1, 2. 1) ¿Jóvenes Satanasta, supaykunatawan atipayta atinkumanchu? (Patapi kaj dibujota qhawariy). 2) ¿Imamantataj qhepan parrafospi parlarisunchej?

APÓSTOL Pabloqa cristianosta soldadoswan kikincharqa. Nerqataj noqanchej uj maqanakupi jina kashasqanchejta. Nillarqataj mana runaswanchu maqanakushasqanchejta, manachayqa Satanaswan, supaykunawan ima. Paykunaqa maqanakuyman unaymantaña yachasqa kanku. Chayrayku ichá manchachikusunman paykunawan maqanakuyta. Jovenestaj ichá astawanraj manchachikunkuman. Chaywanpis jovenesqa, Jehová Diospa yanapayninwan Satanasta, supaykunatawan maqanakupi atipayta atinkuman. May chhika jovenestaj chay maqanakupi atipashankuña. Imajtinchus “Diospa qosqan maqanakuna pʼachata tukuyninta” churakuspa, Satanaspa contranpi sinchʼita sayashanku (Efesios 6:10-12 leey).

² Apóstol Pabloqa maqanakuna pʼachamanta parlashaspa, ichá romano soldadospi yuyasharqa (Hech. 28:16). Chayrayku qhepan parrafospi astawan maqanakuna pʼachamanta parlarisunchej. Ashkha jovenespa experienciasninkumantataj yachakusunchej. Reparasunchej, ima llakiykunapichus chay jóvenes rikukusqankuta. Reparallasuntaj imaynatachus “Diospa qosqan maqanakuna pʼachata  tukuyninta” churakusqankurayku sinchʼita sayashasqankuta.

3, 4. ¿Imajtintaj nisunman cheqa kaj uj chumpi jina kasqanta?

³ (Efesios 6:14 leey). Romano soldadospa chumpinkoqa fierromanta ruwasqa karqa. Chaywantaj ñañu wasankuta matʼita chumpiykukoj kanku, pecherankutataj sujetachej kanku. Chantapis chumpinkupeqa espadankuta, cuchillunkutawan churaj kanku. Chayrayku soldadosqa chumpinkuta matʼita chumpiykukuspa, uj maqanakupi sumajta maqanakoj kanku.

⁴ Cheqa kajta yachakusqanchejqa, uj chumpi jina llulla yachachiykunamanta jarkʼawanchej (Juan 8:31, 32; 1 Juan 4:1). Chayrayku Bibliata astawan entiendesun chayqa, Diospa kamachiykunasninta kasukuyta atillasun, nisunman pecheranchejta churakuyta atillasun (Sal. 111:7, 8; 1 Juan 5:3). Chantapis Bibliata sumajta entiendespaqa, pillapis imapichus creesqanchejmanta tapuwajtinchej mana manchachikuspa kutichiyta atillasun (1 Ped. 3:15).

5. ¿Imajtintaj manapuni llullakunachu kasqa?

⁵ Diosmanta cheqa kajta yachakusqanchejrayku Bibliaj nisqanta kasukunchej, nitaj llullakunchejchu. Satanastaj llullakunanchejta munan. Ashkha runastataj llullakuypi urmachishan. Llullata parlayqa noqanchejpaj mana allinchu, nillataj wajkunapajpis (Juan 8:44). Chayrayku noqanchejqa tukuy tiempo mana llullakuspa parlananchej tiyan, nitaj Bibliamanta yachachishaspallachu. Mana llullakunapajtaj, mayta kallpachakunanchej tiyan juchasapas kasqanchejrayku (Efe. 4:25). Chaywanpis wakin kuteqa, ichá llullakuyta munasunman. Chaymanta parlaspa hermanitanchej Abigailmanta parlarina. * Payqa 18 watasniyoj, nintaj: “A vecesqa, llullakuyta munani mana pʼenqaypi rikhuriyta munaspa chayri mana kʼamichikuyta munaspa. Chaywanpis cheqa kajtapuni parlani Jehová Dios allin ñawiwan qhawanawanpaj, sonqoypis mana juchachanawanpaj. Chayrayku tatasniywan, amigosniywanqa imata nejtiypis creewankupuni”, nispa. Hermananchej Victoriamantañataj parlarina. Payqa 23 watasniyoj, nintaj: “Imatapunichus Biblia yachachisqanta sutʼinchajtinchej, nitaj llullakojtinchejqa, runasqa asikuwasunman. Chaywanpis cheqa kajta parlaspaqa, manaña manchachikusunchu. Astawanqa Jehová Diosman qayllaykusunchej, hermanospis, tatasninchejpis respetawasunchej”, nispa. Reparanchej jina cheqa kajta parlayqa allinninchejpajpuni.

