1, 2. 1) Nacekusqanchejmantapacha, ¿imatataj necesitanchej, chantá imatataj ruwayta atinchej? 2) Wakin wawas, ¿imaraykutaj astawan sufrinku?

RUNASQA nacekusqanchejmantapacha sonqochasqa kayta necesitanchej, wajkunatataj sonqochayta atinchej. ¿Imaraykutaj chayta ninchej? Uj wawita pujllashaspa moqetunta rasmillakusqanpi tʼukurina. Wawitaqa chay rato tatanman chayri mamanman waqaspa willakamun. Paykunaqa nanasqetanta mana sanoyachiyta atinkuchu, jinapis wawitankuta sonqochariyta atinku. Chayrayku wawitankuta imaynapichus urmakusqanta tapurinku, waqaysitunta picharqonku, munakuywantaj sonqocharinku. Chantá nanasqetanta jampiykunku. Wawitankutaj sonqochakuytawan niña waqanchu, watejmantataj pujllaj kutirin. Tiemponmantaj moqetunpis sanoyapun.

² Jinapis wakin wawasqa astawan sufrinku. Imaraykuchus wakin sajra runasqa paykunata violanku. Wakin wawasqa uj kutita abusasqa karqanku, wakintaj watasta. Wakin kutispi, chay sajra runasqa chay rato japʼichikunku, castigasqataj kanku. Wakin kutistajrí, ni ima castigota japʼinkuchu. Abusaj runata chay rato castiganku chaypis, wawasqa abusasqa kasqankuta mana qonqayta atinkuchu. Chayraykutaj jatun kanankukama mayta sufrillankupuni.

3. 1) 2 Corintios 1:3, 4 nisqanman jina, ¿imatá Jehová Dios ovejitasninpaj munan? 2) ¿Ima tapuykunamantaj kutichisun?

³ Wakin hermanosninchejqa, wawa kashaspa abusasqa kasqankurayku kunankama sufrishallankupuni. ¿Imataj paykunata yanapanman? (2 Corintios 1:3, 4 leey). Jehová Diosqa ovejitasnin munasqas, sonqochasqastaj kanankuta munan. Chayrayku qhepan parrafospi kay tapuykunaman kutichisun:  ¿Imaraykutaj wawa kashaspa abusasqa kajkuna sonqochanata necesitanku? ¿Pitaj paykunata sonqochanman? ¿Imaynatá paykunata sonqochasunman?

4. Wawa kashaspa abusasqa kajkuna, ¿imaraykutaj sonqochanata necesitallankupuni?

⁴ Wawa kashaspa abusasqa kajkunaqa, ashkha watas pasajtinñapis sonqochanata necesitallankupuni. ¿Imaraykutaj? Chayta entiendenapaj, yuyarikuna wawasqa kuraj runaswan mana kikinchu kasqankuta. Chayrayku abusasqa wawasqa, mana kuraj runas jinachu sufrinku. Qhepan parrafospi yachakusun, imaynatachus paykuna sufrisqankuta.

5. Abusasqa wawas, ¿wajkunaman kʼaskakuyta munankuchu?

⁵ Wawasqa paykunata uywajkunaman kʼaskakunku, nitaj paykunamanta ima sajratapis suyankuchu. Ajinata yuyasqankurayku, wawasqa kusisqa wiñakunku, waj runaspipis atienekunku. Jinapis ashkha wawasqa, maypichus wiñakunku chayllapitaj abusasqa kanku. Abusajkunataj familiaresninku chayri rejsisqasninku kanku. ¿Imaynatataj chay wawitas wiñakunku? Paykunaqa ashkha watas pasajtinpis, manaña wajkunaman kʼaskakuyta munankuchu.

6. ¿Imaraykutaj wawasta abusay manchay sajrapuni?

