1-3. 1) ¿Kusikunchejchu perlasta maskʼaj ranqhero jina cheqa kajta tarisqanchejmanta? (Patapi kaj fotosta qhawariy). 2) ¿Imatataj qhepan parrafospi yachakusunchej?

WAKIN lugarespeqa, may chhika runas imatapis rantispa tiendaman kutichipunku, pesachikusqankurayku chayri fregasqa kasqanrayku. Wakenqa qolqenkuta kutichikapunku, wakintaj waj cosawan cambianku. Chantapis may chhika runasqa Internetnejta rantispa qolqenkuta kutichikapullankutaj.

² Noqanchejqa ni imarayku chay rantejkuna jina verdadta wajwan cambiarpasunmanchu. Nisunman cheqa kajta yachaspañaqa mana yuyallasunmanpischu cheqa kajta ‘kachariyta’ chayri Diosmanta karunchakuyta (Proverbios 23:23 leey; 1 Tim. 2:4). Pasaj semanaqa yachakorqanchej imastachus saqesqanchejta Bibliamanta yachakunanchejrayku. Tukuypis Bibliamanta yachakunanchejpaj tiempochakorqanchej. Wakintajrí ichá ashkha qolqeta ganashaspapis sumaj trabajonchejta saqeporqanchej. Wakinrí ichá amigosninchejmanta, familiaresninchejmantawan karunchakorqanchej. Wakintaj ñaupa kausayninchejta, costumbresninchejtapis qonqanapaj mayta kallpachakorqanchej. Chaykunata saqepusqanchejmantataj mana pesachikunchejchu. Imajtinchus  Bibliamanta yachakusqanchejrayku ashkha bendicionesta japʼishanchej.

³ Uj pacha Jesús nerqa: ‘Sumaj perlasta maskʼaj ranqheroqa may valorniyoj perlata tariytawan, tukuy imasninta usqhayllata vendemusqa. Chantá chay perlata rantikapusqa’, nispa (Mat. 13:45, 46). Chay perlaqa ninakun imapunichus Diospa Gobiernon kasqanta entiendeywan. Jesusqa chay rijchʼanachinawan reparachiwanchej, Diospa Gobiernonmanta yachakuy uj perla jina may valorniyoj kasqanta. Noqanchejtaj Diospa Gobiernonmanta yachakunapaj, Bibliaj nisqasnintataj entiendenapaj tukuy imata saqerqanchej. Chayrayku amapuni Diosmanta karunchakunachu. Chaywanpis wakin hermanosqa chiriyaporqanku, Diosmantataj karunchakaporqanku. Noqanchejqa, mana chay hermanos jina karunchakunapaj Bibliata kasukunanchej tiyan. Biblia niwanchej: ‘Cheqa kajpi purillaypuni’, nispa (3 Juan 2-4 leey). Cheqa kajpi pureyqa niyta munan Bibliaj nisqasninta tukuy imapi kasukuy. Chaytaj kausayninchejpi yachakunan tiyan. Chaywanpis qhepan parrafospi yachakusunchej imajtinchus wakin hermanos Diosmanta karunchakusqankuta. Yachakullasuntaj imastachus ruwana kasqanta cheqa kajpi purinallapajpuni.

4. ¿Imaraykutaj Jesuspa wakin yachachisqasnin ñaupa kausayninkuman kutiripusqanku?

⁴ Jesuspa yachachisqasninmanta wakenqa, Diosmanta yachakuspapis ñaupa kausayninkuman kutiriporqanku. Uj kutipi Jesusqa ashkha runasman milagrota ruwaspa mikhucherqa. Chaymantataj chay runasqa Jesús Galilea qochaj chimpanman rejtin, rillarqankutaj. Jesustaj paykunaman nerqa: “Manachus noqaj aychayta mikhunkichej, nitaj yawarniytapis ujyankichej chayqa, mana kausayta japʼinkichejchu”, nispa. Chayta uyarispa Jesuspa ashkha yachachisqasnin “chayta sutʼinchariwayku” ninankumantaqa, nerqanku: “¡Imatataj parlashanri! ¿Pitaj chayta uyarinmanri?”, nispa. Chaymantataj “ashkha yachachisqasnin ñaupa kausayninkuman kutiriporqanku, manañataj Jesuswanchu purerqanku” (Juan 6:53-66).

5. ¿Imaraykutaj wakin hermanos Diosmanta karunchakusqanku?