6, 7. ¿Imajtintaj nisunman Jehová Diospa kamachiykunasnin uj pechera jina kasqanta?

⁶ Romano soldadoj pecheranqa, fierromanta karqa. Soldadoj cuerponpaj jinataj ruwasqa karqa. Pecheraj fierrosnenqa qarawan, fierro ganchoswantaj sumaj japʼichisqa karqa. Hombrosnin chaynejpi fierrospis ajina japʼichisqallataj karqa. Uj soldadoqa, pecheranpa fierrosninta lugarninpi japʼinanpaj sapa kuti pecheranta qhawaykurej. Imajtinchus chay fierros mana lugarninpi kajtenqa, mana allinta maqanakojta saqejchu. Chay pecheraqa soldadoj sonqonta, wijsanta ima jarkʼaj ni imawan tʼojsichikunanpaj.

⁷ Jehová Diospa kamachiykunasnenqa, uj pechera jina sonqonchejta sajra imasmanta jarkʼawanchej (Pro. 4:23). Chayrayku kasukunapuni, nitaj munayninchejman jinallachu imatapis ruwana. Imaynatachus uj soldado mana cambianmanchu fierro pecheranta uj lata pecherawan, ajinata. Imajtinchus noqanchejqa, mana Jehová Dios jinachu yachayniyoj kanchej sonqonchejta jarkʼanapaj (Pro. 3:5, 6). Chayrayku sonqonchejpi mana sajra yuyaykuna saphichakunanpajqa, sapa kuti qhawarikunanchej tiyan Diospa kamachiykunasninman jinachus manachus kausakushasqanchejta.

8. ¿Imajtintaj Jehová Diospa kamachiykunasninta kasukunanchejpuni kasqa?

⁸ Wakin jovenesqa, ichá yuyankuman Jehová Diospa kamachiykunasnin uj llasa qʼepi jina kasqanta,  nitaj wakin imasta ruwajta saqesqanta. Chayta astawan entiendenapaj, Danielmanta parlarina. Payqa 21 watasniyoj, nintaj: “Profesoresniywan, compañerosniywanqa mayta asikuwaj kanku mana paykuna jina imatapis ruwasqaymanta. Chayrayku uj tiempota umphuyaporqani, ni imapaj valesqaytataj yuyarqani. Chaywanpis tiemponmanqa, repararqani Jehová Diospa kamachiykunasninman jina kausakoyqa allinniypajpuni kasqanta, sajra imasmantataj jarkʼawasqanta. Imajtinchus wakin compañerosneyqa, drogakuyta qallarerqanku, wakintaj ni colegiotapis tukorqankuchu. Kausayninkoqa may llakiy karqa”, nispa. Madisonmantañataj parlarina. Payqa 15 watasniyoj, nintaj: “Mana Jehová Diospa kamachiykunasninta kasukuyta atillanichu. Astawanqa compañerosniy jinallataj imatapis ruwayta munani. Chayrayku Jehová Diospa kamachiykunasninta kasukunaypaj, Jehovaj testigon kasqayta yuyarikuni. Yuyarikullanitaj compañerosniy jina ruwanaypajqa, Satanás tanqashawasqanta. Chayrayku ima pruebata atipaspapis, sonqo juntʼasqa sientekuni”, nispa.

9, 10. ¿Imatataj jukʼutata jina churakusunman?

⁹ (Efesios 6:15 leey). Romamanta soldadosqa jukʼutanku churasqapuni maqanakuman rej kanku. Chay jukʼutankoqa mana pʼitikullajchu imajtinchus sumaj qarasmanta ruwasqa karqa. Manataj chakisninkuta nanachejchu. Chayrayku soldadosqa mana llustʼaspa purillaj kanku.

¹⁰ Romamanta soldadosqa, jukʼutankuta churakoj kanku maqanakupi sinchʼita sayanankupaj. Noqanchejpis, “allin kawsaymanta” sumaj willaykunata jukʼutata jina churakusunman predicanallapajpuni (Isa. 52:7; Rom. 10:15). Chaywanpis wakin kutisqa, ichá predicayta manchachikusunman. Chayta astawan entiendenapaj Robertomanta parlarina. Payqa 20 watasniyoj, nintaj: “Colegiopeqa compañerosniyman predicayta pʼenqakoj kani. Mana yachanichu imajtinchus pʼenqakusqayta. Pero kunanqa compañerosniyman predicay mayta gustawan”, nispa.

11. ¿Imatataj wakin jóvenes ruwaj kasqanku mana manchachikuspa predicanankupaj?

