1. ¿Jehová Dios autoridades jinachu kasqa?

AUTORIDADESQA munayninkuman jina runasta kamachinku, atiyninkuman atienekuspataj runasta ñakʼarichinku (Mat. 20:25; Ecl. 8:9). Jehová Diostajrí mana chay autoridades jinachu. Payqa may atiyniyoj kaspapis, runasta mana pisipajchu qhawawanchej. Astawanpis noqanchejwan kʼacha, sapa ujninchejmanta llakikun, yanapata necesitashajtinchejpunitaj yanapawanchej. Chantapis payqa yuyarikun jallpʼalla kasqanchejta. Yachantaj maykamallachus imatapis ruwayta atisqanchejta (Sal. 103:13, 14).

2. ¿Imastataj qhepan parrafospi yachakusunchej?

² Bibliaqa niwanchej Jehová Dios khuyakuywan kamachisninta yanapasqanta. Qhepan parrafospitaj yachakusunchej Jehová Dios Samuelta kʼachallamanta yanapasqanta. Samueltaqa yanaparqa kuraj kaj sacerdoteta juchachananpaj. Yachakullasuntaj Jehová Dios Moiseswan pacienciakusqanta. Imajtinchus Moisesqa nerqa: ‘Israelitasta mana Egiptomanta orqhomuyta atisajchu’, nispa. Chantapis yachakusunchej Jehová Dios israelitasta Egiptomanta orqhomushajtin khuyakuywan yanapasqanta. Chaykunata qhawarishaspaqa allin kanman  piensarinanchej imastachus Jehová Dios jina ruwananchejpi.

3. 1) ¿Imataj kasqa uj kutipi Samuel puñushajtin? (23 paginapi kaj dibujota qhawariy). 2) ¿Imajtintaj Jehová Dios mana sutinmantachu Samuelwan rejsichikusqa?

³ Samuelqa wawamantapacha tinkukuna toldopi Jehová Diosta sirverqa (1 Sam. 3:1). Uj kutipitaj, Samuel puñushajtin Jehová Diosqa payta wajyarqa: “Samuel”, nispa (1 Samuel 3:2-10 leey). * Samueltaj yuyarqa kuraj kaj sacertote Elí wajyamusqanta. Chayrayku Eliman usqhayta correspa, nerqa: “Kaypi kashani; imapajtaj wajyawankiri?”, nispa. Elitaj nerqa: “Mana noqaqa wajyarqaykichu”, nispa. Watejmanta Jehová Dios kinsa kutipi Samuelta wajyajtin, Samuelqa uyariytawan Eliman rillarqataj: “Kaypi kashani; imapajtaj wajyawankiri?”, nispa. Elitaj chaypacha repararqa Samueltaqa Jehová Dios wajyashasqanta. Chayrayku Samuelman nerqa: “Ujtawan Tata Dios wajyamusojtenqa, kutichiy: Parlallay Tata Dios, kay kamachiykeqa uyarishasunki”, nispa. Samueltaj Elita kasukorqa. Bibliaqa mana niwanchejchu imajtinchus Jehová Dios Samuelwan qallariymantapacha sutinmanta mana rejsichikusqanta. Ichapis Jehová Diosqa mana sutinmanta rejsichikorqachu Samuelta yanapananrayku.

4, 5. 1) ¿Samuel Diospa nisqasninta Eliman willayta atillasqachu? 2) Samuel wawallaraj kashajtin imaschus pasasqanta yachay, ¿imatataj reparachiwanchej?

⁴ (1 Samuel 3:11-18 leey). Jehová Diospa leyninpi wawasman jinata kamacherqa: ‘Machu runastaqa jatunpaj qhawaychej. Nitaj pichus llajtaykita kamachejta maldecinkichu’, nispa (Éxo. 22:28; Lev. 19:32). Chayrayku Samuelqa Diospa nisqasninta mana Eliman willayta atillarqachu. Bibliapis jinata niwanchej: “Samuelqa manchachikorqa Eliman willayta chay mosqoypi jina tukuy rikusqanta”, nispa. Chaywanpis Diosqa Samuelta yanaparqa mana manchachikuspa Eliman willananpaj. Chaypajtaj Diosqa Elita reparacherqa Samuelwan pay parlashasqanta. Ajinamantataj Eliqa Samuelman nerqa: “Tata Diosqa imatataj nisorqa? Mana uj chhikanta pakarispa willariway”, nispa. Samueltaj willarqa tukuyninta, mana uj chhikanta pakarispa.

