1. Adanwan Evawan mana kasukusqankurayku, ¿imastaj karqa?

JEHOVÁ DIOSLLA niyta atin imachus allin, imatajchus mana allin kasqanta. Chaywanpis Adanwan Evawanqa, mana Jehovata valecherqankuchu. Chayrayku allin kajta, mana allin kajta yachanamanta sachʼaj poqoyninta mikhuykorqanku. Ajinamanta Jehová Diospa kamachiykunasninta mana kasukorqankuchu, nitaj paypi atienekorqankuchu (Gén. 3:22). Adanwan Evawan Jehovata mana kasukusqankurayku, paymanta karunchakorqanku, nitaj wiñaypaj kausayta aterqankuñachu. Chantapis tukuyninchejman juchatawan wañuytawan herenciata jina saqewanchej (Rom. 5:12). Chayrayku ñakʼariylla tiyan.

2. ¿Imatataj eunuco runa ruwasqa Felipe payman predicajtin?

² Etiopiamanta eunuco runaqa, mana Adán jinachu, nitaj Eva jinachu karqa. Felipe payman predicajtin, eunuco runaqa sumajta uyarerqa. Chantá Jehová Diosman Jesusmanwan agradecekusqanrayku, bautizakorqapacha (Hech. 8:34-38). Noqanchejpis Diosman kausayninchejta qopuspa, chay eunuco runa jina bautizakusunman. Ajinamanta Jehová Diosman, Jesusmanpis agradecesqa kasqanchejta rikuchisun. Rikuchillasuntaj Jehová Diospi atienekusqanchejta, paylla imachus allin, imatajchus mana allin kasqanta niyta atiwasqanchejta ima.

3. 1) Jehová Diosta sirvispa, ¿ima bendicionestataj japʼisunchej? 2) ¿Imatataj qhepan parrafospi yachakusunchej?

³ Jehová Diosta sirvispa, ima bendicionestachus japʼinanchejpi piensarina. Jehová Diosqa imastachus Adanwan Evawan  pierderqanku chayta qowasunchej, wiñay kausaytapis. Chantapis Jesuspi creesqanchejrayku, juchasninchejmanta perdonawasunchej, llimphu sonqoyojtaj kasunchej (Mat. 20:28; Hech. 10:43). Mana chayllachu, bautizakuspaqa Diospa familianmanta kasunchej. Diospis allinpaj qhawawasunchej, sumaj kausaytataj qowasunchej (Juan 10:14-16; Rom. 8:20, 21). Arí, Jehová Diosqa payta sirvejkunaman ashkha bendicionesta qon. Jinapis wakenqa chayta yachaspapis, bautizakuyta manchachikunku. Chayrayku qhepan parrafospi, yachakusunchej imaschus wakinta bautizakunankupaj jarkʼasqanta, imaynatachus chay jarkʼaykunata atipanankutapis.

4. ¿Imatataj Avery nisqa joven manchachikoj?

⁴ Wakenqa mana atinankuta yuyanku. Avery sutiyoj jovenmanta parlarina. Paypa tatasnenqa Jehovaj testigosnin kanku. Tatanqa sumaj tata, congregacionpitaj anciano jina sumajta llankʼan. Chaywanpis Averyqa bautizakuyta manchachikorqa. Pay nin: “Yuyarqani tatayman ni jaykʼaj igualakunayta. Nej kani: ‘¿Imanasajtaj tantakuypi tukuypaj mañakunayta niwajtinku, discursosta qowajtinku, predicacionmanta encargakunayta niwajtinkupis?’. Chay imasta mana atinayta manchachikorqani”, nispa.

5. ¿Imatataj Hannah yuyaj?

⁵ Hannah sutiyoj sipasmanta parlarina. Payqa 18 watasniyoj, ni imapaj sirvisqantataj yuyaj. Testigo familiapi uywasqa kaspapis, Jehová Diospa kamachiykunasninta mana juntʼayta atinanta yuyaj. Wakin kutitaj sinchʼi llakisqa kashaspa, cuerponta nanachikoj. Pay nin: “Ni piman willajchu kani cuerpoyta nanachikusqayta, ni tatasniymanpis. Piensarqanitaj chay jinata ruwakusqayrayku, Jehová Dios ni jaykʼaj munakunawanta”, nispa.

