1-3. 1) ¿Imaraykutaj ninchej Diospa amigon kayta atisqanchejta? 2) ¿Pikunamantataj kay yachaqanapi yachakusunchej?

BIBLIAJ kinsa librosnin Abraham Diospa kausaqen chayri amigon kasqanta nin (2 Cró. 20:7; Isa. 41:8; Sant. 2:23). Bibliaqa Abrahamllamanta Jehová Diospa amigon kasqanta nin. Chaytaj mana ninayanchu paylla Diospa amigon kayta atisqanta. Imaraykuchus Bibliaqa tukuyninchej Diospa amigon kayta atisqanchejta willawanchej.

² Diospa Palabran ashkha cheqa sonqo qharismanta warmismanta ima parlan, paykunaqa Diospi creerqanku, sumaj amigosnintaj karqanku (Salmo 25:14 leey). Paykunaqa apóstol Pablo nisqanman jina “chay chhika testigos[manta]” kajkuna kanku. Tukuyninkutaj Jehová Diospa amigosnin karqanku (Heb. 12:1).

³ Kunantaj Diospa kinsa amigosninmanta yachakusunchej, pikunamantachus Biblia mayta parlan. Ñaupajta Rutmanta yachakusunchej. Payqa Moab jallpʼamanta karqa, suegrantapis mayta munakorqa, viudataj karqa. Chantá Ezequiasmantañataj yachakullasuntaj. Payqa Judá llajtata kamachej, cheqa sonqotaj karqa. Chantapis Mariamanta yachakullasunchejtaj, payqa  Jesuspa maman karqa. ¿Imaynatataj paykuna Diospa sumaj amigosnin karqanku? ¿Imatataj paykunamanta yachakusunman?

4, 5. ¿Imatataj Rut ajllanan karqa, imaraykutaj chayta mana ajllayta atillarqachu? (13 paginapi dibujota qhawariy.)

⁴ Noemiqa ñojchʼasnin Rutwan, Orfawan ima Moabmanta, Israelman purirerqa. Rishaspataj Orfaqa Moabman kutipuyta ajllarqa. Chaywanpis Noemiqa Israel llajtaman kutipuyta munarqa. ¿Imatataj Rut ruwarqa? ¿Orfa jinachu familianwan kananpaj Moab jallpʼaman kutipuyta ajllanman karqa? Chayrí, ¿Noemiwanchu Belenman ripuyta ajllanman karqa? Ichapis Rutqa imatachus ruwananta mana ajllayta atillarqachu (Rut 1:1-8, 14).

⁵ Ichapis payqa Moabman kutipuy may allin kasqanta yuyanman karqa. Imaraykuchus familiaresnin Moabpi tiyakorqanku, paykunataj ichá payta qhawayta atinkuman karqa. Chantapis Rutqa llajta masisninta, llajtanpa costumbresninta, ima qallutachus parlasqankuta ima sumajta yacharqa. Chaytataj Noemiqa Israelpi mana qoyta atinmanchu karqa. Chantapis Rutta Moabman kutinanta nerqa, imaraykuchus mana wasiyojchu karqa, nitaj waj wawasnin karqachu Rutwan, Orfawan casarakunankupaj. Orfaqa “llajtanman, dioskunanmantaj kutip[orqa]” (Rut 1:9-15). Ruttajrí mana llajtanman nitaj llulla diosesninmanpis kutiporqachu.

6. 1) ¿Imatataj Rut ajllarqa? 2) ¿Imaraykutaj Booz nerqa Jehovaj lijrasnin urapi pakakusqanta?

