HORATA yachanapajqa relojta qhawarinchej, ¿icharí? Pillapis “¿ima horasñataj?” nispa tapuriwajtinchejqa, tukuy imaymanamanta kutichinchej.

Una y cuarenta y cincoña kajtenqa, wakin kutis ninchej: “Las dos menos cuartoña, chayri las dosña kanqa”, nispa.

Chaywanpis Bibliata leeshaspaqa ichapis tapurikorqanchej, imaynatachus unay tiempopi horata yachasqankuta. Unay tiempomanta runasqa, ima horaschus kasqanta sumajta yachaj kanku. Chayrayku Ñaupa Testamentopi kay palabrasta oqharikun: tutamanta, chaupi pʼunchayta, chharpuyaykuyta ima (Gén. 8:11; 19:27; 43:15, 16; Deu. 28:29; 1 Rey. 18:26). Chantapis Bibliaqa, niwanchej unay tiempomanta runas horata yachanankupaj mashkhamanchus uj tutata tʼaqasqankuta.

Jaqay tiempopeqa tutasnin serenos kajpuni llajtata qhawanankupaj. Israelitasqa serenos turnakunankupaj uj tutata kinsaman tʼaqarqanku. Por ejemplo Jueces capítulo 7 versículo 19 nin, chaupi tutanejta qhawajkuna soldados cambiakusqankuta. Chaywanpis Jesuspa tiemponmanta judiosqa, romanos jina, griegos jinataj uj tutata tawaman tʼaqarqanku.

Chaytataj sutʼita reparasunman Mateo, Marcos, Lucas, Juan librospi. Por ejemplo, Mateo libropi nin: ‘Niraj sutʼiyamushajtintaj, Jesusqa yaku patata purispa yachachisqasninman qayllaykusharqa’, nispa (Mat. 14:25). Uj kutipitaj Jesús jinata nerqa: “Wasiyojchus yachanman ima horatachus suwa jamunanta chayqa, rijchʼarisqallapuni kanman, manataj saqenmanchu wasinman suwa yaykunanta”, nispa (Mat. 24:43).

Judíos uj tutata tawaman tʼaqasqankuta sutʼita reparallasunmantaj, Jesús imatachus yachachisqasninman nisqanpi. Pay nerqa: “Rijchʼarisqallapuni kaychej. Qankunaqa mana yachankichejchu maykʼajchus wasiyoj chayamunanta, chʼisintachus, chayri chaupi tutatachus, chayri gallo waqaytachus, chayri sutʼiyaytachus”, nispa (Mar. 13:35). Chʼisiyay horasqa inti yaykupusqanmanta las 9 de la nochekama karqa. Chaupi tuta horastaj las 9 de la nochemanta 12 de la nochekama karqa. Gallo waqay horasqa las doce de la nochemanta 3 de la mañanakama karqa. Ichapis chay horasta uj gallo waqarqa Pedro Jesusta negashajtin (Mar. 14:72). Sutʼiyay horasqa 3 de la mañanamanta inti llojsimunankama karqa.

Reparanchej jina unay tiempomanta runasqa, relojta mana rejsispapis horata yacharqanku.