¿IMA pʼunchaytaj qanpaj may sumaj karqa? ¿Casarakusqayki pʼunchaychu? ¿Ñaupaj wawitayki nacekusqan pʼunchaychu? Chayrí, ¿bautizakusqayki pʼunchaychu? Bautizakusqayki pʼunchay may sumaj karqa chayqa, maytachá kusikorqanki. Chay pʼunchayqa qotuchakuymanta hermanospis Jehovata tukuy sonqoykiwan, tukuy yuyayniykiwan, tukuy kallpaykiwan munakusqaykita rikuspa maytachá kusikullarqankutaj (Mar. 12:30).

Cheqamantapuni nisunman bautizakusqaykimantapacha Jehovata sirvispa mayta kusikusqaykita. Chaywanpis wakin hermanosqa manaña ñaupajpi jinachu Jehovata kusiywan sirvinku. ¿Imaraykú? Chantá, ¿imasraykutaj Jehovata kusiywan sirvinallanchejpuni tiyan?

Reinomanta willayqa mayta kusichiwanchej. Imaraykuchus Jehová kay sajra pachata chinkachinanta, paraisota apamunanta ima niwanchej. Sofonías 1:14 versículo nin: “Tata Diospa jatun pʼunchaynenqa qayllamushanña. Qayllapiña kashan, usqhayllatataj chayamushan”, nispa. Chaywanpis imatachus suyakusqanchej mana usqhayta chayamojtenqa, ichapis manaña kusisqachu kasunman. Niñataj ñaupajpi jinachu Diostapis sirvisunman (Pro. 13:12).

Qotuchakuymanta hermanoswan khuska kayqa Jehovata kusiywan sirvinapaj yanapawanchej. Diospa llajtan llimphu kausayniyoj kasqan ichapis Jehovata yupaychanapaj, payta kusiywan sirviyta qallarinapaj ima yanapawarqanchej (1 Ped. 2:12). Chaywanpis qotuchakuymanta uj hermano chayri uj hermana Diospa kamachiykunasninta mana kasukusqanrayku qharqochikojtin, ichá wakin hermanosta qʼenaqachinman, niñataj Jehovata kusisqachu sirvinkuman.

Qhapaj kayta maskʼaypis kusiyninchejta chinkachillanmantaj. ¿Imaynamantá? Satanaspa sajra pachanqa mana necesitasqanchej imasta rantinapaj tanqawanchej. Jesuspa nisqanta yuyarikuna, pay nerqa: “Mana pipis atinchu iskay patronesta ujllapi sirviyta, imaraykuchus ujninta chejnenqa, ujnintataj munakonqa; chayri, ujninman kʼaskakonqa, ujnintataj qhesachanqa. Mana atinkichejchu ujllapi sirviyta Diosta, qhapaj kaytawan”, nispa (Mat. 6:24). Qhapaj kayta maskʼashaspaqa,  mana atisunmanchu Diosta kusiywan sirvillaytapuni.

Jehovata munakojkunaqa payta sirviyta mana llasa qʼepita jinachu qhawanku (1 Juan 5:3). Imatachus Jesús nisqanta yuyarina, pay nerqa: “Noqaman jamuychej, tukuy saykʼusqa kajkuna, llasa qʼepiyojkuna ima, noqataj samarichisqaykichej. Yugoyman churakuychej, yachaqakuychejtaj noqamanta. Noqaqa kʼacha, llampʼu sonqotaj kani, almasniykichejpajtaj samakuyta tarinkichej, imaraykuchus yugoyqa llampʼulla, qʼepiypis chhallalla”, nispa (Mat. 11:28-30). Arí, cheqa cristiano kayqa mayta kusichiwanchej. Imasraykuchus Jehovata sirvispa kusikusqanchejmanta, kinsa imasta qhawarina (Hab. 3:17, 18).

Jehovaqa kusikuyniyoj Dios, pay ruwawarqanchej (Hech. 17:28; 1 Tim. 1:11, NM). Bautizakusqanchejmanta ashkha watasña kajtinpis, Jehovata kusiywan sirvishallanchejpuni, pay ruwawasqanchejrayku.

Héctor hermanonchejmanta parlarina. Payqa qotuchakuykunata waturej jina 40 watasta llankʼarqa. Machituña kaspapis, warmin onqosqa kasqanrayku Jehovapaj pisillataña llankʼaspapis, Jehovata kusiywan sirvishallanpuni (Sal. 92:12-14). Pay nin: “Warmiy pisimanta pisi astawan onqosqanrayku llakikojtiypis, mana qhawayta atillajtiypis, Jehovata kusiywan sirvishallanipuni. Jehová kausayta qowasqanta, imapajchus runasta ruwasqanta yachayqa Jehovata astawan munakunaypaj, tukuy sonqo sirvinaypaj ima yanapawan. Chantapis kusiyniyta mana chinkachinaypaj willayman rinipuni, Diospa Reinonpi yuyanaypajtaj kallpachakuni”, nispa.