⁶ Ichapis Rutqa Jehovamanta yachakorqa qosan chayri Noemí yachachisqanrayku. Yachakorqataj Jehová mana Moabmanta dioses jinachu kasqanta. Payqa Jehovata munakorqa, yacharqataj Jehovalla yupaychanapaj jina, munakuyta rikuchinapaj jina ima kasqanta. Chayrayku Rutqa Noemiwan Israelman ripuyta ajllarqa, Noemimantaj nerqa: “Llajtaykeqa llajtay kanqa, Diosniykipis Diosnillaytaj kanqa”, nispa (Rut 1:16). Rut, Noemita munakusqanqa mayta tʼukuchiwanchej. Jehovata munakusqantaj astawanraj tʼukuchiwanchej. Rut Jehovata munakusqanqa Booztapis tʼukuchillarqataj, paytaj aswan qhepaman Jehovaj lijrasnin urapi pakakusqanmanta allinta ruwasqanta nerqa (Rut 2:11, 12 leey). Chay nisqantaj yuyarichiwanchej uj chilwisitu mamanpaj lijarasnin urapi imamantapis jarkʼakunanpaj pakakusqanta (Sal. 36:7; 91:1-4). Ajinallatataj Jehovapis uj kʼacha tata jina Rutta jarkʼarqa, creeyninraykutaj bendicerqa. Rutqa ni jaykʼaj pesachikorqachu imatachus ajllasqanmanta.

7. Jehová Diosman manaraj qokunchejchu chay, ¿imataj chayta ruwanapaj yanapawasun?

⁷ Kunanpis ashkha runas Jehová Diosta rejsispapis, mana lijrasnin urapi pakakuyta maskʼankuchu. Nitaj yuyankuchu Diosman qokuspa bautizakuyta. Qanpis bautizakuyta mana yuyashankichu chayqa, imaschus jarkʼashasusqanpi tʼukuriy. Tukuypis uj diosta chayri waj imata sirviyta ajllanku (Jos. 24:15). Chaywanpis Jehovata sirviyta ajllananchejqa aswan sumaj. Jehovaman qokuspaqa paypi creesqanchejta rikuchinchej, paytaj pakakunanchej kanqa. Chʼampaypi rikukojtinchejpis, Rutta jina yanapawasunchej payta yupaychanallapajpuni.

8. ¿Imayna familiapitaj Ezequías uywasqa karqa?

⁸ Ezequiasqa Diospaj tʼaqasqa llajtapi nacekorqa. Chaywanpis ashkha israelitas  Diosta wasancharqanku. Chaykunamanta ujnintaj rey Ajaz karqa, Ezequiaspa tatan. Chay reyqa may sajra karqa, israelitastataj llulla dioskunata yupaychanankupaj tanqarqa. Jerusalén templotapis mana jatunpajchu qhawarqa. Wawasnintapis kausashajta ujnin diosninpaj qʼolaykucherqa. Chay wawasnenqa may llakiytachá wañorqanku. Chayrayku Ezequiasqa wawa kashaspa maytachá ñakʼarerqa (2 Rey. 16:2-4, 10-17; 2 Cró. 28:1-3).

9, 10. 1) ¿Imaraykú ichá Ezequías phiñakunman karqa? 2) ¿Imaraykú Jehovawan ni jaykʼaj phiñakunachu tiyan? 3) Tatasninchej sajra imasta ruwajtinkupis, ¿paykuna jinallatajchu ruwananchej tiyan? Sutʼinchay.

⁹ Ezequiasqa tatanta sajra imasta ruwajta rikuspa, ichapis Jehovapaj phiñakunman karqa. Kay tiemponchejpi ashkha cristianos mana Ezequiaspa chʼampayninpi jinachu rikukunku. Chaywanpis uj llakiypi rikukuspa Diospa llajtanpaj chayri Jehovapaj mayta phiñakunku (Pro. 19:3). Wakintaj familiaresninku Diosta mana kasukusqankurayku, paykunapis mana kasukunankuta chayri tatasninku jinapuni ruwananku kasqanta yuyanku (Eze. 18:2, 3). ¿Chay cheqachu?

¹⁰ Chay mana cheqachu kasqanta Ezequiaspa kausaynin rikuchiwanchej. Ni jaykʼaj Jehovawan phiñakunachu. Imaraykuchus mana paychu juchayoj runas sajra imaspi rikukusqankumanta (Job 34:10). Cheqamantapuni nisunman tatasqa wawasninkuta kʼacha runas chayri sajra runas kanankupaj tanqayta atisqankuta (Pro. 22:6; Col. 3:21). Chaywanpis kayqa mana ninayanchu tatasninchej imatachus ruwanku chaytapuni ruwananchej kasqanta. Imaraykuchus Jehovaqa sapallanchejmanta imatapis ajllayta atinanchejpaj jina ruwawarqanchej. Chayrayku imayna runachus kayta, imatachus kausayninchejwan ruwaytapis ajllayta atinchej (Deu. 30:19). ¿Imatataj Ezequías ruwarqa?

