1, 2. ¿Imaraykú Jonatán Davidta munakusqan tʼukunapaj jina?

JONATANQA tʼukulla kasharqa. Imaraykuchus tatan Saulpa ñaupaqenpi mana manchachikoj waynuchitu Goliatpa “uman aysarisqa” kasharqa. Chay waynuchitoqa David karqa, Goliattataj wañucherqa (1 Sam. 17:57). Jonatanqa sutʼita yacharqa Davidwan Jehová kashasqanta, chaymantapachataj Davidwan sumaj amigos karqanku. Purajmanta cheqa sonqo kanankupajtaj uj tratota ruwarqanku (1 Sam. 18:1-3). Jonatanqa tukuy kausayninpi Davidta mana wasancharqachu.

² Jonatanqa Davidta munakullarqapuni Saulpa cuentanmanta rey kananpaj Davidta Jehová Dios ajllajtinpis. Chantá Saúl Davidta wañuchinanpaj maskʼajtinpis Jonatanqa Davidmanta llakikorqa. Yacharqataj David chʼin pampapi Hores qayllapi pakakushasqanta, chayrayku chay lugarman rerqa Jehovapi atienekunallanpajpuni kallpacharej. Jonatán Davidman nerqa: “Ama manchachikuychu; tatay Saúlqa mana taripayta atisonqachu. Qanqa Israelpa reynin kanayki tiyan, noqataj qampa qhepaykipi  kasaj yanapasunaypaj”, nispa (1 Sam. 23:16, 17).

3. ¿Imataj Jonatanpaj aswan sumaj karqa, imaynatá chayta yachanchej? (21 paginapi dibujota qhawariy.)

³ Mana wasanchaj runastaqa jatunpaj qhawanchej. Jonatantapis jatunpaj qhawanchej mana Davidman cheqa sonqo kasqanraykullachu, manaqa Jehovaman cheqa sonqo kasqanrayku. Paypajqa Jehovaman cheqa sonqo kay aswan sumaj karqa rey kananmanta nisqaqa. Chayrayku Davidta munakorqa, nitaj enemigonta jinachu qhawarqa. Chantapis Jehovapi atienekunallanpajpuni yanaparqa. Iskayninku Jehovaman cheqa sonqosllapuni karqanku, nitaj paykunapurapis wasanchanakorqankuchu. Tratota ruwasqankutapis juntʼarqanku, chay tratopi nerqanku: “Señor kaytaqa rikuchun qanwan noqawan sumajta kausakunanchejpaj. Jinallataj kachun qampa wawasniykiwan, noqaj wawasniywampis wiñaypaj”, nispa (1 Sam. 20:42).

4. 1) ¿Imataj kusisqa, sonqo juntʼasqa kanapaj ima yanapawasunchej? 2) ¿Imatá kay yachaqanapi yachakusunchej?

⁴ Noqanchejpis familianchejman, amigosninchejman, qotuchakuymanta hermanosman ima cheqa sonqos kananchej tiyan (1 Tes. 2:10, 11). Astawantaj Jehová Diosman, imaraykuchus pay kausayta qowanchej (Apo. 4:11). Jehovaman cheqa sonqo kaspaqa, kusisqas, sonqo juntʼasqas ima kasunchej. Chʼampaykunapipis Jehovaman cheqa sonqo kananchej tiyan. Kay yachaqanapeqa yachakusunchej imaynatachus Jonatanpa kausaynin Jehovaman cheqa sonqo kananchejpaj kaykunapi yanapawasqanchejta: 1) kamachinapaj atiyniyoj kajkunata jatunpaj qhawayta mana atillajtinchej; 2) pimanrajchus cheqa sonqo kayta ajllananchej kajtin; 3) uj anciano qhasimanta imatapis niwajtinchej; 4) imatachus nisqanchejta mana juntʼayta atejtinchej ima.

5. ¿Imaraykú israelitas Jehovaman mana cheqa sonqos kayta atillarqankuchu?