⁵ Wakin hermanosqa, Diosmanta karunchakorqanku uj versículo waj jinamanta sutʼinchakusqanrayku chayri congregacionpi ashkha ruwanasniyoj hermano pantaykusqanrayku. Wakintaj karunchakorqanku uj hermano Bibliawan kʼarajta yuyaychasqanrayku chayri uj hermanowan phiñanaykukusqankurayku. Wakinrí Diosmanta karunchakorqanku Diosta wasanchajkunata chayri Testigosmanta llullasta parlajkunata creeykusqankurayku. Wakinrí Diosmanta karunchakorqanku manaña Diospa llajtanpi kayta munasqankurayku (Heb. 3:12-14). Chay hermanos Diosmanta karunchakunankumantaqa, allin kanman karqa apóstol Pedro jina Jesuspi confiananku. Jesús apostolesninman “¿qankunapis ripullaytatajchu munankichej?” nispa tapushajtin, Pedroqa jinata kuticherqa: “Señor, ¿pimantaj ripusqaykuri? Qanpa nisqasnillayki wiñay kausayman pusan”, nispa (Juan 6:67-69).

6. ¿Imaynatataj wakin hermanos Diosmanta karunchakusqanku?

⁶ Wakin hermanosqa Diosmanta mana reparakuspalla pisimanta pisi karunchakorqanku. Imaynatachus uj barco mar kantumanta pisimanta pisi karunchakun, ajinata. Chayrayku Biblia niwanchej allinta qhawarikunanchejta “creeymanta ni jaykʼaj karunchakunanchejpaj” (Heb. 2:1). Pisimanta pisi karunchakoj hermanosqa, mana  karunchakuytapunichu munarqanku. Chaywanpis Jehová Diosman qayllaykunankupaj mana kallpachakusqankurayku, chiriyaporqanku. Chayrayku qhepan parrafospi qhawarisunchej imastachus ruwana kasqanta ni jaykʼaj Diosmanta karunchakunapaj.

7. ¿Imatataj ruwananchej kasqa Diospa ñannillantapuni purinapaj?

⁷ Diospa ñannillantapuni purinapajqa, Diospa Palabranta entiendenanchej tiyan, tukuy imapitaj kasukunanchej tiyan. Jehová Diostarajpuni ñaupajman churananchej tiyan, tukuy imatataj Bibliaj yuyaychaykunasninman jinapuni ruwananchej tiyan. Uj kutipi rey David Diosman jinata nerqa: “Tata Dios, ñanniykita rejsichiway, noqa chaynillantapuni purinaypaj”, nispa (Sal. 86:11). Noqanchejpis David jina Jehová Diosman ninanchej tiyan ñannillantapuni purinanchejta, payta kasukuspa. Diostachus mana kasukusunchej chayqa, ñaupa kausayninchejman kutiripuyta munasunchej. Chantapis Bibliaj nisqantaqa tukuyninta kasukunanchej tiyan, nitaj wakillantachu. Kasukunapajtaj “cheqa kajta allinta” entiendenanchej tiyan (Juan 16:13). Pasaj semanaqa yachakorqanchej Diospa Palabranta estudiananchejrayku imastachus saqesqanchejmanta. Kunantaj yachakusunchej ni imarayku ñaupa kausayninchejman kutirinachu kasqanmanta (Mat. 6:19).

8. ¿Tiemponchejta usuchejtinchej Diosmanta karunchakusunmanchu?

⁸ Tiemponchejta usuchiymanta. Diosmanta mana karunchakunapajqa mana tiemponchejta usuchinanchejchu tiyan. Tiemponchejtaqa ichapis usuchishasunman anchata pujllaspa, fiestasllaman rispa, Internetllaman yaykuspa chayri telellata qhawaspa. Chaykunata ruwayqa mana juchachu. Chaywanpis ichá Bibliata estudianamantaqa chayri predicacionman rinamantaqa chay imasllata ruwashasunman. Chaymanta parlaspa hermananchej Emamanta parlarina. * Paymanqa wawitamantapacha mayta gustaj caballosman lloqʼay. Chayrayku caballosman lloqʼaspallapuni chʼisiyaj. Chaywanpis tiemponta usuchishasqanta reparakuspa, nikusqa: “Cambianay tiyan”, nispa. Chantapis paytaqa hermananchej Cory Wellspa experiencian mayta yanapasqa. * Chay hermanatapis caballosman lloqʼay mayta gustallajtaj. Kunantaj hermananchej Emaqa astawan Jehová Diosta sirvishan. Tiemponpis tiyan hermanoswan familiaresninwan ima astawan parlarikunanpaj. Reparakuntaj Jehová Diosman astawan qayllaykusqanta, tiempontapis manaña usuchishasqanta.

9. ¿Allinchu kasqa qhapajyayta maskʼay?