⁶ Wawasqa mana sapankumanta jarkʼakuyta atinkuchu, chayrayku wawasta abusayqa manchay sajrapuni. Wawasta abusaj runasqa, wawitaj cuerpitonpis, yuyaysitunpis niraj wakichisqachu kashajtin, qhariwarmi jina puñuykuyta yachachinku. Chaytaj manapuni allinchu. Imajtinchus wawaqa, niña entiendenchu casarasqaslla qhariwarmi jina puñuykuyta atisqankuta. Chantapis pisipaj qhawakuspa wiñakun, niñataj wajkunaman kʼaskakuyta munanchu.

7. 1) ¿Imaraykutaj abusaj runas wawasta facilta engañanku? 2) Abusasqa wawa, ¿ima yuyaywantaj wiñakun?

⁷ Wawaj yuyaysitonqa, mana kuraj runajta jinachu. Chayrayku manaraj sumajtachu reparan, imachus allin, imatajchus mana allin kasqanta (1 Cor. 13:11). Chayraykutaj abusajkunaqa wawasta facilta engañanku. Abusaj runasqa, wawaman creechinku abusasqa kananpaj pay juchayoj kasqanta. Manachayrí wawaman ninku, willakojtin ni pi creenanta. Chayrí wawata creechinku, kuraj runaswan wawaswan munanakojtinkoqa, qhari warmi jina puñuykuyta atillasqankuta. Abusasqa wawataj chay yuyaywan wiñan, nitaj entiendenchu chay runa llullakushasqanta. Chantapis pisipaj, chʼichipajtaj qhawakuspa wiñakun, yuyantaj ni pi payta munakusqanta.

8. Jehová Diosninchej, ¿sufrejkunata sonqochanchu?

⁸ Rikunchej jina, abusasqa wawasqa unayta sufrinku. Chayrayku wawasta abusayqa manchay millay ruwaypuni. Kay tiempopitaj chayqa astawan rikukushan. Chaytaj sutʼita rikuchiwanchej, qhepa pʼunchaykunapi kausashasqanchejta. Runasqa “runa masinkuta mana munakojkuna” kanku. “Chʼaukiyaj sajra runasrí, astawan astawan” sajrayashanku (2 Tim. 3:1-5, 13). Supayqa sajra imasllata ruwayta munan. Ashkha runastaj paypa munasqanta ruwashanku. Jinapis Tatanchej Jehovaqa, Satanasmanta, sajra runasmanta ima, aswan atiyniyoj. Payqa Supaypa mañasninta sumajta yachan. Chayrayku llakiyninchejta allinta entienden, sonqochawasuntaj. Jehovaqa “may khuyakuyniyoj Tata, tukuy imapi sonqochaj Diostaj. Paymin sonqochawanchej tukuy llakiyninchejpi. Ajinamanta noqanchejpis imaymana llakiykunapi kajkunata sonqochananchejpaj, imaynatachus Dios sonqochawanchej, ajinata”. Chay jina kʼacha Tatata sirvispa, may kusisqa kanchej (2 Cor. 1:3, 4). Qhawarinachej pinejtachus sonqochawasqanchejta.

9. Rey David Salmo 27:10 versiculopi nisqanman jina, ¿saqerpasqa kajkunata Jehová saqerparillantajchu?

⁹ Wakin tatas chayri mamasqa, wawasninku abusasqa kajtinku mana imatapis ruwankuchu. Wakin wawastataj familiankumanta kajkunallataj abusanku. Ajina familiaspi wiñakojkunaqa, astawan sonqochanata necesitanku. Rey Davidqa Jehová Diosninchej sonqochayta atiwasqanchejta yacharqa (Salmo 27:10 leey). Payqa yacharqa tatanwan mamanwan saqerparejtinkupis, Diosqa mana saqerparinanta. Kunanpis Tatanchej Jehovaqa, sufrejkunata kamachisninwan sonqochachin. Jallpʼantinpi hermanos, familianchej kanku. Jesuspis nerqa: “Pichus cielopi kashaj Tataypa munayninta ruwajqa, chaymin hermanoy, hermanay, mamaytaj”, nispa (Mat. 12:48-50).