⁵ Jonatán, israelitas ima may llakiypi kasharqanku, Saúl Diospa “kamachina tiyanampi” tiyasqa kashaspa, sajra imasta ruwashasqanrayku (1 Cró. 29:23). Jehovaqa mana kasukusqanrayku Saulta qhesacharqa (1 Sam. 15:17-23). Jinapis ashkha watasta kamachinanta saqerqa. Chayrayku israelitasqa Jehovaman cheqa sonqo kayta mana atillarqankuchu.

6. ¿Imaynatá yachanchej Jonatán Jehovaman cheqa sonqollapuni kasqanta?

⁶ Jonatanqa Jehovaman cheqa sonqollapuni karqa. Chayta yachanchej Saúl mana kasukuyta qallarisqanmanta qhepaman imatachus ruwasqanpi (1 Sam. 13:13, 14). Chay tiempopeqa filisteos israelitaswan maqanakoj rerqanku 30.000 maqanaku carretasninkuwan, israelitastaj 600 soldadosniyojlla karqanku. Chantá Saulwan, Jonatanwan imalla maqanakupaj armasniyoj karqanku. Jinapis Jonatanqa mana manchachikorqachu. Yuyarikorqataj profeta Samuelpa nisqanta, Samuel nerqa: “Tata Diosqa sutinta jatunchananrayku mana saqesonqachejchu”, nispa (1 Sam. 12:22). Jonatanqa armasninta apaykachapoj kamachinta nerqa: “[Jehovapajqa] atikullan atipachinawanchej ashkha runaswampis, chayri pisiswampis”, nispa. Iskayninkutaj 20 soldadosta jina wañucherqanku. Jonatanqa Jehovapi mayta atienekorqa, Jehovataj mayta bendicerqa. Jinallapi jallpʼa ikhakorqa, chaywantaj Jehovaqa maytapuni filisteosta mancharichispa kharkaticherqa, paykunapurataj maqanakuspa tukuchinakorqanku, israelitastaj chay maqanakupi atiparqanku (1 Sam. 13:5, 15, 22; 14:1, 2, 6, 14, 15, 20).

7. ¿Imaynatá Jonatán tatanta qhawarqa?

⁷ Saúl, Jehová Diosta niña kasukojtinpis,  Jonatanqa payta atikusqanman jina kasukullarqapuni. Sutʼincharinapaj, Jehovaj llajtanta jarkʼanankurayku tatanwan khuska enemigosninkuwan maqanakoj rerqa (1 Sam. 31:1, 2).

8, 9. ¿Imaraykú kamachinawanchejpaj pikunatachus Jehová churan chaykunata respetananchej tiyan?

⁸ Noqanchejpis Jonatán jina Jehovaman cheqa sonqos kasunman, suyunchejpi kamachejkunata atikusqanman jina kasukuspa. Jehovaqa chay ‘kamachejkuna’ kananta saqen, munantaj respetananchejta (Romanos 13:1, 2 leey). Chayrayku tukuy kamachejkunata respetanchej, mana respetanapaj jina kajtinkupis. Jehová munallantaj kamachinawanchejpaj pikunatachus churan chaykunata respetananchejta (1 Cor. 11:3; Heb. 13:17).