¹¹ Ashkha cristiano jovenesqa, ninku sumajta wakichikojtinku mana manchachikuspa predicayta atillasqankuta. Kunantaj wakin jovenespa experienciasninkumanta parlarina. Chaytaj yanapawasunchej imaynatachus predicacionpaj wakichikunata. Hermanitanchej Juliamanta parlarina. Payqa 16 watasniyoj, nintaj: “Compañerosniy imasmantachus parlasqankuta uyarispa, imaspitajchus creesqankuta yachaspaqa, imaynatachus yanapanaypi tʼukurini, chantá wakichikuni. Wakichisqaña kaspataj ima publicacionwanchus compañerosniywan parlanayta yachaniña. Chayrayku publicacionesta mochilaypi apaykachanipuni”, nispa. Mariamantañataj parlarina. Payqa 23 watasniyoj, nintaj: “Compañerosniyta kʼachamanta parlapayajtiy, sumajtataj uyarejteyqa, reparayta atini ima llakiykunapichus rikukushasqankuta. Paykunata yanapanaypajtaj, ima yanapaschus jovenespaj tiyan chaykunata sumajta estudiani. Ajinamanta compañerosniyta Bibliawan yanapayta atillani. Wakin kutistaj, nini Internetpi jw.org nisqaman yaykunankuta”, nispa. Predicanapaj sumajta wakichikuspaqa, predicayta atillasun, imaynatachus uj soldado jukʼutanta churaykukuspa enemigonman sinchʼita sayaykoj, ajinata.

12, 13. ¿Imaswantaj Satanás jovenesta laurashaj flechaswan jina urmachiyta munan?

¹² (Efesios 6:16 leey). Romamanta soldadosqa uj jatun jarkʼakuna escudowanpuni maqanakoj kanku. Soldadosqa, chay escudowan casi tukuy cuerponkuta espadasmanta, tʼojsina lanzasmanta, flechasmantawan jarkʼakoj kanku.

¹³ Satanasqa, jovenesta llulla yachachiykunawan laurashaj flechaswan jina urmachiyta munan. Chayrayku wakin jovenesqa pisipaj qhawakunku, yuyankutaj Jehová Dios mana  munakusqanta. Hermananchej Aidamanta parlarina. Payqa 19 watasniyoj, nintaj: “Tantakuykunapeqa mana comentajchu kani. Imajtinchus yuyaj kani comentarioyta ni pi valechinanta. Jinamantataj creeyniy pisiyarqa. Chayrayku wakin kutis yuyaj kani Jehová Diosman mana qayllaykuyta atisqayta. Jinapis kunanqa, tantakuykunapi iskayta chayri kinsa kutillatapis comentanaypaj kallpachakuni. Comentayta manchachikuspapis, comentaspaqa mayta kusikuni. Hermanospis mayta kallpachawanku. Ajinamantataj reparani Jehová Dios mayta munakuwasqanta, creeyniypis astawan wiñasqanta”, nispa.

14. ¿Imatataj Aidaj experiencianmanta yachakusunman?

¹⁴ Uj soldadoj escudonqa pachallanpuni, mana jatunyanchu nitaj juchʼuyyanchu. Chaywanpis Aidaj experiencianmanta yachakusunman, creeyninchej wiñananta chayri pisiyananta. Noqallanchejmanta kashan creeyninchejta wiñachinanchej chayri pisiyachinanchej (Mat. 14:31; 2 Tes. 1:3). Chayrayku creeyninchejta wiñachinallanchejpuni tiyan “uj jatun jarkʼakuna escudo jina” jarkʼanawanchejpaj.

15, 16. Suyakusqanchej salvacionpi yuyay, ¿imamantataj uj montera jina jarkʼawasunman?

¹⁵ (Efesios 6:17 leey). Romamanta soldadosqa umankuman monterata jina churakoj kanku, umankuta, kunkankuta, uyankuta ima jarkʼakunankupaj. Wakin monterasqa japʼinayoj jina karqa, soldados apaykachanankupaj.

¹⁶ Imaynatachus montera uj soldadoj umanta jarkʼaj, ajinallatataj ‘suyakusqanchej salvacionpi’  yuyayqa jarkʼawasunchej mana waj imaspi yuyanapaj (1 Tes. 5:8; Pro. 3:21). Imastachus Jehová Dios tumpamantawan ruwananpi yuyallasunpuni chayqa, mana llakiyninchejwan atipachikusunchu (Sal. 27:1, 14; Hech. 24:15). Chayrayku Jehová Dios sumaj kausayta qonawanchejpi creenanchejpuni tiyan, mana waj imaspi yuyaspa. Ajinamantaqa suyakusqanchej “salvacionta monterata jina” umanchejman churakusunchej, manataj yuyasunchu uj cuentolla kasqanta.