6. ¿Imaraykutaj Vanessa bautizakuyta manchachikusqa?

⁶ Wakenqa amigosninkurayku mana bautizakunkuchu. Vanessamanta parlarina. Payqa 22 watasniyoj. Pay nin: “Sumaj amigay kapuwarqa. Paytaqa chunka watasta jinaña rejserqani. Amigayqa mana bautizakunayta munarqachu. Chaytaj mayta llakichiwaj. Mana piwanpis masichakuyta atillajchu kani. Yuyarqanitaj amigaymanta karunchakuspaqa, niña waj amigata tarinayta”, nispa.

7. ¿Imaraykutaj Makayla bautizakuyta manchachikusqa?

⁷ Wakenqa juchapi urmayta manchachikunku. Makayla sutiyoj sipasmanta parlarina. Pay phishqa watitayoj kashajtin, hermanon congregacionmanta qharqochikusqa. Wiñasqanman jina, Makaylaqa hermanonpa ruwasqan tatasninta mayta llakichisqanta rikorqa.  Pay nin: “Piensaj kani: ‘Bautizakuytawan juchallikusaj chayqa, congregacionmanta qharqowanqanku. Tatasniytaj astawan llakikunkuman’, nispa”.

8. ¿Imaraykutaj Miles bautizakuyta manchachikusqa?

⁸ Wakenqa chejnisqa kayta manchachikunku. Miles sutiyoj jovenmanta parlarina. Tatanwan madrastranwanqa testigos kanku, mamantaj mana. Miles nin: “Mamaywanqa 18 watasta tiyakorqani. Tatay bautizakushajtin, mamayqa mayta phiñakorqa. Chayrayku manchachikorqani ‘bautizakuyta munani’ niyta. Yuyarqani noqatapis mayta sufrichinawanta”, nispa.

9. Jehová Diospa munakuyninmanta, paciencianmantawan astawan yachakuspa, ¿imatá ruwayta munanki?

⁹ Adanwan Evawanqa mana tukuy sonqochu Jehová Diosta munakorqanku. Chayrayku paymanta karunchakorqanku. Chaywanpis Jehová Diosqa, saqerqa wawasniyoj kanankuta, paykunata munasqankuman jina uywanankuta ima. Adanwan Evawan Diosmanta karunchakuspa mana allintachu ruwasqankoqa, pisi tiemponman sutʼi rikukorqa. Imaraykuchus kuraj wawankoqa, sullkʼanta wañurpacherqa. Aswan qhepamantaj runasqa, imaymana juchapi pejtusqa kasharqanku (Gén. 4:8; 6:11-13). Chaywanpis Jehová Diosqa, payta sirviyta munajkunata salvananpaj Wawanta kachamorqa (Juan 6:38-40, 57, 58). Chaypi reparanchej Jehová Dios maytapuni munakuwasqanchejta, pacienciayojtaj kasqanta. Jehová Diospa munakuyninmanta, paciencianmantawan astawan yachakuspaqa, payta astawan munakunki. Nitaj Adanwan Evawan jina kayta munankichu. Astawanqa kausayniykita Diosman qopuyta munanki.

10. ¿Yanapasunkimanchu Salmo 19:7 versiculopi tʼukuriy?

¹⁰ Jehová Diosmanta yachakullaypuni. Jehová Diosmanta astawan yachakuspaqa, payta sirviyta atisqaykita reparanki. Chaymanta parlaspa, Avery nisqa joven nin: “Salmo 19:7 versiculota leerqani, chaypitaj tʼukurerqani. Chaypi yachakorqani Jehová Dios yachayniyojman tukuchiyta atiwasqanta”, nispa (Salmo 19:7 leey). Payqa chay versiculoj nisqan kausayninpi juntʼakusqanta rikuspa,  Jehová Diosta astawan munakorqa. Jehová Diosta munakuspaqa, mana noqallanchejpichu yuyasun, manaqa paypi, munayninpi ima piensasun. Chaymanta parlaspa Hannah nin: “Bibliata leespa, sapallaypi estudiaspataj repararqani noqa kikiy cuerpoyta nanaykuchikuspa, Jehová Diosta llakichishasqayta”, nispa (1 Ped. 5:7). Hannahqa mayta kallpachakorqa Diospa Palabranta kasukunanpaj (Sant. 1:22). Pay nin: “Jehová Diosta kasukuy allinniypaj kasqanta reparaspaqa, payta astawan munakorqani. Kunanqa Jehová Dios yanapanawanmanta mana iskaychakunichu”, nispa. Tiemponman Hannahqa manaña yuyallarqapischu cuerponta nanachikuypi. Astawanpis Jehová Diosman kausayninta qopuspa bautizakorqa.