⁵ Elitaj yacharqa Jehová Diospuni juchachashasqanta. Imajtinchus uj profeta aswan ñaupajta willarqaña ayllun castigasqa kananta (1 Sam. 2:27-36). Samuel wawallaraj kashajtin imaschus pasasqanta yachayqa, reparachiwanchej Jehová Dios may yachayniyoj kasqanta, maykamallachus imatapis ruwayta atisqanchejta entiendesqanta ima.

6. Imaynatachus Jehová Dios Samuelta yanapasqanta yachay, ¿imatataj reparachiwanchej?

⁶ Imaynatachus Jehová Dios Samuelta yanapasqanta yachayqa, reparachiwanchej Jehová Dios jovenesta sumajta entiendesqanta, llakiykunasninkutapis yachasqanta. Jovenesqa ichapis manchachikunkuman kuraj runasman predicayta chayri munankuman compañerosninku jinallataj imatapis ruwayta. Ajinapi rikukuspaqa Jehová Diospa yanapanta mañakunkuman, tukuy llakiyninkutataj willarinkuman. Imajtinchus Jehová Diosqa mayta munashan jovenesta yanapayta (Sal. 62:8). Bibliaqa ashkha jovenesmanta parlan, Samuelmanta jina. Jovenestaj paykunapi piensarinkuman. Chantapis paykuna jinallataj problemaspi rikukoj hermanoswan parlarinkuman. Chay hermanosqa ichapis willarenqanku Jehová Dios wakin kutispi tʼukunapaj jina yanapasqanta.

7, 8. ¿Jehová Dios Moiseswan pacienciakusqachu, llakiynintapis entiendesqachu?

⁷ Moisés 80 watasniyoj kashajtin, Jehová Diosqa payman nerqa: “Qanta kachasqayki Faraonman,  Israelpa miraynin wawasniyta Egiptomanta orqhomunaykipaj”, nispa (Éxo. 3:10). Moisesqa chayta uyarispa ichapis “wañusaj” nerqa. Imajtinchus payqa Madianpi 40 watasta ovejerolla karqa. Chayrayku Jehová Diosman nerqa: “Pitaj noqa kani Faraonman rispa, israelitasta Egiptomanta orqhomunaypajri?”, nispa. Diostaj kuticherqa: “Noqamin qanwan kasaj”, nispa (Éxo. 3:11, 12). Moisesman nillarqataj: “Israelita kurajkunaqa kasusonqanku”, nispa. Moisestaj kuticherqa: “Imatá paykuna chaytaqa creewanqankuri”, nispa (Éxo. 3:18; 4:1). Chayta nispa Moisesqa, rikuchisharqa manapuni Egiptoman riyta munasqanta. Chaywanpis Jehová Diosqa Moiseswan pacienciakorqa. Milagrosta ruwananpajpis atiyta qorqa. Moisesqa tukuy runasmanta nisqa ñaupajta atiyta japʼerqa milagrosta ruwananpaj (Éxo. 4:2-9, 21).

⁸ Chantá Moisesqa, Egiptoman manapuni riyta munaspa nillarqataj: “Ay, Señor. Ni jaykʼaj noqaqa runasman allinta parlayta atinichu”, nispa. Jehová Diostaj nerqa: “Noqamin simiykinejta parlasaj, yachachisqaykitaj imatachus parlanaykita”, nispa. Chayta uyarispapis Moisesqa manapuni Egiptoman riyta munarqachu. Astawanpis nerqa: “Ay, Señor. Waj runallata kachakuy ari”, nispa. Chantá Jehová Diosqa Moisespaj phiñarikorqa. Chaywanpis Moisespa llakiyninta entiendesqanrayku Aarón yanapananta nerqa (Éxo. 4:10-16).

