atisajchu”, nispa. Astawanpis tukuy atisqanta predicarqa, runasmanpis astawan yachacherqa. Ricardo nin: “Precursor kanaypaj ashkhatarajpuni yachakunay karqa. Chayrayku mayta kallpachakorqani predicacionpi uyariwajkunaman kutinaypaj. Paykunaman yachachej rinaypaj, sumajta wakichikoj kani. Uj estudiotapis tarerqani. Tukuy chaykunaqa mayta yanapawarqa”, nispa. Kunanqa Ricardoqa sumaj precursor, siervo ministerialtaj kashan.

10. ¿Imatataj David ruwarqa niraj enemigosninta qhatiykushaspa?

¹⁰ Imapichus David waj kutipi rikukusqanmanta parlarina. Davidwan soldadosninwanqa, Saulmanta ayqeykachakuspa kausashajtinku, uj maqanakuman rerqanku. Chaykamataj enemigosninkoqa, familiasninkuta, tukuy kapuyninkutawan apakaporqanku. Davidqa sumaj maqanakoj soldado kasqanrayku, soldadosninwan chay rato paykunata qhatiykunman karqa. Jinapis chayta ruwananmantaqa, Jehovaj yanapayninta maskʼarqa. Davidqa sacerdote Abiatarnejta Jehovata taporqa: “Chay suwa runasta qhatiykuymanchu?”, nispa. Jehová Diostaj kuticherqa: “Qhatiykullay, taripankiraj, chay presostapis qhechukapunki”, nispa (1 Sam. 30:7-10).

11. ¿Imatataj jóvenes ruwankuman niraj imatapis ruwashaspa?

¹¹ Jóvenes, ¿imatataj Davidpa ruwasqanmanta yachakuwajchej? Imata ruwanaykichejpajpis,  tataykichejta mamaykichejta tapurikuychejpuni. Experienciayoj ancianospis mayta yanapasunkichejman. Jehovaqa paykunata “regalosta jina” congregacionpi churan (Efe. 4:8). Payqa ancianospi atienekun. Qankunapis paykunapi atienekullawajchejtaj. Creeyninkumanta yachakuychej, yuyaychasqankutapis japʼikuychej. Rey Asamantapis mayta yachakuwajchej. Qhepan parrafospi paymanta parlarisun.

12. ¿Imaynataj Asa karqa kamachiyta qallarishajtin?

¹² Rey Asaqa, joven kashaspa kʼumuykukoj sonqo, waputaj karqa. Payqa tatan Abías wañupusqantawan, Judapi rey jina kamachiyta qallarerqa. Kamachiyta qallarisqantawantaj, llulla yupaychayta chinkacherqa. Chantapis Asaqa, tukuy “Judá aylluta ñawpa tatasninkoj Señorninku Tata Diosman chimpanankuta kamacherqa, jinataj leyesninta, kamachisqasnintapis juntʼanankuta” (2 Cró. 14:1-7). Chantá Etiopiamanta Zera uj millón soldadoswan maqanakoj jamojtin, Asaqa Jehovamanta yanapata mañakorqa. Pay nerqa: “Tata Dios, kallpayoj kajtapis, pisi kallpayoj kajtapis yanapayta atinki. Chayrayku yanapariwayku Señorniyku Tata Dios, qampi suyakusqaykurayku”, nispa. Chay palabrasqa, Jehovapi mayta atienekusqanta rikuchiwanchej. Asaqa sutʼita yacharqa, Jehovaqa payta, llajtantapis salvayta atisqanta. Jehová Diostaj “Asata, Judatawan yanaparqa etiopespa contrankuta maqanakupi atipanankupaj” (2 Cró. 14:8-12).

13. ¿Imatataj rey Asa ruwarqa, chanta imapitaj rikukorqa?

¹³ Uj millón soldadoswan maqanakoyqa, manchachikunapaj jinapuni karqa. Rey Asataj, Jehovapi atienekusqanrayku chay maqanakupi atiparqa. Jinapis aswan qhepaman waj problemapi kaspa, mana Jehová Diospi atienekorqachu. Chaypacha Israelmanta sajra rey Baasaqa, paywan maqanakuyta munarqa. Asataj siriosmanta yanapata mañakamorqa. Chay ruwasqantaj manapuni allinchu karqa. Jehovaqa profeta Hananinejta payman nerqa: “Siriaj reynimpa soldadosnin makiykimanta lluspʼinku, imaraykuchus Siriaj reynimpi atienekorqanki Señorniyki Tata Diospi atienekunaykimantaqa”, nispa. Jinapunitaj karqa. Chaymanta qhepaman, rey Asaqa tukuy tiempo maqanaku chʼajwapi karqa (2 Cró. 16:7, 9; 1 Rey. 15:32).

14. 1) ¿Imaynatá jóvenes Jehovapi atienekusqankuta rikuchinkuman? 2) Kay 1 Timoteo 4:12 nisqanman jina, ¿imaynatá hermanos Jehovapi atienekoj jovenesta qhawanku?