⁹ Sudamericamanta hermananchej Olgaqa, qosan mayta ñakʼarichejtinpis Jehovaman cheqa sonqollapuni karqa. ^[1] Wakin kutis qosan mana parlapajchu chayri Jehovaj testigon kasqanrayku sonqonta nanachinanpaj jina imatapis nej. Chantapis saqerparinanta, wawasnintapis apakapunanta nerqa. Jinapis Olgaqa ‘mana sajrallawantajchu’ kuticherqa. Astawanpis sumaj warmi kananpaj mayta kallpachakorqa. Qosanpaj waykʼupoj, ropasninta tʼajsapoj, familiaresnintapis qhawaysej (Rom. 12:17). Atispataj qosan familiaresninta, amigosninta waturej riyta munajtin, paywan khuska rej. Suegron waj llajtapi wañupojtinpis, chayman rinankupaj tukuy imata wakicherqa. Suegronta pʼampanankupaj misa kajtintaj mana iglesiaman yaykorqachu. Ashkha watasninmantaj qosanqa niña ñaupajpi jinachu ñakʼaricherqa. Olga qosanwan pacienciakusqan, jatunpaj qhawasqan ima mana qhasichu karqa. Imaraykuchus kunanqa tantakuykunaman rinanpaj qosan kallpachan, pusan ima. Wakin kutistaj tantakuykunapipis qhepakun (1 Ped. 3:1, 2).

10. ¿Imaynatá Jonatán yacharqa pimanrajchus cheqa sonqo kananta?

¹⁰ Saúl Davidta wañuchiyta munasqanta nejtin, Jonatanqa pimanrajchus cheqa sonqo kananta ajllanan karqa. Payqa tatanman cheqa sonqo kayta munarqa, jinallataj  Davidmanpis. Yacharqataj Davidta Jehová yanapashasqanta, nitaj Saultachu. Chayrayku Davidman cheqa sonqo kayta ajllarqa. Willarqataj tatan wañuchiyta munashasqanrayku pakakamunanta, chantapis tatanman Davidta mana wañuchinanta nerqa (1 Samuel 19:1-6 leey).

11, 12. ¿Imaynatá Jehovata munakusqanchej payman cheqa sonqo kanapaj yanapawanchej?

¹¹ Jehovata munakunchej chayqa, payman astawan cheqa sonqos kasunchej nitaj pi runamanpis. Australiamanta Alice sutiyoj hermanapis pimanchus cheqa sonqo kananta ajllanan karqa. Bibliata estudiayta qallarispa yachakushasqanmanta familiaresninman willarqa. Uj pʼunchaytaj imaraykuchus Navidadta niña ruwananta willarqa. Chayta yachaspa familiaresnenqa mayta llakikorqanku, chaywanpis aswan qhepaman paypaj mayta phiñakorqanku. Yuyarqankutaj paykunata mana munakusqanta. Mamanpis niña payta rikuyta munasqanta nerqa. Alice nin: “May llakisqa kasharqani, sonqoy maytapuni nanawarqa, imaraykuchus familiayta sinchʼita munakuni. Jinapis Jehovata, Jesusta ima kausayniypi ñaupajman churayta munarqani, chayrayku qhepan jatun tantakuypi bautizakorqani”, nispa (Mat. 10:37).

¹² Jehovata munakunchej chayqa, payman astawan cheqa sonqos kasunchej. Nitaj suyunchejmanchu, colegionchejmanchu, pelotata jaytʼaj equiponchejmanchu. Sutʼincharinapaj, Henryta colegionmanta equiponwan ajedrezta pujllay gustaj, chayta pujllaspataj colegionmanta equiponwan ganayta munarqa. Sapa semana tukukuyta ajedrezta pujllasqanrayku, tantakuykunaman, willayman ima mana riyta atejchu. Henryqa Jehovaman cheqa sonqo kananmantaqa, colegionman astawan cheqa sonqo kashasqanta repararqa. Chayrayku ajedrez pujllayta saqeporqa (Mat. 6:33).

13. ¿Imatataj ruwarqa Ken sutiyoj hermano familianpi allinta kausakunankupaj?