9. ¿Imataj Moisesta yanapasqa sumaj kamachej kananpaj?

⁹ Jehová Diosqa may atiyniyoj kasqanrayku Moisesta Egiptoman kachananpaj mancharichinman karqa, munajta mana munajtataj kachanman karqa. Chaywanpis Jehová Diosqa mana chaytachu ruwarqa. Astawanpis Moiseswan pacienciakorqa, kʼacha karqa, mana saqerpanantataj nerqa. Moisestaj Jehová Dios paywan kʼacha kasqanrayku israelitasta sumajta kamacherqa. Kallpachakorqataj Jehová Dios jina kʼacha kananpaj, llampʼu sonqo kananpaj, wajkunaj llakiykunasnintapis entiendenanpaj (Núm. 12:3).

10. ¿Imatataj tatas, qosas, ancianos ima Jehová Diosmanta yachakunkuman?

¹⁰ Sichus qosa, tata chayri anciano kanki chayqa, Jehová Diosmanta mayta yachakuwaj.  Kallpachakuy Jehová Dios jina señoraykita, wawasniykita, hermanosta ima kʼachamanta parlapayanaykipaj, pacienciakunaykipaj, khuyakunaykipaj, llakiyninkuta entiendenaykipaj ima (Col. 3:19-21; 1 Ped. 5:1-3). Jehová Dios jina, Jesucristo jinataj kanki chayqa, wajkuna qayllaykamullasonqanku llakiykunasninkuta willarisunankupaj. Paykunatataj kallpachayta atillanki (Mat. 11:28, 29). Uj sumaj ejemplotaj wajkunapaj kanki (Heb. 13:7).

11, 12. ¿Imatataj Jehová Dios ruwasqa israelitas mana manchachikunankupaj?

¹¹ 1513 watapi Jesús niraj jamushajtin, israelitasqa Egiptomanta llojsimorqanku. Paykunaqa 3 millones kuraj karqanku. Paykuna ukhupitaj karqanku wawas, awelitos, onqosqas, cojitospis. Chayrayku israelitasqa uj sumaj kamachejta necesitarqanku. Paykunata kʼachallamanta pusananpaj, llakiykunasninkuta entiendenanpaj ima. Ajinatapunitaj Jehová Dios israelitasta pusarqa Moisesnejta. Israelitasta chʼin pampanejta sumajta pusarqa mana manchachikunankupaj (Sal. 78:52, 53).

¹² Chantapis Jehová Diosqa israelitas mana manchachikunankupaj paykunata sumajta organizarqa. “Israelitasqa Egiptomanta sumaj wakichisqas llojserqanku maqanakuman llojsej soldados jina” (Éxo. 13:18). Israelitasqa sumaj organizasqas kasqankurayku repararqanku Jehová Dios enemigosninkumanta jarkʼashasqanta. Chantapis Jehová Diosqa pʼunchaypi “phuyuwan paykunata pusarqa, tutantaj nina kʼanchaywan” (Sal. 78:14). Israelitasqa Jehová Diospi mayta atienekorqanku, atienekunallankupunitaj karqa.

13, 14. 1) ¿Imatataj Jehová Dios ruwasqa jatun Puka Qochapi israelitasta librananpaj? 2) ¿Imaynatataj Jehová Dios Egiptomanta soldadosta chinkarpachisqa?

¹³ (Éxodo 14:19-22 leey). Israelitasqa Puka Qocha kantuman chayaspa ni imanakuyta atisharqankuchu. Imajtinchus egipciosqa qhepankuta qhatiykusharqanku. Jinallapitaj ñaupaqenkuta risharqa, chay phuyu qhepankuman kutirimuspa, qhepankutañataj rerqa. Chay phuyoqa egipciosta laqhayaykorqa, israelitastatajrí tutan kʼancharqa. Chantá Moisesqa jatun qochanejman makinta oqharerqa, Tata Diostaj tukuy chay tuta inti llojsimuynejmanta sumajta wayrachimuspa, yakuta iskayman khallarparerqa. Israelitastaj uywasninkuwan jatun qochaj chaupinta yaykuspa, chʼaki jallpʼapi pasarqanku. Latʼituspis mana llustʼakuspa pasarqanku.