10. ¿Imatataj apóstol Pablo 1 Tesalonicenses 2:7 versiculopi nerqa?

¹⁰ Congregacionpi familia jina kasqanchejmanta parlarina. Apóstol Pabloqa congregacionpaj mayta llankʼaj, hermanos yachakunankupaj jinataj kausaj. Chayrayku payqa hermanosman nerqa: “Noqa jina ruwaychej, imaynatachus noqapis Cristo jina ruwani ajinata”, nispa. Pabloqa chayta nerqa Dios yuyaychasqanrayku (1 Cor. 11:1). Uj pacha, payqa anciano jina imatachus ruwasqanta nerqa: “Qankuna ukhupi may kʼachas karqayku, imaynatachus uj mama wawitanta ñuñuchin, munakuywantaj qhawan, ajinata”, nispa (1 Tes. 2:7). Kay tiempopipis munakuyniyoj ancianosqa, llakisqa hermanosta Bibliawan sonqocharishaspa, munakuywan parlapayanku.

11. ¿Ancianosllachu llakiypi kajkunata sonqochayta atinkuman?

¹¹ Abusasqa kajkunataqa, mana ancianosllachu sonqochankuman. Bibliaqa tukuyman niwanchej: “Purajmanta sonqochanakullaychejpuni”, nispa (1 Tes. 4:18). Sinchʼi creeyniyoj hermanasqa, llakiypi kaj hermanasta sonqochariyta atinkuman. Jehová Diosninchejqa wawitanta sonqochaj mamawan kikinchakun (Isa. 66:13). Bibliaqa nin, wakin warmis llakiypi kajkunata sonqochasqankuta (Job  42:11). Jehová Diosqa mayta kusikun, sinchʼi creeyniyoj hermanas llakiypi kajkunata sonqochajtinku. Ichá ancianosqa ajina wiñay tukusqa cristianaswan sapallankupi parlarinkuman, llakisqa hermanata yanaparinankupaj. *

12. Llakisqa kajkunata yanaparishaspa, ¿imatataj mana ruwanachu kasqa?

¹² Llakisqa kajkunaqa wakin imasmanta mana parlayta munankuchu. Paykunata yanaparishaspaqa, ama anchata tapuykachanachu (1 Tes. 4:11). Chantá, ¿imaynatá paykunata yanaparisunman, sonqocharisunmantaj? Qhepan parrafospi Bibliaman jina phishqa yuyaychaykunata yachakusun.

13. 1) Kay 1 Reyes 19:5-8 nisqanman jina, ¿imatataj Jehová Diospa angelnin Eliaspaj ruwasqa? 2) ¿Imatá Diospa angelninmanta yachakusunman?

¹³ Llakisqa kajkunapaj imitallatapis ruwapuna. Uj pacha, profeta Eliasta enemigosnin wañuchiyta munarqanku. Paytaj mana wañuchinankupaj ayqekorqa. Chaypacha mayta llakikusqanrayku, wañupullaytaña munarqa. Jehová Diostaj Eliasta sonqochananpaj, angelninta kacharqa. Chay angelqa payman qʼoñi tʼantata jaywarqa, mikhukunantataj nerqa (1 Reyes 19:5-8 leey). Jehová Diospa angelninmantaqa, mayta yachakusunman. Llakisqa kajkunapaj imitallatapis ruwapojtinchejqa, paykunata mayta kallpachasun. Paykunaman imatachus ninanchejta mana yachaspaqa, ichapis mikhunitata waykʼupusunman, uj regalitota qorisunman chayri uj tarjetitata jaywasunman. Chaykunata ruwajtinchejqa, llakisqa hermanosninchejqa munakusqanchejta, paykunamantataj llakikusqanchejta reparanqanku.

