1, 2. ¿Pikunataj runasta astawan ñakʼarichinku?

RUNASQA rikhuricherqanku telefonota, focota, autota, heladerata ima. Chaykunataj mayta yanapawanchej. Rikhurichillarqankutaj pistolasta, dinamitasta, bombasta, cigarrillosta, waj imastawan. Chaykunataj runasta ñakʼarichin. Chaywanpis chaykunamanta nisqaqa llulla runas unaymantapachaña runasta astawan ñakʼarichinku. Imajtinchus runasqa llullakunku wajkunata ñakʼarichinankupaj chayri engañanankupaj. Tukuymanta nisqataj ñaupajtaqa Diablo llullakorqa. Chayrayku Jesusqa, Diablo ‘llullakojkunaj tatan’ kasqanta nerqa (Juan 8:44 leey).

² Diabloqa Edén huertapi llullakorqa. Jehová Diosqa chay huertata ruwarqa, Adanwan Evawan chay huertapi tiyakunankupaj. Paykunamantaj nerqa, allin kajta mana allin kajta yachanamanta sachʼaj poqoynillanta amapuni mikhunankuta. Chay sachʼaj poqoyninta mikhojtinkutaj wañunankuta. Diablotaj katarita parlachispa Evaman nerqa: “Chayqa mana jinachu; mana wañunkichejchu”, nispa. Chantá nillarqataj: “Dios allinta yachan, chay sachʼaj poqoyninta mikhuspa, sumaj yachayniyojman tukunaykichejta. Ajinamanta chaywan qankunaqa Dios jina kankichej, yachankichejtaj imachus allin kajta, mana allin kajtapis”, nispa (Gén. 2:15-17; 3:1-5). Chayta nispa Diabloqa maytapuni llullaykukorqa.

3. ¿Imastaj qhatiriwanchej Diablo llullakusqanrayku?

 ³ Diabloqa llullakuspa manchay sajra kasqanta rikucherqa. Imaraykuchus payqa yacharqa Eva wañunanta chay sachʼaj poqoyninta mikhuykojtin. Adanwan Evawanqa Diablota creeykuspa Jehová Diosta mana kasorqankuchu, chaynejtataj wañorqanku (Gén. 3:6; 5:5). Juchallikusqankuraykutaj “wañoyqa tukuy runasman chayarqa”. Bibliapis niwanchej: ‘Wañoyqa rey jina tukuyta kamachisharqa, Adanpa tiempomantapacha. Mana Adán jina juchallikojkunatapis kamachisharqa’, nispa (Rom. 5:12, 14). Chayrayku juchasapas kanchej, wañunchejtaj. Chantapis runasqa ‘qanchis chunka watasllata kausanchej, aswan kallpayojkunataj pusaj chunkata’. “Chay jina kawsayniyoj kayqa llakiyllata, ñakʼariyllata apamun” (Sal. 90:10). Maytapuni sufrinchej Diablo llullakusqanrayku.

4. 1) ¿Imatataj qhepan parrafospi yachakusunchej? 2) Salmo 15:1, 2 versículos nisqanman jina, ¿pikunallataj Diospa qayllanpi kayta atinkuman?

⁴ Jesusqa Diablomanta nerqa: ‘Mana cheqa kajpi sinchʼita sayarqachu. Cheqa kajqa mana sonqonpichu kashan’, nispa. Chayrayku Diabloqa “jallpʼapi kaj tukuy runasta” pantachishallanpuni (Apo. 12:9). Chaywanpis mana munanchejchu Diablo pantachinawanchejta. Chayrayku qhepan parrafospi yachakusunchej Diablo imaynatachus runasta pantachishasqanta, imajtinchus runas llullakusqankuta. Yachakullasuntaj mana Adán jinachu nitaj Eva jinachu kana kasqanta, Diospa qayllallanpipuni kanapajtaj mana llullakunachu kasqanta (Salmo 15:1, 2 leey).

5. ¿Imaynatataj Diablo runasta engañaj kasqa?