¹³ Wakin kutisqa familia ukhupi pimanrajchus munakuyninchejta rikuchinanchejta mana ajllayta atillanchejchu. Sutʼincharinapaj, Ken sutiyoj hermano nin: “Mamayta viejitaña kasqanrayku astawan waturikoj riyta, noqaykuwan wakin kutis qhepakunanta ima munarqani. Chaywanpis warmiywan mamaywanqa mana allintachu kausakoj kanku. Chayrayku mana atillajchu kani ujllapi mamayta warmiyta ima kusichiyta”, nispa. Kenqa imatachus Biblia nisqanpi tʼukurerqa, repararqataj chay kutipi warminta kusichinan kasqanta, cheqa sonqo kanan kasqanta ima. Chantá warminwan parlarerqa imaraykuchus mamanwan kʼacha kanan kasqanta. Mamanwanpis parlarillarqataj imaraykuchus warminta jatunpaj qhawanan kasqanta (Génesis 2:24; 1 Corintios 13:4-6 leey).

14. ¿Imaynatá Saúl Jonatanta qhawarqa?

¹⁴ Jehovaman cheqa sonqo kallasunmantaj mayqen ancianollapis qhasimanta imatapis niwajtinchej. Saúl Diospa ajllasqan rey kajtinpis wawanta ñakʼaricherqa. Nitaj entienderqachu imaraykuchus Jonatán, Davidta munakusqanta. Chayrayku mayta phiñakorqa Davidta Jonatán yanapayta munajtin, tukuypa rikunantataj Jonatanta kʼumuykachacherqa. Jinapis Jonatanqa tatanta respetallarqapuni. Jehovamanpis, Davidmanpis cheqa sonqollapuni karqa. Imaraykuchus Davidqa Israel llajtaj reynin kanan karqa (1 Sam. 20:30-41).

15. Mayqen ancianollapis qhasimanta imatapis niwajtinchej, ¿imatataj ruwananchej tiyan?

¹⁵ Ancianosqa tukuyta allinpaj qhawanankupaj kallpachakunku. Pantaj runas kasqankuraykutaj ichá mana entiendeyta atillanqankuchu  imaraykuchus imatapis ruwasqanchejta (1 Sam. 1:13-17). Chayrayku maykʼajllapis mayqen ancianollapis qhasimanta imatapis niwajtinchej, Jehovaman cheqa sonqollapuni kana.

16. ¿Imaspitaj Diosman cheqa sonqo kasqanchejta rikuchisunman?

¹⁶ Saulqa Jonatán rey kananta munarqa (1 Sam. 20:31). Chaywanpis Jonatanqa Jehovata mayta munakorqa, paymantaj cheqa sonqo kayta munarqa. Chayrayku rey kayta maskʼananmantaqa Davidpa amigon kayta ajllarqa, Davidwan tratota ruwasqantapis juntʼarqa. Jonatán jina Jehovata munakusun, cheqa sonqotaj kasun chayqa ‘mana allin riwajtinchejpisʼ, imatachus nisqanchejta juntʼasunchej (Sal. 15:4). Jehovaman cheqa sonqos kasqanchejrayku, imatachus nisqanchejta juntʼasunchej. Sutʼincharinapaj, uj negociopaj uj contratota ruwanchej chayqa mana juntʼayta atinapaj jina kajtinpis juntʼananchej tiyan. Qhariwarmi kausayninchejpi chʼampaykuna kajtinpis, Jehovata munakusqanchej yanapawasunchej warminchejta chayri qosanchejta munakunallapajpuni (Malaquías 2:13-16 leey).

17. ¿Imatataj kay yachaqanapi yachakunchej?

¹⁷ Jonatán jina Jehovaman cheqa sonqos kayta munanchej, nitaj allinnillanchejta maskʼayta munanchejchu. Chayrayku hermanosninchejta munakunallapuni wakin kutis pantajtinkupis. Jehovaman cheqa sonqollapuni kanachej chʼampaykunapi rikukuspapis. Ajinamanta Jehovata kusichisunchej, noqanchejpis kusikullasuntaj (Pro. 27:11). Yachanchejtaj Jehová ni jaykʼaj saqerparinawanchejta, tukuy imata noqanchejrayku ruwananta ima. Qhepan yachaqanapi yachakusunchej Davidpa tiemponpi wakin runas Diosman cheqa sonqo kasqankumanta, wakintaj mana.