14. Jehová Dios Eliasta yanapasqanmanta, ¿imatá yachakusunman?

¹⁴ Llakisqa kajkunata mana manchachikunankupaj yanaparina. Eliasmanta parlarinallapuni. Jehová Diosqa, Elías Horeb orqoman correnanpaj atiyninwan kallpacharqa. Diosqa ashkha watas ñaupajta, chay orqopi llajtanwan uj tratota ruwarqa. Eliasqa chay karu lugarman chayaspa, ichá niña yuyarqachu enemigosnin wañuchinankuta. ¿Imatá chaymanta yachakusunman? Abusasqa kajkunata yanapariyta munaspaqa, mana manchachikunankupajraj yanaparina. ¿Imaynatá ancianos chayta ruwankuman? Paykunaqa sapa hermano chayri hermana mana kikinchu kasqanta yuyarikunanku tiyan. Ichapis uj hermanaqa, wasinpi teycituta tomarispa llakiyninmanta parlariyta munanman. Waj hermanatajrí ichapis salonllapi parlariyta munanman.

15. Allinta uyariyta yachay, ¿chʼinsitumanta uyariyllachu kasqa?

¹⁵ Uyariyta yachana. Bibliaqa niwanchej: “Sapa ujpis allinta uyariyta yachanan tiyan, manataj usqhayllata parlananchu tiyan”, nispa (Sant. 1:19). Allinta uyariyta yachayqa, mana llakisqata chʼinsitumanta uyariyllachu, nitaj uyanta qhawaspa uyariyllachu. Jehová Dios imaynatachus Eliasta uyarisqanmanta yachakuna. Profeta Eliasqa Jehovaman willakorqa, manchachikusqanta, sapallan kashasqanta, tukuy imatataj qhasillapaj ruwasqanta. Jehová Diostaj payta sumajta uyarerqa, munakuywantaj sonqocharerqa. Ajinamanta Jehovaqa profeta Eliasta allinta uyarisqanta rikucherqa (1 Rey. 19:9-11, 15-18).

16. Uj hermanonchej llakiyninta willarishawajtinchej, ¿imaynatá payta munakusqanchejta rikuchisunman?

¹⁶ Uj hermano chayri uj hermana llakiyninta willarishawajtinchej, ¿imaynatá payta munakusqanchejta, khuyakusqanchejta ima rikuchisunman? Sumajta yuyaycharikuspa  imallatapis nirisunman. Ichapis nisunman: “Llakichiwanki hermanáy, imaynatá chayta ruwasonqankuri. ¡Chaytachu wawasta ruwanqanku!”, nispa. Chantá imatachus willarishawasqanchejta sumajta entiendenapaj, kʼachallamanta tapurisunman. Miskʼi simiwan uj mashkha palabrasta nejtinchej, llakisqa kajqa sumajta uyarisqanchejta yachanqa. Reparanqataj munakusqanchejta, llakiynintapis entiendeyta munasqanchejta (1 Cor. 13:4, 7).

17. Pipis llakiyninta willarishawajtinchej, ¿imaraykutaj pacienciawan uyarina?

¹⁷ Pipis llakiyninta willarishawajtinchejqa, mana ‘usqhayllata parlanachu tiyan’. Parlashajtenqa ama pantachinachu, nitaj yuyaychanapachachu. Amallataj pantasqa kasqanta ninachu. Astawanpis pacienciawan uyarina. Elías Jehovaman llakiyninta willakushajtin, imachus llakichisqanta sutʼita nerqa. Diosninchej creeyninta kallpachasqantawantaj, Eliasqa watejmanta chayllatataj nerqa (1 Rey. 19:9, 10, 13, 14). Eliasmanta yachakusunman, wakenqa llakiyninkumanta kutin kutita parlasqankuta. Llakisqa hermanonchej ajina chayqa, Jehová jina pacienciawan uyarina. Amataj chay rato ninachu imatachus ruwananta, manaqa paymanta khuyakuna (1 Ped. 3:8).