11. ¿Imaraykutaj Ezequías Israelmanta aswan kʼacha rey karqa?

¹¹ Ajazqa Judamanta tukuynin reyesmanta manchay sajra karqa, Ezequiastajrí tukuynin reyesmanta manchay kʼacha karqa (2 Reyes 18:5, 6 leey). Ezequiasqa  mana munarqachu tatan jina ruwayta. Astawanpis Jehovaj profetasnin Isaiasta, Miqueasta, Oseasta ima kasukorqa. Chaytaj imatachus tatan ruwasqanta chinkachinanpaj yanaparqa. Diospa templonta llimphucharqa, Diosmanta mañakorqa israelitaspa juchasninta perdonananta, llulla diosesninkutapis chinkacherqa (2 Cró. 29:1-11, 18-24; 31:1). Asiriamanta rey Senaquerib Jerusalenman maqanakoj rinanta nejtintaj, payqa sinchʼi creeyniyoj kasqanta, mana manchachikoj kasqanta ima rikucherqa. Llajtatapis Jehová salvananpi atienekunankupaj yanaparqa (2 Cró. 32:7, 8). Uj kutitaj runaykachasqanmanta Jehová kʼamejtin llampʼu sonqowan japʼikorqa (2 Cró. 32:24-26). Rikunchej jina tatan jina sajra imasta ruwananmantaqa, Jehová Dioswan amigos kayta ajllarqa. Cheqamantapuni pay jina ruwanapaj mayta kallpachakusunman.

12. ¿Imatataj Ezequías jina ashkha cristianos ajllanku?

¹² Kay sajra pachapi runasqa rumi sonqos kanku, chayraykutaj tatasqa wawitasninkuta mana munakuywanchu uywanku, nitaj ima sajra ruwaykunamantapis jarkʼankuchu (2 Tim. 3:1-5). Ajinapi ashkha cristianos uywasqas kaspapis, Dioswan masichakuyta ajllanku. Ezequías jinallataj, paykunapis mana tatasninku jinapunichu ruwananku kasqanta rikuchinku. Jehová Diosqa ima ruwaytapis sapallanchejmanta ajllayta atinanchejpaj jina ruwawarqanchej. Chayrayku Ezequías jina Jehovata sirviyta, jatunchayta ima ajllayta atinchej.

13, 14. 1) ¿Imastaj Mariata llakichinman karqa? 2) ¿Imatataj María ángel Gabrielman nerqa?

¹³ Ezequías kausasqanmanta ashkha watasninman, uj llampʼu sonqo sipas Jehovawan sumajta masichakorqa. Sutintaj María karqa, uj sumaj ruwaytataj Diosmanta japʼerqa. Chay sipasqa Diospa khuyakuyninta tarisqanrayku wijsayoj rikhurerqa, uj qhari wawata nacechikorqa, uywarqataj, chay wawaqa Jehová Diospa wawan karqa. Jehovaqa maytachá chay sipasta munakorqa, wawanta uywapunanpi atienekunanpaj. Chaywanpis, ¿imaynatá María chay sumaj ruwayta japʼerqa?

¹⁴ Mariaman uj sumaj ruwayta Jehová Dios qosqanmanta sapa kuti parlarinchej. Chaywanpis, ¿tʼukurerqanchejchu imaschus Mariata llakichinanpi? Sutʼincharinapaj, ángel Gabrielqa nerqa uj qhariwan mana puñuykuspalla uj milagronejta onqoj rikhurinanta. Chaywanpis chay angelqa Mariaj familiaresninman, vecinosninman ima, chayta mana sutʼincharqachu. ¿Imatataj paykuna yuyankuman karqa chayta yachaspa? ¿Imaynatataj Joseman  mana wasanchasqanta willanman karqa? Mariaqa Diospa wawanta uywanan karqa. Mana tukuy llakiykunasninmanta yachaspapis, ángel Gabrielwan parlasqanmanta qhepaman imatachus ruwasqallanmanta yachanchej. Pay nerqa: “Noqaqa Señorpa kamachin kani. Diospa munaynin ruwasqa kachun noqapi nisqaykiman jina”, nispa (Luc. 1:26-38).

