1. ¿Imataj ni imawan kikinchakunchu?

JEHOVÁ DIOSMAN qayllaykusqanchejqa ni imawan kikinchakunchu. Paymantataj ni imarayku karunchakuyta munasunmanchu. Chantapis mayta kusikunchej Bibliaj nisqasninta entiendespa. Imajtinchus Bibliata entiendesqanchejrayku Diosman qayllaykuyta atinchej (Col. 1:9, 10).

2. ¿Imasta yachaytaj Jehová Diospa qayllallanpipuni kanapaj yanapawasunman? (Patapi kaj dibujosta qhawariy).

² Jehová Diosqa Sumaj Yachachej kasqanrayku Bibliaj nisqasninta entiendechiwanchej. Payqa Bibliapi sutinta yachachiwanchej. Yachachillawanchejtaj pay kʼacha kasqanta, munakuyniyoj kasqanta, pacienciayoj kasqanta, may atiyniyoj kasqanta, waj imastawan. Yachachillawanchejtaj mayta munakuwasqanchejrayku kʼata Wawanta qosqanta. Chantapis Bibliapi yachachiwanchej Jesús cielopi gobernashasqantaña, tumpamantawantaj kay jallpʼata gobernamunanta. Chantapis Jehová Diosqa yachachiwanchej ajllasqa cristianos cieloman ripunankuta, waj ovejasmanta kajkunatajrí kay jallpʼa patapi kusisqa tiyakunankuta (Juan 10:16). Yachachillawanchejtaj imastachus ruwana  kasqanta allinta kausakunapaj. Tukuy chaykunata yachaytaj Jehová Diospa qayllallanpipuni kanapaj yanapawanchej, aswan kusisqa kausakunapajtaj.

3. ¿Jehová Dios cobrawanchejchu Bibliata entiendenapaj yanapawasqanchejmanta?

³ Jehová Diosqa khuyakuyniyoj. Payqa khuyakuwasqanchejrayku Wawanta qorqa. Chantapis Jehová Diosqa Bibliata entiendeyta munajkunata yanapan, nitaj yanapasqanmanta cobranchu. Uj kutipi Simón sutiyoj runa Pedroman nerqa: “Atiyta qowaychej, pillamanpis makisniyta churaykojtiy, Diospa atiyninta japʼinanpaj”, nispa. Chaypajtaj apóstol Pedroman qolqeta pagayta munarqa. Chaywanpis Pedroqa Simonta nerqa: “Qolqeykeqa qanwan khuska tukukuchun, Diospa qhasilla qosqanta qolqewan rantiyta munasqaykirayku”, nispa (Hech. 8:18-20).

4. ¿Imastataj qhepan parrafospi yachakusunchej?

⁴ (Proverbios 23:23 leey). Cheqa kajta yachanapaj chayri Bibliaj nisqasninta entiendenapajqa, mayta kallpachakunanchej tiyan, waj imastawan saqepunanchej tiyan. Cheqa kajta yachakoyqa “cheqa kajta rantikuy” jina. Cheqa kajta yachaspañaqa allinta qhawarikunanchej tiyan cheqa kajmanta mana kacharikunapaj. Chayrayku qhepan parrafospi yuyarikusunchej imastachus ruwasqanchejta cheqa kajta yachanapaj. Chayta yachaspaqa, reparasunchej cheqa kajta yachay chayri Bibliamanta yachakuy may valorniyoj kasqanta. Chayta reparaspataj mana yuyallasunpischu Jehová Diosmanta karunchakuyta.

5. ¿Bibliamanta yachakunapaj paganachu kasqa?