Jehová juchamanta, wañuymantawan kacharichiwanchej. Biblia nin: “Diosqa chay jinatapuni kay pachapi kaj chhikata munakusqanrayku, uj kʼata Churinta qorqa. Ajinamanta pillapis paypi creejqa mana chinkayman renqachu, astawanqa wiñay kawsayniyoj kanqa”, nispa (Juan 3:16). Jesuspa wañuyninpi creesunchej chayqa, juchasninchej perdonasqa kanqa, wiñaypajtaj kausakuyta atisunchej. Kaykunapi tʼukureyqa Jehovaman agradecekunapaj, kusiywan sirvinapaj ima yanapawanchej.

México suyumanta hermanonchej Jesús nin: “Ashkha qolqeta ganayta munasqayrayku astawan llankʼaj kani. Chaywanpis Jehovamanta, wawanta noqanchejrayku kachamusqanmanta ima yachakorqani. Chayraykutaj Jehovata sirviyta munaspa payman qokuspa bautizakorqani. Uj  empresapi 28 watastaña llankʼaspapis, Jehovapaj tiempo juntʼasqata llankʼanayrayku, chay empresapi llankʼayniyta saqerqani”, nispa. Ajinamanta chay hermanoqa Jehovata kusiywan sirviyta qallarerqa.

Llimphu kausayniyoj kayqa kusichiwanchej. ¿Niraj Jehovata rejsishaspa imaynachus kausayniyki kasqanta yuyarikunkichu? Apóstol Pabloqa Romamanta cristianosta “ñaupajta juchaj wata runasnin ka[sqankuta]” nerqa. Chaywanpis chay cristianosqa “cheqan kajpa kamachisninman tuk[orqanku]”. Imaraykuchus llimphu kausayniyoj karqanku, wiñay kausaytataj suyakusharqanku (Rom. 6:17-22). Noqanchejpis Jehovaj kamachiykunasninta kasukusqanchejrayku mana khuchichakuypi, maqanakuykunapi urmanchejchu, ajinamantataj llakiykunamanta jarkʼakunchej. Chaytaj mayta kusichiwanchej.

Kunantaj Jaimemanta parlarina, payqa boxeador karqa. Nitaj Diospi creejchu, kausay jinallamanta rikhurisqanpitaj creej. Tantakuykunaman riyta qallarishaspataj, hermanos ukhupi munanakuy kasqanta rikuspa mayta tʼukorqa. Ñaupa kausayninta saqenanpajtaj Jehovamanta yanapata mañakorqa paypi creenanpaj. Jaime nin: “Pisimanta pisi yachakorqani Dios munakuyniyoj, khuyakuyniyoj Tata kasqanta. Cheqan kamachiykunasnenqa mayta jarkʼawan. Ñaupa kausayniyta mana saqeymanchu karqa chayqa, ñaupaj amigosniy jina wañuymanña karqa. Tukuy kausayniymanta nisqaqa Jehovata sirvispa astawan kusikuni”, nispa.

Kay sajra pachaj tukukuyninta suyashaspa, ¿imatataj ruwananchej tiyan? Diospa munayninta ruwasunchej chayqa, wiñay kausayta japʼisunchej. “Chayrayku ama saykʼunachu allin kajta ruwaspa, imaraykuchus mana saykʼuspa trabajallasunchejpuni chayqa, maychus tiempompi sumaj poqoyta oqharisun” (Gál. 6:8, 9). Jehovaj yanapayninwan sinchʼita sayanallapuni, jatun ñakʼariy tiempopajpis kʼacha kaykunata wiñachinapaj kallpachakunallapuni, Jehovatapis kusiywan sirvinallapuni (Apo. 7:9, 13, 14; Sant. 1:2-4).

Sinchʼita sayajtinchejqa Jehová bendeciwasunchej. Imaraykuchus payqa mana qonqanchu payta, sutinta munakusqanchejrayku imastachus ruwasqanchejmanta. Payta kusiywan sirvillasunpuni chayqa, salmista David jina nisunchej, pay nerqa: “Tata Diospipuni yuyani; pay pañaypi kajtin, mana imapis urmachiwanqachu. Chayrayku, sonqoy ukhupi may kusisqa kani. Tukuy kayneyqa qampi suyaspa samarikonqa”, nispa (Sal. 16:8, 9).