15. ¿Imaraykutaj María sinchʼi creeyniyoj karqa?

¹⁵ Mariaqa sinchʼi creeyniyojpuni karqa. Payqa imatachus Jehová ruwananta kamachisqanta, uj kamachi jina ruwayta munarqa. Atienekorqataj Jehová Dios qhawananpi, jarkʼananpi ima. ¿Imaraykutaj María sinchʼi creeyniyoj karqa? Payqa mana Diospi creespañachu necekorqa. Astawanpis maytachá kallpachakorqa sinchʼi creeyniyoj kananpaj. Chayta ruwasqanraykutaj Jehová bendicerqa (Efe. 2:8). ¿Imaynatataj María sinchʼi creeyniyoj kananpaj kallpachakusqanta yachanchej? Imaynatachus uyarisqannejta, imamantachus parlasqannejta ima. Chaykunatataj kunan qhawarina.

16. ¿Imaynatá yachanchej María sumajta uyarisqanta?

¹⁶ Imaynatachus uyarisqan. Bibliaqa “uyariyta yachaychej, amataj anchata parlaychejchu” niwanchej (Sant. 1:19, 20). Mariaqa uyariyta yachaj. Bibliaqa rikuchin imatapis sumajta uyarisqanta, astawantaj imastachus Jehová Diosninchejmanta yachakusqanta. Chay imaspi tʼukurinanpajtaj tiempochakoj. Sutʼincharinapaj, Jesús nacekojtin, michejkuna willarqanku imatachus Jesusmanta uj ángel nisqanta, chay nisqankupitaj María sumajta tʼukurerqa. Chantá tʼukurillarqataj Jesús 12 watayoj kashaspa imatachus nisqanpi. Chay iskay kutispi sumajta uyarerqa, imatachus uyarisqanpitaj tʼukurerqa, ni jaykʼajtaj qonqarqachu (Lucas 2:16-19, 49, 51 leey).

17. ¿Imatataj yachakunchej Mariaj nisqanmanta?

¹⁷ Imastachus nisqan. Imastachus Mariaj nisqanqa mana anchata Bibliapi rikhurinchu. Kay Lucas 1:46-55 versiculosllapi astawan rikhurin. Chaytaj rikuchiwanchej Diospa Palabranta María sumajta rejsisqanta. ¿Imaraykú chayta ninchej? Imaraykuchus paypa nisqan yuyarichiwanchej, Samuelpa maman Ana mañakuyninpi ima palabrastachus oqharisqanta (1 Sam. 2:1-10). Mariaqa Lucas 1:46-55 versiculospi 20 kutista jina Diospa Palabranta oqharerqa. Chantapis payqa Amigon Jehovamanta ashkha imasta yachakorqa, chaykunamanta parlariytaj mayta gustaj.

18. ¿Imaynatataj María jina ruwasunman?

¹⁸ Maykʼajllapis Jehovamanta uj sumaj ruwayta japʼispa mana juntʼayta atinanchejta yuyanchej chayqa, María jina ruwana, chay ruwayta llampʼu sonqowan japʼikuna, Jehová chay ruwayta juntʼanapaj yanapanawanchejpitaj atienekuna. Chantapis María jina Jehová yachachiwasqanchejta uyarina, paymanta yachakusqanchejpi, imatachus aswan qhepaman ruwananpi ima tʼukurina. Chaykunamanta wajkunaman willarinapajtaj kallpachakuna (Sal. 77:11, 12; Luc. 8:18; Rom. 10:15).

19. Jehovaj amigosnin jina ruwasunchej chayqa, ¿imatataj tarisunchej?

¹⁹ Rut, Ezequías, María ima, Abraham jinallataj Jehovaj sumaj amigosnin karqanku. Paykuna, ñaupa tiempomanta Diospa waj kamachisnin ima “chay chhika testigos[manta]” kanku. Paykunapis Jehová Diospa sumaj amigosnillantaj karqanku. Noqanchejpis paykuna jina ruwanallapuni (Heb. 6:11, 12). Chayta ruwasunchej chayqa, Jehovawan wiñaypaj masichakusunchej.