⁵ Bibliamanta yachakunapaj mana paganachu kajtinpis, mayta kallpachakunanchej tiyan Bibliamanta yachakunapaj. Proverbios 23:23 versiculopi “rantikuy” palabraqa, hebreo parlaypi niyta munan “japʼiy”. Kay iskaynin palabrastaj, reparachiwanchej imatapis japʼinapajqa, imawanpis pagana kasqanta chayri imatapis qona kasqanta. Por ejemplo, uj mercadopi ichá ninkuman platanosta gratis qoshasqankuta. Chaywanpis mana suyasunmanchu chay plátanos wasinchejpi rikhurinanta. Manaqa chay platanosta japʼinapajqa chay mercadoman rinanchej tiyan, chaymantataj wasinchejman kutipunanchej tiyan. Bibliamanta yachakunapajpis manallataj qolqeta pagananchejchu tiyan. Chaywanpis mana suyasunmanchu jinallamanta yachakunanchejta, manaqa wakin imasta ruwananchej tiyan.

6. ¿Diospa Palabranmanta yachakuy allinninchejpajchu kasqa?

⁶ (Isaías 55:1-3). Jehová Diosqa Isaías libropi reparachiwanchej Palabranta entiendejtinchej kusisqa kausakunanchejta. Chay versiculospi Jehová Diosqa Palabranta yakuwan, lechewan, vinowan ima kikinchan. Imaynatachus uj yaku vaso chʼakichikoj runata phaj nichin, ajinallatataj Diospa Palabranpis phaj nichiwanchej. Chantapis imaynatachus leche uj wawaman kallpata qon, ajinallatataj Diospa Palabranpis kallpata qowanchej Diosman astawan kʼaskaykunapaj. Chantapis imaynatachus vino runaj sonqonta kusichin, ajinallatataj Diospa Palabranpis mayta kusichiwanchej (Sal. 104:15). Chayrayku pay niwanchej kamachiykunasninta kasukojtinchej, kusisqa kausakunanchejta (Sal. 19:8). Jehová Diosqa Palabranta yakuwan, lechewan, vinowan ima kikinchaspa, reparachiwanchej Palabranta entiendejtinchej, kasukojtinchejtaj allinta kausakunanchejta. Kunantaj qhawarinachej imastachus ruwasqanchejta Diospa Palabranmanta yachakunapaj.

7. ¿Diosmanta yachakunapaj tiempochakunachu kasqa?

⁷ Tiempochakorqanchej. Diosmanta yachakunapajqa, wakin ruwanasninchejta saqeporqanchej  (Efesios 5:15, 16 leey, sutʼinchaynin). Por ejemplo, tiempochakorqanchej Diospa Gobiernonmanta uyarinapaj, Bibliata, publicacionesta ima leenapaj, estudianapaj, tantakuykunaman wakichisqa rinapaj ima. Wakenqa Diosmanta usqhayllata yachakorqanchej, wakinrí unaypi. Chaywanpis yachakushallanchejpuni Jehová Diospa yachayninmanta, imayna kʼachachus kasqanmanta, ruwasqasninmantapis (Rom. 11:33). Primera vez Torremanta Qhawaj revista ruwakushajtin, ujnin yachaqananpi nerqa uj verdadta yachayqa uj tʼikitata tariywan ninakusqanta. Chay revistapi nerqa: “Ama uj tʼikitallawanqa contentakunachu, arí, ama uj verdadllawanqa contentakunachu. Astawanqa Bibliata entiendenapaj kallpachakunallapuni”, nispa. Chayrayku piensarinanchej tiyan Jehová Diosta sumajtañachus manachus rejsisqanchejpi. Diosmanta yachakuytaqa ni jaykʼaj tukusunchu, paraisopipis paymanta yachakullasunpuni. Chayrayku ama tiemponchejta usuchinachu, astawanqa Jehová Diosmanta yachakunapaj tukuy atisqanchejta kallpachakuna.

8. ¿Imatataj uj jovencita ruwasqa Jehová Diosmanta yachakunanpaj?