18. Llakisqa kajkunapaj Diosmanta mañapuspa, ¿paykunata yanapasunmanchu?

¹⁸ Llakisqa kajkunapaj sonqomantapacha Diosmanta mañapuna. Sinchʼi llakisqa kajkunaqa, Diosmanta wakin kutis mana mañakuyta atillankuchu. Ichapis pisipaj qhawakusqankurayku, Jehová mana uyarinanta yuyanku. Paykunata yanapariyta munaspaqa, sutinkuta oqharispa paywan khuska Diosmanta mañakuna. Orapushaspataj Jehová Diosman nina, chay hermanota chayri hermanata, tukuy hermanos mayta munakusqanchejta. Chantá Jehová Diosman rogakuna munasqa ovejitanta sonqochananta. Ajinata Diosmanta mañakojtinchejqa, paykunata mayta sonqochanqa (Sant. 5:16).

19. ¿Maypitaj sonqochaj palabrasta tarisunman?

 ¹⁹ Llakisqa kajkunata sonqochanapaj jina parlarina. Niraj imatapis nishaspa sumajta yuyaychakuna. Imatapis parlarparillasun chayqa, wajkunaj sonqonta espadawan jina tʼojsisunman. Jinapis miskʼi simiwan parlajtinchejqa, paykunaj sonqonkuta jampiwan jina thañichisunman (Pro. 12:18). Chayrayku Jehová Diosmanta mañakuna, llakisqa kajta sonqochanapaj palabrasta tarinapaj yanapanawanchejta. Jehová Diosqa Palabranpi sonqochaj palabrasta ashkhata churacherqa (Heb. 4:12).

20. 1) Abusasqa kajkuna, ¿imastataj yuyankuman? 2) ¿Imaynatá llakisqa hermanosninchejta yanapasunman?

²⁰ Wawa kashaspa abusasqa kajkunaqa, ichapis pisipaj, chʼichipajtaj qhawakuspa wiñakunku, yuyankumantaj ni pi paykunata munakusqanta. Yuyallankumantaj mana munakunapaj jinachu kasqankuta. Chaytaj mana jinachu. Chayrayku Bibliapi rikuchina, Jehová Dios paykunata mayta munakusqanta (“ Llakisqa kajta sonqochanapaj textos” nisqa recuadrota leeriy). Profeta Danielmanta parlarina. Payqa uj pacha manchay llakisqa, pisi kallpayojtaj kasharqa. Jehová Diosninchejtaj ujnin angelninta payta kallpachananpaj kacharqa. Chay angeltaj Danielman nerqa, Jehová Diospaj may munasqa kasqanta (Dan. 10:2, 11, 19). Jehová Diosqa llakisqa hermanosninchejta kikillantataj munakun.

21. 1) Wawasta abusajkuna mana pesachikojtinku, ¿imatataj Jehová ruwanqa? 2) ¿Imatataj tukuy atisqanchejta ruwasunman?

²¹ Llakisqa kajkunata sonqochashaspaqa, Jehová Dios may munakuyniyoj kasqanta yuyarichinchej. Ama qonqanachu Diosninchejqa justiciata ruwasqantapuni. Payqa sumajta yachan, pikunachus abusasqa kasqankuta. Chayrayku chay millay juchata ruwajkunataqa, mana pesachikojtinku castiganqapuni (Nah. 1:3). Chaykamaqa abusasqa kajkunata sonqochanapaj, tukuy atisqanchejta ruwana. Jehová Diosninchejqa, Satanaspa mundonpi sufrejkunaj llakiyninkuta wiñaypaj chinkachenqa. Chaytaj mayta sonqochawanchej. Abusasqa kajkunaqa, tukuy llakiyninkuta tumpamantawan qonqanqanku (Isa. 65:17).