Arí, sajra angelesqa kankupuni. ¿Imaynatá rikhurerqanku? Jehová Diosqa angelesta ruwarqa imatapis ajllayta atinankupaj jina. Jehovaqa Adantawan Evatawan ruwarqa. Chaymanta pisi tiemponmantaj uj ángel munayninman jina ruwayta qallarerqa. Adantawan Evatawantaj Diospa contranpi oqharikunankupaj tanqarqa (Génesis 3:1-7; Apocalipsis 12:9). Bibliaqa mana ninchu imachus chay angelpa sutin kasqanta, nillataj ninchu Diospa contranpi niraj oqharikushajtin imatachus cielopi ruwasqanta. Jinapis Bibliaqa nin Diospa contranpi oqharikusqanrayku chay ángel Satanasman tukusqanta, chay sutitaj “Churanakoj” niyta munan. Chantá nillantaj Kuraj Supayman tukusqanta, chay sutitaj “Llullakuspa Tumpaj” niyta munan (Mateo 4:8-11).

Llakikunapaj jina Diospa contranpi oqharikoyqa qallarerqa. Noej tiemponpi ashkha angelesqa cielomanta kay jallpʼaman uraykamorqanku, runasman tukuspataj millay imasta ruwarqanku. Ajinamanta manaña imapajchus ruwasqas kasqankuman jinachu kausarqanku (Judas 6; Génesis 6:1-4; 1 Pedro 3:19, 20).

¿Imá karqa chay sajra angeleswan? Chay angelesqa Jehová Dios kay jallpʼata llimphuchananpaj jatun parata apamojtin, aycha cuerponkuta saqespa cieloman kutiporqanku. Jinapis Jehová Diosqa chay sajra angelesta manaña saqerqachu tiyakorqanku chay lugarman yaykojta. Astawanpis tuti laqhaman cadenaswan wataykuspa wijchʼuykorqa, “Tártaro” nisqaman (Judas 6; 2 Pedro 2:4). Supaykunaqa Satanaspa atiyninpi kashanku, imaraykuchus Satanasqa “supaykunaj kurajninku”, kʼacha angelmantaj “tukuyta yachan” (Mateo 12:24; 2 Corintios 11:14).

Bibliaqa niwanchej Jehová Dios 1914 watapi, Cristoj kamachiyninta sayarichisqanta. * Chaymantataj Satanás, supaykunasnin ima cielomanta kay jallpʼaman wijchʼuchikamorqanku. Kay pʼunchaykunapi khuchichakuykunata, millay sajra imasta rikusqanchejqa, supaykunaj ruwasqankuman jina kashan (Apocalipsis 12:9-12).

Millay sajra imas astawan yapakusqanqa, supaykunaj ruwaykunasnin tukukuyninman chayashasqanta rikuchiwanchej. Tumpamantawan Diospa Gobiernonqa chay supaykunaj ruwayninta sayachenqa, kay jallpʼata uj paraisoman tukuchenqa, waranqa watastataj kamachenqa. Chantá supaykunaqa ujtawan runasta pruebaman churanqanku. Chaymantataj supaykunaqa wiñaypaj chinkachisqa kanqanku (Mateo 25:41; Apocalipsis 20:1-3, 7-10).