⁸ Kaori sutiyoj jovencitamanta parlarina. * Payqa Japonmanta. Estados Unidosmantaj estudiaj ripusqa. Uj precursorataj wasinpi taripaspa predicasqa. Kaoriqa waj iglesiamanta kaspapis chay precursorawan Bibliata estudiayta qallarisqa. Bibliata estudiay gustasqanrayku chay precursorata nisqa semanapi iskay kutita estudiachinanta. Kaoriqa trabajakusqanrayku, universidadpi estudiasqanraykutaj mana tiempoyojchu karqa. Chaywanpis reunionesman rinanpaj, Bibliata estudiananpaj ima tiempochakoj. Payqa tiempochakunanpaj manaña fiestasman, nitaj pujllarikojpis rejchu. Ajinamanta Jehová Diosman astawan qayllaykorqa, killasninmantaj bautizakorqa. Bautizakusqanmanta sojta killasninmantaj, 2006 watapi precursoraña karqa, kunankamataj precursora jinallapuni Jehová Diosta sirvishan.

9. ¿Imatataj uj runa reparanqa Bibliamanta yachakuspa?

⁹ Wakin imasta saqeporqanchej. Bibliamanta yachakunapajqa ichá sumaj sueldoyoj trabajonchejta saqeporqanchej chayri universidadmanta llojsiporqanchej. Pedromanta Andresmantawan parlarina. Paykunaqa pescadores karqanku. Jesustaj paykunata nerqa: “Qhepayta jamuychej, runa japʼej pescadoresman tukuchisqaykichej”, nispa. “Paykunataj chay ratopacha chʼipasninkuta saqerpayaspa, qhepanta rerqanku” (Mat. 4:18-20). Uj runa Jehová Diosmanta yachakunanpajqa, mana Pedro jinapunichu, nitaj Andrés jinapunichu trabajonta saqepunan tiyan. Imajtinchus familianman necesitasqanta qonanpaj trabajananpuni tiyan (1 Tim. 5:8). Chaywanpis Bibliamanta yachakuspaqa, chay runa reparanqa Jehová Diostaraj ñaupajman churanan kasqanta nitaj trabajontachu. Jesuspis nerqa: ‘Amaña jallpʼa patapi valorniyoj imasta tantaychejchu. Astawanpis valorniyoj imastaqa cielopi tantaychej’, nispa (Mat. 6:19, 20).

10. ¿Imatataj María saqepusqa?

¹⁰ Mariamanta parlarina. Paymanqa wawitamantapacha golf nisqa deporte gustarqa. Colegionpi sumajta pujllasqanraykutaj uj becata qosqanku universidadpi estudiananpaj. Mariaqa golf deportepi sumaj profesional kayta munarqa ashkha qolqeta ganananpaj. Jinallapi Bibliata estudiayta qallarerqa. Bibliata entiendesqanmantataj sonqon mayta qhallallarerqa, yachakusqanman jinataj kausakuyta qallarerqa. Pay nerqa: “Bibliaman jina kausakuyta qallarispaqa, aswan kusisqa karqani”, nispa. Jinamanta pay reparakusqa golf deportepi profesional kaspaqa mana Jehová Diosta  sirviyta atinanta (Mat. 6:24). Chayrayku payqa chay deporteta saqeporqa. Kunantaj kusisqa precursora regular jina sirvishan.

11. Bibliaj nisqanman jina kausakuyta qallarejtinchej, ¿amigosninchej, familiaresninchej ima entiendewanchejchu?

¹¹ Amigosninchejmanta, familiaresninchejmantapis tʼaqakorqanchej. Bibliaj nisqanman jina kausakuyta qallarishajtinchejqa, amigosninchejwan, familiaresninchejwan ima manaña entiendewarqanchejchu. Jinamantataj ichá paykunamanta karunchakorqanchej chayri paykuna karunchakuwarqanchej. Chantachá Jesusqa kamachisninpaj Diosmanta jinata mañaporqa: “Paykunataqa cheqa kajnejta qanpaj tʼaqay, palabraykeqa cheqapuni”, nispa (Juan 17:17). Bibliaj nisqanman jina kausakusqanchejrayku, manaña kay mundomanta runas jinachu kausakunchej, jinamanta paykunamanta tʼaqakunchej. Runaspis noqanchejmanta karunchakunku waj jinitas kasqanchejta yuyasqankurayku. Mana munanchejchu familianchejta tʼaqanachiyta. Chaywanpis wakin amigosninchej, familiaresninchejpis Jehová Diosta yupaychasqanchejrayku chejnikuwanchej, churanakuwanchejtaj. Jesuspis nerqa: “Cheqamanta runaj enemigosnenqa kikin wasillanmantataj kanqanku”, nispa (Mat. 10:36). Nillarqataj Jehová Diosrayku tukuy imata saqejtinchej pachaj jinastawanraj japʼinanchejta (Marcos 10:28-30 leey). 