⁵ Apóstol Pablo Diablomanta nerqa: “Yachanchej, ima mañasniyojchus pay kasqanta”, nispa. Chayrayku noqanchejqa mana Diablowan engañachikullasunmanchu (2 Cor. 2:11). Yachanchej mundontinmanta runas Diabloj makinpi kasqankuta, jinallataj llulla religionespis, gobiernospis, jatuchaj negociospis (1 Juan 5:19). Noqanchejpajqa sutʼi kashan Diablo supaykunasninwan atiyniyoj runasta llullakunankupaj tanqashasqankuta (1 Tim. 4:1, 2). Por ejemplo, wakin empresariosqa imatapis vendenankupaj llulla propagandasta ruwanku, ajinamanta engañaspa ashkha qolqeta gananankupaj.

6. ¿Imajtintaj nisunman pastoreswan curaswan llullakusqanku jatun jucha kasqanta?

⁶ Pastoreswan curaswan llullakusqankoqa jatun jucha. Imaraykuchus paykunaqa llullasta runasman creechinku, Diospa chejnisqan imastataj ruwachinku. Ajinamanta pastorespa, curaspa nisqankuta creej runasqa wiñay kausayta pierdenkuman (Ose. 4:9). Jesusqa yacharqa leymanta yachachejkuna, fariseos ima runasta engañashasqankuta. Chayrayku paykunaman nerqa: “¡Ay qankunamanta leymanta yachachejkuna, fariseos, puraj uyas! Qankunaqa qochanta, jallpʼantataj purinkichej uj runallatapis qankuna parteman tukuchinaykichejpaj. Qankuna parteña kajtintaj, qankunamanta astawanraj Hinón Wayqʼoman wijchʼusqa kananpaj tukuchinkichej”, nispa (Mat. 23:15, sutʼinchaynin). Chantapis paykunaman nillarqataj: “Qankunaj tataykichejqa Kuraj Supay, chay tataykichejpa munaynintataj ruwayta munankichej. Payqa qallariymantapacha runa wañuchi karqa”, nispa (Juan 8:44).  

7. ¿Ima llullastataj pastoreswan curaswan yachachinku?

⁷ Kay tiempopipis pastoreswan curaswanqa, fariseos jinallataj llullasta yachachinku. Paykuna “Diosmanta cheqa kajta” yachachinankumantaqa, llulleriosta yachachinku  (Rom. 1:18, 25). Por ejemplo yachachinku, wañusqas infiernopi ñakʼarisqankuta, alma mana wañusqanta, wakintaj yachachinku Diosninchej allillanpaj qhawasqanta warmipura chayri qharipura casarakuyta, kausakuyta ima.

8. ¿Imatataj tumpamantawan autoridades llullakuspa nenqanku?

⁸ Autoridadespis llullakuspa runasta engañallankutaj. Tumpamantawantaj autoridadesqa llullakuspa nenqanku: “Tukuy imapis allillan, ni imamanta llakikuna kanchu”, nispa. “Chaypacha paykunaj tukukuyninkoqa ujllata chayamonqa”. Chayrayku “tukuy imapis allillan” kasqanta nejtinkoqa, mana creenanchejchu tiyan. Imaraykuchus noqanchejqa allinta yachanchej, Jehová Diospa pʼunchaynin, imaynatachus uj suwa tuta jamun, ajinata jamunanta (1 Tes. 5:1-4).

9. ¿Imaraykutaj runas llullakoj kasqanku?

⁹ Kay tiempopeqa mana autoridadesllachu llullakunku. Uj rejsisqa revista jinata nin: “Runasqa churasqa kanchej llullakunanchejpaj, nitaj juchata jinachu qhawanchej”, nispa. Chay revista nillantaj: “Runasqa llullakunku mana castigasqas kanankupaj, juchankuta mana rimarinankupaj, sajra ruwayninkuta pakanankupaj, qolqeta astawan gananankupaj chayri imapipis atipanankupaj”, nispa. Chay revista nillantaj wakin runasqa amigosninkuman, familiankuman, trabajomanta compañerosninkuman chayri pillamanpis mana manchachikuspa llullakusqankuta.

10. 1) ¿Imaraykutaj runas mana wajkunapi confiayta atillankuchu? 2) ¿Jehová Diosta engañayta atisunmanchu?