11. 1) ¿Imatataj Vanessa ruwasqa sumaj amigosniyoj kananpaj? 2) ¿Imatataj ruwawaj Vanessa jina sumaj amigosta tarinaykipaj?

¹¹ Amigosniykita sumajta ajllay. Vanessaqa bautizakunanpaj amigan jarkʼashasqanta reparakorqa. Chayrayku amiganmanta karunchakorqa. Congregacionpitaj amigosta ruwakunanpaj kallpachakorqa. Vanessa nin: “Noej familianpa kausaynin mayta yanapawarqa. Paykunaqa sajra runaspa chaupinkupi kausakorqanku. Chaywanpis paykunapura parlarikuspa kusisqa karqanku”, nispa. Chantá Vanessaqa bautizakorqa, precursora jinataj llankʼayta qallarerqa. Pay nillanpuni: “Precursora kaspaqa congregacionniypi, waj congregacionespipis sumaj amigosta tarerqani”, nispa. Sichus Diospa Gobiernonmanta willanaykipaj kallpachakullankipuni chayqa, Vanessa jina sumaj amigosta tarinki (Mat. 24:14).

12. 1) ¿Adanwan Evawan Jehová Diosta manchachikorqankuchu? 2) ¿Imataj pasasqa Adanwan Evawan Jehová Diospa contranpi oqharikusqankutawan?

¹² Ama runata manchachikuychu. Wakin imasta ruwaytaqa manchachikunapuni. Chaykunamanta ujtaj kashan, Jehová Diospa contranpi imatapis ruway (Sal. 111:10). Sichus Adanwan Evawan Jehová Diosta manchachikunkuman karqa chayqa, payta kasukunkuman karqa. Chaywanpis Diospa contranpi oqharikorqanku. Chayrayku ñawisninku kicharikorqa, juchallikusqankutataj reparakorqanku. Chayta reparakusqankurayku, qʼalaslla kashasqankumanta pʼenqakorqanku,  laqheswantaj maytʼukorqanku. Wawasninkumantaj juchatawan wañuyllatawanña herenciata jina saqerqanku (Gén. 3:7, 21).

13, 14. 1) 1 Pedro 3:21 nisqanman jina, ¿imaraykutaj wañuyta mana manchachikunachu kasqa? 2) ¿Jehová Diosta munakunanchejchu tiyan?

¹³ Jehová Diospa contranpi juchallikuyta manchachikuna tiyan. Chaywanpis wañuytaqa mana manchachikunanchejchu tiyan. Imaraykuchus Jehová Diosqa Wawanta noqanchejrayku qorqa. Ajinamanta wiñay kausayta japʼinanchejpaj. Juchanchejmanta sonqomantapacha pesachikusunchej chayqa, Diosqa perdonawasunchej. Chaypajqa Jesús noqanchejrayku kausayninta qosqanpi creenanchej tiyan. Chaytataj ruwasunman Jehová Diosman kausayninchejta qospa, bautizakuspa ima (1 Pedro 3:21 leey).

¹⁴ Jehová Diostaqa munakunanchejpuni kashan. Payqa mana sumaj imasllatachu sapa día qowanchej, manaqa cheqa kajta, munaynintawan rejsichiwanchej (Juan 8:31, 32). Chantapis Jehová Diosqa congregacionnejta yuyaychawanchej, yanapawanchejtaj. Problemasninchejta aguantanapaj yanapawanchej, niwanchejtaj paraisopi wiñay kausayta qonawanchejta (Sal. 68:19; Apo. 21:3, 4). Rikunchej jina, Jehová Diosqa mayta munakuwanchej. Chaypi tʼukurispaqa, astawan payta munakusunchej, sonqonta nanachiytataj manchachikusunchej.