12. ¿Imanasqankutaj Aaronta Diosmanta yachakusqanrayku?

¹² Uj judío runamanta parlarina. Payqa Aarón sutikorqa. Yuyarqataj Diospa sutinta ni imarayku oqharinachu kasqanta. Chaywanpis Diosmanta cheqa kajta yachayta munarqa. Chay runaqa yacharqa Diospa sutin hebreo parlaypi tawa letraslla kasqanta. Uj kutipitaj uj hermano payman yachacherqa Diospa sutin “Jehová” kasqanta. Chaypajtaj chay tawa letrasman vocalesta yapaykunanta nerqa. Chayta yachasqanmantataj Aaronpa sonqonqa mayta qhallallarisqa. Chayrayku iglesianman rispa yachachejkunaman Diospa sutinta willarimusqa. Aaronqa yuyasqa chay yachachejkuna Diospa sutinta yachaspa kusikunankuta. Chaywanpis chay yachachejkunaqa phiñakusqanku, thoqaykuspataj Aaronta qharqomusqanku. Familianpis churanakullasqataj. Jinapis Aaronqa Jehová Diosmanta yachakullasqapuni. Chantá bautizakusqa, wañupunankamataj Jehová Diosta sirvisqa. Noqanchejtapis ichá amigosninchej chayri familiaresninchej chejnikuwanchej Jehová Diosta yupaychasqanchejrayku.

13. ¿Ima ruwaykunatataj saqeporqanchej Bibliamanta yachakusqanchejrayku?

¹³ Sajra yuyaykunata, sajra ruwaykunatawan saqeporqanchej. Bibliaj nisqanman jina kausakunapajqa, Dios jina yuyananchej tiyan, munaynintataj ruwananchej tiyan. Apóstol Pedropis nerqa: ‘Kunanqa Diospa wawasnin kankichej, paytataj kasukunkichej. Chayrayku amaña sajra munayniykichejman jina kausaychejchu, mayqenchus qankunapi karqa manaraj payta rejsishajtiykichej. Astawanqa tukuy ima ruwasqaykichejpi llimphus kaychej’, nispa (1 Ped. 1:14, 15). Corinto llajtapeqa ashkha runas millay imasta ruwaj kanku. Chayrayku Diospa ñaupaqenpi llimphus kanankupajqa, chay millay ruwanasninkuta saqeporqanku (1 Cor. 6:9-11). Kay tiempopipis ashkha runasqa Bibliamanta yachakuspa sajra ruwaykunasninkuta saqepullankutaj. Apóstol Pedroqa nerqa: ‘Qankunaqa ashkha tiempotaña kay mundomanta runaspa ruwasqankuta ruwarqankichej. Chaypachaqa purej kankichej: millay kausaypi, sajra imasta munapayaypi, machaykuykunapi, millay fiestaspi, machaykuykuna fiestaspi, llulla dioskunata millayta yupaychaypi ima’, nispa (1 Ped. 4:3).

14. ¿Imatataj Davidwan señoranwan saqepusqanku Bibliamanta yachakushaspa?