¹⁰ Llulla runas kasqanrayku runasqa ni pipi confiankuchu, qhariwarmispis separakapunku. Por ejemplo qosasqa may sonqo pʼakisqa qhepakunku señoranku wajwan puñuykusqanta enterakuspa. Wakin qosastaj señorankuta wawasninkutawan llakiyta maqanku, qhaparqachanku ima. Chaywanpis wajkunaj ñaupaqenkupeqa kʼacha runasman rijchʼakunku. Paykunaqa runasta engañayta atinkuman, chaywanpis Jehová Diostaqa mana engañayta atinkumanchu. Bibliaqa nin: “Tukuy ima, paypa qhawayninpi qhatarasqa kashan, sutʼipachataj”, nispa (Heb. 4:13).

11. ¿Imatataj Ananiasmanta Safiramantawan yachakusunman? (6 paginapi kaj dibujosta qhawariy).

¹¹ Ananiasmanta Safiramantawan parlarina. Satanasqa paykunata tanqarqa apostolesman llullakunankupaj. Ananiaswan Safirawanqa jallpʼankuta venderqanku, chay vendesqankumantataj wakin qolqellata apostolesman qorqanku. Chay tiempomanta hermanoswan allinpaj qhawachikuyta munasqankuraykutaj, llullakuspa apostolesman nerqanku jallpʼa vendesqanku qolqeta enteronta jaywashasqankuta. Chaywanpis Jehová Diosqa yacharqa llullakusqankuta, chayrayku paykunata wañucherqa (Hech. 5:1-10).

12. ¿Imataj kanqa llullakoj runaswan?

¹² Diablowan, mana pesachikoj llulla runaswan imaqa, “azufre nina qochaman” wijchʼusqas kanqanku. Nisunman wiñaypaj chinkachisqa kanqanku (Apo. 20:10; 21:8; Sal. 5:6). Imaraykuchus Jehová Diosqa llulla runasta ‘millayta purejkunata jina qhawan’ (Apo. 22:15, sutʼinchaynin).

13. ¿Jehová Dios llullakojchu kasqa?

¹³ Jehová Diosqa “mana wañoj runa jinachu llullakunampaj”. “Payqa mana jaykʼaj llullakunchu” (Núm. 23:19; Heb. 6:18). Jehová Diosqa chejnikun “llulla parlaykunata” (Pro. 6:16, 17). Jehová Diosta kusichinapajqa cheqan kajtapuni parlananchej  tiyan, manataj purajmanta llullanakunanchejchu tiyan (Col. 3:9).

14. 1) ¿Llulla iglesiasmanta runas jinachu kanchej? 2) ¿Imatataj Lucas 6:45 versiculomanta yachakusunman?

¹⁴ Noqanchejqa mana llulla iglesiasmanta runas jinachu kanchej. Imajtinchus noqanchejqa mana llullata parlanchejchu (Zacarías 8:16, 17 leey). Apóstol Pablopis nerqa: ‘Diospa kamachisnin kasqanchejta rikuchinchej cheqata parlasqanchejpi’, nispa (2 Cor. 6:4, 7). Jesustaj nerqa: “Sonqopi imachus juntʼa kashan, chaymanta simeqa parlan”, nispa (Luc. 6:45). Chayrayku mana llullakunapajqa sonqonchejman cheqa kajta juntʼachinanchej tiyan. Ajinamanta trabajomanta compañerosninchejman, amigosninchejman, familiaresninchejman ima mana llullakusunchu. Kunantaj wakin ejemplosta qhawarinachej imaspichus mana llullakunachu kasqanmanta.

15. 1) ¿Allinchu kasqa puraj uya kananchej? 2) ¿Imataj jovenesta yanapanman mana mundomanta runas jina kausakunankupaj? (Sutʼinchayninta qhawariy).