⁹ Qhapajyayta maskʼaymanta. Diospa ñannillantapuni purinapajqa, mana qhapajyayta maskʼayman qokunanchejchu tiyan. Bibliata estudiashaspaqa, reparakorqanchej Jehová Diosta sirviy aswan importante kasqanta qhapajyayta maskʼanamanta nisqaqa. Chayrayku ichapis kapuyninchejta pisiyacherqanchej. Chaywanpis ichá llakikuyta qallarisunman wajkunata mosoj aparatosniyojta rikuspa chayri waj imasniyojta rikuspa. Yuyasunmantaj ni imayoj kasqanchejta. Jinamantataj Jehová Diosta sirvinamantaqa ichá mosoj aparatosta chayri waj imasta rantikunapi musphashasunman. Chayta ruwaspaqa Demas jina ruwashasunman. Apóstol Pabloqa Demasmanta jinata nerqa: “Demasqa kay mundoj imasninta munakusqanrayku saqerpariwan”, nispa (2 Tim. 4:10).  Demasqa ichapis astawan qhapajyananrayku Diosmanta karunchakorqa. Chayri ichapis manaña sufriyta munarqachu Diosta yupaychananrayku. Demasmantaqa mayta yachakusunman. Ichapis ñaupa kausayninchejpeqa qhapajyayta maskʼaj kanchej. Chayrayku mana allinta qhawarikojtinchej ichapis watejmanta qhapajyayta maskʼashasunman. Jinamantataj Jehová Diosmanta karunchakapusunman.

10. ¿Familiaresninchejta kusichinanchejrayku Diospa kamachiykunasninta pʼakisunmanchu?

¹⁰ Familiaresninchejmanta, amigosninchejmantawan. Diospa ñanninta purinallapajpuneqa, mana jawamanta runaswan sajra imasta ruwanapaj inkitachikunanchejchu tiyan. Bibliata estudiashaspaqa ichapis familiaresninchejmanta, amigosninchejmanta ima karunchakorqanchej. Ichapis wakin familiaresninchejqa mayta churanakuwarqanchej, wakintaj mana (1 Ped. 4:4). Tukuypis kallpachakunchej familiaresninchejwan allinta kausakunapaj, miskʼi simiwan parlapanapaj ima. Chaywanpis mana Jehová Diospa kamachiykunasninta pʼakisunmanchu familiaresninchejta kusichinanchejraykullaqa. Chantapis Biblia niwanchej amigosninchej Jehová Diosta sirvejkuna kananku kasqanta (1 Cor. 15:33).

11. ¿Imapitaj piensarinanchej kasqa mana sajra munayninchejwan atipachikunapaj?

¹¹ Yuyayninchejpi, ruwasqasninchejpi ima llimphus kanamanta. Jehová Diospa ñannillantapuni purinapajqa paypa ñaupaqenpi llimphus kananchej tiyan (Isa. 35:8; 1 Pedro 1:14-16 leey). Bibliamanta yachakuyta qallarishaspaqa, Bibliaj nisqanta kasukunapaj kausayninchejpi cambiosta ruwarqanchej. Wakintaj mayta kallpachakorqanchej millay kausayninchejta saqepunapaj. Chayrayku kunanqa allinta qhawarikunanchej tiyan mana ñaupa kausayninchejman kutirinapaj. Millay juchapi mana urmanapajqa chayri sajra munayninchejwan mana atipachikunapajqa, piensarisunman llimphus kananchejpaj Jehová Dios kʼata Wawanta noqanchejrayku qosqanpi (1 Ped. 1:18, 19). Ni jaykʼaj qonqananchejchu tiyan Señorninchej Jesucristo may valorniyoj yawarninwan juchamanta kacharichiwasqanchejta. Chayta yuyarikuspaqa, Diospa ñaupaqenpi llimphusllapuni kanapaj kallpachakusunchej.

12, 13. 1) ¿Costumbresta ruwanachu kasqa? 2) ¿Imatataj qhepan parrafospi yachakusunchej?

¹² Costumbresmanta. Ichapis trabajomanta chayri colegiomanta compañerosninchej, familiaresninchejpis wakin costumbresta ruwanapaj tanqawasunman. Chay costumbrespi mana satʼikunapajqa sutʼita entiendenanchej tiyan Jehová Dios costumbresta chejnikusqanta. Chantapis publicacionesninchejpi maskʼasunman imaynatachus wakin fiestas, costumbres ima rikhurisqanta yachanapaj. Costumbresta mana ruwanachu kasqanta sutʼita entiendespaqa, mana ima costumbretapis ruwasunchu, ajinamantataj Jehová Diosta ‘kusichisunchej’ (Efe. 5:10). Jehová Diospi confiasunchej, Palabrantapis kasukusunchej chayqa, mana manchikusunchu runas contranchejpi imatapis ninankumanta (Pro. 29:25).

¹³ Kunantaj qhepan parrafospi qhawarisunchej imastachus ruwananchej kasqanta Diospa ñannillantapuni purinapaj.