15. ¿Imataj Makaylata yanapasqa pantayta manaña manchachikunanpaj?

¹⁵ Makaylamanta parlarqanchejña. Payqa Jehová perdonaj Dios kasqanta entiendespa, mana pantaykuyta manchachikorqañachu. Pay nin: “Juchasapas kasqanchejrayku, tukuypuni pantaj kasqanchej. Jinapis Jehová Dios mayta munakuwasqanchejta entienderqani. Jesuspa wañuyninraykutaj perdonawaj kasqanchej”, nispa. Makaylaqa Jehová Diosta munakusqanrayku, payman kausayninta qopuspa bautizakorqa.

16. ¿Imatataj Miles ruwasqa manaña mamanta manchachikunanpaj?

¹⁶ Miles sutiyoj jovenmanta parlarqanchejña. Payqa yuyarqa maman mana bautizakojta saqenanta. Chayrayku congregacionesta waturej hermanowan parlarisqa. Miles nin: “Congregacionesta waturej hermanoqa, noqa jinallataj uywakusqa. Paypa mamanqa nillataj testigochu kasqa. Payqa mamaywan parlarinaypaj yuyaychawarqa. Niwarqa mamayman noqapuni bautizakuyta munasqayta ninayta, nitaj tataychu tanqashawasqanta”, nispa. Miles mamanman “bautizakuyta munani” nisqantawan mamanqa phiñakusqa. Tiemponmantaj Milesqa wasinmanta ripusqa, bautizakusqataj. Chaymanta parlaspa Miles nin: “Jesuspa wañuyninpi tʼukurispaqa, entienderqani Jehová Dios maytapuni munakuwasqanta. Chayta yachaspaqa sonqoy wawayarqa. Chayrayku Diosman kausayniyta qoporqani, bautizakorqanitaj”, nispa.

17. ¿Imatataj tukuypis rikuchiyta atinchej?

¹⁷ Evaqa Edén huertapi sachʼaj poqoyninta mikhuykuspa, Jehová Diosta qhesacharqa. Adantaj chay sachʼaj poqoyninta mikhuykuspa, Jehová Dios tukuy imata payrayku ruwasqanta pisipaj qhawasqanta rikucherqa. Chaywanpis tukuyninchej rikuchiyta atinchej, Adanwan Evawan mana allintachu ruwasqankuta. Bautizakuspaqa rikuchinchej, Jehová Dioslla derechoyoj kasqanta imachus allin, imatajchus mana allin kasqanta ninanpaj. Chantapis rikuchillanchejtaj, payta mayta munakusqanchejta, paypi atienekusqanchejta ima.

18. ¿Imatataj ruwawaj Jehová Diospa munayninta ruwanallaykipajpuni?

¹⁸ Bautizakuytawanqa Diosllapajña kausananchej tiyan, manaña noqanchejpajchu. Wakinkunaqa chayta mana atinankuta piensanku. Jinapis may chhika runas, Diospa munayninta sapa día ruwashanku. Qanpis paykuna jina Diospa munayninta ruwawaj. Chaypajqa Bibliata entiendenaykipaj kallpachakullaypuni, hermanoswanpis masichakuy, Diosmanta yachakusqaykitapis tukuy sonqo wajkunaman willariy (Heb. 10:24, 25). Imata ruwanapajpis Jehová Diospa yuyaychayninta maskʼay. Payqa Palabrannejta, llajtannejta ima yuyaychasonqa (Isa. 30:21). Ajinamanta kausayniykipi allinpuni risonqa (Pro. 16:3, 20).

19. ¿Imatataj yuyarikunanchej kasqa, imaraykutaj?

¹⁹ Jehová Diospa kamachiykunasnin allinniykipaj kasqanta yuyarikullankipuni chayqa, Jehová Diosta astawan munakunki, kamachiykunasnintapis kasukullankipuni. Ajinamanta Satanás imata qoyta munasojtinpis, manapuni Jehová Diosmanta karunchakunkichu. Kaymanta waranqa watasmantaj, jinata ninki: “Walejtapunichá bautizakorqani”, nispa.