17. ¿Imatataj Satanás kay tiempopi yuyachiwasunman?

¹⁷ Satanasqa suyakusqanchej salvacionta monterata jina mana churakunanchejpaj, waj imaspi yuyachiwasunman. Chayta astawan entiendenapaj Jesusmanta parlarina. Satanasqa yacharqa Jesús rey jina runasta gobernananta. Yachallarqataj Jesús sufrinanta, wañunantataj niraj gobernashajtin. Chantapis yacharqa, Jesús suyakunanraj kasqanta Jehová Dios reyta jina churanankama. Chayrayku Satanasqa, Jesús mana anchata suyakunanpaj, Jesusman nerqa: ‘Sichus qonqoriykukuspa yupaychawanki chayqa, kay tukuynin qanpata kanqa gobernanaykipaj’, nispa (Luc. 4.5-7). Satanasqa yachallantaj Jehová Dios uj sumaj kausayta qonawanchejta. Chay diakamataj suyananchejraj kasqanta. Suyakushaspataj ashkha problemaspi rikukunanchejta. Chayrayku Satanasqa kay tiempopi sumajta kausakuyta atisqanchejta yuyachiwasunman. Payqa munan tukuy imayoj kananchejta, Diospa Gobiernonmantataj qonqapunanchejta (Mat. 6:31-33).

18. ¿Imatataj reparachiwanchej hermananchej Karina nisqan?

¹⁸ Ashkha cristiano jovenesqa, hermananchej Karina jina mana Satanaswan engañachikorqankuchu. Hermananchej Karinaqa 20 watasniyoj, nintaj: “Yachani Diospa Gobiernollan tukuy llakiyninchejta tukuchinanta”, nispa. Jóvenes, Karina nisqanqa, reparachiwanchej kay mundopi tukuy imayoj kayqa pisi tiempollapaj kasqanta. Chayrayku Karinaqa, profesional kananmantaqa, tukuy tiemponta, kallpantawan Jehová Diospaj astawan llankʼananpaj churashan.

19, 20. Diospa Palabranta sumajta rejsinapaj, ¿imatataj wakin jóvenes jina ruwasunman?

¹⁹ Romamanta soldadospa espadasninkoqa, 50 centimetrosniyoj jina karqa. Soldadosqa espadankuta sumajta apaykachaj kanku. Imajtinchus sapa día amañaj kanku.

²⁰ Apóstol Pabloqa, Diospa Palabran uj espada jina kasqanta nerqa. Chaytataj Jehová Dios qowarqanchej. Chaywanpis Diospa Palabrantaqa sumajta rejsinanchej tiyan. Ajinamanta pipis imapichus creesqanchejmanta tapuwajtinchej sumajta sutʼinchanapaj chayri pantasqa yuyaykunasninchejta cheqanchanapaj (2 Cor. 10:4, 5; 2 Tim. 2:15). Diospa Palabranta sumajta rejsinapaj, wakin jovenespa experienciasninkumanta parlarinachej. Sebastianmanta parlarina. Payqa 21 watasniyoj, nintaj: “Jehová Dios jina yuyanaypajqa, Bibliata leeshaspa sapa capitulomanta uj versiculota uj hojapi anotakuni. Gustawasqan versiculosmantataj uj listata ruwakushani”, nispa. Hermanitonchej Danieltaj nin: “Bibliata leeshaspaqa, wakin versiculosta anotakuni predicacionpi runaspaj leeripunaypaj. Reparanitaj runaspaj tukuy sonqo Bibliata leepojtiy, entiendechinaypajtaj kallpachakojteyqa, uyariyta munasqankuta”, nispa.

21. ¿Imajtintaj Satanasta, sajra angelestawan mana manchachikunanchejchu kasqa?

²¹ Ñaupaj parrafospeqa ashkha jovenespa experienciasninkumanta parlarerqanchej. Chay experienciasninkutaj reparachiwanchej Satanasta, supaykunatawan mana manchachikunanchejchu kasqanta. Imajtinchus paykuna atiyniyoj kajtinkupis, Jehová Dioslla aswan atiyniyoj. Tumpamantawantaj Jesús Gobernashajtin Satanaswan, supaykunawanqa presochasqa kanqanku. Waranqa watas juntʼakojtintaj chinkachisqa kanqanku (Apo. 20:1-3, 7-10). Arí, Jehová Diospa yanapayninwanqa Satanaspa contranpi sinchʼita sayaykusunman. Imajtinchus yachanchej Satanás ima mañasniyojchus kasqanta, jinallataj imatachus ruwayta munawasqanchejtapis.