¹⁵ Jóvenes, amapuni puraj uyas kaychejchu. Wakin cristiano jovenesqa, familiankuwan hermanoswan kashaspa kʼacha cristianosman rijchʼakunku. Chaywanpis escuelamanta compañerosninkuwan kashaspaqa, mundomanta runas jinallataj purinku, Internetpi redes sociales nisqapipis mana allin imasta parlanku. Wakenqa mala palabrasta parlanku, mundomanta runas jina vestikunku, mana allin musicasta uyarinku, machaykunku, drogakunku, pakayllapi novianku, waj sajra imastawan ruwanku. Chaytataj tatasninkuman, hermanosmanpis mana willankuchu. Yuyankutaj Jehová Diospis mana yachasqanta (Sal. 26:4, 5). Chaywanpis Jehová Diosqa yachan ‘simillankuwan yupaychashasqankuta, sonqonkutaj paymanta may karunchasqa kasqanta’ (Mar. 7:6). Chayrayku may allinpuni Bibliaj nisqanta kasukunanchej. Biblia nin: “Ama juchasapas imaynatachus kawsasqankuta moqʼespa qhawaychu; astawanqa Tata Diosta tukuy tiempo manchachikuy”, nispa (Pro. 23:17). *

16. Uj solicitudta juntʼachishaspa, ¿imatapis pakanachu kasqa?

¹⁶ Precursor regular kanapaj, Betel wasipi sirvinapaj chayri imaynallamantapis  Diospaj astawan llankʼanapajqa, uj solicitudta juntʼachinanchej tiyan. Chay solicitudpi tapukun onqosqaschus manachus kasqanchejta, imayna takiykunatachus uyarisqanchejta, imayna videostachus qhawasqanchejta, llimphutachus manachus kausakusqanchejta ima. Chay tapuykunamanqa ni imata pakaspa kutichinanchej tiyan (Heb. 13:18). Sajra imasta ruwarqanchej chayqa chayri imata ruwasqanchejmantapis sonqonchej juchachawanchej chayqa, ancianoswan parlarinanchej tiyan. Ajinamanta llimphu sonqowan Jehová Diosta sirvinapaj (Rom. 9:1; Gál. 6:1).

17. ¿Imatataj ruwananchej kasqa autoridades hermanosninchejmanta tapuwajtinchej?

¹⁷ Kunantaj qhawarinachej imatachus ruwana kasqanta autoridades qhatiykachawajtinchej. Ichapis paykunaqa tukuy imata hermanosninchejmanta tapuwasunman. Ajinata tapuwajtinchejqa Señorninchej Jesucristo jina ruwananchej tiyan. Jesusqa Romamanta autoridad tapushajtin chʼinlla qhepakorqa (Mat. 27:11-14). Noqanchejpis Jesús jinallataj rikukuspaqa chʼinlla kakunanchej tiyan hermanosninchejta mana imananankupaj (Pro. 10:19; 11:12). Jesusqa sumajta Bibliaj nisqasninta yacharqa. Chayrayku Biblia nin: “Uj tiempoqa tiyan chʼinyanapaj, uj tiempotaj parlanapaj”, nispa (Ecl. 3:1, 7).

18. ¿Imatataj ruwananchej kasqa ancianos juchallikoj hermanomanta tapuwajtinchej?

¹⁸ Ancianosqa congregacionta llimphuta japʼinanku tiyan. Chayrayku juchallikoj hermanomanta tapuwajtinchej, ni imata pakarispa willananchej tiyan, chay juchallikoj hermano amigonchej chayri familianchejmanta kajtinpis. Imajtinchus Biblia niwanchej: “Cheqanta parlaj testigoqa maychus kajta sutʼinchan”, nispa (Pro. 12:17; 21:28). Ancianosqa juchallikojpa ruwasqasninta sumajta yachananku tiyan. Ajinallamanta juchallikoj hermanota yanapayta atenqanku, Diosmanta mana karunchakunanpaj (Sant. 5:14, 15).

19. ¿Imatataj qhepan semana yachakusunchej?

¹⁹ Davidqa Jehová Diosman nerqa: “Qanqa munanki runa chʼuwa sonqo kananta”, nispa (Sal. 51:6). Davidqa sutʼita yacharqa Dios chʼuwa sonqo kananchejta munasqanta. Chayrayku ‘amapuni llullataqa parlanachu ujkuna ujkunawan’. Qhepan semanaqa yachakusunchej imastachus ruwananchej kasqanta mana llulla religionesmanta runas jinachu kasqanchejta rikuchinapaj.