¹⁴ (Éxodo 14:23, 26-30 leey). Chantá Egiptomanta soldadospis caballosninkupi, carretasninkupi ima israelitaspa qhepanta yaykullarqankutaj. Chantá Moisesqa jatun qochata israelitaswan pasaytawan, jatun qochanejman makinta jaywarerqa, yakutaj ujllata manchay kallpawan maychus kananman kutiykaporqa. Egiptomanta soldadostaj, yakuwan pʼampaykuchikorqanku. Ajinata Jehová Diosqa Egiptomanta soldadosta yakuwan jatun qochapi chinkarparicherqa (Éxo. 15:8-10).

15. Imaynatachus Jehová Dios israelitasta Egiptomanta orqhomusqanta yachay, ¿imatataj Jehová Diosmanta yachachiwanchej?

¹⁵ Imaynatachus Jehová Dios israelitasta Egiptomanta orqhomusqanta yachayqa, reparachiwanchej Diosninchej sumajta imatapis organizasqanta, mana chʼajwas kananpaj (1 Cor. 14:33). Reparachillawanchejtaj Jehová Diosqa tukuy imaymanasmanta cuidawasqanchejta, imaynatachus uj ovejero munakuywan ovejasninta cuidan, ajinata. Jehová Diosqa enemigosninchejmanta jarkʼawanchej. Chayta yachaytaj yanapawanchej mana imamantapis manchachikuspa tiyakunapaj. Astawanraj tukukuy pʼunchaykunapi tiyakushasqanchejrayku (Pro. 1:33).

16. ¿Jehová Dios israelitasta jina salvallawasunmantajchu?

¹⁶ Jehová Diosqa kay tiempopipis kamachisninmanta  llakikun. Chayrayku payman astawan qayllaykunapaj yanapawanchej, enemigosninchejmantapis jarkʼawanchej. Jatun ñakʼariy tiempopipis jarkʼallawasuntaj (Apo. 7:9, 10). Chayrayku jóvenes kaspapis, viejitos kaspapis, onqosqas kaspapis, suchus kaspapis, mana makiyoj kaspapis jatun ñakʼariy tiempopeqa mana manchachikusunchu. * Astawanpis Jesuspa nisqanta yuyarikusunchej, pay nerqa: “Cheqanta sayaykuychej, umaykichejta oqharispa, imaraykuchus kacharichisqa kanaykichejqa qayllamushanña”, nispa (Luc. 21:28). Magogmanta Gog chinkachiyta munawajtinchejpis Jehová Diospi tukuy sonqo atienekusunchej. Magogmanta Gogqa ninakun uj qotu nacioneswan, pikunachus faraonpa soldadosninmanta nisqa aswan atiyniyoj kanku (Eze. 38:2, 14-16). Chay qotu naciones chinkachiyta munawajtinchejqa, Diosninchej salvanawanchejmanta mana iskaychakunanchejchu kanqa. Imaraykuchus yachanchej Jehová Dios kikillanpuni kasqanta. Payqa kamachisninta khuyakunpuni, salvanpunitaj (Isa. 26:3, 20).

17. 1) Bibliapi Diospa kamachisninmanta leeshaspa, ¿imaspitaj tʼukurinanchej kasqa? 2) ¿Imatataj qhepan semana yachakusunchej?

¹⁷ Ñaupaj parrafospi yachakorqanchej, Jehová Dios kamachisninta munakuywan qhawasqanta, pusasqanta, salvasqantataj. Yachakullarqanchejtaj kamachisninpa llakiykunasninta sumajta entiendesqanta. Bibliapi Diospa kamachisninmanta leeshaspaqa, tʼukurinanchej tiyan imaynasmantachus Jehová Dios paykunata yanapasqanpi, imayna kʼachapunichus paykunawan kasqanpipis. Ajinata ruwaspaqa astawan Jehová Diosta munakusunchej, paypitaj astawan atienekusunchej. Qhepan semana yachakusunchej imaynasmantachus Jehová Dios jina familianchejta, hermanosninchejta, predicacionpi runasta ima khuyakuyta atisqanchejta.