 ¹⁴ Davidmanta Jasminmantawan parlarina. Paykunaqa machasqallapuni purej kanku. Davidqa sumaj contador kaspapis, borracho kasqanrayku sapa kuti trabajonmanta wijchʼuchikoj. Señorantaj manchay phiña karqa. Uj kutitaj Davidpa señoranwan uj qhariwarmi misioneros callepi tinkusqanku. Chay misionerosqa predicaytawan chay señoraman nisqanku: “Jamusqayku Bibliamanta yacharichisoj”, nispa. Semananmantaj misionerosqa Davidta señorantawan machasqata taripasqanku. Davidwan señoranwanqa yuyasqanku chay misioneros mana jamunankuta. Qhepan kutipajtaj Davidwan señoranwanqa chʼaki sonqos misionerosta suyasqanku, Bibliamanta yachakuyta munasqankurayku. Ajinamanta Bibliaman jina kausakuyta qallarerqanku. Kinsa killanmantaj vicionkuta saqeporqankuña, chaymantataj casarakorqanku. Davidwan señoranwan cambiasqankuta rikuspataj, llajta masisninku Bibliamanta yachakuyta qallarerqanku.

15. ¿Imastataj mana saqepuyta atillasunmanchu Bibliamanta yachakushaspa?

¹⁵ Costumbresta saqeporqanchej. Casi tukuypis Bibliamanta yachakushaspa costumbresninkuta mana saqepuyta atillankuchu. Wakenqa Bibliamanta yachakuspañapis mana costumbresninkuta qonqapuyta atillankuchu. Wakenqa manchachikunku familianku, trabajomanta compañerosninku, amigosninku ima phiñakunankuta manaña costumbresninkuta ruwajtinku. Imajtinchus wakin lugarespi wakin costumbresta ruwayman yachasqa kanku. Por ejemplo, casi tukuynejpi todo santos costumbreta ruwanku (Deu. 14:1). Chay jina costumbresta qonqanapajqa, ñaupa cristianosmanta yachakuy yanapawasunchej. Chayrayku qhawarinachej imastachus Éfeso llajtamanta cristianos ruwasqankuta.

16. ¿Imatataj Efesomanta wakin cristianos ruwasqanku?

¹⁶ Éfeso llajtapeqa ashkha runas layqas karqanku. Chaywanpis chay runasmanta wakenqa cristianosman tukorqanku. Bibliataj paykunamanta jinata niwanchej: “Pikunachus layqeriosta ruwaj kanku chaykunamanta ashkhas, librosninkuta tantaykuspa tukuypa ñaupaqenpi ruphaykucherqanku. Chay ruphachisqanku libros mashkhachus valesqanta yupaspataj, yacharqanku 50.000 qolqe valesqanta. Ajinata atiywan Jehová Diospa palabranqa tukuynejman chayasharqa, aswan ashkha runastaj creesharqanku”, nispa (Hech. 19:19, 20). Chay cristianosqa librosninkuta may chhika valejtinpis qʼolaykucherqanku, Jehová Diostaj chayta ruwasqankumanta paykunata bendicerqa.

17. 1) ¿Imastataj ruwarqanchej Bibliamanta yachakunapaj? 2) ¿Imatataj qhepan semana yachakusunchej?

¹⁷ Bibliamanta yachakunapajqa tukuypis tiempochakorqanchej. Wakintaj ichapis uj sumaj profesional chayri uj sumaj trabajoyoj kasunman karqa. Chaywanpis chaykunata saqeporqanchej Bibliamanta yachakunanchejrayku. Wakintajrí ichapis amigosninchejmanta chayri familiaresninchejmanta tʼaqakorqanchej. Chantapis tukuyninchej kallpachakorqanchej manaña sajra munayninchejman jina kausakunapaj, costumbresninchejta saqepunapaj, millay imasta manaña ruwanapajpis. Chaykunata saqepusqanchejmantataj mana pesachikunchejchu. Imajtinchus verdadta yachaspaqa astawan Jehová Diosman qayllaykunchej. Jehová Diosman qayllaykusqanchejtaj ni imawan kikinchakunchu. Chaywanpis wakin cristianosqa Bibliamanta yachakuspañapis Diosmanta karunchakaporqanku. Chayrayku qhepan semana yachakusunchej imaschus Diosmanta karunchayta atiwasqanchejta. Yachakullasuntaj imatachus ruwana kasqanta ni imarayku Diosmanta karunchakunapaj.