14. 1) ¿Allinchu kasqa Bibliata estudianallanchejpuni? 2) ¿Bibliamanta yachakunallachu kasqa?

¹⁴ Jehová Diosmanta ni jaykʼaj karunchakunapajqa, Bibliata estudianallapuni, yachakusqanchejpitaj tʼukurina. Chaypajqa tiempochakunanchej tiyan. Bibliata astawan estudiaspaqa astawan entiendesunchej, nitaj Jehová Diosmanta karunchakuyta  yuyallasunpischu. Bibliapis niwanchej: “Cheqa kajta rantikuy, amataj kacharikuychu yachaymanta, unanchaymanta, yuyaychaymanta ima”, nispa (Pro. 23:23). Bibliamantaqa mana yachakunallanchejchu tiyan. Manaqa yachakusqanchejman jina kausakunanchej tiyan. Bibliaj yuyaychaykunasninta entiendespaqa, aswan yachayniyojman tukusunchej. Yachayniyoj kaspataj Bibliaman jina kausakusunchej. Chantapis reparakusunchej kausayninchejpi wakin cambiostawan ruwananchej kasqanta. Ajinata reparakuspaqa Bibliata kasukunanchejpacha tiyan, imaraykuchus Bibliaj nisqasnenqa qolqemanta nisqaqa aswan allin (Pro. 8:10).

15. ¿Imajtintaj may allinpuni kasqa tukuy tiempo Bibliaj nisqanman jina kausakunanchej?

¹⁵ Imata ruwashaspapis Bibliata kasukunapuni. Bibliapis niwanchej: “Cheqa kajwan chumpiwan jina matʼita chumpiykukuychej”, nispa (Efe. 6:14). Unay tiempopi soldadosqa ñañu wasankuta chumpiwan matʼita chumpiykukoj kanku cheqanta sayanankupaj, sumaj jarkʼasqa kanankupajtaj. Llauqhallata chumpiykukojtinkoqa, mana cheqantachu sayaj kanku. Cheqa kajman jina kausakuy chayri Bibliaman jina kausakoyqa chumpiwan chumpiykukuy jina. Chayrayku sichus tukuy tiempo Bibliaj nisqanman jina kausakusunchej chayqa, mana sajra imaspi yuyasunchu, nitaj pantarpallasunchu. Astawanpis uj problemapi rikukuspa chayri juchaman urmanapaj jina kashaspa, Bibliaj nisqanman jina allin kajtapuni ruwasunchej. Unay tiempomanta soldadosqa, guerraman rinankupaj qhawarikojpuni kanku chumpiwan chumpiykukusqankutachus manachus. Noqanchejpis chay soldados jinallataj sapa kuti qhawarikunanchej tiyan Bibliaj nisqanman jinachus manachus kausakushasqanchejta. Chantapis soldadosqa chumpinkupi espadankuta warkhoj kanku.

16. ¿Imajtintaj nisunman Bibliamanta yachachiy yanapawasqanchejta Diosmanta mana karunchakunapaj?

¹⁶ Diosmanta mana karunchakunapajqa, Bibliamanta tukuy atisqanchejta runasman yachachinanchej tiyan. Diospa Palabranqa espadawan ninakun. Unay tiempomanta soldadosqa espadanku japʼirisqapuni purej kanku, noqanchejpis Diospa Palabranta espadata jina makinchejpi japʼinanchej tiyan (Efe. 6:17). Diospa Palabranta japʼishasqanchejta rikuchisunman ‘cheqa kaj palabrata maychus kajta yachachispa’ (2 Tim. 2:15). Bibliamanta runasman yachachispaqa, astawan Bibliata rejsinchej, entiendenchejtaj. Bibliata entiendespataj mana Diosmanta karunchakuyta yuyallasunpischu.

17. ¿Kusikunchejchu cheqa kajta yachakusqanchejmanta?

¹⁷ Diospa Palabranpi cheqa kajta rejsisqanchejmanta mayta kusikunchej. Imaraykuchus Bibliata entiendeyqa, astawan Jehová Diosman qayllaykuchiwanchej. Chaytaj ni imawan kikinchakunchu. Jehová Diosqa ashkhataña yachachiwanchej, chaytaj tukuy yachayninmanta kantullan. Chayrayku Jehová Diosqa yachachillawasunpuni. Bibliamanta yachakusqanchejta may valorniyoj perlasta jina qhawananchej tiyan. Chayrayku “cheqa kajta” yachakunapaj kallpachakunallapuni, ‘amataj chaymanta kacharikunachu’. Ajinamanta David jina Diosman nisunchej: “Tata Dios, ñanniykita rejsichiway, noqa chaynillantapuni purinaypaj”, nispa (Sal. 86:11).