 ¹⁴ Jóvenes, ¿imatataj rey Asamanta yachakuwajchej? Kʼumuykukoj sonqo kayta, Jehovapi atienekuyta ima. Bautizakushaspaqa Jehovapi creesqaykichejta rikucherqankichej, paypitaj atienekorqankichej. Jehová Diostaj familianpi kusiywan japʼikusorqachej. Jinapis kunanqa, Jehovapi atienekunallaykichejpuni tiyan. Kausayninchejpi jatun imasta ruwananchej kajtin, Jehovapi atienekuyta atillanchej. Jinapis ichá wakin imaspeqa, Jehovamanta qonqakapunchej. Chayrayku jóvenes, imata ruwanaykichejpajpis Jehovaj yanapantapuni maskʼaychej. Chayta ruwaychej imawanchus kusirikuyta ajllashaspa, trabajota maskʼashaspa, imatachus kausayniykichejwan ruwaypi piensashaspa ima. Ama yachaynillaykichejpi atienekuychejchu. Astawanpis Bibliaj yuyaychaykunasninta maskʼaychej, chayman jinataj ruwaychej (Pro. 3:5, 6). Chayta ruwaspaqa Jehová Diosta kusichinkichej. Congregacionmanta hermanospis sumajpaj qhawasonqachej (1 Timoteo 4:12 leey).

15. Kay 2 Crónicas 18:1-3; 19:2 nisqanman jina, ¿imasta ruwaspataj Josafat pantarqa?

¹⁵ Jóvenes, qankunapis tukuy runas jinallataj juchasapas kasqaykichejrayku, wakin kutisqa pantankichej. Jinapis tukuy atisqaykichejta Jehovata sirviwajchej. Rey Josafatmanta parlarina. Payqa manchay kʼacha runa karqa. Joven kashaspa, ‘tatanpa Diosninta maskʼarqa, kamachisqasnintapis juntʼarqa’. Chantapis kuraj kamachisninta tukuynin Judá llajtasman kacharqa, Jehová Diosmanta yachachimunankupaj (2 Cró. 17:4, 7). Jinapis Josafatqa wakin kutis pantarqa. Chayrayku Jehovaj kamachisninwan kʼamichikorqa (2 Crónicas 18:1-3; 19:2 leey).

16. ¿Imatataj jóvenes hermano Rajeevmanta yachakunkuman?

¹⁶ Jóvenes, ¿imatataj Josafatmanta yachakuwajchej? Pipis yuyaycharisojtiykichej, tukuy sonqo japʼikuychej. Ichapis ashkha jóvenes jinallataj, mana yachankichejchu imatachus kausayniykichejpi ñaupajman churanaykichejta. Jina kajtin, hermano Rajeevpa kausaynin mayta yanapasunkichejman. Pay nin: “Jovencito kashaspa, mana yacharqanichu imatachus kausayniywan ruwanayta. Ashkha jóvenes  jina pujllayllata, kusirikuyllata munaj kani. Nitaj reunionesman, ni predicacionmanpis riyta munajchu kani”, nispa. ¿Imataj Rajeevta yanaparqa? Pay nillanpuni: “Jinallapi uj anciano yuyaychariwarqa. Payqa 1 Timoteo 4:8 versiculopi tʼukurichiwarqa”, nispa. Rajeevqa imatachus anciano nisqanta tukuy sonqo japʼikorqa, piensarerqataj imatachus kausayninwan ruwananpi. Rajeev nin: “Chaymantapacha Jehová Diosta kausayniypi ñaupajman churarqani. Chay anciano yuyaychariwasqanmanta watasninmantaj, siervo ministerial karqani”.

17. ¿Imaynatá hermanos Jehovata sumajta sirvej jovenesta qhawanku?

¹⁷ Tukuy hermanos, Jehovata sumajta sirvej jovenesta may allinpaj qhawanku (Sof. 3:9). Jóvenes, ima ruwanatapis tukuy sonqo, kʼuchisitullataj ruwajtiykichej, hermanosqa mayta munakusonqachej, allinpajtaj qhawasonqachej (1 Juan 2:14).

18. Proverbios 27:11 nisqanman jina, ¿imaynataj Jehová kanqa jóvenes payta tukuy sonqo sirvejtinku?

¹⁸ Jóvenes, Jehová Diosqa qankunapi atienekun, maytataj munakusunkichej. Payqa nerqaña, tukukuy tiempopi ashkha jóvenes paypaj tukuy sonqo llankʼanankuta (Sal. 110:1-3). Jehovaqa yachan payta munakusqaykichejta, tukuy atisqaykichejtataj sirvishasqaykichejta. Chayrayku wajkuna wawata jinallapuni qhawasojtiykichejpis, ama paykunapaj phiñakuychejchu. Ama apurayllata ima ruwanatapis congregacionpi japʼiyta munaychejchu. Imapi pantaspataj, Jehovaj kʼamiyninta tukuy sonqo japʼikuychej (Heb. 12:6). Congregacionpi ima ruwanatapis japʼispaqa, kʼuchi kʼuchilla ruwaychej. Jinapis astawanqa, tukuy ima ruwasqaykichejwan Tatanchej Jehovata kusichiychej (Proverbios 27:11 leey).